Ono Yovipama Viohongele Ekalo Lietu Tuakristão Kuenda Oku Kunda
OSEMANA 7-13 YELOMBO
OVOKUASI A SANGIWA VONDAKA YA SUKU | 1 SAMUELE 12-13
“Oku Litunula Kutuala Kelaviso”
Utala Wondavululi, 1/8/2000 kem. 21 ocin. 17
Oku Litunula Kutuala Kelaviso
17 Oku ci vanja ño lonjanga ci mõleha soketi ovilinga via Saulu via sungulukile. Noke yovina viosi, omanu va Suku veya oku “sakalala,” kumue ‘loku suvala,’ kuenda va kuata usumba walua omo ka vakuatele vali elavoko lalimue. (1 Samuele 13:6, 7) Ocili okuti, ka civĩko oku pita kovaso oku linga cimue nda ekalo liaco li kisika okuti te ca lingiwa. Ivaluka okuti, Yehova o pondola oku tala eci ci kasi vutima kuenda oku limbuka eci ci tu vetiya oku linga cimue. (1 Samuele 16:7) Omo liaco, eye mbi wa mõla cimue ku Saulu okuti ka ca sonehiwile Vembimbiliya. Ndeci, Yehova pamue wa limbuka okuti ekambo liepandi Saulu a kuata lia vetiyiwa lepela. Citava okuti Saulu co sakalaisa calua omo okuti, eye wa kala soma ya va Isareli vosi, pole te wa kevelela umue okuti kokuaye wa kala ndukulu umue uprofeto wa lenda! Onjanja yaco eyi Saulu wa sima hati, oku cilua kua Samuele ku wihã omoko yoku linga lovaka aye muẽle upange waco kuenda oku pembula ovilongua atambuile. Nye ceya okuiyako noke? Samuele ka sanjukilile elinga lia Saulu. Pole, wa kangisa Saulu loku sapuila hati: “Cilo puãi uviali wove ka u tumãla. . . . Momo ove kua lingile eci [Yehova, NW] a ku handeleka.” (1 Samuele 13:13, 14) Yimue vali onjanja, oku litunula kuatuala kelaviso.
Utala Wondavululi, 1/7/2007 kem. 20 ocin. 8
Yehova o Sanjukila Epokolo Liove
8 Ulandu wa Soma Saulu ndomo wa sonehiwa Vembimbiliya, u lekisa esilivo liepokolo. Saulu kefetikilo liusoma waye, wa liketisile calua kuenda wa kala osoma yimue yomboka, kuenje ‘wa litendele okuti o sule.’ Pole, vokuenda kuotembo, epela kuenda ovisimĩlo vĩvi, vio vetiya oku li nõlela onjila yaye muẽle. (1 Samuele 10:21, 22; 15:17) Onjanja yimue, Saulu wa kala oku lavoka oku linga uyaki la va Filisiti. Noke Samuele wo handelekele oku u kevelela toke eci a tiuka koku eca ocilumba ku Yehova loku u lekisa onjila a sukila oku kuama. Pole, omo okuti Samuele wa kala oku cilua, omanu va fetika oku lisandola. Eci Saulu a ci mola, wa nõlapo oku eca “ocilumba coku pia elisi.” Esino liaye lia sumuisa Yehova. Eci Samuele a pitila, Saulu ka tavele oku limbuka oku lueya kuaye. Kuenje, wa popia hati, omo okuti Samuele wa kala oku cilua, eye wa nõlapo oku eca ocilumba ku Yehova oco a kuatisiwe lohenda yaye. Saulu wa simĩle okuti, oku eca ocilumba oco ocina ca velapo okuti, oku pokola konumbi ya Samuele yoku u talamẽla toke eci a tiuka koku eca ocilumba caco, ku sule. Pole, Samuele wo sapuila hati: “Wa linga cĩvi. Kua pokuile kocihandeleko ca Yehova, Suku yove, cina a ku handeleka.” Omo liaco, wa tundisiwa komangu yusoma omo liesino liaye.—1 Samuele 10:8; 13:5-13.
Ovina vi Sangiwa Vembimbiliya
Utala Wondavululi, 15/7/2011 kem. 14 ocin. 15
Ove hẽ o ka Kuama Olonumbi Via Yehova Viocisola?
