Ono Yovipama Viohongele Ekalo Lietu Tuakristão Kuenda Oku Kunda
OSEMANA 4-10 YA KUVALA
OVOKUASI A SANGIWA VONDAKA YA SUKU | 1 YOANO 1-5
“Ko ka Soli Oluali Ndaño Ovina vi Kasi Voluali”
(1 Yoano 2:15, 16) Ko ka soli oluali ndaño ovina vi kasi voluali. Nda umue o sole oluali, ocisola ca Isia ka ci kasi vokuaye; momo ovina viosi vi kasi voluali—oloñeyi vietimba, oloñeyi viovaso, oku litunila ovina viomuenyo—ka vi tundi ku Isia, puãi vi tunda koluali.
utala wondavululi, 1/1/2005 kem. 22 ocin. 13
Tu Kuami Ongangu Ya Yesu
13 Omanu vamue va siata oku sima okuti, ovina haviosiko vi kasi voluali okuti vĩvi. Ovisimĩlo evi viocili. Pole, tu sukila oku ivaluka okuti, ovina vi kasi voluali vi pondola oku tu yapuisa oku vumba Yehova. Voluali, ka muli ovina vi tu kuatisa oku kuata ukamba la Yehova. Omo liaco, nda tua sola ovina violuali, ndaño muẽle vina okuti havivĩko, tu kala kohele yoku yapuisiwa vonjila ya Suku. (1 Timoteo 6:9, 10) Tu sukila oku ivaluka okuti voluali lulo, muli ovina vialua vĩvi vi pondola oku nyõla ovituwa vietu viwa. Olonjanja vimue votelevisãu mua siata oku lekisiwa oviluvialuvia viungangala, kuenda ovina vi vetiya oku sanda ovokuasi, lukahonga. Nda tu amamako oku tala ovina viaco, noke vika mõleha kokuetu ndu okuti viwa. Kuenje vika tu tuala kayonjo. Handi vali, nda tua livala ukamba lomanu vana vatiamisila lika utima wavo koku sanda ovokuasi loku linga olomĩlu, tuka yonjiwilavo kovina viaco. Kuenje tuka sima okuti ovina viaco ovio lika via velapo komuenyo.—Mateo 6:24; 1 Va Korindo 15:33.
(1 Yoano 2:17) Oluali lu kasi oku pita loloñeyi vialuo, pole, una o linga ocipango ca Suku o kala otembo ka yi pui.
utala wondavulluli, 15/8/2013 kem. 27 ocin. 18
Kũli̇̃hi̇̃sa Ovituwa o Sukila Oku Lekisa
18 Ocina cikuavo ci tu kuatisa oku yuvula ‘ovina violuali lulo,’ oku ivaluka olondaka via Yoano wa popia hati: “Oluali lu takata loñeyi yaluo, puãi u o lingainga ocipango ca Suku o kala oloneke ka vi pui.” (1 Yoano 2:17) Oluali lulo lua Satana lu kasi ndu okuti lu ka amamako otembo ka yi pui. Pole, ovina viaco ka vi kala otembo yalua. Poku ivaluka okuti ovina viosi vi kasi voluali lulo lua Satana vi ka nyõliwa, ci tu kuatisa oku yuvula oku yapuisiwa layonjo aye.
Oku Konomuisa Lutate Ovina vi Sangiwa Vembimbiliya
(1 Yoano 2:7, 8) A vamanji wa soliwi, si kasi oku vu soneheli ocihandeleko cokaliye, te ocihandeleko cosimbu, cina vu kasi laco tunde kefetikilo. Ocihandeleko caco cosimbu, ondaka wa yevi. 8 Handi vali, ndu sonehelivo ocihandeleko cokaliye, haico cocili vokuaye kuenda vokuene, momo owelema u kasi oku pita kuenje ocinyi cocili ci kasi oku nina.
utala wondavululi, 15/9/2013 kem. 10 ocin. 14
Alungulo a Yehova a Koleliwa
14 Vovisonehua vio Helasi mu sangiwa olonumbi vialua vi tu vetiya oku lekisa ocisola komanu. Yesu wa tukula ocihandeleko cavali haico ca velapo, catiamẽla koku ‘sola omanu vosi, ndeci tu lisole etu muẽle.’ (Mat. 22:39) Tiago manji a Yesu wa tukula ocisola hati, ‘ocihandeleko cusoma. (Tia. 2:8) Upostolo Yoano wa soneha ndoco: ‘A vakuacisola, si kasi loku vu soneheli ocihandeleko cokaliye, te ocihandeleko cale.’ (1 Yoa. 2:7, 8) Nye upostolo Yoano a yonguile oku popia lolondaka viokuti, “ocihandeleko cale,” kuenda “ocihandeleko cokaliye”? Eye wa kala oku tukula ocihandeleko cocisola. Ca kala ocihandeleko ‘cale’ omo okuti, ‘tunde kefetikilo’ eci Yesu a ci tukula pa pitile ale otembo yalua. Yesu wa popiavo hati, ocihandeleko caco ca kalavo ‘cokaliye,’ momo olondonge viaye via sukilile oku lekisa ocisola cocili poku liyaka lovitangi komuenyo wavo. Omo okuti tulondonge via Kristu, ka tu sanjukila hẽ alungulo a tu kuatisa oku yuvula ovituwa ka via sungulukile via siata voluali lulo okuti vi pondola oku nyõla ocisola tu kuetele omanu?
