Ocipama 10

Ndomo Citava Oku Sanga Etavo Liocili

Nda oyongola oku kala ekamba lia Suku, te okuama etavo lina Suku atava. Yesu walinga hati, “vakuakufendela vocili” vaka linga efendelo lia Suku “locili.” (Yoano 4:​23, 24) Kuli onjila yimosi lika yasunguluka yoku fendela Suku. (Va Efeso 4:​4-6) Etavo liocili lituala komuenyo kopui, pole etavo liesanda lituala kenyoleho.​—⁠Mateo 7:​13, 14.

Ove opondola oku limbuka etavo liocili vo kuvanja omanu vana vakasi okulikuama. Omo okuti Yehova uwa, vosi vana okuti afendeli vaye vocili vasukilavo oku kala omanu vawa. Casunguluka omo okuti uti uwa walalanja wimavo alalanja awa, haecovo okuti etavo liocili limavo omanu vawa.​—⁠Mateo 7:​15-20.

Akamba va Yehova Embimbiliya valikuetele esumbilo liocili. Vakũlĩha okuti Embimbiliya ondaka ya Suku. Vaecelela okuti omuenyo wavo usonguiwa leci cisangiwamo, oku tetulula ovitangi viavo, kuenda livakuatisa oku lilongisa eci catiamẽla ku Suku. (2 Timoteo 3:16) Ovo vaseteka oku kuama eci ovo vakunda.

Akamba va Yehova valekisa ocisola komanu vakuavo. Yesu walekisa ocisola lomanu poku valongisa eci catiamẽla ku Suku, kuenda poku sakula omanu vosi vana vakala lokuvela. Vana vakuama etavo liocili lavovo valekisa ocisola lomanu. Lokusetukula Yesu, ovo kavatepisa omanu omo liusuke ale pamue omo lialimi alitepa. Yesu walinga hati omanu vakalimbuka olondonge viaye omo liocisola ovo valekisa komanu vakuavo.​—⁠Yoano 13:⁠35.

Akamba va Suku vasumbila onduko yaye, Yehova. Nda omunu umue olikala oku tukula ale oku kapako onduko yove, citava hẽ okuti omunu waco okuata ukamba love? Lalimue eteke! Eci tukuata limue ekamba, etu tu tukula londuko tukapako kuenda tupopia ovina viwa viatiamẽla kokuaye komanu vakuavo. Omo liaco vosi vana vayongola okukala akamba va Suku te vakapako onduko yaye kuenda vasapuila eci catiamẽla kokuaye komanu vakuavo. Yehova oyongola okuti eci oco tulinga.​—⁠Mateo 6:9; Va Roma 10:​13, 14.

Ndomo Yesu alinga, akamba va Suku valongisa omanu catiamẽla Kusoma wa Suku. Usoma wa Suku uviali wokilu okuti u ka pongolola osi vofeka yimue yelau. Akamba va Suku vakuete ocikundi coku sapula olondaka evi viwa viatiamẽla Kusoma wa Suku komanu vakuavo.​—⁠Mateo 24:⁠14.

Olombangi via Yehova viseteka oku kala akamba va Suku. Ovo vasumbila Embimbiliya kuenda valikuetele ocisola pokati kavo. Vatukula onduko ya Suku loku yisumbila kuenda valongisa vakuavo Usoma wa Suku. Olombangi via Yehova vikasi oku linga efendelo liocili vongongo oloneke vilo.