15 Anga hẽ, omanu vaco va kuatele ovisimĩlo viokuti hĩse oku kolela osoma yomunu okuti ku Yehova haicoko? Nda oco va simĩle, va kala oku kuama ovina viesanda! Kuenda va kala kohele yoku tava kovina vialua viesanda vi tunda ku Satana. Olosoma viaco nda via va yapuisila kefendelo lioviteka. Vakuakufendela oviteka, va yapuisiwa lovisimĩlo viokuti oku kolela kolosuku vi letiwe vina via tungiwa loviti, ale lovawe, oco ca velapo, okuti oku kolela ku Yehova Suku, una wa lulika ovina viosi haeye ka muiwa lovaso ci sule. Pole, ndomo upostolo Paulu a ci popia, oviteka ‘ka vi kuete esilivilo.’ (1 Va Kor. 8:4) Ovio ka vi lete, ka vi yevite, ka vi vangula, kuenda ka vi lingi cimue. Ove o pondola oku vi mola kuenda oku vi kuata, pole, poku vi fendela, ci lekisa okuti o kasi oku kuama ovina viesanda, haivio viuveke vi ka ku nenela ovitangi.—Osa. 115:4-8.
OSEMANA 14-20 YELOMBO
OVOKUASI A SANGIWA VONDAKA YA SUKU | 1 SAMUELE 14-15
“Oku Pokola Kua Velapo Okuti, Ocilumba ci Sule”
Utala Wondavululi, 1/7/2007 kem. 20 ocin. 4
Yehova o Sanjukila Epokolo Liove
Yehova omo okuti eye Ululiki wetu, ovina viosi tu kuete via tunda kokuaye. Anga hẽ kuli ocina cimue tu pondola oku eca kokuaye? Ocili okuti tu kuete ocina cimue ca velapo. Ocina caco nye? Etambululo, li sangiwa kolondaka via popia hati: “Kuata olondunge amõlange, sanjuisa utima wange, oco nambulule u o njimbula.” (Olosapo 27:11) Tu pondola oku eca ku Suku epokolo lietu. Ocili okuti, vosi yetu tu kuete ovitangi via litepa kuenda tua tunda kapata a litepa. Pole, nda tua pokola ku Yehova, tu eca etambululo kuhembi wa Satana wa popia hati, eci omanu va liyaka lovitangi, va liwekapo oku fendela Yehova. Omo liaco, tu kuete esumũlũho lioku situlula uhembi waco.
Perspicaz-3 kem. 114 ocin. 11
Epokolo
Ka kuli lacimue ci piñaiya epokolo kuenda ka tu pondola oku tambula ohenda ya Suku, nda ka tukuete ocituwa coku pokola. Samuele wa sapuila Soma Saulu hati: “Anga hẽ Yehova o sanjukila ovilumba vioku pia elisi lolombanjaile okuti oku pokola kondaka ya Yehova ci sule? Tala! Oku pokola kua velapo okuti, ocilumba ci sule kuenda oku yevelela kua velapo okuti, ulela wolomeme u sule.” (1Sa 15:22) Oku liwekapo oku pokola ci lomboloka oku yuvula ondaka ya Yehova, ci lekisa okuti omunu ka tava kuenda ka kolelele Kono yondaka yaye. Omunu wosi o liwekapo oku pokola ka litepele lomunu ukuakutãha ale una o fendela oviteka. (1Sa 15:23; sokisa la Ro 6:16.) Ocituwa coku pokola ci lekisiwa kovilinga; oku yuvula oku pokola ci lekisa oku tomba ono yalungulo. (Mat 21:28-32) Vana va sanjukila lika oku yeva loku tava ocili ca Suku, pole, ka va kapiko ovina vi sukiliwa, va kasi oku likemba ovo muẽle lalongiso esanda kuenda ka va tambula esumũlũho lalimue. (Tia 1:22-25) Omõla a Suku wa lekisa okuti ndaño muẽle vana va linga ovina eye a tuma, pole va vi linga lonjila yimue ka ya sungulukile, ka va ka iñila Vusoma kuenda va ka likaliwa.—Mat 7:15-23.
