Yevelela Ondaka ya Yehova Kuosi o Kasi

1, 2. Yehova wa siata oku sapela ndati lafendeli vaye?

OVOLANDU Embimbiliya a lekisa okuti, Yehova wa siata oku songuila afendeli vaye volonjila via litepa. Kosimbu, Yehova wa enda oku sapela lomanu lekuatiso liovangelo, lovinjonde, kuenda lolonjoi oco a situlule kokuavo ovina via laikele oku pita kovaso yoloneke. Yehova wa ecelevo kokuavo ovikele vimue. (Ate. 7:89; Esek. 1:1; Dan. 2:19) Vakuavo va tambuile olonumbi via Yehova lekuatiso liomanu a nõla oco va songuile ocisoko caye palo posi. Ndaño okuti afendeli va Yehova va tambuile olonumbi viaye volonjila via litepa, pole, vana va pokola kolonumbi viaco, va sumũlũisiwa.

² Koloneke vilo, Yehova o songuila afendeli vaye lekuatiso liondaka yaye yi sangiwa Vembimbiliya, lespiritu sandu liaye, kuenda ekongelo. (Ovil. 9:31; 15:28; 2 Tim. 3:16, 17) Olonumbi tua siata oku tambula ku Yehova, via lomboloka ciwa, kuenda vi kasi ndu okuti, ‘tu yevite vatũi etu ondaka yi tundilila konyima yetu yiti: “Enjui, eyi oyo onjila, endelimo.”’ (Isa. 30:21) Tu pondola oku yeva ondaka ya Yehova lekuatiso lia Yesu, osimbu a kasi oku songuila ekongelo lekuatiso “liukuenje wa kolelua haeye wa lunguka.” (Mat. 24:45) Omo liaco, tu sukila oku kapako olonumbi viosi tu tambula, momo, tu pondola oku kuata lika omuenyo ko pui nda tua lekisa epokolo.—Va Hev. 5:9.

3. Nye ci pondola oku tu tateka oku pokola kolonumbi via Yehova? (Tala elitalatu kefetikilo liocipama cilo.)

³ Omo okuti Satana wa kũlĩha okuti olonumbi via Yehova vi ka popela omuenyo wetu, o seteka oku tu yapula oco ka tu ka vi yevelele. Handi vali, ‘utima wetu wa piãla kelimbi,’ u pondola oku tu tateka oco ka tu ka pokole kolonumbi via Yehova. (Yer. 17:9) Omo liaco, tu konomuisi ndomo tu pondola oku yula ovina vi tu tateka oku yevelela ondaka ya Suku. Tu konomuisavo ndomo oku yevela Yehova, kuenda oku sapela laye vohutililo ci tu kuatisa oku teyuila ukamba wetu laye ndaño lovitangi.

YULA OLONJANJO VIA SATANA

4. Satana wa siata oku seteka ndati oku yapula ovisimĩlo viomanu?

⁴ Satana wa siata oku yapuisa omanu poku sandeka asapulo esanda, kuenda ovohembi akuavo. (Tanga 1 Yoano 5:19.) Ovikanda viasapulo, alivulu, olorevista, o radiu, o Televisãu, kuenda o Internet, via siata oku sandeka asapulo kolonepa viosi violuali. Ndaño okuti vasapulo aco muli ovina vi kuete esilivilo, pole, mua kongela ovina ka vi likuata lolonumbi via Yehova. (Yer. 2:13) Olono viaco viasapulo via siatavo oku vetiya olohuela vialume lalume, ale akãi lakãi. Kuenje, omanu va sima okuti, elungulo Liembimbiliya liatiamẽla koku likuela kuomanu vakuavimatamata vimuamue viuyali, liuhembi.—1 Va Kor. 6:9, 10.

