Lilongisila Kondaka ya Suku

Momo Lie tu Ecelela Oku Longisiwa la Suku?

Ocipama cilo, ci konomuisa apulilo amue okuti, pamue wa va lingile ale kuenda ci lekisa ovinimbu vi ku kuatisa oku sanga atambululo Vembimbiliya liove. Olombangi Via Yehova vi sanjukila oku konomuisa atambululo aco love.

1. Momo lie o lilongisila ovina viatiamẽla ku Suku?

Suku o kuete olondaka viwa vioku sapuila omanu. Eye o tu sapuila ovina viaco Vembimbiliya. Embimbiliya li sokisiwa lukanda umue wa tunda ku Isietu wo kilu ukuacisola.​—Tanga Yeremiya 29:11

2. Olondaka viwa vi lomboloka nye?

Omanu va sukila ombiali yimue yiwa. Ka kuli ombiali yimue yi tẽla oku yovola omanu kungangala, kekambo liesunga, kovoveyi, ale kolofa. Pole, kuli olondaka viwa. Suku o ka eca ombiali yiwa komanu yina yi ka malako ovina viosi vi koka ohali.​—Tanga Daniele 2:44.

3. Momo lie ci kuetele esilivilo oku lilongisa ovina viatiamẽla ku Suku?

Ndopo Suku o ka nyõla omanu vosi palo posi okuti va siata oku koka ohali. Osimbu otembo yaco ka ya pitĩlile, eye o kasi oku longisa omanu valua vakuavitima via sunguluka oku kuata omuenyo uwa, oku sola Suku kuenda omanu vakuavo. Lekuatiso Liondaka ya Suku, omanu vaco va kasi oku lilongisa ndomo va tẽla oku liyaka lovitangi, oku kuata esanju liocili kuenda oku sanjuisa Suku.​—Tanga Sofoniya 2:3.

4. Helie Usovoli Wembimbiliya?

Embimbiliya li kuete 66 kalivulu. Olio lia sonehiwa leci ci soka 40 kalume. Alivulo atãlo atete a sonehiwa la Mose okuti, pa pita ale ci soka. 3.500 kanyamo. Elivulu lia sulako lia sonehiwa lupostolo Yoano okuti, pa pita ale ci pitahãla 1.900 kanyamo. Pole, asonehi Vembimbiliya, va soneha lika ovisimĩlo via Suku, viavo muẽle havioko. Omo liaco, Suku eye Usovoli Wembimbiliya.​—Tanga 2 Timoteo 3:16; 2 Petulu 1:21.

Tua kũlĩha okuti, Embimbiliya li tunda ku Suku, momo li tu sapuila lonjila ya suapo ovina vi keya kovaso yoloneke. Kakuli omunu laumue o pondola oku ci linga. (Isaya 46:9, 10) Handi vali, olio li tu lomboluilavo ovituwa via Suku. Olio li kuete unene woku pongolola omuenyo womanu. Ovina viaco, via siata oku vetiya omanu valua oku tava okuti, Embimbiliya Ondaka ya Suku.​—Tanga Yehosua 23:14; 1 Va Tesalonike 2:13.

5. O kuata ndati elomboloko Liembimbiliya?

Yesu wa kũlĩhĩwile ndulongisi Wondaka ya Suku. Ndaño omanu valua a sapela lavo va kũlĩhĩle Embimbiliya, pole, ovo va sukilile ekuatiso oco va kuate elomboloko. Oco Yesu a kuatise omanu, wa tukula ovinimbu vimue Viembimbiliya loku situlula “elomboloko Liovisonehua.” Onepa yilo losapi hati: “Lilongisila Kondaka ya Suku,” yi ka kuama onjila yaco oco yi ku kuatise.​—Tanga Luka 24:27, 45.

Kuli ovina vi komõhisa tu lilongisa ku Suku okuti, esilivilo liomuenyo. Pamue omanu va ku sepula omo lioku lilongisa Embimbiliya. Pole, ku ka sumue. Momo elavoko liove lioku kuata omuenyo ko pui, lia tamba koku kuata ukũlĩhĩso wa Suku.​—Tanga Mateo 5:10-12; Yoano 17:3.

Oco o kũlĩhe ovina vikuavo tanga ocipama 2 celivulu Embimbiliya Li Longisa Nye? lia sandekiwa Lolombangi Via Yehova.