Ku ka Cilue, Papatisiwa

1. Asunga api awa tu kuete oku papatisiwa?

OVE hẽ o sole Yehova una wa ku ĩha ombanjaile yosi yiwa, oku kongelamo omuenyo wove? O yongola hẽ oku lekisa ocisola cove kokuaye? Onjila ya velapo yoku ci linga, oku litumbika ku Yehova kuenda oku papatisiwa. Ananga aco a pondola oku ku kuatisa oku tiamẽla kepata lia Yehova. Kuenje Isiove wokilu haeye ekamba, o ka ku songuila loku ku tata, momo ove o ka tiamẽla kokuaye. (Osa. 73:24; Isa. 43:​1, 2) Handi vali, eci o tumbika omuenyo wove ku Suku loku papatisiwa, o kuata elavoko liomuenyo ka u pui.—1 Pet. 3:21.

2. Nye tu konomuisa vocipama cilo?

² Anga hẽ kuli cimue ci kasi oku ku tateka oku papatisiwa? Nda oco, haveko lika. Olohuluwa vialua viomanu ndeci ove, va sukililevo oku linga apongoloko kovituwa viavo kuenda konjila yavo yoku sokolola oco va papatisiwe. Ovo cilo, va kasi oku vumba Yehova lesanju kuenda lombili. Nye o pondola oku lilongisila kulandu wa vamue va papatisiwa kocita catete? Tu konomuisa ovitangi va liyaka lavio kuenda eci tu lilongisila kulandu wavo.

VA SAMARIA VA PAPATISIWA

3. Apongoloko api va Samaria va sukilile oku linga osimbu ka va papatisiwile?

³ Va Samaria koloneke via Yesu, va tiamẽlele kocimunga cimue cetavo ca kala ocipepi lo Sekeme kuenda lo Samaria yo kosimbu konano yo Yudea. Osimbu va Samaria ka va papatisiwile, va sukilile oku kuata ukũlĩhĩso wa suapo Wondaka ya Suku. Ovo va tavele lika alivulu atãlo Embimbiliya, oku upisa Kefetikilo toke Kesinumuĩlo kuenda citava okuti lelivulu lia Yehosua. Pole, va Samaria va lavokaile oku iya kua Mesiya ndomo ca lekisile ohuminyo ya Suku kelivulu Liesinumuĩlo 18:​18, 19. (Yoa. 4:25) Oco va Samaria va papatisiwe, va sukilile oku tava okuti Yesu eye Mesiya wa likuminyiwile. Kuenje “va Samaria valua,” oco va linga. (Yoa. 4:39) Vakuavo va sukilile oku yula ocame ca kala pokati ka va Samaria la va Yudea.—Luka 9:​52-54.

4. Ndomo ca tangiwa Kovilinga 8:​5, 6, 14, nye va Samaria va linga eci Filipu a va kundila?

⁴ Nye ca kuatisa va Samaria oku papatisiwa? Eci Filipu a va “kundila eci catiamẽla ku Kristu,” va Samaria vamue “va tava kondaka ya Suku.” (Tanga Ovilinga 8:​5, 6, 14.) Ovo ka va likalele oku yevelela Filipu, ndaño okuti eye wa kala u Yudea. Citava okuti ovo va ivaluka Ocisonehua ci popia hati, Suku hokuacameko. (Esin. 10:​17-19) Ovo va “yevelela ovina Filipu a kala oku popia” viatiamẽla ku Kristu kuenda va limbuka okuti Filipu wa tumiwa la Suku. Eye wa lingavo ovikomo vialua, oku kongelamo oku sakula omanu va vela kuenda oku tundisa olondele.—Ovil. 8:7.