5. Tu pondola oku yuvula ndati oku yapuisiwa lovohembi a Satana?

⁵ Vana va sole olonumbi viesunga via Yehova, va pondola oku yuvula ndati ovohembi a Satana a siata koloneke vilo? Va tepisa ndati ovina vĩvi levi viwa? Va ci linga “poku lilava ndeci ca popia ondaka [ya Suku]”! (Osa. 119:9) Vondaka ya Suku mu sangiwa olonumbi vi pondola oku tu kuatisa oku tepisa asapulo awa, kuenda asapulo uhembi. (Olosap. 23:23) Yesu wa tukula Ovisonehua poku popia hati: ‘Omunu o muila omuenyo kolondaka viosi vi tunda vomẽla wa Yehova.’ (Mat. 4:4) Tu sukila oku lilongisa ndomo tu kapako olonumbi Viembimbiliya komuenyo wetu. Kosimbu, Mose wa sonehele ocihandeleko ca Yehova catiamẽla koku yuvula ukahokolo, kuenje, ca kuatisa umalẽhe Yosefe oku kuata elomboloko liokuti, ocituwa caco ci tuala koku lingila ekandu Yehova Suku. Eye ka tavele oku tomba olonumbi via Yehova eci ukãi wa Potifara a seteka oku u yonja oco a linge eci ka ca sungulukile. (Tanga Efetitilo 39:7-9.) Ndaño okuti ukãi waco wa yonja Yosefe olonjanja vialua, pole, ka yevelile kondaka yaye oco a liwekepo oku yevelela kondaka ya Yehova Suku. Koloneke vilo, tu sukilavo oku tepisa pokati keci ciwa leci cĩvi, poku yevelela ondaka ya Yehova, oco ka tu ka yapuisiwe lovohembi a Satana.

6, 7. Nye tu sukila oku linga oco ka tu ka yapuisiwe layonjo a Satana?

⁶ Voluali mue yuka alongiso atavo esanda a vetiya omanu valua oku sima okuti, oku sandiliya etavo liocili ka ci kuete esilivilo. Pole, Yehova wa siata oku eca olonumbi via sunguluka oco vi kuatise omanu vana va kuete onjongole yoku vi lilongisa. Omo liaco, tu sukila oku nõla omunu tu yongola oku yevelela. Omo okuti ka tu pondola oku yevelela olondaka vivali vonjanja yimosi, tu sukila ‘oku kũlĩha ondaka’ ya Yesu, loku u yevelela. Yehova wa nõla Yesu oco a songuile olomeme Viaye.—Tanga Yoano 10:3-5.

⁷ Yesu wa popia hati: “Lunguki leci vu yeva.” (Mar. 4:24) Ndaño okuti olonumbi via Yehova via leluka, kuenda via sunguluka, pole, tu sukila oku vi yevelela lutate poku pongiya utima wetu oco vi tu kuatise. Nda ka tua lavuluile, tu tava kayonjo a Satana, kuenje, tu liwekapo oku pokola kalungulo a Suku. Omo liaco, ku ka ecelele okuti ovina vimue ndeci: Ovisikilo violuali, olovideo, ovina vi lekisiwa vo Televisãu, akamba, alongisi vo kosikola, ale omanu vana va kemãla vi yapuisa omuenyo wove.—Va Kol. 2:8.

8. (a) Utima wetu u pondola oku yapuisiwa ndati lolonjanjo via Satana? (b) Nye ci pondola oku pita letu, nda ka tua kapeleko olondimbukiso vielungulo?

