Oku pokola kolonjali, ci sokisiwa loku feta ofuka yimue kombango. Nda o lekisa okuti wa koleliwa, o ka koleliwa vali calua
Kamalẽhe
10 Oku Koleliwa
CI LOMBOLOKA NYE?
Omanu va koleliwa, va pokola kolonumbi, va tẽlisa olohuminyo viavo kuenda otembo yosi va popia ocili. Eli olio esunga lieci va koleliwila lolonjali, lakamba kuenda la vacime.
MOMO LIE CI KUETELE ESILIVILO?
Olonjanja vialua nda o lekisa uvangi wokuti wa koleliwa, o tambula elianjo lialua.
“Onjila yimue yoku koleliwa lolonjali viove, oku lekisa okuti otembo yosi wa loñoloha kuenda wa kapako ovikele. Pole, ku ci lingi lika eci ovo va kasi ocipepi.”—Sarahi.
CECI EMBIMBILIYA LI POPIA: “Amamiko oku seteka eci ene muẽle wa tuwi.”—2 Va Korindo 13:5.
NYE O PONDOLA OKU LINGA?
Nda o yongola okuti omanu va ku kolela vali, oku kapako olonumbi vi kuãimo ci ka ku kuatisa.
Kala ukuacili. Ocina cimue ci teta lonjanga oku koleliwa, ovohembi. Ocili okuti, nda otembo yosi wukuacili, ca piãla enene eci o lueya, omanu va ku kolela.
“Ca leluka oku kala ukuacili nda ovina viosi vi enda ciwa. Pole, oku kala ukuacili kocina cimue ci molẽha ndu okuti ci nyõla ekalo liove, ci vokiya ekolelo omanu va ku kuetele.”—Caiman.
CECI EMBIMBILIYA LI POPIA: “Tu likolisilako oku kala vakuacili kovina viosi.”—Va Heveru 13:18.
Kala ukualondunge. Ko Estados Unidos kua lingiwa ekonomuiso limue komanu vana va kuete upange woku pañinya omanu oco va talavaye. Ci soka 78 kolopursentu viomanu va konomuisiwa, “cimue pokati kovituwa vitatu vi kuete esilivilo olonalavãyi viokaliye vi sukila oku lekisa, olondunge.” Oku lilongisa oku kala ukualondunge tunde vovomalẽhe, ci ka ku kuatisa eci o kala ukulu.
“Olonjali viange vi tẽla oku limbuka okuti nda lekisa olondunge kuenda ndi tẽlisa ovopange o vonjo, pole, ka vi sukila oku ndi kisika. Poku lekisa olondunge, ekolelo va ñuetele, li livokiya vali.”—Sarah.
CECI EMBIMBILIYA LI POPIA: “Nda kolela okuti, o ka linga eci nda pinga, . . . momo nda kũlĩha okuti o ka linga eci ca velapo okuti, eci ñasi loku popia ci sule.”—Filemone 21.
Kala ukuepandi. Vosi va limbuka eci umalẽhe umue a kula ketimba kuenda koku lepa. Pole, olonjanja vialua, cambata otembo omanu oku limbuka nda eye wa loñoloha kuenda o kuete olondunge.
“Olonjali viove kuenda omanu vakuavo, ka va ku kolela omo okuti onjanja yimue wa lekisa olondunge. Pole, o pondola oku koleliwa lavo nda otembo yosi o lekisa olondunge.”—Brandon.
CECI EMBIMBILIYA LI POPIA: “Wali . . . epandi.”—Va Kolosai 3:12.