Ovina vi Sangiwa Vembimbiliya
Perspicaz-1 kem. 535
Ohenda
Oku tava kocisimĩlo cimue oco ku lekisiwe ohenda osimbu okuti oku ci linga ka ci likuata locipango ca Suku, ci nena ovitangi vialua. Eci ca situluiwa kueci ca pita la Soma Saulu. Ya pitĩlilepo otembo ya Suku yoku kangisa va Amaleke, omanu vatete va sandiliya oku yaka la va Isareli, noke yoku tunda kuavo Kegito. Saulu wa tambuile ocihandeleko cokuti, ku ka va kuatele ohenda. Poku tava kocisimĩlo coloñuatisi viaye, ka tẽlisile ocihandeleko ca Yehova. Omo liaco, Yehova wa nyẽhula Saulu ndosoma. (1Sa 15:2-24) Omunu wosi o likolisilako oku kuama olonjila viesunga via Yehova kuenda oku kala ukuacili Kokuaye okuti kovina vikuavo ci sule, eye ka ka linga eci ka ca sungulukile ndeci Saulu, kuenda ka ka pumba oku taviwa la Yehova.
OSEMANA 21-27 YELOMBO
OVOKUASI A SANGIWA VONDAKA YA SUKU | 1 SAMUELE 16-17
“Oku Liyaka Kuaco Kua Yehova”
Utala Wondavululi Wowiñi, 2016.5 kem. 11 ocin. 2-3
“Oku Liyaka Kuaco Kua Yehova”
Daviti wa sapuila Saulu ovina a linga lohosi kuenda okanyani. Anga hẽ, Daviti wa kala oku litunula? Sio. Daviti wa kũlĩhĩle eci co kuatisa oku yula ovinyama viaco. Eye wa popia hati: “Yehova una wa mopela kekasa liohosi kuenda kekasa liokanyani eye o mopela peka liu Filisiti u.” Saulu loku tava kocisimĩlo caco, wa tambulula hati: “Kuende. Suku a kale love.”—1 Samuele 17:37.
O yongola hẽ oku kuata ekolelo ndeli lia Daviti? Limbuka okuti Daviti ka lekisile lika okuti o kuete ekolelo. Eye wa kolelele ku Suku yaye omo liukũlĩhiso a kuata kuenda ovolandu. Eye wa kũlĩhile okuti Yehova Ukuakuteyuila kuenda o tẽlisa olohuminyo viaye. Nda tu yongola oku kuata ekolelo limuamue, tu sukila oku amamako oku lilongisa ovina viatiamẽla ku Suku Vembimbiliya. Nda tua kapako ovina tu lilongisa, tu ka kuata onima yiwa okuti yi ka pamisa ekolelo lietu.—Va Heveru 11:1.
Utala Wondavululi Wowiñi, 2016.5 kem. 11-12
“Oku Liyaka Kuaco Kua Yehova”
Toke cilo, etambululo Daviti a eca, li lekisa okuti eye wa kuatele ekolelo lia pama. Tu pondola oku sokolola umãlehe waco oku kalukila Goliata poku popia hati: “Ove wiya kokuange losipata lonjelia kuenda unga. Ame puãi njiya kokuove vonduko ya Yehova ukualohoka haeye Suku yolohoka via va Isareli una ove wa vayela.” Daviti wa kũlĩhĩle okuti unene womunu kuenda ovimãleho viuyaki ka vi kuete esilivilo. Goliata ka lekisile esumbilo ku Yehova Suku, kuenje Yehova wa ponduile oku eca etambululo limue kokuaye. Ndeci Daviti a ci popia, “okuliyaka kuaco kua Yehova.”—1 Samuele 17:45-47.
Daviti wa mola utunga wa Goliata kuenda ovimãleho viaye viuyaki. Pole, ka ecelele okuti ovina viaco viu lingisa usumba. Eye ka lingile ovina Saulu kumue lasualali vaye va linga. Daviti ka li sokisile la Goliata. Pole, wa sokisa Goliata la Yehova. Goliata wa lepele eci ci soka 2.9 kolometulu okuti, alume vakuavo va kala laye ci sule. Pole, anga hẽ wa kala unene calua okuti, Ululiki woluali luosi ci sule? Ndeci ci sokisiwa lomanu vosi, eye wa kala ndocipuka cimue okuti Yehova wa ponduile oku u kundula!
Utala Wondavululi Wowiñi, 2016.5 kem. 12 ocin. 4
“Oku Liyaka Kuaco Kua Yehova”
Afendeli va Suku koloneke vilo ka va lingi uyaki. Eci ca pita kosimbu. (Mateo 26:52) Pole, tu sukila oku setukula ekolelo lia Daviti. Ndeci eye a linga, tu sukila oku vumba lika Yehova loku u sumbila. Pamue tu kala ndu okuti ovitangi vietu vinene calua okuti etu tu sule. Pole, nda tua sokisa ovitangi vietu lunene ka u pui wa Yehova, ovio vitito calua. Nda tua nõla Yehova oco a linge Suku yetu loku kolela kokuaye ndeci Daviti a linga, ka kuli ocitangi lacimue ci pondola oku tu saluisa. Ka kuli lacimue ci pondola oku yula unene wa Yehova!
