Asapulo Wusoma No. 37

Esapulo Lieciwa Koluali Luosi

Esulilo Liatavo Esanda Li Kasi Ocipepi!

▪ Atavo esanda a lomboloka nye?

▪ Aka nyõliwa ndati?

▪ Oka puluka hẽ kenyõleho liaco?

Atavo Esanda a Lomboloka Nye?

Wa siata oku mola ungangala u kasi oku lingiwa vonduko yetavo? Uyaki, undiandia kuenda evĩho vi kasi oku lingiwa la vana va popia hati va vumba Suku. Eci hẽ ka ca siatele oku ku sumuisa? Momo lie atavo a siatela oku koka ovitangi vialua? Atavo esanda a kasi oku vetiya omanu oku linga ovina vĩvi. Yesu wa lombolola okuti ndeci ‘uti ũvi wima apako ãvi,’ cimuamue haico, atavo esanda a siata oku lekisa ovituwa vĩvi. (Mateo 7:​15-​17) Apako api atavo esanda a siata oku ima?

◼ ATAVO ESANDA A SIATA OKU VETIYA UYAKI LOKU LITENGA VOPULITIKA: Vukanda umue wasapulo kocifuka co Asia mua sonehiwa hati: ‘Asongui vatavo esanda va siata oku kemba omanu oco va tẽlise olonjongole viavo.’ Ukanda waco wasapulo wa lungula hati: ‘Omanu va kasi kohele yoku yapuisiwa.’ Usongui umue wetavo kofeka yo Estados Unidos wa popia hati: ‘Vonduko ya Ñala ovingumba viosi vi pondi, osimbu handi ovo ka va ku pondeli.’ Anga hẽ eci ca sunguluka? Embimbiliya li popia hati: “Umue nda o popia hati, ndi sole Suku, kuenje o suvuka ukuavo, ohembi momo u ka sole ukuavo a lete ka tẽla oku sola Suku ka lete.” (1 Yoano 4:​20) Yesu wa popia hati: “Soli ovanyali vene.” (Mateo 5:​44) Momo lie atavo esanda a siatela oku litenga vuyaki?

◼ ATAVO ESANDA A LONGISA UHEMBI: Atavo amue a siata oku longisa okuti, vetimba liomunu muli ocilelembia okuti eci a fa, oco ci kala lomuenyo konepa yimue yiñi. Omo liuhembi waco, omanu valua va siata oku feta olombongo kasongui vatavo oco va va lingileko olohutililo loku sima okuti vika kuatisa vangandiavo va fa. Eci hacoko Embimbiliya lilongisa. Olio li popia hati:“U o linga ekandu eye o fa.” (Esekiele 18:⁠4) “Ava va kasi lomuenyo va kũlĩha okuti va laika oku fa, puãi ava va fa lacimue va kũlĩha.” (Ukundi 9:⁠5) Yesu wa longisa okuti ava va fa vaka pinduiwa. (Yoano 11:​11-​25) Anga hẽ etavo liove lilongisa okuti omunu o kuete ocilelembia ka ci fi?

◼ ATAVO ESANDA A ECELELA UKAHONGA: Kolofeka vimue olombiali vi ecelela okuti ulume o kuela ulume ale ukãi o kuela ukãi lukuavo. Handi vali va ecelela okuti omanu vaco, va kala asongui vetavo. Kuli atavo amue okuti a pisa ukahonga. Pole, va ecelela okuti asongui vavo va linga ukahonga lomãla vatito. Nye Embimbiliya lilongisa catiamẽla kondaka eyi? Olio li popia hati: “Ko ka kembiwi. Ndaño vakuokahonga, ndaño vakuaviteka, ndaño vava va lala lakãi vamãle, lalume va lisokisa lakãi, lalume vakuakulala lalume . . . ka va piñala usoma wa Suku.” (1 Va Korindo 6:​9, 10) Ove hẽ wa kũlĩha etavo limue okuti li pisa ukahonga?

Nye cika pita latavo a ima apako ãvi? Yesu wa popia hati: “Uti wosi ka wimi apako awa u timbuiwa kuenje wimbiwa vondalu.” (Mateo 7:​19) Etavo liesanda lika kunduiwa. Eci cika pita otembo yipi? Kuenda cika lingiwa ndati? Ocinjonde ci sangiwa kelivulu Liesituluilo kocipama 17 kuenda 18, ceca atambululo kapulilo ava.

Atavo Esanda Aka Nyõliwa Ndati?

