Nye Ceca Uvangi Wokuti tu Kasi “Koloneke Via Sulako,” Ale “Kotembo ya Sulako”?

Etambululo Liembimbiliya

Embimbiliya li popia eci catiamẽla kovina via laikele oku situlula ‘esulilo lioluali [lulo].’ (Mateo 24:3; Embimbiliya li Kola) Olio li tukula otembo yaco okuti, ‘oloneke via sulako’ kuenda ‘otembo ya sulako,’ ale ‘otembo ya sulako ya sokiyiwa.’—2 Timoteo 3:1; Daniele 8:19; Easy-to-Read Version.

Vipi vimue pokati kovitumasuku Viembimbiliya viatiamẽla “koloneke via sulako”?

Embimbiliya lia tukula ovina vialua via laikele oku pita votembo yimuamue okuti, via ponduile oku lekisa “ondimbukiso” yi situlula oloneke via sulako. (Luka 21:7) Kũlĩhĩsa vimue pokati kavio:

Ovoyaki kovitumãlo viosi violuali. Yesu wa popia hati: “Ofeka yi ka katukila ofeka kuenda usoma u katukila usoma.” (Mateo 24:7) Cimuamue haico ci sangiwa Kesituluilo 6:4 ku popia umue ukuakuendela kokavalu kocindekaise okuti, ka lomboloka uyaki u “imũla ombembua kilu lieve.”

Onjala. Yesu wa popele hati: “Ku ka kala onjala.” (Mateo 24:7) Elivulu Liesituluilo li popiavo ulume ukuavo ukuakuendela kokavalu kocindekaise okuti, ka lomboloka onjala yalua kolonepa viosi violuali.—Esituluilo 6:5, 6.

Ovilemawe vinene. Yesu wa popele okuti, kua laikele oku kala “ovilemawe kocitumãlo locitumãlo.” (Mateo 24:7; Luka 21:11) Ovilemawe viaco via siata oku koka ohali yalua loku ponda omanu valua.

Ovoveyi kuenda afengi. Ndeci Yesu a popia, kua laikele oku kala ovoveyi, ale afengi okuti, “ovoveyi a kãla.”—Luka 21:11, Contemporary English Version.

Elivokiyo liungangala. Vokuenda kuotembo yalua ndaño kua siata oku kala ungangala, Yesu wa popele okuti, koloneke via sulako, oku “livokiya kuevĩho” kua laikele oku lua.—Mateo 24:12.

Oku vĩhisiwa kuilu lieve. Esituluilo 11:18 lia popia okuti omanu va laikele oku “vĩhisa ilu lieve.” Ovo ka va ponduile oku ci linga lika lovilinga viungangala kuenda viovitukiko. Ovo va ci linga poku vĩhisa ofela kuenda ilu lieve.

Ovituwa vĩvi. Embimbiliya kukanda 2 Timoteo 3:1-4 li popia okuti, omanu valua va laikele oku kala “vakualutukãi, havakuaciliko, . . . vakualundi, ka va ka tẽla oku likandangiya, olongangala, ka va ka sola eci ciwa, olomakuli, vakualonamãlãla, vakuepela.” Omanu va ponduile oku lekisa ovituwa viaco vĩvi okuti, otembo yaco ya laikele oku tukuiwa okuti, ‘oloneke via sulako, lekalo lia tĩla calua.’

Ekambo liomunga kuenda ocisola pokati kapata. Embimbiliya kukanda 2 Timoteo 3:2, 3 ku popia okuti, omanu valua ‘ka va ka kuata ocisola la vangandiavo’ kuenda omãla va laikele oku ‘sinĩla olonjali’ viavo.

Omanu ka va kuatela Suku ocisola. Yesu wa popele hati: “Ocisola comanu valua ci ka pola.” (Mateo 24:12) Yesu wa yonguile oku popia okuti, omanu va laikele oku tepulula ocisola va kuetele Suku. Haicovo ci sangiwa kukanda 2 Timoteo 3:4 okuti, koloneke via sulako, omanu va ponduile oku kala “vakuakusola ayele okuti Suku ci sule.”

Ombambe ku vana va litukula okuti vakuetavo. Embimbiliya kukanda 2 Timoteo 3:5 ku popia okuti, omanu va laikele oku popia okuti va fendela Suku osimbu okuti, ka va kapeleko olonumbi viaye komuenyo wavo.

Elivokiyo lielomboloko liovitumasuku Viembimbiliya. Elivulu lia Daniele lia popele okuti, “kotembo yesulilo,” omanu valua va ponduile oku kuata elomboloko lialua liocili Cembimbiliya oku kongelamo elomboloko lia suapo liovitumasuku viaco.—Daniele 12:4, letosi.

Upange woku kunda olondaka viwa Viusoma voluali luosi. Yesu wa popele hati: “Olondaka evi viwa Viusoma vi ka kundilua koluali luosi.”—Mateo 24:14.

Ekambo lionjongole loku pembula esapulo, lia laikele oku livokiya. Yesu wa popele okuti, omanu valua ka va ponduile oku lekisa onjongole kesapulo kuenda va laikele oku pembula ovovangi a lekisa okuti, esulilo li kasi ocipepi. (Mateo 24:37-39) Handi vali, ukanda 2 Petulu 3:3, 4 wa popia okuti, vamue va ponduile oku pembula uvangi loku sima okuti, wuhembi.

Oku tẽlisiwa kuovitumasuku viosi. Yesu wa popia okuti koloneke via sulako, ovitumasuku viosi via tukuiwa ndeti, via laikele oku tẽlisiwa vepuluvi limuamue.—Mateo 24:33.

Anga hẽ tu kasi “koloneke via sulako”?

Oco. Ekalo lioluali kuenda ovitumasuku Viembimbiliya vi lekisa okuti, oloneke via sulako ale otembo yesulilo, via fetika kunyamo 1914, eci Uyaki Watete wa Pita Voluali lua fetika. Oco o kũlĩhe uvangi u situlula okuti tu kasi koloneke via sulako, tala ovideo yi kuãimo:

Kunyamo 1914, Usoma wa Suku wa fetika oku viala kilu. Ocina catete owo wa linga, oku tundisa Satana Eliapu lolondele viaye kilu loku ecelela okuti, ovo va linga ovina vi yapuisa lika omanu va palo posi. (Esituluilo 12:7-12) Satana o vetiya omanu poku linga ovina vĩvi via siata oku pita. Kuenje ovina viosi evi vi koka okuti, ‘oloneke via sulako, lekalo, li tĩla calua.’—2 Timoteo 3:1.

Omanu valua va kasi oku tala ohali yalua omo lioloneke viaco via sulako. Ovo va sakalala omo okuti, valua ka va tẽla vali oku kala pamosi la vakuavo lombembua. Vakuavo va kuete usumba wokuti, omanu vosi va li ñualelapo oku li ponda.

Vepuluvi limuamue, vana okuti va kasivo oku tala ohali omo liekalo lioluali, va kuete elavoko limue liwa kovaso yoloneke. Ovo va kolela okuti, ndopo Usoma wa Suku, u ka yovola omanu kovitangi va kasi oku liyaka lavio. (Daniele 2:44; Esituluilo 21:3, 4) Ovo va kasi oku talamẽla lepandi eci Suku a ka tẽlisa olohuminyo viaye kuenda va sanga elembeleko kolondaka via Yesu viokuti: “Una o pandikisa toke kesulilo, o ka popeliwa.”—Mateo 24:13; Mika 7:7.