Wa ci Kũlĩha?

Momo lie ca sungulukilile okuti olonende vivali kuenda ivuvu vivali violopomba vi taviwa ndocilumba?

VEMẼHI Liocihandeleko, ci kale olonende kuenda ivuvu violopomba via enda oku taviwa ndocilumba ku Yehova. Olonjila evi vivali, olonjanja viosi via tukuiwila kumosi vocihandeleko catiamẽla kocilumba kuenda yimue pokati kavio ya ponduile oku piñala pocitumãlo cukuavo. (Ovis. 1:14; 12:8; 14:30) Momo lie ca kuatela esilivilo? Esunga liaco lieli okuti, olonende halonjanja viosiko via enda oku sangiwa. Momo lie?

Olonende olonjila vimue okuti, vi linga ovongende alua, vi sangiwa kolonepa vimue vio Isareli vokuenda kuolosãi viowuya. Kosãi ya Mbalavipembe, ovio via siata oku enda kombuelo yolofeka vina vi linga owuya, vi tiuka lika ko Isareli votembo yokuenye. (Ocis. ca Sal. 2:11, 12; Yer. 8:7) Eci ca lombolokele okuti ko Isareli ka ca lelukile oku eca olonende ndocilumba vokuenda kuolosãi vio wuya.

Pole, ivuvu violopomba ka via endaile oku linga ovongende, omo liaco, ko Isareli kua enda oku kala olonjila viaco anyamo osi. Handi vali, ivuvu via enda oku fukiwa. (Ci sokisa la Yoano 2:14, 16) Ndomo ca lombolola elivulu limue losapi hati: Ovikũla Kuenda Ovinyama Viokosimbu, “Kovambo osi o ko Palestina va enda oku fuka ivuvu. Omunu lomunu vonjo yaye wa kuatele okanjo kivuvu, ale ututa umue vocimanu okuti omo mu kala ivuvu viaco. (Ci sokisa la Isaya 60:8)

Yehova wa lekisa okuti, eye ukuacisola kuenda wa sunguluka poku tava ocilumba colonjila via kalapo vepuluvi liaco ku va Isareli vokuenda kunyamo.