Ovina vi Sangiwa Vembimbiliya
Perspicaz-3 kem. 547
Saulu
Noke lia Daviti oku wavekiwa ndosoma ya va Isareli, Saulu espiritu lia Yehova lio tunda. Tunde opo, espiritu lĩvi lia tunda “ku Yehova lia kala oku u sakalaisa.” Omo okuti Yehova wo pa espiritu liaye ku Saulu, ca koka okuti espiritu limue lĩvi liu viala, loku koka okuti ka kuata vali ombembua yovutima, loku pongolola olonjongole viaye kuenda ka sokolola vali lonjila ya sunguluka. Ehonguo lia Saulu omo lioku yuvula oku pokola ku Yehova, lia lekisa ovisimĩlo vĩvi a kuata kuenda utima ka wa sungulukile, ci lekisa okuti ka tambuile vali eteyuilo liespiritu lia Suku. Omo okuti Yehova wa ecelela “espiritu lĩvi” oku viala loku lingisa usumba Saulu, olio lia tukuiwa okuti, “espiritu lĩvi lia tunda ku Yehova” noke akuenje va Saulu vo sapuila vati “espiritu lĩvi lia tunda ku Suku.” Umue pokati koloñuatisi viaye wa popia hati, Saulu wa pinga okuti Daviti o kala onjimbi yaye kelombe oco o lembeleke “eci espiritu lĩvi lia Suku” liu wila.”—1 Sa 16:14-23; 17:15.
OSEMANA 28 YELOMBO-3 YA KUPUPU
OVOKUASI A SANGIWA VONDAKA YA SUKU | 1 SAMUELE 18-19
“Amamako Lumbombe Eci o Kuata Ekalo Liwa”
Utala Wondavululi, 1/4/2004 kem. 27 ocin. 4
Kolela Kespiritu Lia Suku Eci o Liyaka Lovitangi
Noke, Daviti weya oku velisiwapo lomanu vofeka. Eye wa loñolohele calua koku sika ohalupa. Eteke limue, Soma Saulu wa tumĩle oku u vilikiya oco o sikileko ohalupa. Noke, Daviti wa ponda Goliata una asualali vo ko Isareli va kuatelele usumba. Kuenje wa yula olohoka via va Filisiti. Omanu va solele calua Daviti, kuenje vo wimbila ocisungo. Omo liaco, ukuenje wa soma wa lombolola hati, Daviti ‘wa loñolohele’ koku sika ohalupa. Eye wa kalavo ‘onõi haeye esualali, ukuotate koku vangula kuenda wa finile calua.’—1 Samuele 16:18; 17:23, 24, 45-51; 18:5-7.
Utala Wondavululi, 2018.01 kem. 28 ocin. 6-7
O Tẽla hẽ Oku Limbuka Etepiso li Kasi Pokati Komanu?
Omanu vamue omo lieposo, ongusu ale unene va kuete, va linga vakuepela. Vakuavo va linga vakuepela omo lioku loñoloha koku imba ovisungo, ale omo lioluhimo va kuete. Daviti ka kuatele lika uloño umosi eye wa kuata ovoloño aco osi a tukuiwa ndeti. Pole wa amamako oku lekisa umbombe komuenyo waye wosi. Noke yoku yula Goliata, Soma Saulu wa eca omõlaye ukãi oco a likuele la Daviti. Eye wa pula ndoco: “Ame nga elie, pamue vakuepata liange velie ndeci epata lia tate vi Isareli, okuti ame ndinga ondatembo yosoma?” (1 Samuele 18:18) Nye ca kuatisa Daviti oku amamako lumbombe? Daviti wa kuata ovikele vialua, lovoloño momo Yehova wa lekisa umbombe kokuaye kuenda wo kapeleko calua. (Osamo 113:5-8) Daviti wa limbukile okuti cosi a kuata ca tunda ku Yehova.—Sokisa 1 Va Korindo 4:7.
