Oku Kolela ku Nena Esanju Komuenyo
OCILI okuti, okulia kumue kua nyõleha ku nena ovitangi vialua vimo kuenda esumuo. Omunu una wa siata oku pita ale locitangi caco, o sukila oku kuata utate leci catiamẽla kovituwa viaye vioku lia. Pole, omunu oku yuvula oku lia omo liokulia kumue kuo vala vimo, hayoko onjila ya sunguluka yoku potolola ocitangi caco. Oku ci linga ci pondola oku nenela omunu ovitangi vialua okuti viatete ci sule. Lomue omunu o pondola oku amamako lomuenyo nda eye wa liwekapo oku litekula ketimba.
Cimuamue haico okuti, nda omunu umue tua kolela o tu pakula, ci nena evalo lialua. Nda tua siata oku pita locitangi caco, eci ci lekisa okuti tu sukila oku kũlĩhĩsa lutate eci catiamẽla koku nõla kuetu akamba. Pole, oku yuvula omanu vaco okuti ka tu va kuatela vali ekolelo kovina viosi oco tu yuvulevo ohele yoku pakuiwa, hacoko ci potolola ocitangi caco. Momo lie? Momo oku liwekapo oku kolela omanu ku pondola oku nyana esanju lietu. Oco tu kuate omuenyo wesanju tu sukila oku kuata ukamba lomanu poku likolela pokati.
Elivulu limue lia sonehiwa kunyamo wo 2002 lia lombolola okuti: “Oku kolela oko osapi yoku linga ukamba lomanu vana tu lisanga lavo vokuenda kueteke leteke.” Ukanda umue wesapulo lio kofeka yo Alemanya wa lombolola hati, “omanu vosi va kuete onjongole yoku kolela. Momo oku kolela ku eca esilivilo komuenyo womunu” lonjila yimue okuti omunu o limbuka uwa woku amamako “oku kala komuenyo.” Ukanda waco wamisako oku lombolola okuti “omunu una ka lekisa ekolelo ku vakuavo, ka pondola oku amamako oku tamãlala lovitangi komuenyo.”
Omo okuti vosi yetu tu sukila oku kolela komunu umue, oco hẽ helie vali tu pondola oku kolela okuti ka tu kuata ohele yoku pakuiwa?
Kolela Yehova Lutima Wove Wosi
Embimbiliya li tu sapuila okuti: “Kolela Yehova lutima wove wosi.” (Olosap. 3:5) Olonjanja viosi Ondaka ya Suku yi tu vetiya oku kolela Kululiki wetu, Yehova Suku.
Momo lie ci tavela oku kuatela ekolelo lietu ku Suku ? Esunga liatete lioku kolela Yehova Suku, lieli okuti eye o kola. Uprofeto Isaya wa soneha ndoco: “O kola, o kola, o kola, Yehova.” (Isaya 6:3) Anga hẽ omo lioku limbuka okuti Yehova o kola, eci ci ku tateka oku amẽla kokuaye? Ocili okuti ci pondola oku ku vetiya oku kuata ukamba laye momo oku kola kua Yehova ku lomboloka okuti eye wa lipua kovina viosi ka via sungulukile kuenda tu pondola oku kolela kokuaye lutima wetu wosi. Eye lalimue eteke a kala omunu umue ukuevĩho ale oku kala ondingaĩvi, kuenje ka kuete layimue onjongole yoku tu pakula.
Handi vali, etu tu kapa ekolelo lietu ku Suku omo liepondolo kuenda onjongole yaye yoku kuatisa omanu vosi vana vo vumba. Unene waye wa velapo u wĩha epondolo lioku linga eci a yongola. Esunga kuenda olondunge viaye via lipua viu songuila oku tẽlisa eci a yongola oku linga. Kuenda, ocisola caye ka ci sokisiwa cu vetiya oku linga eci a yongola. Upostolo Yoano wa soneha ndoco: “Suku eye ocisola.” (1 Yoano 4:8) Ocisola ca Suku ci vetiya ovina viosi eye a linga. Oku kola kua Yehova kuenda ovituwa vikuavo via velapo viu lingisa oku kala Isia una uwa haeye tu pondola oku kolela lutima wetu wosi. Ka kuli lacimue ale omunu umue tu pondola oku kolela vali lutima wetu wosi okuti Yehova ci sule.
Kolela Yehova Kuenda Kuata Esanju Liocili
Esunga likuavo lieci tu kolelela Yehova lutima wetu wosi lieli okuti, eye wa tu kũlĩha vali ciwa okuti omunu umue wiñi ci sule. Eye wa kũlĩha okuti omunu lomunu o kuete esukila limue lioku kolapo, loku kala komuenyo otembo ka yi pui kuenda oku kuata ukamba wocili Lululiki waye. Omunu wosi una o kuete ukamba waco laye o kala omunu umue wa kolapo vali calua. Soma Daviti wa popia hati: “Omunu wa kolela Yehova, ... eye wa sumuluha.” (Osamo 40:4) Olohuluwa vialua viomanu kotembo yilo va siatavo oku lekisa ekolelo lutima wavo wosi kovisimĩlo evi via Soma Daviti.