5. Nye o pondola oku lilongisila kulandu wa va Samaria?

⁵ Va Samaria vaco nda va ecelela okuti ocame ale ekambo liukũlĩhĩso, li va tateka oku yevelela ovina Filipu a kala oku va longisa. Pole, ovo ka va ecelelele okuti ci pita lavo. Va Samaria ka va ciluile oku papatisiwa noke lioku kolela okuti, Filipu wa kala oku va longisa ocili. Ulandu Wembimbiliya u lombolola ndoco: ‘Eci ovo va tava ku Filipu, una wa kala oku kunda olondaka viwa Viusoma wa Suku kuenda vionduko ya Yesu Kristu ‘ci kaile alume ci kaile akãi va papatisiwa.’ (Ovil. 8:12) Ove hẽ wa kolela okuti Ondaka ya Suku oyo ocili kuenda Olombangi Via Yehova via siata oku yuvula ocame, loku likolisilako oku lekisa ocisola cocili komanu vakuavo cina ci situlula Akristão vocili? (Yoa. 13:35) Nda oco, ku ka kuate usumba woku papatisiwa.

6. O pondola oku kuatisiwa ndati lulandu wa manji Ruben?

⁶ Ruben wo ko Alemanya, wa kulila vepata limue Liolombangi Via Yehova. Pole, eci a kala umalẽhe wa kuatele atatahãi nda okuti kuli muẽle Suku. Nye co kuatisa oku yula atatahãi aco? Eci a limbuka okuti eye wa kambelele ukũlĩhĩso, wa nõlapo oku vokiya ukũlĩhĩso waye. Eye wa popia hati: “Velilongiso liange lio pokolika, nda sukilile oku limbuka ovina viocili levi viesanda. Kuenje nda nõlapo oku lilongisa osapi yi lombolola nda okuti ovina via tukuluka ño.” Eye wa tanga elivulu losapi hati: Existe um Criador Que se Importa com Você? (Kuli hẽ Ululiki Umue Okuti wa ku Kapako?) Elivulu liaco, lia kuatisa calua Ruben. Eye wa popia ndoco: ‘Haka, ci komõhisa! Puãi Yehova o kasiko muẽle.’ Vokuenda kuepasu Ruben a linga Kombala Yolombangi Via Yehova, wa vokiya ocisola caye kongongela ya vamanji voluali luosi. Eci eye a tiukila ko Alemanya, wa papatisiwa eci a kuata 17 kanyamo. Nda ove o kuete atatahãi atiamẽla ku Suku, Kembimbiliya ale kovina vikuavo, amamako oku linga akonomuiso valivulu etu. Oku kuata “ukũlĩhĩso wa suapo” ci pondola oku ku kuatisa oku yula atatahãi. (Va Efe. 4:​13, 14) Poku yeva ovolandu ocisola, lomunga yi kasi pokati kafendeli va Yehova kolonepa vikuavo violuali kuenda oku mola ovovangi aco vekongelo liove, ocisola o kuetele vamanji koluali luosi ci ka livokiya calua.

SAULU U TARSO WA PAPATISIWA

7. Ocisimĩlo cipi Saulu a sukilile oku pongolola?

⁷ Kũlĩhĩsa ulandu wa Saulu u Tarso. Eye wa pindisiwile kocihandeleko ca va Yudea kuenda wa kala oku litunda ciwa pokati ka va Yudea. (Va Gal. 1:​13, 14; Va Fil. 3:5) Kotembo yimue, va Yudea valua va tendele Akristão ndolonanguluke kuenje Saulu wa fetika oku va lambalala lonyeño yalua. Eye wa simĩle okuti wa kala oku linga ocipango ca Suku. (Ovil. 8:3; 9:​1, 2; 26:​9-11) Nda Saulu wa kolelele ku Yesu kuenda oku kala Ukristão umue wa papatisiwa, eye wa sukilile oku likapelako okuti wa laikelevo oku lambalaliwa.

8. (a) Nye ca kuatisa Saulu oku papatisiwa? (b) Ndomo ca tangiwa Kovilinga 22:​12-16, Ananiya wa kuatisa ndati Saulu? (Talavo ociluvialuvia.)

⁸ Nye ca kuatisa Saulu oku papatisiwa? Eci Yesu a vangula la Saulu oku upisa kilu, ocinyi cimue co lingisa omeke. (Ovil. 9:​3-9) Vokuenda kuoloneke vitatu, eye wa likandangiya okulia kuenda oku sokolola kueci ca lipita laye. Ocili okuti Saulu weya oku tava okuti, Yesu eye Mesiya kuenda olondonge via Yesu via kuamele etavo liocili. Citava okuti, Saulu wa kala oku livetela evelo omo lioku panga onepa kolofa via Stefano! (Ovil. 22:20) Kesulilo lioloneke vitatu, ondonge yimue yi tukuiwa Ananiya, lumbombe walua ya enda ku Saulu kuenje wo kayisa kupeke waye kuenda wo vetiya oku papatisiwa lonjanga yalua. (Tanga Ovilinga 22:​12-16.) Saulu lumbombe wa tava kekuatiso kuenda wa yevelela Ananiya kuenje wa papatisiwa.—Ovil. 9:​17, 18.

