Esumbilo Kuenda Oku Kapiwako Poku Teyuiwa la Suku

YESU eci a kala palo posi, eye wa situlula ciwa ekalo kuenda onjila ya Isiaye wokilu yoku linga ovina. Eye hati: “Si lingi cimue locipango cange muẽle; pole, ndeci Isia a ndongisa, ame mopia ovina viaco . . . ndi lingainga ovina viu sanjuisa.” (Yoano 8:28, 29; Va Kolosai 1:15) Poku konomuisa onjila ndomo Yesu a enda oku sapela lakãi kuenda ocituwa a lekasaile poku kala lavo, ci tu ĩha elomboloko liocisimĩlo ca Suku catiamẽla kakãi kuenda onjila ndomo eye a yongola okuti oco va tatiwa.

Poku kunamẽla kovolandu avanjeliu, olonoño vialua via siata oku limbuka okuti ocisimĩlo ca Yesu catiamẽla kakãi, ca litepela calua. Ndamupi? Handi vali, anga hẽ alongiso aye a kuatisa oco okuti akãi va kuata elianjo?

Ndomo Yesu a Tataile Akãi

Yesu ka va tendele ndocina cimue coku tẽlisa lika olonjongole vioku lipekela. Asongui vetavo lia va Yudea va kuatele ocisimĩlo cokuti, oku livala ukamba lakãi ku tuala lika koku tẽlisa olonjongole ka via sungulukile. Omo akãi va tendiwile okuti ono yekandu, ka ca tavele okuti va sapela lalume powiñi ale oku tunda okuti ka va lisitikile kocipala loveu. Ca litepa ceci okuti, Yesu wa lungula alume, oco ka va ka yuvule oku linga ukamba lakãi, pole ovo va sukila oku lava olonjongele viavo ka via sungulukile kuenda oku va tata lesumbila.—Mateo 5:28.

Yesu wa popiavo hati: “Wosi o linyãla lukãi waye kuenje o kuela ukãi ukuavo, o linga ukahokolo kuenda o lueyela ukãi waye.” (Marko 10:11, 12) Lonjila ndeyi, eye wa pisa elongiso lia songui vetavo lia ecelelele okut alume va linyãla lakãi vavo “omo liovina viaño.” (Mateo 19:3, 9) Va yudea valua, ka va kũlĩhĩle ocisimĩlo coku lingila ukahokolo ukãi. Asongui vavo vetavo va enda oku longisa okuti, ulume lalimue eteke a ka tendiwa okuti ukuakahokolo; ukãi eye lika o pondola oku tendiwa okuti wa linga ukahokolo! Ndomo ci li kuata lelomboluilo limue Liembimbiliya, “Yesu poku lekisa okuti ulume lukãi va kuete ocikele cimue konepa eyi, wa lekisa okuti akãi va kuetevo esilivilo kuenda va sesamẽla esumbilo.”

Esilivilo lielongiso liaye koloneke vilo: Kolohongele Violombangi Via Yehova, akãi va kuete elianjo lioku kala kumosi lalume. Pole ovo ka va sukila oku kuata ohele layimue omo liukamba u kasi pokati kavo, momo alume Akristão va kuete ocikele coku tata ‘akãi akulu nda va ina yavo, amalẽhe akãi nda vamanjavo akãi, lutima wa yela.’—1 Timoteo 5:2.

Yesu wa sanda otembo yoku longisa akãi. Ca litepa locisimĩlo ca siatele calua casongui va va yudea cokuti akãi ka va sukila oku longisiwa, Yesu wa va longisa loku va vetiya oku situlula ovisimĩlo viavo. Velivala limue, eye ka tavele okuti Maria o tatekiwa oku yeva esanju li tunda koku longisiwa, poku pisa ocisimĩlo ca siata cokuti ocitumãlo cukãi vokusinya. (Luka 10:38-42) Marta, huva a Maria, wa kuatisiwa lelongiso lia Yesu, ndomo ca situluiwa vatambululo eye a eca noke yolofa via Lasaru.—Yoano 11:21-27.

Yesu wa kapeleko ovisimĩlo viakãi. Kotembo yaco, akãi valua va Yudea va kuatele ocisimĩlo cokuti, esanju li tunda koku cita omõla umue ulume ovo nda va lipeka, nda citava, uprofeto umue. Eci ukãi umue a popia hati: ‘Imo lia ku cita lia sumũlũha!’ Yesu wa vangula laye catiamẽla kocina cimue ca velapo. (Luka 11:27, 28) Yesu poku lekisa okuti oku pama kekolelo oko ku kuete vali esilivilo, eye wa situlula ocina ca velelepo ocikele akãi va tambuile.—Yoano 8:32.

Esilivilo lielongiso liaye koloneke vilo: Alongisi vekongelo Liakrsitão va sanjukila atambululo a siata oku eciwa lakãi kolohongele. Ovo va sumba akãi va pama kekolelo okuti, ci kale pokolika ale komuenyo wavo weteke leteke, longangu yavo, va linga “alongisi vieci ciwa.” (Tito 2:3) Kuenda ovo va va kuatisa koku kunda olondaka viwa viusoma wa Suku.—Olosamo 68:11; tala okuadru “Anga hẽ Paulu wa Handeleka Akãi Oco ka va ka Vangule?” kemela 9.

Yesu wa kapeleko akãi. Kosimbu, omãla vakãi ka va kapiwileko ndeci omãla valume. O Talmude yi situlula ocisimĩlo caco popia hati: “Wa sumũlũha una wa cita omãla valume, pole wa sinãliwa una wa cita omãla vakãi.” Olonjali vimue via tendele omõla ukãi ndocilemo; momo va sukila oku u vanjela ulume loku feta ovilombo kuenda ka ca tavele oku lavoka oku tambula ekuatiso kokuavo eci ovo va kuka.