⁸ Satana omo wa kũlĩha okuti ka tua lipuile, o seteka oku tu yapuisa lekambo lietu lioku lipua. Eci Satana a seteka oku tu yapuisa lahonguo etu, ka ci leluka oku amamako oku lekisa epandi ku Yehova. (Yoa. 8:44-47) Tu pondola oku yula ndati ocitangi caco? Konomuisa ulandu womunu umue o tiamisila utima waye kovitalukilo vi eca esanju vokuenda kuotembo yitito, kuenje, o linga ovina vĩvi okuti, lalimue eteke a simĩle oku vi linga. (Va Rom. 7:15) Nye co vetiya oku linga ovina viaco? Citava okuti, wa fetika oku lekisa esino kondaka ya Yehova vokuenda kuotembo. Pamue ka limbukile ondimbukiso yelungulo liovina via kala kutima waye, kuenje, wa nõlapo oku lekisa esino. Citava okuti, wa liwekapo oku likutilila, oku endaenda lika kupange woku kunda olonjanja vimue, ale oku pumba olohongele vimue. Kuenje, wa yapuisiwa lolonjongole viaye, kuenda wa linga ovina a kũlĩhĩle okuti, ka via sungulukile. Tu pondola lika oku yuvula ocitangi caco, nda tua lavulula olondimbukiso vielungulo okuti, ka tu lingi ovina viaco. Nda tua yevelela lutate ondaka ya Yehova, ci tu kuatisa oku yuvula ovisimĩlo violonanguluke.—Olosap. 11:9.

9. Momo lie ci kuetele esilivilo oku limbuka ovisimĩlo vi tu vetiya oku linga ekandu?

⁹ Nda uvei womunu umue wa limbukiwa lonjanga, citava oku sanga onjila yoku u sakula. Cimuamue haico tu sukila oku linga okuti, tu yuvula lonjanga ovisimĩlo vi tu vetiya oku linga ekandu. Nda tua limbuka ovisimĩlo viaco, tu sukila oku vi yuvula lonjanga oco ‘ka tu ka kuatiwe la Satana okuti tu linga ocipango caye.’ (2 Tim. 2:26) Nye tu sukila oku linga nda tua limbuka okuti, ovisimĩlo vietu kuenda olonjongole vietu vi tu yapula kovina Yehova a yongola okuti, tu vi linga? Tu sukila oku tiamisila lonjanga utima wetu kokuaye, oku tava kalungulo aye, kuenda oku a kapako. (Isa. 44:22) Tu sukila oku ivaluka okuti, oku nõla onjila ka ya sungulukile, ci pondola oku tu nenela ovitangi vialua voluali lulo. Nda tua ci linga, ci tu kuatisa oku yuvula ovitangi viaco!

YULA EPELA KUENDA OCIPULULU

10, 11. (a) Omunu o fetika ndati oku lekisa epela? (b) Nye tu lilongisa kongangu yĩvi ya Kora, la Datana, kuenda Avirama?

¹⁰ Tu sukila oku ivaluka okuti, utima wetu u pondola oku tu tindula ku Yehova. Momo, pamue u tu vetiya oku kuata epela, ale ocipululu. Konomuisa ndomo olonjanjo viaco vi pondola oku tu tateka oku yevelela ondaka ya Yehova, kuenda oku tu kokela ovitangi. Omunu ukuepela, o velisapo lika ovisimĩlo viaye. Eye, o sima okuti, o kuete omoko yoku linga ovina viosi a yongola, kuenda ka tava kovisimĩlo via vakuavo. Handi vali, osima okuti, ovisimĩlo viaye via velapo via vamanji, viakulu vekongelo, ale viocisoko ca Yehova. Kokuaye, ondaka ya Yehova ka yi kuete esilivilo.

¹¹ Eci va Isareli va kala vungende vekalasoko, Kora, la Datana, kuenda Avirama, ka va pokuile kolonumbi via Mose levi via Arone. Omo okuti va kala vakuepela, ka va pokuile vali keliangiliyo liefendelo lia Yehova. Nye Yehova a linga? Eye, wa ponda omanu vaco vosi vakuesino. (Ate. 26:8-10) Ulandu owu, u tu longisa ovina vialua! Oku tomba olonumbi via Yehova ci koka ovitangi vialua. Omo liaco, tu sukila oku ivaluka okuti, “kovaso yepela ku iya oku nyolẽha.”—Olosap. 16:18; Isa. 13:11.

12, 13. (a) Lombolola ulandu umue u lekisa ndomo ocipululu ci pondola oku tu kokela ovitangi. (b) Lombolola ndomo ocipululu ci pondola oku li vokiya nda ka tua ci yuvuile.