9. Nye tu lilongisila kovolandu a Saulu?

⁹ Tu pondola oku lilongisila kovolandu alua a Saulu. Eye nda wa ecelela okuti epela kuenda usumba womunu, viu tateka oku papatisiwa. Pole, eye ka ecelelele okuti ci lipita laye. Saulu lumbombe walua, wa pongolola ekalo liomuenyo waye eci a tava ocili catiamẽla ku Kristu. (Ovil. 26:​14, 19) Saulu wa nõlelepo oku kala Ukristão, ndaño wa kũlĩhĩle okuti wa laikele oku lambalaliwa. (Ovil. 9:​15, 16; 20:​22, 23) Noke liepapatiso liaye, eye wamamako oku kolela Yehova oco o kuatise oku liyaka loloseteko vialua. (2 Va Kor. 4:​7-10) Oku papatisiwa Ndombangi ya Yehova, ci pondola oku koka elambalalo, ale oku setekiwa kekolelo, pole, o ka kuata ekuatiso. O pondola oku kolela kekuatiso lia Yehova kuenda lia Kristu.—Va Fil. 4:13.

10. O pondola oku kuatisiwa ndati lulandu wa Anna?

¹⁰ Anna wa citiwila vepata limue lia va Kurda Kutundilo wo Europa. Noke lia Inaye oku papatisiwa, Isiaye wa tava okuti Anna o fetika oku lilongisa Embimbiliya eci a kuata 9 kanyamo. Pole, eci epata liaye lia limbuka okuti Anna wa fetika oku lilongisa Embimbiliya Lolombangi Via Yehova, lia fetika oku u lambalala. Epata lia ci tendele ndekutisasõi umue ukuepata oku siapo etavo lia vakukululu yavo. Eci Anna a tẽlisa 12 kanyamo, wa pinga ku isiaye oco a papatisiwe. Isiaye wa yonguile oku kũlĩha nda onjila a nõla ya tunda muẽle vutima waye, ale umue eye wo kisika. Eye wa tambulula hati, “Ame ndi sole Yehova.” Isiaye wa tava okuti o papatisiwa. Anna noke lioku papatisiwa, epata liaye liamamako oku u tata lãvi. Umue pokati ka vangandiaye wo sapuila ndoco: “Ca velapo ove oku ambata omuenyo umue wa vĩha kuenda oku sipa okuti oku kala Ombangi ya Yehova sio.” Anna wa liyaka ndati locitangi caco? Eye hati: “Yehova wa ñuatisa oku pandikisa, kuenda olonjali viange via ñuatisavo calua.” Anna wa siata oku soneha ulala umue u situlula apuluvi osi a limbuka eka lia Yehova komuenyo waye. Otembo lotembo, eye o vanja kulala waco, oco ka ka ivaleko ndomo Yehova a siata oku u kuatisa. Nda ove o kuete usumba woku lambalaliwa, ivaluka okuti Yehova o pondola oku ku kuatisavo.—Va Hev. 13:6.

KORNELIU WA PAPATISIWA

11. Momo lie ka ca lelukile ku Korneliu oku papatisiwa?

¹¹ Tu pondolavo oku lilongisa ovina vialua vi kuete esilivilo kulandu wa Korneliu wa tukuiwa Vembimbiliya. Eye wa kala oku “songuila” 100 casualali violohoka via va Roma. (Ovil. 10:​1, Etosi.) Kuenje omo liocikele caco, citava okuti eye wa kuatele oluhimo walua pokati komanu kuenda kusualali. Eye “wa eca eca oviali viohenda komanu.” (Ovil. 10:2) Yehova wa tuma upostolo Petulu oco a kunde olondaka viwa kokuaye. Anga hẽ ocikele Korneliu a kuatele co tateka oku papatisiwa?

