Timgad—Olupale Lumue Luosimbu lua li Lembika lu Situlula Ekalo Lialuo
OLONOÑO vakuakulembulula ovina via li lembika, va komõha ovina va mõla. Pocitumãlo caco ca li lembika vekalasoko lio ko Algeria, va sangapo olumbala lueyulo lua va Roma. James Bruce ulume umue wo ko Eskosia eci a sanga ocina caco kunyamo wo 1765, ka limbukile okuti o kasi kilu liovingululu violupale lumue lunene va Roma va tungile Konano yo Afrika—olupale luosimbu luo Thamugadi, okuti cilo lu tukuiwa hati Timgad.
Kunyamo wo 1881, vakuakulembulula ovina via li lembika va tunda ko Fransa, va fetika oku limbuka ovina vikuavo via kala po Timgad. Ndaño ovo va simĩle okuti ka ya kaile osi yiwa, pole, va limbuka okuti omanu va kalapo, va kuatele ekalo liwa. Pole, nye ca vetiya va Roma oku tungila olupale lumue lua posoka pocitumãlo caco? Nye tu lilongisila kolupale luaco luosimbu kuenda komanu va tungilemo?
OCIMÃHO CIMUE COPULITIKA KA CA LIMBUKIWILE
Eci va Roma va sanda oku tambula olonepa vikuavo konano yo Afrika kocita catete O.Y., ovo va sanga apata amue a fetika oku yaka lavo. Ndamupi ovo va tẽla oku linga ocisila combembua lomanu vaco? Catete, olohoka via Augustan Legion Terceiro, via tunga ovilombo via pama kuenda ovotala oku lavulula kolomunda okuti koloneke vilo, konano yo Algeria. Vokuenda kuotembo va tunga olupale luo Timgad, pole locimãho cikuavo.
Ndaño okuti, va Roma va tungile olupale luo Timgad oco va kapemo omanu va sanga okuti ka va kuatele vali epondolo lioku talavaya, pole va tunga olupale luaco locimãho coku nyõla olongusu viapata aco. Ocimãho cavo ca tẽlisiwa. Ekalo liwa lia kala vo Timgad lia fetika oku vetiya omanu vaco okuiya volupale oku landisa ovina viavo. Omo okuti, va Roma ovo lika va taviwile oku kala volupale luo Timgad, omanu va yonguile oku li kongela ku va Roma, va sukilile oku kala volupale luaco ci soka 25 kanyamo, oco ovo lomãla vavo va tambule ocicapa cuvangi ci va ecelela oku tunga volupale luaco.
Omanu vamue vo vo Afrika, ka va sanjukilile lika oku tambula ocicapa ci va ecelela oku kala volupale luaco, pole va yonguilevo oku tambula ovikele vikuavo vo Timgad ale valupale akuavo. Onjila va Roma vakuama yoku vetiya olonyitiwe vio vo Afrika ya tẽlisa, momo noke lia 50 kanyamo tunde eci olupale luo Timgad lua tungiwa, oco mua fetika oku tungila omanu vo ko konano yo Afrika.
NDOMO O ROMA YA YAPUISA OMANU
Eyambo limue okuti kilu liaco kua posuisiwa lociñumañuma ca suku umosi muvatatu
Va Roma va tẽla ndati oku yapuisa lonjanga va muẽle yofeka? Ovo va ci linga poku kuama ocisimĩlo ca Cicero ulume umue u Roma wa longisa okuti—omanu vosi va kuata ekalo limuamue liomuenyo. Ci kale va Roma veya osimbu vofeka kuenda olonyitiwe vio Afrika, va litepela olosi volonepa via li soka. Olupale luaco olonjo via tungiwile lonjila yimue okuti vi kala kulala kuenda vocinãla ci soka 20 kolometulu kuenje pokati kolonjo papitile atapalo a sanjavala. Esokiyo liaco lia vetiya calua omanu.
Ndeci ca kala valupale akuavo a va Roma, omanu va enda oku li sanga pocitanda oco va yevelele asapulo o kaliye ale oku linga olomapalo. Omanu va kala kolomunda ocipepi lolupale citava okuti, va ponduile oku sima ndu okuti va kasi ale oku endela vulembo keteke limue liowuya walua ale oku puyukila volohondo vina omanu vosi va enda oku yuila okuti ka va feti. Citava okuti ovo, va kalavo oku sima okuti va pondola oku tumãla polono viovava atalala, loku sapela lakamba. Ovina viaco viosi via kala ndonjoi kokuavo.
Pocitanda cimue cikuete ovindumba via lepa kuenda olomesa
Olomapalo via enda oku lingiwila voluayela, via yapuisavo ovitima viomanu. Pocitumãlo caco pa enda oku kala ci pitahãla 3.500 komanu va tunda ko Timgad kuenda kalupale akuavo a kala ocipepi. Va kua ku linga olomapalo va enda oku vetiya omanu oku sola ovituwa via va Roma poku lekisa ovina vi vetiya oku linga upuepue kuenda ungangala.