(1 Yoano 5:16, 17) Nda umue o lete manjaye o linga ekandu ka li tuala kolofa, o sukila oku u likutililako kuenje Suku u wĩha omuenyo. Eci ci tiamisiwila ku vana ka va lingi ekandu li tuala kolofa. Kuli ekandu li tuala kolofa. Catiamẽla kekandu liaco, siu pingi oco a likutilileko omunu waco. 17 Elinga liosi ka lia sungulukile, ekandu, puãi kuli ekandu okuti ka li tuala kolofa.
perspicaz-volume 1 kem. 243 ocin. 5
Ongecelo
Ci kuete esilivilo oku kongela vamanji volohutililo vietu. Mose wa ci lingavo poku likutililako va Isareli, oco va likekembele akandu avo loku pinga ongecelo kuenje Yehova wa yeva ohutililo yaye. (Ate. 14:19, 20) Salomone, eci a tumbika onembele wa likutilila ku Yehova oco a ecele afendeli vaye eci va linga ekandu limue loku va kuatisa oku endela vonjila ya sunguluka. (1 Olos. 8:30, 33-40, 46-52) Esera, wa lekisa utõi poku situlula akandu a va Yudea va kala kumandekua. Ohutililo a linga lutima wosi kuenda elungulo a eca ca ecelela okuti omanu va lekisa ovituwa viwa oco Yehova a ecele akandu avo. (Esera 9:13–10:4, 10-19, 44) Tiago wa vetiya vana va vela konepa yespiritu oco va vilikiye akulu vekongelo oco vo likutilileko kuenje “nda wa linga ekandu limue o ka eceliwa.” (Tia. 5:14-16) Omo liaco, “kuli ekandu li tuala kolofa” okuti oku popia etonãi espiritu sandu, ekandu limue ka li eceliwa. Ka ca sungulukile Ukristão oku kongela volohutililo vieye una wa linga ekandu liaco.—1 Yoa. 5:16; Mat. 12:31; Va Hev. 10:26, 27; tala elomboloko LIESPIRITO kuenda EKANDU.
Oku Tangiwa Kuembimbiliya
(1 Yoano 1:1–2:6) Tunde kefetikilo tu kasi oku vu soneheli catiamẽla kondaka yomuenyo tua yeva, tua mola lovaso etu, tua limbuka kuenda tua lamba lovaka etu, 2 (okuti omuenyo ko pui wa tu situluiwa, tua ci mola kuenda tu ci imbila uvangi loku ku ci sapuili. Omuenyo waco ko pui wa tunda ku Isia kuenje ca tu situluiwa), 3 puãi eci tua mola, leci tua yeva tu ku ci sapuili, okuti vu likuata omunga kumue letu ndeci etu tu likuetele omunga kumue la Isia kuenda Omõlaye Yesu Kristu. 4 Omo liaco, tu vu soneheli ovina evi oco esanju lietu li suepo. 5 Eli olio esapulo tua yeva kokuaye kuenje li kasi oku sapuiwa kokuene okuti: Suku ocinyi kuenda vokuaye ka muli owelema. 6 Nda tua popia tuti, “Tu likuete omunga kumue laye,” pole, handi tu endela vowelema, tulohembi kuenda ka tu kasi oku kuama ocili. 7 Puãi nda tu endela vocinyi ndeci eye a kasi vocinyi, tu likuata omunga kuenda osonde ya Yesu Omõlaye yi yelisa akandu etu osi. 8 Nda tu popia tuti, “Ka tu kuete ekandu,” tu likemba etu muẽle kuenda ocili ka ci kasi vokuetu. 9 Puãi nda tua litavela akandu etu, omo okuti eye wa kolelua haeye ukuesunga, ecela akandu etu kuenje o tu yelisa kevĩho liosi. 10 Nda tu popia tuti, “Ka tu kuete ekandu,” tuo lingisa ohembi kuenda ondaka yaye ka yi kasi vokuetu.
2 Atumãla tuange, ñasi oku vu soneheli ovina evi okuti ka vu lingi ekandu. Pole, nda umue wa linga ekandu, tu kuete oñuatisi yimue yi kasi kumue la Isia okuti, Yesu Kristu ukuesunga. 2 Eye ocilumba coku tuvika akandu etu, pole, hakandu etuko lika, la-a oluali luosi. 3 Kuenje tu limbuka okuti tuo kũlĩha, nda tu amamako oku pokola kovihandeleko viaye. 4 Una o popia hati, “Ndo kũlĩha,” puãi ka pokola kovihandeleko viaye, ohembi kuenda ocili ka ci kasi vomunu waco. 5 Pole, una o pokola kondaka ya Kristu, o limbukiwa okuti o kuetele ocisola Suku. Oku oko tu limbukila okuti tu kasi vomunga kumue laye. 6 Una o popia okuti o kasi vomunga kumue laye, o sesamẽla oku endaenda ndeci eye a endaenda.
OSEMANA 11-17 YA KUVALA
OVOKUASI A SANGIWA VONDAKA YA SUKU | 2 YOANO 1–YUDA
“Tu Sukila Oku Likolisilako Oco tu Amameko Oku Kala Vocili”
(Yuda 3) A vamanji wa soliwi, ndaño okuti nda likolisilako oku vu soneheli catiamẽla keyovo tua kakatela vosi, pole, nda nõlapo oku vu soneheli oco ndu vetiyi okuti vu yakela ekolelo lina lia eciwile onjanja yimosi kolosandu.
utala wondavululi 1/10/2004 kem. 13-14 ocin. 8-9
‘Tu Amamiko Loku Tambula Unene wa Yehova’
8 Embimbiliya li situlula ciwa ayonjo a Satana. Omo liaco, ka tu kasi vonumbi yatutu aye. (2 Va Korindo 2:11) Satana wa seteka oku nyõla ekolelo lia Yovi poku nena ovitangi vialua kokuaye. Vovitangi viaco mua kongelele oku nyõla ukuasi waye, kuenda olofa viomãla vaye. Mua kongelelevo oku suvukiwa lepata liaye, oku tala ohali, kuenda oku popiwa lãvi lakamba vaye vesanda. Omo liovitangi viaco, Yovi weya oku nyumãla calua. Kuenda wa simĩle okuti, Suku wo yanduluka. (Yovi 10:1, 2) Ocili okuti, Satana ka pondola oku nena ovitangi ndevi via Yovi. Pole, Akristão va siata oku liyaka lovitangi vialua. Kuenda eye o pondola oku va yapula lovitangi viaco.