Ndeci Daviti a linga, afendeli va Yehova va siata oku likolisilako oku kala ambombe. Nye ci tu kuatisa oku ci linga? Ocina cimue ci tu kuatisa, ongangu ya Yehova. Ci komohĩsa calua oku kũlĩha okuti, omunu wa velapo Voluali Luosi, o lekisa umbombe. (Osamo 18:35) Handi vali, tu kuãi elungulo Liembimbiliya liokuti: “Wali ohenda locikembe, lumbombe, loku omboka kuenda epandi.” (Va Kolosai 3:12) Ocituwa cikuavo ci tu kuatisa, ocisola “ka ci lipandiya kuenda ka ci litunula.” (1 Va Korindo 13:4) Eci tu lekisa umbombe, tu kuatisa omanu oku kala akamba va Yehova. Ndeci ulume a pondola oku vetiyiwa oku vumba Yehova omo liovituwa viukãi waye, omanu valua va pondolavo oku lilongisa catiamẽla ku Yehova omo lioku limbuka umbombe wetu.—1 Petulu 3:1.
Ovina vi Sangiwa Vembimbiliya
Perspicaz-3 kem. 337 ocin. 4
Uprofeto
Ndaño okuti ovaprofeto va enda oku nõliwa lespiritu lia Yehova, pole, halonjanja viosiko va enda oku vangula loku vetiyiwa lespiritu sandu. Tete, espiritu lia Suku ‘lia enda oku va wila’ vapuluvi amue loku situlula asapulo a sukila oku sandekiwa. (Esk 11:4, 5; Mik 3:8) Eci ca enda oku va ĩha ongusu loku vetiyiwa oku vangula. (1Sa 10:10; Yer 20:9; Amo 3:8) Ovo ka va lingaile lika ovina ka via siatele, pole, olondaka kuenda ovilinga viavo via enda oku situlula unene lovisimĩlo vi komõhisa. Citava okuti, ci situlula esunga lieci va enda oku popela okuti, omanu vamue va kasi oku ‘imba owanji ndovaprofeto.’ (1Sa 10:6-11; 19:20-24; Yer 29:24-32; sokisa Ovl 2:4, 12-17; 6:15; 7:55.) Oku tiamisila utima kuenda ombili va kuatele yoku tẽlisa ocikele cavo, nda ca vetiya omanu oku sima okuti ovituwa va lekisa ka via siatele kuenda ka va sokolola, ndeci ca pita luprofeto umue wa lilekisa ku vakesongo vasualali eci Yehu a wavekiwa. Eci va limbuka okuti ulume waco wa kala uprofeto, vakesongo kasualali va tava lonjanga kesapulo liaye. (2Ol 9:1-13; sokisa Ovl 26:24, 25.) Eci Saulu a kala oku lambalala Daviti, wa ‘imba owanji nduprofeto,’ wa lula uwalo waye, kuenda wa pekela posi “luwalo wo kosi lika eteke liaco liosi kuenda uteke wosi,” citava okuti velivala lina Daviti a puluka. (1Sa 19:18–20:1) Eci ka ci lomboloka okuti otembo yosi ovaprofeto va enda oku lula uwalo wavo, momo ulandu Wembimbiliya u lekisa ocina ca litepa. Kovolandu akuavo avali, uprofeto wa lula uwalo waye locimãho cimue, oco a lekise onepa yimue yocitumasuku caye. (Isa 20:2-4; Mik 1:8-11) Esunga lieci Saulu a lulila, ci kaile okuti lioku situlula okuti eye omunu waño, poku lula uwalo waye wusoma, nda ekambo lioku lekisa esumbilo komoko kuenda kunene wa Yehova, nda ca kuata ocimãho cikuavo, ka ca lomboluiwile.
OSEMANA 4-10 YA KUPUPU
OVOKUASI A SANGIWA VONDAKA YA SUKU | 1 SAMUELE 20-22
“Ndomo tu Kala Ekamba Liwa”
Utala Wondavululi, 2019.11 kem. 7 ocin. 18
Pamisa Ukamba Wove la Vamanji Osimbu Esulilo ka Lieyile
Koloneke vilo, vamanji valua va kasi oku liyaka lovitangi viñi viñi. Ndeci, omanu valua va tala ohali omo liovilemawe, ale ovoyaki. Eci ku pita ovitangi viaco, valua pokati ketu tu yekisa vamanjetu volonjo vietu. Vamanji vakuavo, va kuatisa lovipako viavo. Pole, vosi yetu tu pondola oku pinga ku Yehova, oco a kuatise vamanjetu. Nda tua limbuka okuti manji umue wa sumua, pamue ka tu kũlĩha eci tu popia, ale ceci tu linga. Pole, vosi yetu tu pondola oku kuatisa. Ndeci, tu pondola oku pita otembo yimue lekamba lietu. Tu pondolavo oku yevelela locisola eci eye a vangula. Handi vali, tu pondola oku u sapuila ocisonehua cimue tu sole calua. (Isa. 50:4) Ca velapo vali ceci okuti, eci akamba vove va sukila ekuatiso, ove eca ekuatiso liaco.—Tanga Olosapo 17:17.
