Kuatisa Usongui Wetu Yesu

1. Cipi ocipango ca Yehova koloneke vilo?

OCIPANGO ca Suku koloneke vilo, ceci okuti olondaka viwa Viusoma vi kundiwa koluali luosi. (Mar. 13:10; 1 Tim. 2:3, 4) Upange waco wa Yehova kuenda owo u kuete esilivilo omo okuti eye wa nõla Omõlaye wa soliwa oco a songuile upange waco. Tu koleli okuti, omo lioku songuiwa la Yesu, upange woku kunda u ka tẽlisa eci Yehova a yongola osimbu handi esulilo ka lieyile.—Mat. 24:14.

2. Nye tu konomuisa vocipama cilo?

² Vocipama cilo, tu konomuisa ndomo Yesu pocakati ‘cukuenje wa kolelua haeye wa lunguka,’ a kasi oku eca olonumbi vi sangiwa Vondaka ya Suku kuenda oku sokiya olondonge vi kasi oku linga upange wa velapo woku kunda koloneke vilo. (Mat. 24:45) Tu konomuisavo ndomo omunu lumunu pokati ketu, a pondola oku kuatisa Yesu lukuenje wa kolelua.

YESU O SONGUILA UPANGE WOKU KUNDA

3. Unene upi Yesu a tambula?

³ Yesu eye usongui wupange woku kunda. Tua ci kũlĩha ndati? Osimbu eye ka endele handi kilu, wa li sanga lolondonge vimue vakuekolelo kumunda yo Galilea. Kuenje wa va sapuila hati: “Unene wosi wo kilu lowu wo posi, wa nyĩhiwa.” Noke wamisako hati: “Kuendi, ka longisi omanu vo kolofeka viosi.” (Mat. 28:18, 19) Kuenje pokati kovina vikuavo, Yesu wa tambula unene woku songola upange woku kunda.

4. Momo lie tu kolela okuti Yesu handi o kasi oku songuila upange woku kunda?

⁴ Yesu wa popele okuti upange woku kunda kuenda woku longisa omanu, wa laikele oku lingiwa “kolofeka viosi” kuenje eye wa ponduile oku kala kumue lolondonge viaye “oloneke viosi, toke kesulilo lioluali.” (Mat. 28:20) Olondaka evi vi lekisa ciwa okuti, upange woku kunda wa laikele oku amamako oku songuiwa la Yesu toke koloneke vilo.

5. Tu kuatisa ndati koku tẽlisiwa Olosamo 110:3?

⁵ Yesu ka sakalalele okuti kua ponduile oku kala olondingupange vitito vokuenda kuoloneke via sulako. Eye wa kũlĩhĩle okuti olondaka viocitumasuku vi sangiwa kolosamo viokuti: “Omanu vove va ka lieca lutima wosi keteke liunene wolohoka viove,” via laikele oku tẽlisiwa. (Osa. 110:3) Nda ove o kasi oku kunda olondaka viwa, o kasi oku kuatisa Yesu, lukuenje wa kolelua kuenda o kasi oku kuatisa koku tẽlisiwa kuocitumasuku eci. Upange u kasi oku amamako, pole, kuli ovitangi vimue.

6. Vipi vimue pokati kovitangi akundi Vusoma va siata oku liyaka lavio koloneke vilo?

⁶ Vimue pokati kovitangi akundi Vusoma va siata oku liyaka lavio, elambalalo. Olonanguluke, asongui vatavo kuenda vakuapulitika, va siata oku linga alundi alua atiamẽla kupange wetu. Nda okuti apata etu, omanu tua kũlĩha kuenda vana tu talavayela kumosi va yapuisiwa lovohembi aco, citava okuti ovo va tu sapuila oco tu siepo oku vumba Yehova kuenda oku liwekapo oku kunda. Kolofeka vimue elambalalo lia linga ocina cimue ci koka usumba, momo ovanyãli vetu va siata oku saluisa vamanjetu kuenda oku va kapa vokayike. Ka ci tu komõhisa oku mola omanu oku tu tata lonjila ndeyi. Yesu wa popele okuti: “Vu ka suvukiwa lolofeka viosi omo lionduko yange.” (Mat. 24:9) Omo lioku pita voloseteko vialua viatiamẽla kesuvu, uvangi wokuti tua taviwa la Yehova. (Mat. 5:11, 12) Eliapu olio li kasi oku vetiya alambalalo aco. Pole, Yesu wa velapo kunene okuti Satana o sule! Lekuatiso lia Yesu, olondaka viwa vi kasi oku kundiwa komanu vokolofeka viosi. Tu konomuisi uvangi waco.