9 Koloneke vilo via sulako, ohele yoku yapuisiwa konepa yespiritu ya livokiya calua. Omanu voluali, va tekela lika koku sanda ovokuasi. Ovingungu viasapulo vi vetiyila lika ovitima viomanu koku linga ukahonga. Kuenje omanu valua va siata oku sima okuti, oku linga ukahonga oco cinena esanju komuenyo. Handi vali, onepa yalua yomanu va linga “vakuakusola ca lua esanju, [okuti] Suku ci sule.” (2 Timoteo 3:1-5) Omo liaco, nda ka tua ‘yakelele ekolelo lietu,’ tu pondola oku nyõla ekalo lietu kespiritu.—Yuda 3.
Ovokuasi a Sangiwa Vondaka ya Suku
(Yuda 4) Nda ci sonehela momo alume vamue va iñila latutu pokati ketu okuti episo liavo lia sokiyiwa ale tunde osimbu Lovisonehua; ovo vakuakutomba Suku, haivo va pengisa ohenda ya piãla ya Suku oco ci va ĩhe evelo lioku lingainga umbondo kuenje va sepula una okuti eye lika cime cetu, haeye Ñala Yesu Kristu.
(Yuda 12) Alume vaco, va kasi lene povipito vu linga oco va lekise ocisola ku vamanji. Pole, ovo va sokisiwa lovawe a solekiwa kosi yovava, haivo angombo va litekula ovo muẽle okuti ka va kuete usumba; ovo alende ka a kuete ovava okuti ambatiwa lofela; oviti ka vimi apako votembo yaco, haivio via fa luvali kuenda via tukũiwa;
perspicaz-volume 1 kem. 62
Ovipito Viocisola
Embimbiliya ka li lombolola catiamẽla kovipito viocisola kuenda ka li lekisa olonjanja via enda oku lingiwa. (Yuda 12) Ovipito viaco ka via tumbikiwile la Yesu Kristu, ndaño lovapostolo vaye kuenda ka vi kisikiwa. Vamue va popia okuti Akristão olohuasi poku linga ovipito viaco, lia kala epuluvi lioku laleka vamanji vana olohukũi. Olosiwe, ovimbumba, olohuasi kuenda olohukũi via enda oku lila kumosi omo liomunga va likuatelele pokati.
perspicaz-volume 3 kem. 456
Ewe
Kelimi lio Helasi ondaka spi·lás, yi lomboloka ewe limue ale ocina cimue ci kala kosi yovava. Yuda wa tukula ondaka yaco, oco a vangule eci catiamẽla kulume una wa kala vekongelo Liakristão lovilinga ka via sungulukile. Ndeci ovawe a kasi kosi yokalunga a pondola oku kokela ohele konaviyu yimue, cimuamue haico okuti ulume waco wa kala ohele yimue yinene ku vamanji vekongelo. Catiamẽla kulume waco, eye wa popia hati: “Alume vaco, va kasi lene povipito vu linga oco va lekise ocisola ku vamanji. Pole, ovo va sokisiwa lovawe a solekiwa kosi yovava.”—Yuda 12.
(Yuda 14, 15) Enoke okuti omunu wepanduvali kocitumbulukila ca Adama, wa imba owanji watiamẽla komanu vaco eci a popia hati: “Yehova weya lolohuluwa violosandu viaye, 15 oco a pise vosi, loku yambula olondingaĩvi viosi omo liovilinga viavo vĩvi. Suku o ka ci linga omo lielinga liavo lĩvi. Ovo vakuakandu, ka vo sumbilile kuenda vo sepula.”
utala wondavululi, 1.2017 kem. 12 ocin. 1
‘Eye wa Sungulukile ku Suku’
Ocitumasuku cipi Enoke a sandeka? Ceci cokuti: “Yehova weya lolohuluwa violosandu viaye, oco a pise vosi, loku yambula olondingaĩvi viosi omo liovilinga viavo vĩvi. Suku o ka ci linga omo lielinga liavo lĩvi. Ovo vakuakandu, ka vo sumbilile kuenda vo sepula.” (Yuda 14, 15) Citava okuti ocina catete wa limbuka ceci okuti esapulo Enoke a sandeka lia kala ndu okuti lia pita ale kuenda Suku wa tẽlisa ale ovina viaco. Ovitumasuku viosi via tukuiwa, via kuama ongangu yaco. Ocisimĩlo ceci okuti: Uprofeto wa kala oku vangula catiamẽla kocina cimue ci ka pita okuti, citava oku ci lombolola ndocina cimue ca pita ale.—Isaya 46:10.
