Yuvula Ocituwa Coluali Coku Livelisapo
WA LIMBUKA ale okuti omanu valua voluali va sima okuti va sesamẽla oku tatiwa lonjila yimue yilikasi loku tambula ovikele vimue? Pole, ndaño okuti ovo va tatiwa lonjila yimue yilikasi, va sima okuti handi va sesamẽla oku kuata vali ovikele vialua. Omanu va tuwa ndoco, vakuacipululu kuenda ka va lekisa olopandu kovina va kuete. Embimbiliya li popia okuti eci oco omanu va laikele oku kala koloneke via sulako.—2 Tim. 3:2.
Ocili okuti, tunde kosimbu, kua kala omanu vakuacipululu. Ndeci Adama la Eva va yonguile okuti va li nõlela ovo muẽle eci ciwa leci cĩvi kuenje ca koka okuti vosi yetu tu tala ohali omo lionjila ovo va nõla. Ulandu ukuavo wa Soma Usiya wo ko Yuda, eye wa simĩle okuti wa kuatele omoko yoku timĩha insensu vonembele osimbu okuti ka kuatele omoko yaco. (2 Asa. 26:18, 19) Cimuamue haico okuti, va Fariseo kuenda va Sadukeo va simĩle okuti va sesamẽlele oku tatiwa la Suku lonjila yimue yilikasi omo lioku tiamẽla kocitumbulukila ca Avirahama.—Mat. 3:9.
Etu tua ñualiwa lomanu vakuacipululu kuenje citava okuti, ovituwa viavo vi pondola oku tu yapuisa. (Va Gal. 5:26) Pamue tu fetika oku sima okuti tu sesamẽla oku tambula ocikele cimue, ale oku tatiwa lonjila yimue yilikasi. Tu yuvula ndati oku sokolola lonjila ndeyi? Tete tu sukila oku sokolola ndomo Yehova a tenda ocisimĩlo caco. Olonumbi vivali Viembimbiliya vi ka tu kuatisa.
Yehova eye o nõla ovina tu pondola oku tambula. Konomuisa ovolandu amue.
Vesokiyo liepata, ulume o sukila oku liyeva okuti wa sumbiwa lukãi waye kuenda ukãi o sukila oku liyeva okuti o soliwe la veyaye. (Va Efe. 5:33) Yehova wa popia okuti, olohueli vi sukila oku li lekisila ocisola cilikasi pokati okuti, komunu ukuavo hakoko. (1 Va Kor. 7:3) Handi vali, olonjali vi lavoka okuti, omãla vavo va pokola kokuavo kuenda omãla va lavokavo okuti olonjali vi va tata kuenda vi lekisa ocisola kokuavo.—2 Va Kor. 12:14; Va Efe. 6:2.
Yehova wa popia okuti, tu sukila oku sumbila akulu vekongelo omo liupange wavo walua. (1 Va Tes. 5:12) Pole, akulu vekongelo ka va kuete omoko yoku lavulula ovina vamanji va linga.—1 Pet. 5:2, 3.
Suku wa eca kolombiali viomanu omoko yoku kisika oku feta elisimu kuenda oku tambula esumbilo kolonungi viavo.—Va Rom. 13:1, 6, 7.
Yehova locisola calua o tu ĩha ovina vialua okuti ka tua vi sesamẽlele. Omo liekandu tua piñala ku Adama tu sesamẽla oku fa. (Va Rom. 6:23) Pole, Yehova o tu ĩha asumũlũho alua omo liocisola caye ka ci pongoloka. (Osa. 103:10, 11) Asumũlũho osi tu tambula kokuaye hamomoko tu a sesamẽla, pole, momo okuti eye o tu sole kuenda o tu kuetele ohenda ya piãla.—Va Rom. 12:6-8; Va Efe. 2:8.
CECI CI TU KUATISA OKU YUVULA OKU SIMA OKUTI, TUA VELAPO VALI OKUTI VAKUETU CI SULE
Kuata utate oco ku ka sokolole ndeci omanu vo voluali. Pamue ka tu ci limbuka kuenje tu fetika oku sima okuti, tu sesamẽla vali calua okuti vakuetu ci sule. Yesu wa lekisa okuti ca leluka oku sokolola ndoco, eci ata olusapo luolonalavayi via enda oku tambula olodenariu. Olonalavayi vimue via fetika oku talavaya lomẽle yalua kuenda va talavaya eteke liosi vutanya walua; vakuavo va talavaya lika owola yimosi. Pole, olonalavayi vina via fetika omele yalua, via sima okuti via ponduile oku tambula vali calua okuti vakuavo ci sule, momo ovio via talavaya eteke liosi vutanya walua. (Mat. 20:1-16) Yesu poku lombolola olusapo olu, wa lekisa okuti, olondonge viaye via sukilile oku sanjukila ovina Suku a ponduile oku va ĩha.
Alume va talavaya eteke liosi va sima okuti ovo va sesamẽlele oku tambula ofeto yalua
Kala ukualopandu, ku ka kale ukuakukisika. (1 Va Tes. 5:18) Setukula ongangu yupostolo Paulu okuti, ka pingile ku vamanji va Korindo ovina eye a sukilile, ndaño wa kuatele omoko yaco. (1 Va Kor. 9:11-14) Tu sukila oku kala vakualopandu kovina viosi omanu va tu ĩha kuenda oku yuvula ocituwa coku kisika.
Upostolo Paulu ka kisikile okuti vo wĩha ekuatiso
Lekisa umbombe. Eci omunu a li sokolola calua eye muẽle, olonjanja vialua o sima okuti o sesamẽla oku tambula vali calua okuti ovina a kuete ci sule. Nda tua lekisa umbombe, ci ka tu kuatisa oku yuvula oku sokolola lonjila yimue ka ya sungulukile.
Daniele wa soliwile calua la Yehova, momo wa kala embombe
Uprofeto Daniele ongangu yiwa yoku lekisa umbombe. Eye wa tiamẽlele kepata limue lia kemãla, wa posokele calua, wa loñolohele kuenda wa kuatele ovoloño alua. Kuenje eye nda wa kuata ocisimĩlo cokuti, o sesamẽla oku tatiwa lonjila yimue yilikasi kuenda oku tambula ovikele. (Dan. 1:3, 4, 19, 20) Pole, Daniele wamamako oku lekisa umbombe kuenje ocituwa caco co kokela oku soliwa calua la Yehova.—Dan. 2:30; 10:11, 12.
Omo liaco, tu sukila oku yuvula ocituwa coluali coku livelisapo ca siata koloneke vilo. Pole, tu amamiko oku sanjukila asumũlũho osi Yehova a tu ĩha omo liohenda yaye ya piãla.