7. Uvangi upi o lete u sangiwa kelivulu Liesituluilo 14:6, 7 okuti u kasi oku tẽlisiwa?

⁷ Ocitangi cikuavo tua siata oku liyaka laco kupange woku kunda, ceci okuti omanu valua va vangula alimi a li tepa. Vocinjonde Yesu a eca kupostolo Yoano, eye wa popele okuti, koloneke vietu olondaka viwa via ponduile oku yula ocitangi eci. (Tanga Esituluilo 14:6, 7.) Ndamupi? Etu tua siata oku eca komanu apuluvi alua oku yeva esapulo Liusoma. Koloneke vilo, omanu voluali luosi va pondola oku tanga alivulu a kunamẽla Vembimbiliya vonumbi yetu yo jw.org, momo mu sangiwa eci ci pitahãla 1.000 kalimi! Kua taviwa oku pongoluiwa kuelivulu losapi hati: Sanjukili Omuenyo Otembo ka yi Pui!, lina lia sandekiwa kueci ci pitahãla 700 kalimi okuti olio li kuamiwa koku kuatisa omanu oku linga olondonge! Alongiso aco, a kunamẽla Vembimbiliya a siata oku sandekiwavo pocakati colovideo viangalavaliwa kuenda kalivulu obraile oco a kuatise olomeke. Etu tu lete oku tẽlisiwa kuocitumasuku eci Cembimbiliya. Omanu “vakualimi olofeka viosi,” va kasi oku lilongisa “elimi limue lia pua esanda,” okuti ocili Cembimbiliya. (Sak. 8:23; Sof. 3:9) Cosi eci, ci kasi oku tẽlisiwa vemẽhi liusongui Yesu Kristu.

8. Onima yipi tua siata oku kuata kupange woku kunda cilo?

⁸ Koloneke vilo, ci pitahãla 8.000.000 komanu va sangiwa kueci ci soka 240 kolofeka, va panga onepa kocisoko ca Yehova kuenda unyamo lunyamo ci soka ekũi kolohulukãi va siata oku papatisiwa! Ca velapo okuti etendelo li sule ceci okuti, olondoge viokaliye via siata oku kuata ovituwa Viukristão okuti oku ‘wala omunu wokaliye.’ (Va Kol. 3:8-10) Valua va siapo oku ambata omuenyo ka wa sungulukile, ungangala, olonepele kuenda ocituwa coku velisapo ofeka. Ocitumasuku ci sangiwa ku Isaya 2:4 cokuti, ovo ‘ka va ka lilongisa vali uyaki,’ ci kasi oku tẽlisiwa. Omo lioku likolisilako oku wala omunu wokaliye, ci tu kuatisa oku vetiya omanu oku iñila vocisoko ca Suku kuenda tu lekisa okuti tu londonge yusongui wetu Kristu Yesu. (Yoa. 13:35; 1 Pet. 2:12) Momo lie tua siatela oku kuata onima yaco? Momo Yesu o tu ĩha ekuatiso tu sukila.

YESU WA NÕLA UKUENJE UMUE WA KOLELUA

9. Ndomo ca tangiwa ku Mateo 24:45-47, nye Yesu a popele okuti ca leikele oku pita kotembo yesulilo?

⁹ Tanga Mateo 24:45-47. Yesu wa popele okuti kotembo yesulilo eye wa laikele oku nõla “ukuenje wa kolelua haeye wa lunguka,” oco ace olonumbi vi sangiwa Vondaka ya Suku. Kuenje tua lavokaile okuti ukuenje waco wa kolelua wa ponduile oku likolisilako calua koloneke vilo. Eci ca siata oku muiwa. Yesu wa siata oku talavaya locimunga caco citito calume olombuavekua, oco va ece kafendeli va Suku “olonumbi Viondaka ya Suku votembo ya sokiyiwa.” Alume vaco, ka va litendi okuti vacime cekolelo lia vakuavo. (2 Va Kor. 1:24) Pole, ovo va kũlĩha okuti Yesu Kristu eye ‘usongui kuenda kesongo’ komanu vaye.—Isa. 55:4.