utala wondavululi, 1.2017 kem. 12 ocin. 3
‘Eye wa Sungulukile ku Suku’
Ekolelo Enoke a lekisa li pondola oku tu vetiya oku lipula nda tu tenda oluali ndeci Suku a u tenda. Esapulo liesombiso Enoke a sandeka, li tiamisiwilavo koloneke vilo voluali tu kasi, ndeci ca pita koloneke via Enoke. Ndeci ca tukuiwa vesapulo Enoke a sandeka, Yehova wa nena Etande oco a nyõle olondingavĩ via kala koloneke via Noha. Pole, enyolẽho liaco, lia linga olumapu lienyõleho linene li laika oku iya. (Mateo 24:38, 39; 2 Petulu 2:4-6) Ndomo ca pita kosimbu, koloneke vilo Suku wa lipongiyila kumue lolohuluwa viovangelo oco a sombise oluali lulo lua vĩha. Omunu lomunu pokati ketu, o sukila oku kapako elungulo Enoke a sandeka kuenda oku sapuilako omanu vakuavo. Epata lietu kuenda akamba vetu va pondola oku tu yanduluka. Citava okuti olonjanja vimue tu kala ndu okuti tu kasi ulika. Pole, ndeci Yehova lalimue eteke a yanduluka Enoke, koloneke vilo eye ka yanduluka afendeli vaye vakuekolelo!
Oku Tangiwa Kuembimbiliya
(2 Yoano 1-13) Ame ndukulu, ndi sonehela manji ukãi wa nõliwa, kumue lomãla vaye vana ndi sole, pole, hameko lika, la vosi veya oku kũlĩha ocili, 2 momo ocili ci amamako vokuetu kuenda ci kala letu otembo ka yi pui. 3 Ohenda ya piãla, ocali, lombembua yi tunda ku Suku Isia kuenda ku Yesu Kristu Omõla a Isia, locili kuenda ocisola, yi kale letu. 4 Nda sanjuka calua momo nda sanga okuti vamue pokati komãla vove va kasi oku endela vocili, ndomo tua handelekiwa la Isia. 5 Okãi, kaliye ndu ku pinga okuti tu lisola pokati. (Si kasi oku ku sonehela ocihandeleko cokaliye, te ocihandeleko cosimbu, cina tu kasi laco tunde kefetikilo.) 6 Ocisola ci lomboloka okuti, tu ambata omuenyo u litava lovihandeleko viaye. Ocihandeleko caco ceci, ndeci wa ci yevi tunde kefetikilo, vu sukila oku endaila vocihandeleko caco. 7 Momo olondimbiki vialua via li sanduila voluali, haivio ka vi limbuka okuti Yesu Kristu weyile vetimba. Omunu waco ondimbiki haeye antikristu. 8 Lunguki, okuti ka vu pumbi ovina wa likolisiliko oku talavaya, okuti vu tambula onima ya suapo. 9 Wosi o liamisa kelongiso lia Kristu kuenda ka amamako kelongiso liaco, ka kuete Suku. Wosi amamako kelongiso liaco, eye o kuete Isia kuenda Mõla. 10 Nda umue iya kokuene kuenje ka nena elongiso eli, ku ko tambuli kolonjo viene, ndaño oku u lama. 11 Momo wosi u lama, o kuata onepa kovilinga viaye vĩvi. 12 Ndaño ñuete ovina vialua vioku ku soneheli, si yongola oku ci linga lopapelo kuenda otinda, puãi ndi lavoka oku iya kokuene, oco tu sapele polo la polo, okuti esanju liene li suapo. 13 Omãla va manjove ukãi okuti wa nõliwa, va ku tumisa ovilamo.
OSEMANA 18-24 YA KUVALA
OVOKUASI A SANGIWA VONDAKA YA SUKU | ESITULUILO 1–3
“Nda Kũlĩha Ovilinga Viove”
(Esituluilo 1:20) Elomboluilo lielumbu li kola liolombungululu epanduvali wa mola peka liange liondio kuenda oviyekelo epanduvali violondiyelo viulu lieli: Olombungululu epanduvali vi lomboloka ovangelo vakongelo epanduvali kuenda oviyekelo epanduvali violondiyelo, vi lomboloka akongelo epanduvali.
utala wondavululi, 15/10/2012 kem. 14 ocin. 8
Ovituwa vipi wa siata oku lekisa?
8 Oco tu yuvule ocituwa caco, tu sukila oku ivaluka okuti, Yesu Vembimbiliya wa tukuiwa hati, ‘peka liaye liondio pali olombungululu epanduvali.’ Olombungululu viaco, vi lomboloka Akristão olombuavekua, oku kongelamo akulu vekongelo. Yesu o pondola oku songuila “olombungululu” vi kasi peka liaye lonjila yimue ya sunguluka. (Esit. 1:16, 20) Omo okuti Yesu eye Utue wekongelo Liakristão, wa kũlĩha ovina viosi vi pita lakulu vekongelo. Nda umue pokati kakulu vekongelo o sukila elungulo, Yesu okuti o kuete ‘ovaso a moleha ndulienge wondalu,’ o sandiliya onjila yoku kuatisa manji yaco votembo ya sokiyiwa. (Esit. 1:14) Osimbu Yesu ka tetuluile ocitangi caco, tu sukila oku lekisa esumbilo kakulu vekongelo va nõliwa lespiritu sandu, poku kapako olondaka via Paulu wa popia hati: “Pokoli kasongui vene loku linga eci va tuma, momo va kasi oku lavulula ovimuenyo viene, kuenda va kũlĩha okuti, va ka li lombolola ku Suku. Pokoli kokuavo okuti va ci linga lesanju, haloku lisiõsiõlako, momo nda va ci linga loku lisiõsiõla, ka cu vukuatisi.”—Va Hev. 13:17.