Yesu wa lekisa okuti omuenyo womõla ufeko u kuetevo esilivilo ndeci womõla ulume, momo eye wa pindula omõla ukãi wa Yairo, ndeci a linga lomãlo ulume wocimbumba co ko Naini. (Marko 5:35, 41, 42; Luka 7:11-15) Noke yoku sakula ukãi umue “wa kuatiwile londele yo kokisa oku vela ci soka 18 kanyamo, eye wo tukula hati “omõla a Avirahama”, olondaka vimue okuti ka vi sangiwa vovisonehua via va Yudeia. (Luka 13:10-16) Poku tukula ondaka eyi yesumbilo kuenda yohenda, eye ka lekisile lika okuti ukãi o pangavo onepa kepata liaco, pole wa limbukavo ekolelo lia pama a kuatele.—Luka 19:9; Va Galatia 3:7.

Esilivilo lielongiso liaye koloneke vilo: Olusapo lumue luo ko Asia lu popia hati: “Oku tata omõla ukãi, ci kasi ndoku tapela ocumbo colonelẽho viomunu o li sungue laye.” Pole olonjali Akristão vakuacisola, ka va ecelela oku yapuisiwa locisimĩlo eci. Ovo va likolisilako oku tata ciwa omãla vavo vosi: alume ale akãi. Kuenda va likapelako okuti vosi yavo va longisiwa kuenda oku tualiwa kombutika yuhayele nda ci sukiliwa.

Yesu wa kolelele akãi. Kolombonge via va Yudea, uvangi weciwa lukãi, wa tendiwile nduvangi upiwa umue. Josefo, ukuovolandu kocita catete, wa popia hati: “Akai, ka va ka tambuiwa ndolombangi, omo liehonguo liavo kovimatamata viuyali kuenda omo lioku mamõha kuavo.”

Ca li tepa ceci okuti, Yesu wa nõla akãi oco va ece uvangi watiamẽla kepinduko liaye. (Mateo 28:1, 8-10) Ndaño okuti akãi vaco vakuekolelo va kala olombangi vioku pondiwa loku kendiwa kua Ñala yavo, kovapostolo ca tĩlile oku kolela kakãi vaco. (Mateo 27:55, 56, 61; Luka 24:10, 11) Kristu noke yoku pinduiwa, wa molẽha tete kakãi, ci lekisa okuti wa va kapeleko calua ndeci olondonge vikuavo.—Ovilinga 1:8, 14.

Esilivilo lielongiso liaye koloneke vilo: Pokati Kolombangi Via Yehova, alume va kuete ovikele vekongelo va lekisa okuti va kapako akãi poku yevelela ovisimĩlo viavo. Kuenda alume Akristão ‘va lekisa esumbilo’ kakãi vavo poku va yevelela lutate.—1 Petulu 3:7; Efetikilo 21:12.

Olonumbi Viembimbiliya vi Kuatisa Akãi Oku Kuata Esanju

Eci alume va setukula Kristu, ci vetiya akãi oku lekisa esumbilo kuenda elianjo Suku a va yonguilile kefetikilo. (Efetikilo 1:27, 28) Alume Akristão va yuvula oku kuama ovituwa ka via sungulukile, pole va ecelela oku songuiwa lolonumbi Viembimbiliya kuenje ci kuatisa akãi vavo oku kuata esanju.—Va Efeso 5:28, 29.

Kũlĩhĩsa ulandu wa manji Yelena. Eye wa enda oku yeva esumuo lialua omo lioku tatiwa lãvi lulume waye, momo ulume waco, wa kulila vekalo limue okuti akãi va enda oku kisikiwa oku kuela ale oku tipuiwa. Noke, eye wa fetika oku lilongisa Embimbiliya. Kuenje wa popia hati: “Nda limbuka okuti kuli umue o ndi sole calua kuenda wa ndi kapako. Nda limbukavo okuti, nda ulume wange wa lilongisile Embimbiliya, nda ca pongolola onjila ndomo eye a siata oku ndi tata.” Onjongole yaye ya tẽlisiwa eci ulume waye a fetika oku lilongisa Embimbiliya kuenda wa linga Ombangi ya Yehova poku papatisiwa. Yelena wa popia: “Eye wa linga ongangu yiwa yoku likandangiya. Tua lilongisa oku liecela pokati.” Petosi lipi a pitĩla? “Olonumbi Viembimbiliya via ñuatisa oku limbuka okuti ñuete esilivilo kuenda via ndi teyuila volohuela viange.”—Va Kolosai 3:13, 18, 19.

Manji Yelena hayeko lika wa pita locitangi caco. Akãi valua Akristão va kuete esanju omo okuti, va kasi oku likolisilako kumue lalume vavo oku kapako olonumbi Viembimbiliya volohuela viavo. Pokati ka vamanjavo Akristão, ovo va sanga esumbilo, elembeleko kuenda elianjo.—Yoano 13:34, 35.

Akristão vosi, alume lakãi, va kũlĩha okuti vakuakandu kuenda ka va lipuile. Pole omo lioku kuata ukamba la Suku, Isiavo ukuacisola, Yehova, ovo va kuete elavoko lioku ‘yovuiwavo kupika wetimba’ loku “kuata eyovo liulamba womãla va Suku.” Eli elavoko limue li komõhisa kalume kuenda kakãi vana va kasi oku teyuiwa la Suku!—Va Roma 8:20, 21.