Ove hẽ o Kuete Ekolelo?

Oco tu sanjuise Yehova, tu sukila oku kuata ekolelo. Pole, Embimbiliya li popia okuti, “havosiko va pondola oku kuata ekolelo.” (2 Va Tes. 3:2) Eci upostolo Paulu a vangula olondaka evi, eye wa kala oku tukula ‘omanu vãvi haivo olondingaĩvi,’ ale omanu vana va kala oku u lambalala. Pole, eci eye a vangulavo catiamẽla kekolelo wa ci tiamisiwila komanu vakuavo. Vamue ka va tava okuti kuli Suku kuenda va likala okuti eye wa Lulika ovina viosi. (Va Rom. 1:20) Vamue va popia okuti va kolela kocina cimue ci kuete unene. Pole, eci ka ci tẽla, oco tu sanjuise Yehova, momo eli ekoleloko liocili.

Etu tu sukila oku kolela okuti Yehova o kasi lomuenyo kuenda eye o sumũlũisa vana va kuete ekolelo lia pama kokuaye. (Va Hev. 11:6) Ekolelo li panga onepa kepako liespiritu sandu. Oco tu tambule espiritu sandu, tu sukila oku likutilila ku Yehova oco a tu ĩhe espiritu sandu liaco. (Luka 11:9, 10, 13) Onjila yikuavo yoku tambula espiritu sandu poku tanga Embimbiliya. Ci kuetevo esilivilo oku sokolola kovina tu tanga kuenda oku kapako ovina tu tanga. Lonjila eyi, espiritu sandu li pondola oku songuila omuenyo wetu, loku tu kuatisa oku kuata ekolelo limue li sanjuisa Yehova.