(Esituluilo 2:1, 2) “Sonehela ungelo wekongelo lio ko Efeso huti: Evi ovio ovina via popiwa la una o kuete peka liaye liondio olombungululu epanduvali, haeye endela pokati koviyekelo epanduvali violondiyelo viulu, hati: 2 ‘Nda kũlĩha ovilinga viove, upange wove, lepandi liove kuenda kua siatele oku kuata ukamba lolondingaĩvi, puãi wa nyika vana va litukula vati ovapostolo, osimbu havapostoloko kuenje wa limbuka okuti ovo olohembi.
utala wondavululi, 15/4/2012 kem. 29 ocin. 11
Yehova o tu Lava Oco tu Popeliwe
11 Kelivulu Liesituluilo kocipama 2, leci ca 3, ku tukula ocinjonde cimue ci lekisa okuti, Yesu Kristu wa kũlĩhĩsa ekalo liakongelo epanduvali a kala ko Asia Menor. Vocinjonde caco, Kristu ka konomuisile lika ekalo liakongelo o ko Asia Menor, pole, wa kũlĩhĩsavo ovitangi via kala vekongelo lekongelo. Kuenje, wa va pandiya kuenda wa eca elungulo va sukilile. Ocinjonde caco ci lomboloka nye? Poku tẽlisiwa kuocinjonde caco, akongelo epanduvali a lomboloka Akristão olombuavekua veya oku molẽha kunyamo wo 1914. Elungulo lia eciwa kakongelo epanduvali, li kuetevo esilivilo kafendeli va Suku koloneke vilo. Tua kũlĩha okuti, Yehova o kasi oku songuila afendeli vaye lekuatiso Liomõlaye. Tu kuatisiwa ndati lalungulo aco?
utala wondavululi, 1/2/2001 kem. 11 ocin. 20
Kuama Ongendo Yocisoko ca Yehova
20 Voku kuama ongendo yocisoko ca Yehova, mua kongela oku limbuka ocikele Yesu Kristu a tambula ku Suku, coku kala “utue wekongelo.” (Va Efeso 5:22, 23) Cimue ci komohisavo ceci ca sonehiwa kelivulu lia Isaya 55:4, oku tu tanga ndoco: “Tala ndo tukula ombangi ya vakualofeka, haeye usongui wa vakualofeka, haeye kesongo [k]avo.” Tua kolela okuti, Yesu Kristu wa kuliha ciwa ndomo a songuila. Eye wa kũlĩha ciwa olomeme viaye kuenda wa kũlĩhavo Ovilinga viavo. Eci ci lekisiwila kolondaka viaye eci a kũlĩhĩsa ndomo akongelo epanduvali voku Asia Menor a kala, volonjanja vitãlo wa vangula olondaka via popia hati: “ Nda kũlĩha ovilinga viove” (Esituluilo 2:2,19;3:1;8,15) Yesu wa kũlĩhavo eci tu sukula, ndeci Isiaye, Yehova. Eci handi Yesu ka longisile ohutililo ya isietu kolondonge viaye, eye wa popia hati: “ [Suku] Isiene wa kũlĩha ovina vio sesameli osimbu ka wa vi pingili.”—Mateo 6:8–13.
Oku Konomuisa Lutate Ovina vi Sangiwa Vembimbiliya
(Esituluilo 1:7) Tala! Eye iyilila valende kuenje ovaso osi a ko mola, ndaño vava vo toma; kuenda apata osi o kilu lieve a ka lila loku litetela lesumuo mekonda liaye. Ocili eci ci ka tẽlisiwa muẽle, Amene.
usoma wa suku, kem. 226 ocin. 10
Usoma wa Suku u Kundula Ovanyãli Vaye
10 Esapulo lieyambulo. Ovanyãli vosi Vusoma wa Suku va ka kisikiwa oku imbila uvangi ovina vi ka vokiya ohali yavo. Yesu wa popia hati: “Va [ka] mola Mõlomanu oku iyilila kalende lunene wa lua lulamba.” (Mar. 13:26) Oku lekisiwa kunene waco ondimbukiso yokuti Yesu o keya lesapulo lieyambulo. Konepa yikuavo yocitumasuku catiamẽla koloneke via sulako, Yesu wa eca alomboluilo akuavo atiamẽla keyambulo li ka tukuiwa. Tua sanga ulandu waco volusapo luolomeme kuenda olohombo. (Tanga Mateo 25:31-33, 46.) Oloñuatisi Viusoma wa Suku va ka sombisiwa “ndolomeme” kuenda va ka ‘petula ovitue viavo,’ loku limbuka okuti, ‘eyovo liavo li kasi ocipepi.’ (Luka 21:28) Pole, ovanyãli Vusoma wa Suku va ka sombisiwa “ndolohombo” kuenda va ka “lila,” omo lioku limbuka okuti va loña “keyambulo ka li pui.”—Mat. 24:30; Esit. 1:7.
(Esituluilo 2:7) U o kuete ovatũi a yevelele eci espiritu sandu li popia kakongelo: Ku una o yula ndu wecelela oku lia kuti womuenyo u kasi vocumbo celau ca Suku.’
utala wondavululi, 15/1/2009 kem. 31 ocin. 1
Atosi Avelapo Vonepa Yatete Yelivulu Liesituluilo
2:7—Olondaka viokuti, ‘ocumbo ca Suku,’ vi tiamisiwila ku velie? Vi tiamisiwila Kakristão olombuavekua, omo liekalo liwa va kuete kovaso a Suku. Omo liaco, nda va pandikisa toke kesulilo, vaka tambula onima yokulia “kepako liuti womuenyo,” kuenda vaka kuata omuenyo ko pui kilu.—1 Va Kor. 15:53.
