Ocipama 11
Likala Etavo Liesanda!
Satana kuenda olondele viaye kavayongola okuti ove ovumba Suku. Ovo vayongola oku tateka omanu vosi okuvakapa ocipãla la Suku nda vapondola. Ndamupi hẽ ovo vaseteka okulinga eci? Onjila yimue pokati ketavo liesanda. (2 Va Korindo 11:13-15) Etavo liesanda olio kalilongisa ocili cisangiwa Vembimbiliya. Etavo liesanda likasi ndolombongo viesanda—voku vivanja ño ndoto vimoleha soketi mbi ocina cimue cocili, pole kavisilivila. Eci cikunenela ovitangi vialua.
Atavo uhembi lalimue eteke akapondola oku sanjuisa Yehova, Suku yocili. Eci Yesu akala palo posi, ovimunga viatavo viakala lonjongole yoku u ponda. Vasimaile okuti efendelo liavo olio liasunguluka. Ovo valinga hati: “Tu kuete Isietu umuamue, Suku.” Anga hẽ Yesu wa vatava? Sio! Eye walinga hati: “Wa tundi ku isiene [E]liapu.” (Yoano 8:41, 44) Omanu valua etali vasima okuti vafendela Suku, osimbu vavumba muele ocili Satana kuenda olondele viaye!—1 Va Korindo 10:20.
Omo okuti uti ũvi wima epako lĩvi, cimuamue haeco okuti etavo liesanda limavo omanu vana vakuakupanga ovina vĩvi. Oluali lueyuka ovitangi omo liovina vĩvi omanu vakasi okulinga. Ndeci ukahonga, uyaki, oku nyana, asipato omuenyo, okuponda kuenda alume vakuata akãi oco valipekele lavo. Valua omanu vakuakulinga ovina viaco evi ndeti vĩvi vakuete etavo, pole etavo liavo ka livavetiya okulinga eci casunguluka. Kavapondola oku kala akamba va Suku nda ka valiwekelepo oku linga ovina vĩvi.—Mateo 7:17, 18.
Etavo liesanda lilongisa omanu okulingila ohutililo oviteka. Suku walinga hati lalimue eteke ulingila ohutililo oviteka. Eci casunguluka. Osanjuka hẽ nda omunu umue lalimue eteke avangula love pole ovangula lika lelitalatu liove? Citava hẽ omunu waco oku kala ekamba liove? Sio, eye kapondola. Yehova oyongola okuti omanu vavangula laye, hakuvangulako lociñumañuma ale pamue lelitalatu kalikuete omuenyo.—Etundilo 20:4, 5.
Etavo liesanda lilongisa okuti hacitangiko okuponda omanu votembo yuyaki. Yesu walinga hati akamba va Suku vakapondola oku likuatela ocisola pokati kavo. Kacitava okuti tuponda omanu etu tusole. (Yoano 13:35) Eci ekandu kokuetu okuponda omanu ndaño olondingãvi. Eci anyali va Yesu veya oco vokuate, eye ka ecelele olondonge viaye okuyaka oco vo popele.—Mateo 26:51, 52.
Etavo liesanda lilongisa okuti olondingãvi vikatalisiwa ohali vifelu. Embimbiliya lilongisa okuti ekandu lituala kolofa. (Va Roma 6:23) Yehova eye Suku yocisola. Citava hẽ okuti Suku ukuacisola otalisa omanu ohali otembo yakahandangala vifelu? Lalimue eteke! Vofeka Yelau mukakala lika etavo limuamue, lina okuti litaviwa la Yehova. (Esituluilo 15:4) Atavo vosi vakasi vuhembi wa Satana ha vakakalako vali.