Uvangi Volokololo Okuti Weca Onima
1. Volonjila vipi tu pondola oku setukula Yesu?
1 Yesu eci a kala palo posi, vokuenda kupange waye woku kunda, ka susõhaile oku vangula lomanu a sanga volokololo kuenda povitumãlo vikuavo. (Luka 9:57-61; Yoa. 4:7) Eye wa yonguile oku kundila omanu valua esapulo limue li kuete esilivilo. Koloneke vilo, uvangi wo volokololo onjila yimue yoku kuatisa omanu oku kuata olondunge via Suku. (Olosap. 1:20) Tu kuata onima yiwa nda tua lekisa onjongole komanu kuenda oku lekisa utate.
2. Tu lekisa ndati onjongole komanu poku talavaya volokololo?
2 Lekisa Onjongole Komanu: Ciwa oku sanda onjila yoku amẽla komanu okuti ka tu talama ale oku tumãla lika pocitumãlo cimuamue loku lavoka okuti ovo veya kokuetu. Lekisa esanju, tulukila komunu, tula utima, kuenda lekisa ukamba. Nda o kasi oku talavaya lukundi ukuavo, ciwa okuti vu litepa poku vangula lomanu. O sukila oku likolisilako oku linga epasu komanu vana va lekisa onjongole. Nda citava, kesulilo liombangulo u pula lutate ndomo o pondola oku sapela laye onjanja yikuavo. Akundi vamue omo lioku kundila lika vokololo yimuamue, va sapela lomunu umuamue olonjanja vialua, kuenje eci ci nyõla onjongole yomunu waco.
3. Tu lekisa ndati utate poku eca uvangi volokololo?
3 Lekisa Utate: Lekisa olondunge poku nõla ocitumãlo kuenda omanu o sapela lavo. Ka ci sukila oku kundila omanu vosi tu mola. Kala ukuakulavulula. Nda omunu wa yanga, ciwa oku u pitisa. Poku eca uvangi ocipepi lovitumãlo violomĩlu, lekisa utate oco ku ka tateke usongui wovenda. Olonjanja vimue ciwa oku kundila omanu va tunda vovenda okuti vana va iñila havoko. Poku sapela lomanu, ci linga lonjila yimue okuti ka va lisalukako. Tu sukila oku lekisa utate poku eca alivulu. Nda omunu o lekisa onjongole yitito, ku ko wĩhe orevista, u wĩha otratadu.
4. Momo lie oku eca uvangi volokololo, upange umue u nena esanju haiwo weca onima?
4 Oku eca uvangi volokololo ci tu ecelela oku waya olombuto vialua viocili Cembimbiliya votembo yimue yitito. (Uku. 11:6) Omanu vamue tu sanga volokololo, vana okuti poku kunda konjo lanjo ka tua va sangele kolonjo viavo. Momo lie ku lingila esokiyo lioku eca uvangi volokololo, okuti onepa yimue yupange woku kunda u nena esanju haiwo weca onima?