Ocipama 3

Ove Osukila Oku Kũlĩha Suku

Oku kala ekamba lia Suku, cisukila kokuove okulilongisa eci catiamela kokuaye. Akamba vove vakũlĩha hẽ onduko yove kuenje vakutukula konduko? Oco muẽle valingaenga. Suku oyongola okuti okũlĩha onduko yaye kuenje oyitukola. Onduko ya Suku, eye Yehova. (Olosamo 83:18; Mateo 6:⁠9) Ove osukilavo oku kũlĩha eci eye asole leci kasole. Osukilavo oku kũlĩha velie citava okukala akamba vaye kuenda velie okuti anyali vaye. Okukũlĩha omunu umue cambata otembo. Embimbiliya lilombolola okuti cilekisa uloño ale olondunge okupongiya otembo yokulilongisa eci catiamela ku Yehova.​—⁠Va Efeso 5:​15, 16.

Akamba va Suku valinga eci cusanjuisa. Sokolola akamba vove. Nda ove ovatata lavĩ kuenda olinga ovina ovo kavasole, ukamba wavo love wukamisako? Cimoleha okuti sio! Cimosi haeco, nda oyongola oku kala ekamba lia Suku, ove osukila okulinga cosi cina cu sanjuisa.​—⁠Yoano 4:⁠24.

Atavo havosiko vatu tuala kukamba la Suku. Yesu, okuti Suku wakapeleko calua ukamba laye, wavangula eci catiamẽla kolonjila vivali. Onjila yimue, yasanjavala okuti yasunguluka komanu. Onjila yaco eyi yisonguila kenyoleho. Onjila yikuavo yasukatela okuti kavaluile omanu vandelamo. Onjila yaco eyi yituala komuenyo kopui. Eci cilomboloka okuti nda oyongola okulivala ukamba la Suku, osukila oku kũlĩha onjila yasunguluka yefendelo liaye.​—⁠Mateo 7:​13, 14.