Wa ci Kũlĩha?

Momo lie va Isareli va endaile oku eca ovilombo poku yongola ufeko?

KOSIMBU ovilombo via enda oku eciwa kepata lia ndombua vepuluvi lina okuti kua taviwa oku likuela. Voku eca ovilombo mua kongelele ovikuata viondando ya tĩla, ovinyama, ale olombongo. Olonjanja vimue ovilombo via enda oku fetiwa poku linga upange umue, ndeci ca pita la Yakoba wa tava oku talavayela isia ya Rahele anyamo epanduvali, oco o kuele. (Efet. 29:17, 18, 20) Cipi ca kala ocimãho coku eca ovilombo?

Umue ukuakukonomuisa Embimbiliya o tukuiwa Carol Meyers wa popia hati: Oku eca ovilombo ci pondola oku feta kepata lia ndombua upange va kuata woku tata omõla, okuti ocina cimue ca kuata esilivilo lialua kapata ana okuti [olongunja.] Oku eca ovilombo ci kuatisa koku tokekisa epata lina li kueliwa. Apata aco, a pondola oku likuatisa pokati vokuenda kuotembo yovitangi. Handi vali, ovilombo uvangi wokuti ukãi wa yonguiwa wa laikele oku siapo olonjali viaye vio tata kuenje enda kulume waye.

Oku eca ovilombo, ka ci lomboloka okuti ukãi o kasi ndocikuata cimue ca landiwa, ale ca landisiwa. Elivulu limue losapi hati, Antigo Israel—Vida e Instituições lia popia hati: “Ekisika eli lioku eca ovilombo violombongo, ale ocina cikuavo kepata liufeko, ca enda oku molẽha okuti olohuela via va Isareli via kala ndoku landa. Pole, oku eca [ovilombo] ci kasi ño ndoku tiula cimue kepata lia ndombua, handandoko ya fetiwa oku landa ukãi.”

Koloneke vilo, kolofeka vimue omanu handi va kasi oku amamako oku kuama oviholo viaco vioku eca ovilombo via ndombua. Eci olonjali Akristão va pinga ovilombo ovo va sukila oku ecelela okuti ‘esunguluko liavo li kũlĩhĩwa lomanu vosi” poku yuvula oku pinga ovina vialua. (Va Fil. 4:5; 1 Va Kor. 10:32, 33) Nda va ci linga, va ka lekisa okuti ovo ka va lingi “vakuakusola olombongo,” ale vakuacipululu. (2 Tim. 3:2) Handi vali, nda olonjali Akristão ka vi pingi ovilombo vialua enene, eci ka ci ka kisika ulume o kuela lufeko waco oku tiula uvala, oco a nganyale olombongo vi tẽla vioku feta ovilombo. Ale ulume o kuela lufeko waco, ka ka sukila oku siapo upange wakundi votembo yosi, omo okuti te wa sanda upange woku nganyala olombongo vialua viovilombo vioku yongola ufeko.

Kolonepa vimue violuali, oku eca ovilombo va kuama ocihandeleko cofeka. Konepa eyi, olonjali Akristão va pokola kocihandeleko caco. Momo lie? Momo Ondaka ya Suku yi kisika Akristão oku ‘pokola kolombiali’ kuenda oku pokola kovihandeleko vina okuti ka vi lipatãla lovihandeleko via Suku.—Va Rom. 13:1; Ovil. 5:29.