¹² Kũlĩhĩsavo ndomo ocipululu ci pondola oku nena ovitangi. Omunu ukuacipululu, pamue o sima okuti, olonumbi via Yehova ka vi tiamisiwila kokuaye. Pamue osima okuti, o pondola oku tambula ocina cimue ka catiamẽlele kokuaye. Eci uprofeto Elisia a sakula uvei wovilundu ku Namana usongui wolohoka via va Asuria, Namana wa eca kokuaye olombanjaile vimue, pole, ka vi tambuile. Omo okuti Gehasi oñuatisi ya Elisia wa yonguile oku tambula olombanjaile viaco, wo sapuila hati: “La Yehova o kasi lomuenyo, [ndi lupukila Namana], si tambula cimue kokuaye!” Gehasi ka sapuile ku Elisia ovisimĩlo viaye, pole, wa lupukila ku Namana, kuenje, wa kemba loku pinga kokuaye “otalendo yopalata lovowalo avali oku lipongolola.” Nye ca pita la Gehasi omo lioku kemba uprofeto wa Yehova? Gehasi wa kuatiwa luvei wovilundu wa kala la Namana!—2 Olos. 5:20-27.

¹³ Ocipululu ci fetika levando kutima womunu, pole, nda ka tua lavuluile, ci nyõla omuenyo wetu. Ulandu Wembimbiliya watiamẽla ku Akani u lekisa ndomo ocipululu ci pondola oku li vokiya levando. Kũlĩhĩsa ndomo ocipululu Akani a lekisa ca livokoya lonjanga. Eye wa popia hati: “Eci nda muila pokati kovikuata okapote kamue ka posoka koko Sinare, lovita vivali violosiekele viopalata, kuenda ocinimbu cimue culu ci pesala akũi atãlo kolosiekele, ... nda vi livela, yu nda vi nyañulapo.” Omo okuti Akani ka likandangiyile kolonjongole vĩvi, ocipululu co vetiya oku nyana ovina viwa, kuenje, wa vi lembikila posi vokati kombalaka yaye. Eci ekandu lia Akani lia limbukiwa, Yehosua wo sapuila hati, Yehova wa laikele oku u yambula. Veteke liaco, Akani kumue lepata liaye, va sosuiwa lovawe toke eci va fa. (Yeh. 7:11, 21, 24, 25) Vosi yetu tu sukila oku lavulula oco ka tu ka yapuisiwe locipululu. Omo liaco, tu “liuviki kocipululu cosi.” (Luka 12:15) Ndaño okuti pamue utima wetu u tu vetiya oku kuata ovisimĩlo via vĩha, pole, tu sukila oku lavulula oco ka tu ka yapuisiwe lolonjongole vi tu vetiya oku linga ekandu.—Tanga Tiago 1:14, 15.

14. Nye tu sukila oku linga, nda tua limbuka okuti, tu kasi oku lekisa epela kuenda ocipululu?

¹⁴ Ocili okuti, epela locipululu, vi nena ovitangi. Oku sokolola ovitangi vi tunda koku kuama onjila ka ya sungulukile, ci tu kuatisa oku yuvula ovisimĩlo vi tu tateka oku yevelela ondaka ya Yehova. (Esin. 32:29) Vembimbiliya, Suku yocili ka tu sapuila lika onjila ya sunguluka tu sukila oku kuama. Pole, o tu sapuilavo onima yi tunda koku endela vonjila yiwa, kuenda ovitangi vi tunda koku kuama onjila ka ya sungulukile. Nda utima wetu u tu yapuisila kovina vi vetiyiwa lepela, ale locipululu, tu sukila oku sokolola ovitangi tu pondola oku pita lavio! Tu sukilavo oku sokolola ndomo oku linga ovina ka via sungulukile ci nyõla ekalo lietu, ukamba wetu la vamanji, kuenda ukamba wetu la Yehova.