Oku Tangiwa Kuembimbiliya
(Esituluilo 1:1-11) Esituluilo lia eciwa la Suku ku Yesu Kristu, oco a lekise kakuenje vaye ovina via laikele oku pita ndopo. Kuenje wa tuma ungelo waye kuenda wa vi situluila volondimbukiso vonduko yaye kukuenje waye Yoano, 2 una wa imba uvangi wondaka ya eciwa la Suku kuenda uvangi wa eciwa la Yesu Kristu okuti, wovina viosi eye a mola. 3 Una o tanga lolukandi kuenda vana va yeva olondaka viocitumasuku eci, la vana va pokola kovina via sonehiwamo, va sumũlũha, momo otembo ya sokiyiwa yi kasi ocipepi. 4 Yoano o sonehela akongelo epanduvali a kasi volupale luo Asia okuti: Ohenda ya piãla lombembua yi tunda ku “Una o kasi, haeye wa kala ale kuenda iya,” haiyo yi tunda kolongusu epanduvali vi kasi kovaso yocalo caye, 5 kuenda yi tunda ku Yesu Kristu okuti, “Ombangi Yocili,” haeye “uveli kuava va fa” kuenda “Ombiali yolosoma vio kilu lieve, yi kale love.” Ku una o tu sole, haeye wa tu yovola kakandu etu losonde yaye,— 6 kuenje wa tu lingisa olosoma lovitunda via Suku yaye haeye Isia—kokuaye ku kale ulamba kuenda unene otembo ka yi pui. Amene. 7 Tala! Eye iyilila valende kuenje ovaso osi a ko mola, ndaño vava vo toma; kuenda apata osi o kilu lieve a ka lila loku litetela lesumuo mekonda liaye. Ocili eci ci ka tẽlisiwa muẽle, Amene. 8 “Ame Tete haime Kuasula,” oco Yehova Suku a popia, “Una o kasi, haeye wa kala ale kuenda iya, haeye Ukuonene Wosi.” 9 Ame ndi Yoano manjene, haime ndi talela ohali kumue lene, haetu tua tiamẽla kusoma umuamue kuenda kepandi li tunda koku kala oñame ya Yesu, nda kala kocifuka ci tukuiwa Patmo omo lioku vangula catiamẽla ku Suku, loku imbila Yesu uvangi. 10 Omo liunene wespiritu, ndeya oku kala keteke lia Ñala kuenje nda yeva ondaka yinene konyima yange ya soka lolumbeta, 11 yiti: “Ovina o lete vi soneha vociña kuenje vi tuma kakongelo epanduvali okuti: ko Efeso, ko Smurna, ko Pergamo, ko Tuatera, ko Sardesi, ko Filadefia, lo ko Laodikea.”
OSEMANA 25 YA KUVALA–1 YA CEMBANIMA
OVOKUASI A SANGIWA VONDAKA YA SUKU | ESITULUILO 4–6
“Alume Vakuãla va Endela Kotuvalu”
(Esituluilo 6:2) Kuenje nda mola okavalu ka yela kuenda u wa tumãlako o kuete ohonji; kuenje vo wĩha ekolowa limue, yu wa tundila oku yula loku tẽlisa oku yula kuaye.
utala wondavululi, 3.2017 kem. 4 ocin. 3
Alume Vakuãla va Endela Kotuvalu Va Lomboloka Nye?
U wa endela kokavalu ka yela o lomboloka helie? Elivulu Liesituluilo, li tu ĩha etambululo. Ku lekisa okuti una wa tumãlako o tukuiwa hati, ‘Ndaka ya Suku.’ (Esituluilo 19:11-13) Onduko yokuti, Ndaka, ya eciwa ku Yesu Kristu, omo okuti, eye o sandeka esapulo lia Suku. (Yoano 1:1, 14) Handi vali, eye o tukuiwa okuti, eye “Soma yolosoma kuenda Ñala yoloñala,” haiye “Ombangi yocili haiyo ya Koleliwa.” (Esituluilo 19:16) Ovina viaco, vi lekisa okuti Yesu o kuete unene woku kala Soma Yovita kuenda omo okuti eye wa koleliwa, ka talavaya lunene waye lonjila yimue ka ya sungulukile. Pole, ku lingiwa apulilo amue.
utala wondavululi, 3.2017 kem. 4 ocin. 5
Alume Vakuãla va Endela Kotuvalu Va Lomboloka Nye?
Otembo yipi olokavalu via fetika upange wavo? Kũlĩhĩsa okuti una o kasi kokavalu katete okuti, Yesu, wa fetika oku endela kokavalu kaco eci a tambula ekolowa. (Esituluilo 6:2) Otembo yipi Yesu a fetika oku viala kilu Ndosoma? Eye ka fetikile oku viala eci a tiukila kilu noke liolofa viaye. Embimbiliya li lekisa okuti eye wa talamẽla. (Va Heveru 10:12, 13) Yesu wa eca kolondonge viaye ondimbukiso ya ponduile oku va kuatisa oku limbuka otembo a sukilile oku talamela kuenda oku fetika oku viala kilu. Eye wa popia okuti kefetikilo liuviali waye, ovitangi voluali vi livokiya. Ku kala ovoyaki, ekambo lioku lia kuenda ovovei. (Mateo 24:3, 7; Luka 21:10, 11) Ovolandu a lekisa okuti ovitangi viaco via fetika kunyamo wo 1914, noke lioku fetika Kuyaki Watete wa Pita Voluali. Embimbiliya li tukula otembo yaco hati, ‘oloneke via sulako.’—2 Timoteo 3:1-5.