Utala Wondavululi, 15/2/2008 kem. 8 ocin. 7
Endela Volonjila Via Yehova
Suku o yongola okuti, tu kala akamba va koleliwa. (Olosap. 17:17) Yonatão omõla a Soma Saulu, wa kala ekamba lia Daviti. Eci Yonatão a yeva okuti Daviti wa ponda Goliata, “wa lipandeka lutima wa Daviti kuenje wo sola ndomuenyo waye muẽle. Yonatão yu wa lisila ocisila la Daviti omo wo sola ndomuenyo waye muẽle.” (1 Sam. 18:1, 3) Yonatão wa lungula Daviti eci Saulu a yonguile oku u ponda. Noke lia Daviti oku tila, Yonatão wo sandiliya kuenda wa linga laye ocisila. Saulu wa yonguile oku ponda Yonatão omo lioku u sapuila catiamẽla ku Daviti. Pole, Eci Yonatão a lisanga la Daviti, va pamisa vali ukamba wavo. (1 Sam. 20:24-41) Eci va li sanga onjanja ya sulako, Yonatão wa pamisa ovaka a Daviti “vonduko ya Suku.”—1 Sam. 23:16-18.
Utala Wondavululi, 15/10/2009 kem. 19 ocin. 11
Tuamamiko Oku Lekisa Ukamba Voluali Lulo ka lu Kuete Ocisola
Kala ukuacili. Salomone wa soneha hati: “Ekamba li sola olonjanja viosi, kuenje li linga manjove koloneke viohali.” (Olosap. 17:17) Eci Salomone a soneha olondaka evi, wa ivaluka ukamba isiaye Daviti a kuata la Yonatão. (1 Sam. 18:1) Soma Saulu, wa yonguile okuti, omõlaye Yonatão o piñala omangu yusoma ko Isareli. Pole, Yonatão wa tava okuti, Yehova o nõla Daviti oco a linge osoma. Eci Daviti a vialekiwa komangu yusoma, Yonatão ka temẽle, ndeci Saulu a linga. Eye, ka sumuile omo liesumũlũho Daviti a tambula, kuenda ka tavele kalundi Saulu a linga atiamẽla ku Daviti. (1 Sam. 20:24-34) Anga hẽ, tua siata oku kuama ongangu ya Yonatão? Nda akamba vetu va tambula ovikele vekongelo, tua siata hẽ, oku sanjuka? Tua siata hẽ, oku kuatisa akamba va liyaka lovitangi? Nda va tu sapuila ondaka yimue yĩvi yatiamẽla kekamba lietu, tu tava hẽ lonjanga kesapulo liaco? Tu kuete hẽ ocituwa coku teyuila ekamba lietu ndeci Yonatão a linga?
Ovina vi Sangiwa Vembimbiliya
Utala Wondavululi, 1/6/2005 kem. 32 ocin. 5
Atosi Avelapo Velivulu Liatete Lia Samuele
21:12, 13. Yehova o yongola okuti, eci tu liyaka lovitangi, tu kuatisiwa lolondunge vietu via pindisiwa londaka yaye. Momo vondaka yaye mu sangiwa ukũlĩhĩso wasuapo kuenda olondunge viocili. (Olosapo 1:4) Handi vali, tu kuatisiwavo lakulu vekongelo.
OSEMANA 18-24 YA KUPUPU
OVOKUASI A SANGIWA VONDAKA YA SUKU | 1 SAMUELE 23-24
“Kevelela ku Yehova Lepandi”
Utala Wondavululi, 1/4/2004 kem. 29 ocin. 8
Kolela Kespiritu Lia Suku Eci o Liyaka Lovitangi
Daviti wa kala lekolelo kuenda epandi. Kuenje, ka tavele oku ponda Saulu. Eci Saulu a tunda veleva, Daviti wo sapuila hati: “Yehova a linge onganji pokati kange love. Yehova a ku fetuluinyile, ame eka liange puãi ka li ku olohela.” (1 Samuele 24:12) Daviti wa kũlĩhĩle okuti Saulu wo lueyela. Pole, ko lingile eci cĩvi kuenda wa lekisa esumbilo kokuaye. Kuenje, ovitangi viaco wa vi eca peka lia Yehova.—1 Samuele 25:32-34; 26:10, 11.