AMAMAKO OKU SAPELA LA YEHOVA

15. Ongangu ya Yesu yatiamẽla koku sapela yi tu longisa nye?

¹⁵ Yehova o yongola okuti tu kuata omuenyo uwa. (Osa. 1:1-3) Eye o tu ĩha olonumbi votembo ya sokiyiwa. (Tanga Va Heveru 4:16.) Ndaño okuti Yesu wa lipuile, pole, wa enda oku sapela la Yehova, kuenda wa enda oku likutilila olonjanja viosi. Yehova wa kuatisa Yesu, kuenda wo songuila lonjila yimue yi komõhisa. Eye, wa tumile ovangelo oco vo kuatise, wa eca espiritu sandu liaye oco liu kuatise, kuenda wo songuilavo poku nõla ci soka 12 kovapostolo vaye. Yehova wa vanguila kilu oco a lekise okuti, wa kala oku kuatisa Yesu, kuenda wo tava. (Mat. 3:17; 17:5; Mar. 1:12, 13; Luka 6:12, 13; Yoa. 12:28) Tu sukilavo oku likutilila ku Yehova, ndeci Yesu a linga. (Osa. 62:7, 8; Va Hev. 5:7) Lekuatiso liolohutililo, tu pondolavo oku sapela la Yehova, kuenda oku kuama onjila yeca esivayo kokuaye.

16. Tu pondola ndati oku tambula ekuatiso lia Yehova oco tu tẽle oku yevelela ondaka yaye?

¹⁶ Ndaño okuti Yehova wa eca olonumbi viaye, pole, ka kisika omunu la umue oku vi kuama. Tu sukila oku pinga espiritu sandu liaye, kuenje, eye o tu lĩha ocali. (Tanga Luka 11:10-13.) Tu sukila oku lavulula ndomo ‘tu yeva.’ (Luka 8:18) Nda tu pinga ku Yehova oco a tu kuatise oku yuvula ovisimĩlo via vĩha, pole, tu amamako oku tala omanu va kasi epolõla haivo va linga ukahonga, ale olofilme ka via sungulukile, ci lekisa okuti, tuakuambambe. Tu sukila oku kala pocitumãlo pali espiritu lia Yehova. Momo, tua kũlĩha okuti, espiritu liaye, li kasi volohongele viekongelo. Afendeli valua va Yehova va siata oku yuvula ovitangi, poku yevelela Yehova vokuenda kuolohongele vietu. Kuenje, eci va limbuka okuti va kuete olonjongole vĩvi vutima, va tẽla oku vi yuvula.—Osa. 73:12-17; 143:10.

AMAMAKO OKU YEVELELA LUTATE ONDAKA YA YEHOVA

17. Momo lie ka ca sungulukilile oku likolela etu muẽle?

¹⁷ Kũlĩhĩsa ulandu wa Soma Daviti wo ko Isareli yosimbu. Eci a kala umalẽhe, wa yula ocindululu Goliata u Filisiti. Daviti wa kala esualali, soma, ukuakuteyuila, kuenda ukuakunõla onjila yi kuamiwa lomanu. Pole, eci Daviti a fetika oku likolela eye muẽle, wa yapuisiwa lutima waye, kuenje wa linga ekandu la Batisieva, kuenda wa linga esokiyo oco ulume waye Uriya a pondiwe. Eci Daviti a lunguiwa, wa lekisa umbombe poku limbuka ekandu a linga, kuenje, wa tumbulula ukamba waye la Yehova.—Osa. 51:4, 6, 10, 11.

18. Nye ci tu kuatisa oku amamako oku yevelela ondaka ya Yehova?

¹⁸ Tu sukila oku kapako elungulo li sangiwa vukanda wa 1 Va Korindo 10:12, kuenda tu yuvuli oku likolela etu muẽle. Omo okuti ka tu tẽla ‘oku suñamisa okuenda kuetu,’ citava okuti tu yevelela ondaka ya Yehova, ale ondaka Yunyali waye. (Yer. 10:23) Omo liaco, tu amamiko oku likutilila, loku tava oku songuiwa lespiritu sandu, kuenda oku yevelela lutate kondaka ya Yehova.