(Esituluilo 6:4-6) Kua tunda okavalu kakuavo ka kuete evala li kusuka kuenda u wa tumãlako vo wĩha omoko yoku imula ombembua kilu lieve, okuti ovo va liponda pokati kuenda vo wĩha osipata yinene. 5 Eci eye a yikula esitikilo liatatu, nda yeva ocendalomuenyo catatu ca popia citi: “Enju!” Kuenje nda mola okavalu katekãva kuenda u wa tumãlako o kuete ombalãsa peka. 6 Nda yeva ondaka ya tunda pokati koviendalomuenyo vikuãla ya popia yiti: “Okilu yimosi yotiliku yi landiwa lodenariu yimosi kuenda olokilu vitatu viosevata vi landiwavo lodenariu yimosi; kuenje ulela lovinyu ku ka vi nyõle.”
utala wondavululi, 3.2017 kem. 4 ocin. 2
Alume Vakuãla va Endela Kotuvalu Va Lomboloka Nye?
Okavalu kaco, ka lomboloka uyaki. Limbuka okuti ka ko pile lika ombembua yolofeka vimue, pole kopa ombembua yoluali luosi. Kunyamo wo 1914, oco uyaki watete wa pita voluali wa fetika. Noke liotembo yimue, kua pita uyaki ukuavo voluali okuti watete u sule. Omanu vamue va tava okuti tunde kunyamo wo 1914, etendelo liomanu va fa kovoyaki, li pitãhala 100 colohuluwa viomanu! Handi vali, vetendelo liaco ka mua kongelele olohuluwa viomanu va linga ovilema omo liovoyaki aco.
utala wondavululi, 3.2017 kem. 5 ocin. 2, 4-5
Alume Vakuãla va Endela Kotuvalu Va Lomboloka Nye?
“Nda mola okavalu katekãva kuenda u wa tumãlako o kuete ombalãsa peka. Nda yeva ondaka ya tunda pokati koviendalomuenyo vikuãla ya popia yiti: ‘Okilu yimosi yotiliku yi landiwa lodenariu yimosi kuenda olokilu vitatu viosevata vi landiwavo lodenariu yimosi; kuenje ulela lovinyu ku ka vi nyõle.’”—Esituluilo 6:5, 6.
Okavalu kaco ka lomboloka onjala. Ekalo lia laikele oku tatama calua, momo Embimbiliya li lekisa okuti okilu yimosi yotiliku ya laikele oku landiwa lodenariu yimosi, okuti koloneke via Yesu, ya kala ofeto onalavayi ya enda oku tambula veteke limosi! (Mateo 20:2) Londando yaco, ca tavele oku landa olokilu vitatu viosevata okuti, otiliku ya velapo. Onjongo yaco nda ya tekula ndati epata limue linene? Ondaka yaco ya popiavo okuti omanu va sukila oku tetelẽla ulela lovinyu okuti, ovina omanu va enda oku lia koloneke viaco kuenda kocitumãlo ocitumasuku eci ca sonehiwila.
(Esituluilo 6:8) Noke nda mola okavalu ka yeluluka kuenda u wa tumãlako o kuete onduko okuti Kufa. Kuenje Eyambo lio kuama. Va va ĩha omoko kombandu yakuãla yo kilu lieve, okuti va ponda losipata, lonjala, lefengi li ponda kuenda ovinyama via tema vio kilu lieve.
utala wondavululi, 3.2017 kem. 4 ocin. 8-10
Alume Vakuãla va Endela Kotuvalu Va Lomboloka Nye?
Okavalu kakuãla ka lomboloka olofa omo liovoveyi kuenda ovitangi vikuavo. Noke yunyamo wo 1914, uvei umue u tukuiwa hati, grípe Espanyola wa ponda omanu valua. Citava okuti ci soka 500 kolohuluwa viomanu va kuata uveyi waco. Kotembo yaco pokati komanu 3, omunu 1 wa kuatiwa luveyi waco!
Uveyi wo grípe Espanyola wa kala lika efetikilo. Olonoño vi popia okuti kocita ca 20, omanu valua va fa omo liuveyi wocingongo. Toke koloneke vilo, ndaño okuti uloño watiamẽla koku sakula u kasi oku amamako, ovoveyi ndeci, o AIDS, o tumbe kuenda o malária, a kasi oku ponda omanu valua.
Omo liaco, omanu valua va siata oku fa, omo liovoyaki, onjala kuenda ovoveyi. Onjembo ka yi kuete ohenda momo, yi kasi oku amamako oku tambula omanu.
Oku Konomuisa Lutate Ovina vi Sangiwa Vembimbiliya
(Esituluilo 4:4) Ocalo ca ñualiwa lovialo 24 kuenje nda mola 24 kakulu va tumãla kovialo viaco okuti va wala uwalo u yela kuenda kovitue viavo kua kala akolowa ulu.