10. Api amue pokati kalivulu a ku kuatisa oku tava oku endela vonjila yi tuala komuenyo ko pui?

¹⁰ Tunde kunyamo 1919, ukuenje wa kolelua wa siata oku pongiya alivulu alua okuti a siata oku eca epuluvi komanu valua oku lilongisa ocili Condaka ya Suku. Kunyamo 1921, ukuenje wa kolelua, wa sandeka elivulu losapi hati, A Harpa de Deus, oco li kuatise vana va lekisile onjongole kalongiso Embimbiliya. Vokuenda kuotembo kuapongiyiwa alivulu akuavo. Elivulu lipi lia ku kuatisa oku kũlĩha kuenda oku sola Isietu wo kilu? Lia kala hẽ elivulu, “Seja Deus Verdadeiro,” A Verdade Que Conduz à Vida Eterna, Poderá Viver Para Sempre no Paraíso na Terra, Ukũlĩhĩso u Tuala Komuenyo ko Pui, Embimbiliya li Longisa Nye? Embimbiliya li Pondola Oku tu Longisa Nye?, ale Sanjukili Omuenyo Otembo ka yi Pui! okuti elivulu liokaliye? Alivulu osi a-a, ocimãho cavio coku kuatisa omanu oku linga olondonge kotembo a sandekiwa.

11. Momo lie ci kuetele esilivilo kokuetu oku tambula okulia konepa yespiritu?

¹¹ Vana va fetika ndopo oku lilongisa Embimbiliya, havoko lika va sukila oku litekula konepa yespiritu. Vosi yetu tu sukila oku ci linga. Upostolo Paulu wa soneha ndoco: “Okulia kua kõla kuakulu.” Paulu wa popiavo okuti oku litekula kuaco konepa yespiritu ku ka tu kuatisa “oku tepisa pokati keci ciwa leci cĩvi.” (Va Hev. 5:14) Koloneke vilo via tĩla okuti omanu valua ka va lekisa ovituwa viwa, ka ci leluka oku pokola kolonumbi via Yehova. Pole, Yesu o lete ovina viaco kuenje eye o tu ĩha okulia konepa yespiritu, oco tu pamise ekolelo lietu. Tu tambula eteku liaco pocakati Condaka ya Suku Embimbiliya. Ukuenje wa kolelua, o pongiya kuenda eca okulia kuaco kuespiritu poku kuama olonumbi via Yesu usongui.

12. Ndeci ca linga Yesu, tu tenda ndati onduko ya Suku?

¹² Ndeci ca linga Yesu, tu lekisa esumbilo konduko ya Suku, momo eci oco eye a sesamẽla. (Yoa. 17:6, 26) Ndeci, kunyamo 1931 tua tambula onduko yokuti tu Lombangi Via Yehova kuenje poku ci linga ca lekisa ndomo onduko ya Suku yi kuete esilivilo lialua kokuetu kuenda tua yonguile oku kũlĩhiwa londuko ya Isietu wokilu. (Isa. 43:10-12) Kuenje kosãi ya Mbalavipembe yunyamo waco, onduko ya Suku ya fetika oku molẽha koñoño Yutala Wondavululi. Noke, Vembimbiliya li Kola—Epongoluilo Lioluali Luokaliye, lia kapa onduko ya Suku povitumãlo viosi vi sesamẽla. Eci ca litepa latavo Esanda, omo okuti va siata okupa onduko Yehova Vambimbiliya alua!

