Talavaya Lembimbiliya Ndolumuĩlo

Ndonge Tiago wa sokisa Embimbiliya ndolumuĩlo li tu ecelela oku limbuka omunu tua tuwa vokati ketu. (Tia. 1:​22-25) Tu talavaya ndati Lembimbiliya ndolumuĩlo?

Tanga Lutate. Nda tu li vanja lonjanga volumuĩlo, ka tu limbuka cimue cĩvi kemolẽho lietu. Cimuamue haico okuti, nda tu tanga lonjanga Embimbiliya, ka tu ka tẽla oku limbuka ovina tu sukila oku pongolola kekalo lietu.

Tiamisila utima kovina o sukila oku mioñolola, pole, ku vakuene sio. Olonjanja vimue eci tu vanja volumuĩlo lumue, tu pondolavo oku mola emolẽho lia vakuetu kuenje tu tiamisila utima kueci cĩvi tua mola kokuavo. Cimuamue haico okuti, tu pondola oku talavaya Lembimbiliya oco tu limbuke akulueya omanu vakuavo. Pole, eci ka ci ka tu kuatisa oku pongolola ovina tu sukila oku mioñolola kokuetu muẽle.

Kala ukuesunguluko. Nda tu kakatela lika kovina vĩvi vi molẽha volumuĩlo, citava okuti tu pondola oku sumua. Omo liaco, poku tanga Ondaka ya Suku tu sukila oku kala vakuesunguluko kuenda ka tu lavoka calua kokuetu okuti Yehova ci sule.—Tia. 3:17.