(Esituluilo 4:6) Kovaso yocalo kua kala cimue ci kasi ndociva covava ca setahãla ovitulu. Vokati kocalo kuenda konele yayo kua kala oviendalomuenyo vikuãla vieyuka ovaso konyima lo kovaso.
revelação seu grandioso clímax kem. 76-77 ocin. 8
Ulamba Wocalo ca Yehova Kilu
8 Yoano wa kũlĩhile okuti kosimbu kua nõliwa ovitunda oco vi vumbe votavernakulu. Omo liaco, wa komõha lolondaka a soneha viokuti: “Ocalo ca ñualiwa lovialo 24 kuenje nda mola 24 kakulu va tumãla kovialo viaco okuti va wala uwalo u yela kuenda kovitue viavo kua kala akolowa ulu.” (Esituluilo 4:4) Ocili okuti kua nõliwavo eci ci soka 24 kakulu va tumãla kovialo viaco kuenda va wala akolowa ndolosoma. Velie akulu vaco? Olombuavekua vina via pinduiwa haivo va tumãla kovialo vina Yehova a va likuminyile. Tua ci kũlĩha ndati?
revelação seu grandioso clímax kem. 80 ocin. 19
Ulamba Wocalo ca Yehova Kilu
19 Oviluvu evi vi lomboloka nye? Ocinjonde cimue ca lomboluiwa luprofeto Esekiele ci tu kuatisa oku kuata etambululo. Esekiele wa mola Yehova vekãlu limue kovailu muna a kala oku endelamo loviluvo vina via kuatele esetãhalo limuamue via tukuiwa la Yoano. (Esekiele 1:5-11, 22-28) Noke Esekiele wa mola vali ekãlu liaco kocalo kuna kua kala oviluvo. Kuenje wa tu kula oviluvo viaco okuti vakeruvi. (Esekiele 10:9-15) Oviluvo vikuãla Yoano a mola, vi lomboloka vakeruvi valua va Suku okuti oviluvo via velapo Vocisoko caye co kilu. Yoano poku mola vakeruvi va tumãla konele ya Yehova, ka ca kaile ocina cimue co kaliye momo, kesokiyo liotavernakulu yosimbu kua kala vakeruvi vavali va pangiwa lulu va kala kilu liocikasia covisila, vana va lombolokele ocalo ca Yehova. Pokati ka vakeruvi vaco, Yehova wa enda oku eca ovihandeleko ku va Isareli.—Etundilo 25:22; Osamo 80:1.
(Esituluilo 5:5) Umue pokati kakulu wa ndi sapuila hati: “Ku ka lile. Tala! Ohosi yocikoti ca Yuda, yo kepata lia Daviti, wa yula oco a iñulule ociña loku upa asitikilo aco epanduvali.”
linga ondonge kem. 36 ocin. 5-6
“Hosi Yokepata Lia Yuda”
5 Ohosi ocinyama cimue ci kuete utõi walua. Anga hẽ wa muile ale ohosi? Citava okuti eci wa yi mola ya yikiwila kocitali covinyama kuenje wa kuata usumba. Eci ya ku tulukila, wa limbuka okuti ka yi kuete usumba. Embimbiliya li popia okuti “ohosi onõi pokati kovinyama, ka yi pambukila cimue.” (Olosapo 30:30) Utõi wa Kristu u sokisiwa lutõi wohosi.
6 Tu konomuisi ndomo Yesu a lekisa utõi volonjila vitatu: Poku teyuila ocili, poku teyuila esunga kuenda poku pandikisa kalambalalo. Tu ka li longisavo ndomo tu pondola oku setukula Yesu poku lekisa utõi.
Oku Tangiwa Kuembimbiliya
(Esituluilo 4:1-11) Noke yovina evi, nda mola epito lia yikuka kilu kuenda ondaka yatete nda yeva okuti ya vangula lame, ya soka lolumbeta, yu ya popia yiti: “Enju kulo, oco hu lekise ovina vi laika oku pita.” 2 Kuenje vonjanja yaco ndeya oku kala vunene wespiritu sandu kuenje tala! ocalo cimue ca tumbikiwa pocitumãlo cayo kilu kuenda umue wa tumãla kocalo caco. 3 U wa tumãlako wa setahãla ewe lio jaspe lewe lio sardio kuenda ocalo ca ñualiwa lolukongolo lua setahãla ewe lio emeralda. 4 Ocalo ca ñualiwa lovialo 24 kuenje nda mola 24 kakulu va tumãla kovialo viaco okuti va wala uwalo u yela kuenda kovitue viavo kua kala akolowa ulu. 5 Kocalo kua tunda oviliakulo, olondaka kuenda ovilemĩlo; kua kalavo olondiyelo epanduvali via taimila kovaso yocalo, okuti vi lomboloka aspiritu epanduvali a Suku. 6 Kovaso yocalo kua kala cimue ci kasi ndociva covava ca setahãla ovitulu. Vokati kocalo kuenda konele yayo kua kala oviendalomuenyo vikuãla vieyuka ovaso konyima lo kovaso. 7 Ocendalomuenyo catete ca setahãla ohosi, ocendalomuenyo cavali ca setahãla ongombe, ocendalomuenyo catatu ci kuete ocipala comunu, ocendalomuenyo cakuãla ca setahãla ongonga. 8 Oviendalomuenyo viaco vikuãla, ocendalomuenyo locendalomuenyo ci kuete avava epandu; ovio vieyuka ovaso kolonele viavava lo vemehi. Kuenje utanya luteke va popia vati: “O kola, o kola, o kola Yehova Suku, Ukuonene Wosi, una wa kala, o kasi kuenda iya.” 9 Olonjanja viosi eci oviendalomuenyo viaco vi eca ulamba lesivayo kuenda olopandu ku Una wa tumãla kocalo, okuti Una o kasi lomuenyo oloneke vi enda ño-o hũ ka vi pui, 10 akulu 24 va kekamẽla Una wa tumãla kocalo loku fendela Una o kasi lomuenyo oloneke vi enda ño-o hũ ka vi pui kuenda va imba akolowa avo kovaso yocalo loku popia vati: 11 “A Yehova Suku yetu, ove o sesamẽla oku tambula ulamba, lesivayo kuenda unene, momo ove wa lulika ovina viosi, ovio vi kasilili kuenda via lulikiwa omo liocipango cove.”