Utala Wondavululi, 1/6/2004 kem. 22-23
Omuenyo Wove hẽ wa Tamba Kekalo Lieteke Leteke?
Etosi liatatu lieli okuti, ka tu ka kuami ovina ka vi likuata lolonumbi Viembimbiliya oco tu tetulule ocitangi cimue, pole tu koleli Yehova. Ndonge Tiago wa soneha hati: “Eceleli okuti epandi li tẽlisa ocimãho calio okuti, vu kanguka kuenda vu kala ciwa kovina viosi vu linga kuenje lacimue cu kambeli.” (Tiago 1:4) Tu eceleli okuti epandi li tẽlisa “ocimãho calio” poku pandikisa loseteko yimue toke kesulilo, okuti ka tu sandi ovina ka vi likuata lolonumbi Viembimbiliya oco tu yovuiwe kovitangi viaco. Ekolelo lietu li ka setekiwa loku kanguiwa, oco li situlule unene wa Yehova woku tu kuatisa. Yosefe la Daviti va kuatavo epandi liaco. Ka va sandele oku kuama onjila yimue yoku potolola ovitangi viavo okuti nda ya va kokela oku pumba ohenda ya Yehova. Pole, va ecelela okuti va kuatisiwa lovitangi viavo. Va kolelele ku Yehova kuenda va tambula asumũlũho alua omo lionjila va kuama! Vosi yavo va tumiwa la Yehova oco va yovole loku songuila afendeli vaye.—Efetikilo 41:39-41; 45:5; 2 Samuele 5:4, 5.
Etu tu pondolavo oku liyaka lovitangi vimue vi tu vetiya oku kuama ovina ka vi likuata lolonumbi Viembimbiliya. Ndeci, anga hẽ ove wa sumua omo okuti kua sangele omunu o yongola oku kuela laye? Nda oco, yuvula o seteko yu ku vetiya oku sinila ocihandeleko ca Yehova coku kuelela “lika vu Ñala.” (1 Va Korindo 7:39) O kuete hẽ ovitangi volohuela viove? Ko ka kuame ocituwa coluali, coku litepa kuenda oku li nyãla, pole sandi oku potoluila kumosi ovitangi viaco. (Malakia 2:16; Va Efeso 5:21-33) O kuete hẽ ocitangi coku tekula epata omo liekambo liolombongo? Voku kolela ku Yehova, mua kongela oku yuvula oku tava ovopange ana okuti ka a sungulukile oco o kuate olombongo. (Osamo 37:25; Va Heveru 13:18) Omo liaco, vosi yetu tu sukila oku likolisilako oco tu kuatisiwe lekalo liomuenyo wetu, loku likolisilako oco Yehova a tu sumũlũise. Loku kuama onjila yaco, tu nõlipo oku talamẽla oco Eye a tu lekise onjila ya sunguluka yoku tetulula ocitangi caco.—Mika 7:7.
Ovina vi Sangiwa Vembimbiliya
Utala Wondavululi, 2017.11 kem. 27 ocin. 11
Ku ka Ecelele Okuti Cimue ci ku Tateka Oku Tambula Onima
Oco tu yuvule esepa kuenda onya, tu sukila oku kala vakuacisola kuenda vakuahenda. Ondaka ya Suku yi popia okuti: “Ocisola ci pandikisa kuenda ci lingainga eci ciwa. Ocisola ka ci kuete onya.” (1 Va Korindo 13:4) Onjila yimue yoku yuvula esepa oku kala vutima wetu, oku tenda ovina ndomo Yehova a vi tenda. Yehova o tenda vamanji vosi vekongelo ndetimba limuamue. Embimbiliya li popia okuti: “Nda ocimatamata cimue ci pandiyiwa, ovimatamata viosi vi yolelela kumuamue laco.” (1 Va Korindo 12:16-18, 26) Nda vamanjetu, va sanjuka omo liocina cimue ciwa, etu tu sanjukavo, ka tu va kuatela onya. Sokolola ongangu yiwa ya Yonatão omõla a Saulu. Eci Daviti a nõliwa oco a linge osoma, Yonatão ko kuatelele esepa. Pole, wo vetiya kuenda wo kuatisa. (1 Samuele 23:16-18) Ndeci Yonatão a linga, tu sukilavo oku kala vakuacisola kuenda vakuahenda.