Tala ocipuepue ca tumãla ndeti kilu liocinyama ca tema. Ocinyama caco ci kuete ovitue epanduvali kuenda olombinga ekũi. (Esituluilo 17:​1-4) Ocipuepue caco ci lomboloka nye? Oco ca “viala olosoma vio kilu lieve.” Ca wala olonanga vi kusuka, ci kuete okopo peka kuenda ci kuete ukuasi walua. Handi vali “olofeka viosi via kembiwa lumbanda” waye. (Esituluilo 17:18; 18:​12, 13, 23) Embimbiliya li tu kuatisa oku limbuka okuti ocipuepue caco ocisoko catavo esanda voluali luosi. Oco ka ci lomboloka lika etavo limosi, pole, ci lomboloka atavo osi a siata oku ima apako ãvi.

Ocinyama kua tumãla ocipuepue, ci lomboloka olombiali violuali.a (Esituluilo 17:​10-​13) Atavo esanda a kasi oku viala olosoma violuali luosi poku eca ovisimĩlo viavo kovina viosi.

Ndopo ku ka pita ocilunga cimue ci komohisa. “Olombinga ekũi wa mola . . . kumue locinyama caco vi suvuka ocipuepue. Viu lingisa ekundu, viu wendisa epõlõla. Ositu yaye va yi takĩla kuenje vo yoka londalu.” (Esituluilo 17:​16) Olombiali violuali vika ñualelapo atavo esanda kuenje aka kunduiwa. Nye cika vi vetiya oku ci linga? Elivulu Liesituluilo lieca etambululo liokuti: “Suku wa tiamisa ovitima viavo koku linga ocipango caye.” (Esituluilo 17:​17) Suku oka kundula atavo osi esanda omo liovina vĩvi va kasi oku lingila vonduko Yaye. Yehova oka vetiya olombiali violuali oku ci linga.

Nye o sukila oku linga oco o puluke kenyõleho liatavo esanda? O sukila oku pokola kelungulo lia Suku liokuti: “Amanu vange, tundimo.” (Esituluilo 18:⁠4) Yilo oyo otembo yoku tunda vetavo liesanda. Oco hẽ, pi ove o sukila oku tilila? Ku ka lisokise la vana ka va tava ku Suku haivo ka va kuete elavoko. (2 Va Tesalonike 1:​6-9) Ocitililo ca velapo, etavo liocili. Tu limbuka ndati etavo liocili?

Tu Limbuka Ndati Etavo Liocili?

Apako api awa etavo liocili lia siata oku ima?​—⁠Mateo 7:⁠17.

◼ VAKUETAVO LIOCILI VA LIMBUKIWILA KOCISOLA: Afendeli vocili ka va lingi ‘onepa koluali,’ ka va kuete olonepele, puãi va ‘likuetele ocisola pokati.’ (Yoano 13:35; 17:16; Ovilinga 10:​34, 35) Handi vali, omo liocisola ka va lipondi omunu lukuavo.​—⁠1 Yoano 3:⁠16.

◼ VAKUETAVO LIOCILI VA KOLELA ONDAKA YA SUKU: Vakuetavo liocili ka va longisa “ovisila viomanu.” Va tiamisila elongiso liavo Vembimbiliya. (Mateo 15:​6-9) Momo lie? Momo “Ovisonehua vi kola viosi ovitumasuku, kuenje vi silivila oku longisa, loku lungula, loku pindisa.”​—⁠2 Timoteo 3:⁠16.

◼ VAKUETAVO LIOCILI VA PAMISA EPATA KUENDA VA POKOLA KOLONUMBI VIEMBIMBILIYA: Etavo liocili li longisa alume oku ‘sola akãi vavo ndeci va sole etimba liavo.’ Li kuatisa akãi oku ‘sumbila va veyavo’ kuenda li longisa omãla oku ‘pokola kolonjali viavo.’ (Va Efeso 5:​28, 33; 6:⁠1) Handi vali, vana va kuete ovikele vekongelo va sukila oku lekisa ongangu yiwa komuenyo wavo.​—⁠ 1 Timoteo 3:​1-10.

Anga hẽ kuli etavo limue lia kapako olonumbi evi? Elivulu limue lia pangiwa kunyamo wo 2001, mua sonehiwa hati: ‘Nda omanu vosi va kapeleko eci Olombangi via Yehova vi longisa, voluali nda ka muli Ovoyaki.’

Kueci ci soka 235 kolofeka, Olombangi via Yehova ka vi kundi lika olonumbi via Suku, pole, va vi kapako komuenyo wavo. Tu ku vetiya oku sandiliya Olombangi via Yehova oco vi ku kuatise oku kũlĩha ocipango ca Suku loku u fendela ndomo eye a yongola. Yilo oyo otembo yoku ci linga, ku ka cilue. Momo esulilo liatavo esanda li kasi ocipepi!​—⁠Sofoniya 2:​2, 3.

[Atosi pombuelo yamẽla]

[Elitalatu kemẽla 3]

“Amanu vange, tundimo”

[Elitalatu kemẽla 3]

Atavo esanda a kasi oku “viala olosoma viokilu lieve”