YESU O SOKIYA OLONDONGE VIAYE

13. Nye ci ku vetiya oku tava okuti Yesu o kasi oku songuila “ukuenje wa kolelua haeye wa lunguka,” koloneke vilo? (Yoano 6:68)

¹³ Pocakati ‘cukuenje wa kolelua haeye wa lunguka,’ Yesu wa tumbika ocisoko cimue palo posi, oco ci sandeke efendelo liocili. O liyevite ndati catiamẽla kocisoko eci? Poku tambulula, citava okuti o sokolola kolondaka viupostolo Petulu wa sapuila Yesu hati: “Kulie tu enda? Ove, ove o kuete olondaka viomuenyo ko pui.” (Yoa. 6:68) Pi nda tu kasi etaili nda ka tua kaile vocisoko ca Yehova? Lonjila eyi, Kristu wa tu ĩha ekolelo liokuti tu kuata ovina viosi tu sukila oco tu amameko lekolelo ku Suku. Eye o tu pindisavo oco tu tẽlise ciwa upange wetu woku kunda. Kuenje eye o tu kuatisa oku wala “omunu wokaliye,” oco tu sanjuise Yehova.—Va Efe. 4:24.

14. Asumũlũho api wa siata oku kuata omo lioku panga onepa kocisoko ca Yehova vokuenda kuefengi lio COVID-19?

¹⁴ Yesu wa siata oku eca olonumbi viwa vokuenda kuotembo yohali. Uvangi wasumũlũho aco wa muiwa vokuenda kuefengi lio COVID-19. Osimbu omanu voluali ka va kũlĩhĩle ndomo va cilinga, Yesu wa linga esokiyo liokuti tu tambula olonumbi via suapo vi tu kuatisa oku kolapo. Tua vetiyiwa oku wala olombindi kuenda oku kala ocipãla lomunu ukuavo. Akulu vekongelo va vetiyiwa okuti olonjanja viosi va kũlĩhĩsa nda vamanji vosi vekongelo va kasi ciwa ketimba kuenda kespi- ritu. (Isa. 32:1, 2) Etu tua siata oku tambula olonumbi vikuavo kuenda elembeleko pocakati covolandu Osungu Yolombangi Via Yehova.

15. Olonumbi vipi via eciwa viatiamẽla kolohongele loku linga upange woku kunda vokuenda kuefengi kuenda onima yipi ya siata oku iyililako?

¹⁵ Vokuenda kuefengi, tua tambulavo olonumbi viwa viatiamẽla kolohongele kuenda oku linga upange woku kunda. Lonjanga yalua, tua fetika oku tala olohongele viekongelo, olohongele vimbo kuenda viofeka pocakati colovideo. Tua fetikavo oku kundila pocakati covikanda kuenda colotelefone. Yehova wa siata oku sumũlũisa alikolisilo etu. Olofiliale vialua via lekisa ulandu wevokiyo lietendelo liakundi. Kuenje valua va siata oku pamisiwa lovolandu aco vokuenda kuotembo yaco.—Tala okakasia “Yehova o Sumũlũisa Upange Wetu Woku Kunda.”

16. Ekolelo lipi tu sukila oku kuata?

¹⁶ Vamue va sima okuti konepa yoku eca olonumbi viatiamẽla kefengi, ocisoko cetu ya ci piãlisapo vali enene. Owu umue vali pokati kovovangi u lekisa okuti, olonumbi tu tambula violondunge. (Mat. 11:19) Osimbu tu sokolola ndomo Yesu a kasi oku songuila olondonge viaye locisola, tua kolela okuti ovitangi viosi vi laika oku iya kovaso, Yehova kuenda Omõlaye o soliwe va ka tu kuatisa.—Tanga Va Heveru 13:5, 6.

17. O liyeva ndati omo lioku songuiwa la Yesu?

¹⁷ Tu kuete esumũlũho linene omo lioku songuiwa la Yesu! Etu tua tiamẽla vocisoko cimue okuti ci yula oviholo viomanu, olonepele violofeka kuenda vialimi. Etu tua siata oku tambula olonumbi vialua viondaka ya Suku kuenda tu tambula epindiso liosi tu sukila oco tu linge upange woku kunda. Omunu lomunu o kasi oku longisiwa oku wala omunu wokaliye kuenda tu kasi oku lilongisa oku lisola pokati. Tu kuete esunga lialua lioku sanjuka momo Yesu eye Usongui wetu!