Suku Helie?

Omanu valua va popia okuti va tava ku Suku. Pole nda wa va pula okuti, Suku helie, va pondola oku eca atambululo a litepa. Omanu vamue va popia okuti Suku onganji yimue ka yi kuete ohenda kuenda yi yongola lika oku kangisa omanu omo liakulueya avo. Vakuavo va sima okuti Suku olonjanja viosi o lekisa ocisola kuenda ecela akulueya avo osi. Handi vakuavo va sima okuti Suku o kasi ocipãla letu kuenda ka tu kapeleko. Omo liovisimĩlo viaco via litepa viatiamẽla ku Suku, omanu valua va sima okuti ka citava oku u kũlĩha.

Anga hẽ ci kuete esilivilo oku kũlĩha Suku? Ocili okuti ci kuete. Oku kũlĩha ciwa Suku ci pondola oku ku kuatisa oku kuata ocimãho komuenyo. (Ovilinga 17:26-28) Nda wa likolisilako oku kũlĩha Suku, eye o ka kala ocipepi love, o ka ku sola, loku ku kuatisa. (Tiago 4:8) Handi vali, oku kũlĩha ciwa Suku ci pondola oku ku kuatisa oku kuata omuenyo ko pui.—Yoano 17:3.

O pondola oku kũlĩha ndati Suku? Sokolola komunu umue ove wa kũlĩha ciwa, ndeci ekamba limue. Nye co kuatisi oku kala akamba? Ove wa kũlĩha onduko yaye, ovituwa viaye, ovina a sole, levi ka sole, ovina a linga ale komuenyo, eci a yongola oku linga kuenda ovina vikuavo. Oku kũlĩha ciwa omunu waco, ca ku kuatisa oku kala ekamba liaye.

Cimuamue haico okuti, tu pondola oku kũlĩha ciwa Suku poku lilongisa ovina vimue ndeci:

• ONDUKO YA SUKU HELIE?

• OVITUWA VIPI SUKU A KUETE?

• OVINA VIPI SUKU A LINGA?

• NYE SUKU A KA LINGA KOVASO YOLONEKE?

• OKU KŨLĨHA SUKU CI PONDOLA OKU KU KUATISA NDATI?

O revista yilo yi lekisa atambululo Embimbiliya kapulilo aco. Ovipama vi kuãimo vi ka ku kuatisa oku kũlĩha ciwa Suku. Ovio vi ka ku kuatisa oku limbuka okuti oku kala ekamba lia Suku ci kuete esilivilo cilo kuenda kovaso yoloneke.