12. Nye ca kuatisa Korneliu oku papatisiwa?

¹² Nye ca kuatisa Korneliu oku papatisiwa? Tu tanga ndoco hati, eye “wa sumbilile Suku kumue la vakuanjo yaye.” Handi vali Korneliu, wa enda oku likutilila ku Suku olonjanja viosi. (Ovil. 10:2) Eci Petulu a sapuila olondaka viwa ku Korneliu, eye kumue lepata liaye va tava ku Kristu kuenda haico va papatisiwa. (Ovil. 10:​47, 48) Ocili okuti Korneliu wa nõlelepo oku linga apongoloko a sukiliwa, oco a fendele Yehova kumue lepata liaye.—Yeh. 24:15; Ovil. 10:​24, 33.

13. Nye tu lilongisila kulandu wa Korneliu?

¹³ Ndeci ca lipita la Saulu, Korneliu nda wa ecelelavo okuti, ocikele caye cu tateka oku kala Ukristão. Pole, eye hacoko a linga. Anga hẽ oco o papatisiwe o sukilavo oku linga apongoloko anene komuenyo wove? Nda oco, Yehova o ka ku kuatisa. Eye o ka sumũlũisa onjila wa nõlapo yoku u vumba ndomo ci likuata lolonumbi Viembimbiliya.

14. O pondola oku kuatisiwa ndati lulandu wa Tsuyoshi?

¹⁴ Tsuyoshi okuti wo ko Japão, wa sukilile oku pongolola upange waye woku sanda eteku, oco a papatisiwe. Eye wa kala oñuatisi yomitavaso yosikola yimue ya kemãlele calua koku longisa omanu ndomo vongotiya olonelẽho. Mitavaso yosikola wa enda oku pongiya olonelẽho violonambi kuenda oku panga onepa kovihilahila vietavo Liolobudista. Pole, nda eye ka ponduile oku enda, Tsuyoshi eye wa laikele oku panga onepa kovihilahila viaco. Kuenje eci Tsuyoshi a lilongisa ocili catiamẽla kolofa, wa limbuka okuti ka ponduile oku papatisiwa nda eye wamameleko oku panga onepa kovihilahila viaco. Eye wa nõlapo oku liwekapo oku panga onepa kovihilahila Violobudista. (2 Va Kor. 6:​15, 16) Tsuyoshi wa sapela lomitavaso yosikola catiamẽla kondaka yaco. Onima yipi yeyililako? Tsuyoshi wamamako lupange waye, pole, ka pangele vali onepa kovihilahila via enda oku lingiwa. Eye wa papatisiwa noke lioku tẽlisa unyamo, tunde eci a fetika oku lilongisa Embimbiliya.a Nda okuti ove o sukila oku linga apongoloko kupange wove woku sanda eteku oco o sanjuise Yehova, kolela okuti eye o ka ku ĩha eci o sukila kumue lepata liove.—Osa. 127:2; Mat. 6:33.

VA KORINDO VA PAPATISIWA

15. Nye nda ca tateka va Korindo oku papatisiwa?

¹⁵ Omanu vo ko Korindo yosimbu, va kakatelele calua kovokuasi kuenda va kala vakuevĩho. Omanu valua va tungilemo, vambatele omuenyo umue ka u taviwa la Suku. Citava okuti ekalo liaco, ka lia lelukile komanu va tungile volupale luaco oku fetika oku vumba Yehova. Eci upostolo Paulu a pitĩla volupale luaco, wa kunda olondaka viwa viatiamẽla ku Kristu kuenje “va Korindo valua okuti va ci yeva, va fetika oku tava kuenje va papatisiwa.” (Ovil. 18:​7-11) Noke Ñala Yesu Kristu wa molẽha ku Paulu vocinjonde cimue kuenje wa popia hati: “Ñuete omanu valua volupale olu.” Omo liaco, Paulu wamamako oku kundila volupale luaco vokuenda kunyamo umosi lolosãi epandu.