Atavo a va Roma a tẽlisavo onepa yavo. Posi kuenda vovimano violonjo vioku yuila, via posuisiwile loviluvialuvia vi lekisa ovihilahila viatavo esanda. Omo okuti oku lisukula kua kuatele esilivilo komuenyo wavo, vokuenda kuotembo omanu va fetika oku kũlĩha olosuku via va Roma kuenda etavo. Elikolisilo lioku vetiya olonyitiwe vio vo Afrika oku kuama ovihilahila via va Roma, lia kuata onima yiwa momo kovipito vionambi olonjanja vialua via enda oku posuisiwa loviñumañuma viasuku umosi muvatatu viopocitumãlo kuenda olosuku via va Roma.
OLUPALE LUMUE LUA POSOKA LUA IVALIWA
Noke ya nguluvulu Trajano oku tumbika olupale kunyamo 100 K.K., Konano yo Afrika, va Roma va fetika oku vetiya omanu oku lima olomema vialua, ulela woliveira kuenda ovinyu. Ka papitile otembo yalua ocitumãlo caco ca linga osila yokulia ku tumiwa kolonepa viosi viuviali wo Roma. Ndeci alupale akuavo a kala, olupale luo Timgad lua fetika oku kuata ekalo liwa vemẽhi liuviali wa va Roma. Kuenje vokuenda kuotembo, etendelo liomanu vo Timgad lia livokiya kuenda olupale lua linga lunene lovimbaka via pama.
Ndaño omanu va kala volupale kuenda va muẽle yovapia va linga olohuasi lolomĩlu via va Roma, pole olongunja viovimbo liaco ka via tambuile ekuatiso lalimue. Kocita catatu K.K., ekambo liesunga kuenda oku li vokiya kuelisimo, ca wengula onyeño yolongunja. Vamue vatiamẽlele Ketavo Liokatolika, va li kongela kocisoko colo Donatista—ca litukula okuti Akristão, ca yonguile oku mãlako ovitukiko via siatele Vetavo Liokatolika.—Tanga okakasia “Donatista—“Hetavoko Liocili.’”
Noke yocita canyamo viuyaki pokati katavo, ovoyaki akuavo, kuenda ungangala, uviali wa va Roma ka wa kuatele vali unene. Kocita cepandu K.K. apata amue ava Arabe va timĩha olupale luo Timgad, kuenje, tunde eci olupale luaco lua ivaliwa papita eci ci pitahãla 1.000 kanyamo.
“ECI OCO OMUENYO!”
Ociña cimue kelimi lio Latin mua sonehiwa hati: “Oku yeva, okuyua, oku linga olomapalo, oku yola yola,—eci oco omuenyo!”
Olonoño vina via lembulula ovina via supilepo Timgad va komõha omo liociña va sanga ca sonehiwa kelimi lio Latin. Vociña caco tu tangamo ndoco: “Oku yeva, okuyua, oku linga olomapalo, oku yola yola,—eci oco omuenyo!” Ulume umue ukuasapulo wo ko Fransa wa popia okuti eci “ci lekisa ndu okuti ka ca kaile ocipululu, pole vamue ka va silepo oku tenda omuenyo waco ndelumbu liolondunge.
Va Roma vakuama ekalo liomuenyo waco vokuenda kuotembo yimue. Kocita catete Upostolo Paulu wa tukula omanu va kuamẽle ocisimĩlo cokuti, “tu li, tu nyui, momo hela tu fa.” Ndaño va Roma va kala vakuetavo, komuenyo wavo, va pitisile lika kovaso ayele okuti, ka va sokoluile vali elomboloko kuenda ocimãho comuenyo. Paulu poku lungula Akristão oco va yuvule oku linga ukamba lomanu vaco, wa popia hati: “Ko ka kembiwi. Akamba vãvi va nyõla ovituwa viwa.”—1 Va Korindo 15:32, 33.
Ndaño okuti omanu vo ko Timgad tunde eci va kalako papita ale 1.500 kanyamo, toke cilo ekalo liomuenyo ka lia pongolokele calua. Omanu valua koloneke vilo ka va sokolola vali ndomo omuenyo u ka kala kovaso yoloneke. Kokuavo ocisimĩlo ca va Roma ca sunguluka, momo ka va sokolola ovitangi vi yililako. Embimbiliya li tu lungula hati: ‘Oluali lu kasi oku pongoloka.’ Omo liaco, tu vetiyiwa ‘oku yuvula oku panga onepa koluali.’—1 Va Korindo 7:31.
Ovingululu vio Timgad vi eca uvangi wokuti oku kuata esanju kuenda ekalo liwa komuenyo, ka vi tundi koku kapako ulandu wa sonehiwa vociña cosimbu ca sangiwa Konano yo Afrika. Pole vi tunda koku kapako elungulo Liembimbiliya liokuti: “Oluali lu takata loñeyi yaluo, puãi u o lingainga ocipango ca Suku o kala oloneke ka vi pui.”—1 Yoano 2:17.