‘Ovilinga Viaye Vio Kuama’
MANJI Theodore Jaracz, wa tiamẽle Kosungu Yolombangi Via Yehova, wa malusula omuenyo waye palo posi Votatu, keteke 9 Yevambi komẽle kunyamo wo 2010. Eye wa kuata 84 kanyamo kuenda wa sia ukãi una a kala laye ci soka 53 kanyamo olohuela. Wa siavo mukãi waye kuenda ocimumba cimosi culume lovimumba vivali viakãi.
Manji Jaracz wa citiwa keteke 28 Yenyenye Linene kunyamo wo 1925, ko Pike County, Kentucky, U.S.A., eye wa linga Ombangi ya Yehova poku papatisiwa keteke 10 Yenyenye kunyamo wo 1941 eci a kuata 15 kanyamo. Eci a tẽlisa anyamo 17, wa iñila kupange wotembo yosi, kuna a talavaya 67 kanyamo.
Kunyamo wo 1946, eci Manji Jaracz a kuata 20 kanyamo wa iñila kocisoko cepanduvali Kosikola yo Gileada yo Torre de Vigia. Noke yoku pita kosikola, Manji Jaracz wa linga mitavaso ukuakunyula akongelo vimbo kolupale luo Cleveland, Ohio ko Estados Unidos yo Amerika. Kunyamo wo 1951, wa tumiwa kofeka yo Australia kuna a kala oku talavaya ndusongui wo Filiale. O Anuario yo 1983, ya lombolola okuti Manji Jaracz “wa vetiya calua vamanji kolonepa viosi viofeka omo liombili yaye kovina viespiritu kuenda wa songuila ciwa upange woku kunda.”
Noke yoku tiukila ko Estados Unidos, keteke 10 kosãi ya Cembanima, kunyamo wo 1956, Manji Jaracz wa likuela la manji Melita Lasko. Ovo va fetika omuenyo wolohuela poku talavaya kupange woku nyula akongelo vimbo kuenda vofeka loku pasuisa akongelo alua ko Estados Unidos. Kunyamo wo 1974, Manji Jaracz wa pañinyiwa oku kala Kosungu Yolombangi Via Yehova.
Manji Jaracz o ka ivalukiwa otembo yalua ndufendeli wa Yehova ukuekolelo, omo wa pitisile kovaso ovopange espiritu lutima waye wosi. Eye wa kala ulume umue ukuacisola haeye ukuespiritu kuenda wa pitisile kovaso olonjongole via vakuavo. (1 Va Kor. 13:4, 5) Onjongole yaco, ya enda oku muiwa poku tata vakuavo lesunga kuenda ohenda. Handi vali, ocisola kuenda ohenda a kuatela omanu, ca limbukiwila kombili yaye kupange woku kunda.
Tua sanjukila calua Manji Jaracz, wa vumba Yehova lekolelo anyamo alua okuti, ndaño ka kuatele vali olohõlo vioku talavaya, lopo wa amamako oku sola epata lio Betele la vamanji koluali luosi. Tua kolela okuti omo eye wa ‘pandikisa toke kokufa, wa tambula ekolowa liomuenyo.’ (Esit. 2:10) Tua kolelavo okuti ‘ovilinga viaye, vio kuama.—Esit. 14:13.