OSEMANA 25 YA KUPUPU–1 YA KUPEMBA
OVOKUASI A SANGIWA VONDAKA YA SUKU | 1 SAMUELE 25-26
“Ove hẽ wa Siata oku Linga Ovina Lonjanga Okuti ku Sokolola Vali?”
Setukuli Ekolelo kem. 78 ocin. 10-12
Eye wa Lekisa Olondunge
Asualali vaco va tata ndati angombo va Nabala? Ca lelukile oku punda olomeme kokuavo pole, ka va ci lingile. Ovo va kala ndocimbaka ci teyuila olomeme kuenda akuenje va Nabala. (Tanga 1 Samuele 25:15, 16.) Olomeme langombo va kala kohele yovina vialua vi koka ohele. Olongave vio kombuelo yo Isareli, via kala ocipepi, lovingumba kuenda ovimunu via enda oku nyana olonjanja vialua.
Oku eca okulia kalume vaco va kala vekalasoko ca sukilile upange walua. Omo liaco, Daviti wa tuma olomunga ku Nabala oku pinga ekuatiso. Daviti wa nõla epuluvi liwa. Otembo yaco, ya kala yocipito coku pemũla olomeme, kuenda kovipito viaco omanu va enda oku lipoka. Daviti wa nõlavo olondaka via sunguluka kuenda wa lekisa esumbilo. Omo wa limbukile okuti Nabala wa kala ukulu wendamba, wa lekisa esumbilo kokuaye poku litukula hati ‘omõlove Daviti.’ Oco hẽ Nabala wa tambulula ndati?—1 Sam. 25:5-8.
Nabala wa temẽle calua! Ukuenje una tua tukula kefetikilo, wa sapuila Avigaile olondaka via Nabala hati: ‘Cime cetu wa va kelohãila.’ Nabala omo lioku tatama kuaye, wa fetika oku hoyela ombolo, ovava kuenda ositu. Eye wa sepula Daviti loku u popia hati wa tila. Omo liaco, wa kuata ovisimĩlo ndevi via Saulu una wa suvukile Daviti. Lomue pokati kavo wa kuata ovisimĩlo ndevi via Yehova. Suku wa solele calua Daviti, kuenda ko tendele ndupika umue ukuesino, pole wo tendele okuti wa laikele oku linga o soma yo ko Isareli.—1 Sam. 25:10, 11, 14.
Setukuli Ekolelo kem. 80 ocin. 18
Eye wa Lekisa Olondunge
Eye wa likapa eko liovina viosi via pita kuenda wa pinga ku Daviti oco o wecele. Avigaile wa kũlĩhĩle ciwa okuti ulume waye wa kambele olondunge, ndomo onduko yaye yi ci lekisa, kuenje oku u kangisa, nda ca sepuisa ño unu wa Daviti. Avigaile wa kolelele okuti Daviti onumiwa ya Yehova, kuenda wa kala oku “yaka kovita via Yehova.” Eye wa lekisavo okuti wa kũlĩhĩle ohuminyo Yehova a linga ku Daviti yatiamẽla kuviali, poku popia hati: ‘Yehova wa ku nõla oco o kale osoma ya va Isareli.’ Handi vali, wa pinga ku Daviti oco ka ka linge ocina cimue ca laikele oku u nenela eko liosonde, ale ‘oku kutisiwa osõi,’ pamue oku linga ocina cimue ci koka oku kuata utima wa lema. (Tanga 1 Samuele 25:24-31.) Olondaka viaco vi vetiya calua!
Ovina vi Sangiwa Vembimbiliya
Setukuli Ekolelo kem. 80 ocin. 16
Eye wa Lekisa Olondunge
Anga hẽ eci ci lomboloka okuti Avigaile ka sumbilile ulume waye okuti, eye wa kala usongui? Lakamue. Ivaluka okuti, Nabala wa tata lãvi ombuavekua ya Yehova, kuenda elinga liaye, nda lia nenela olofa omanu valua vakuanjo ya Nabala. Nda Avigaile ka yayuileko oku tetulula ocitangi caco, anga hẽ nda ka kuatele eko omo lielinga liulume waye? Eye wa sukilile oku sumbila tete Suku okuti, veyaye ci sule.