16. Nye ca kuatisa va Korindo oku yula ovina nda via va tateka oku papatisiwa? (2 Korindo 10:​4, 5)

¹⁶ Nye ca kuatisa va Korindo oku papatisiwa? (Tanga 2 Korindo 10:​4, 5.) Ondaka ya Suku kuenda unene waye wespiritu Sandu, via va kuatisa oku linga apongoloko a komõhisa komuenyo wavo. (Va Hev. 4:12) Vana va tava olondaka viwa viatiamẽla ku Kristu ko Korindo, va siapo ovituwa viavo vĩvi ndeci, uholua, oku nyana, kuenda evĩho liukahonga.—1 Kor. 6:​9-11.b

17. Nye o pondola oku lilongisila kulandu wa va Korindo?

¹⁷ Limbuka okuti, ndaño va Korindo vamue va kuatele ovituwa vialua ka via sungulukile okuti ka via lelukile oku vi yula, ovo ka va simĩle okuti ca tĩla oku kala Akristão. Ovo va likolisilako oku endela vonjila ya likupika yi tuala komuenyo ko pui. (Mat. 7:​13, 14) Anga hẽ ove o kasi oku likolisilako oco o yule ocituwa cimue ka ca sungulukile oco o papatisiwe? Nda oco, ku ka liwekepo oku linga apongoloko! Pinga ku Yehova oco Espiritu sandu liaye li ku kuatise oku tamalãla lolonjongole ka via sungulukile.

18. O pondola oku kuatisiwa ndati lulandu wa Monika?

¹⁸ Monika wo kofeka yo Georgia, wa likolisilako calua oco a siepo upopi wa vĩha kuenda ovitalukilo ka via sungulukile, oco a kule toke kepapatiso. Eye wa popia hati: “Vokuenda kutila wange, ocina cimue ca nyĩha ongusu yoku linga apongoloko, ohutililo. Yehova wa kũlĩhĩle okuti, nda ponduile oku linga ovina via sunguluka kuenda olonjanja viosi wa likapeleleko oku ñuatisa loku ndi songuila.” Monika wa papatisiwa eci a kuata 16 kanyamo. Anga hẽ kuli ovituwa vimue ove o sukila oku siapo, oco o vumbe Yehova lonjila yimue yi taviwa laye? Omo liaco, amamako oku pinga unene kokuaye oco o linge apongoloko. Nda wa ci linga, Yehova lohenda yalua o ka ku ĩha espiritu sandu liaye.—Yoa. 3:34.

EKOLELO LIOVE LI PONDOLA OKU SONDOLOLA OLOMUNDA

19. Nye ci ka tu kuatisa oku yula ovitangi vina vi kasi ndolomunda? (Talavo ociluvialuvia.)

¹⁹ Kolela okuti Yehova oku sole calua kuenda o yongola okuti ove o tiamẽla kepata liaye, ndaño o kasi oku liyaka loloseteko vi molẽha ndu okuti via tĩla calua oku vi yula oco o papatisiwe. Yesu wa sapuila kocimunga cimue colondonge viaye kocita catete hati: “Nda wa kuati ekolelo lia lisoka lolumema wulemba, vu ka popia lomunda eyi: ‘Tunda palo sondolokela oko’ kuenda oyo yi ka sondoloka kuenje vu ka tẽla oku linga ovina viosi.” (Mat. 17:20) Omanu vana va kala oku yevelela olondaka viaco, va kala lika la Yesu vokuenda kuanyamo amue kuenje ovo handi va sukilile oku vokiya ekolelo liavo. Pole, Yesu wa va likuminyile okuti, nda va kuata ekolelo lia pama, Yehova wa laikele oku va kuatisa oku yula ovitangi vi kasi ndolomunda! Kuenje Yehova o ka ku kuatisavo oku linga cimuamue.

20. Ovolandu Akristão vo kocita catete kuenda vo koloneke vilo, a ku vetiya oku linga nye?

²⁰ Nda ove wa limbuka okuti kuli ovitangi vimue vi kasi oku ku tateka oco o papatisiwe, sanda olonjila vioku vi yula lonjanga yalua. Sanga elembeleko kuenda oku pamisiwa lovolandu Akristão vo kocita catete kuenda vo koloneke vilo. Ovolandu avo a ku pamise, loku ku vetiya oku litumbika ku Yehova kuenda oku papatisiwa. Omo liaco, eyi onjila yimue ya velapo o pondola oku nõla!