Kũlĩhĩsa ciwa ovolandu amue akuãimo. Manji umue ukãi o tukuiwa hati, Doris wa kala ale kolofeka vio República Dominikana, ko Alemanya, ko Gresia kuenda ko Estados Unidos, wa lombolola hati: “Ame ndi kuete esanju lialua omo lioku kolela Yehova lutima wange wosi. Eye wa kũlĩha ndomo a pondola oku ndi tata ketimba, kespiritu kuenda kueci catiamẽla kesanju liange liutima. Eye ekamba limue okuti ka li pondola oku sokisiwa lomunu umue komuenyo wange.” Ulume umue o tukuiwa hati, Wolfgang, una wa siata oku eca olonumbi viombonge komanu wa lombolola hati: “Ci sanjuisa calua oku kolela omunu una o kuete epondolo lioku kũlĩha eci tu yongola, haeye o kuete epondolo lioku tẽlisa cosi tu yongola komuenyo wetu!” Ulume ukuavo o tukuiwa hati, Ham, wa citiwila kofeka yo Asia, pole cilo o kasi kocifuka co Europa, wa lombolola hati: “Ame nda kolela okuti Yehova wa kũlĩha ovina viosi kuenda eye ka lueya. Omo liaco, oku lekisa ekolelo liange kokuaye ci ndi sanjuisa calua.”
Ci kuete esilivilo okuti omunu lomunu pokati ketu ka kolela lika Ululiki wetu, pole o kolelavo omanu. Omo okuti Yehova ekamba lietu kuenda o kuete olondunge via velapo, eye o tu ĩha olonumbi vi tu kuatisa oku limbuka omanu vana tu pondola oku kolela. Poku tanga Embimbiliya lutate, tu pondola oku limbuka elungulo liaye liatiamẽla kondaka yoku va kolela.
Omanu Vana tu Pondola Oku Kolela
Ukualosamo wa soneha ndoco: “Ku ka kolele olosoma. Ku ka kolele omunu ukuasitu omo kokuaye ka kuli ekuatiso.” (Osamo 146:3) Olondaka evi vi tu kuatisa oku limbuka okuti kuli omanu valua ka va sesamẽla ekolelo lietu. Ndaño muẽle omanu vana va kuete omangu ya velapo voluali lulo ndeci “olosoma,” olonoño vina vi kuete ukũlĩhĩso wa velapo watiamẽla konepa yimue yupange ale yomuenyo womanu, ka ci lekisa olondunge oku kolela calua kokuavo. Olonumbi viavo via siata oku yapuisa omanu, kuenje oku kolela lutima wetu wosi “kolosoma” viaco ci pondola oku tu tuala kesumuo lialua noke yotembo yimue.
Ocili okuti, eci hacoko ci tu vetiya oku siapo oku lekisa ekolelo komanu vosi. Omo liaco, tu sukila oku nõla lutate omanu vana tu pondola oku kolela. Onjila yipi tu sukila oku kuama poku nõla omanu vaco? Poku kũlĩhĩsa lutate ongangu ya va Isareli, ci tava okuti tu sangako limue ekuatiso. Eci va Isareli va sukilile oku nõla omanu vana va pondola oku tambula ovikele viatiamẽla kespiritu, Mose wa tambula onumbi yokuti, “nolapo alume vamue va sunguluka, haivo va sumbila Suku, alume vocili, haivo va suvuka ovitukiko.” (Etundilo 18:21) Nye tu pondola oku lilongisila konumbi eyi?
Alume vaco ava vamue va lekisile ale ovituwa viwa vioku sumbila Suku osimbu handi ka va tambuile ovikele vina vieciwa komanu vana va koleliwa. Ovo va enda ale loku lekisa komuenyo wavo okuti va sumbila Suku kuenda, va enda loku lekisa esumbilo li va kuatisa oku yuvula oku linga cosi ci pondola oku sumuisa Ululiki. Eci ca limbukiwile lomanu vosi okuti alume vaco va likolisilako calua oku kuama ovihandeleko via Suku. Kuenje oku suvuka kuavo ovitukiko kua lekisile okuti va kuete ovituwa viwa vina vi va kuatisa oku yuvula oku yapuisiwa lolombiali. Ovo ka va lekisile etombo komanu vana va va kolela oco va tẽlise olonjongole viavo ale olonjongole viakamba kuenda omanu vana vakuepata liavo.
Eci ka ci tu longisa hẽ, oku kalavo lolondunge koloneke vilo eci tu nõla omanu vana tu pondola oku kolela? Anga hẽ tua kũlĩha omanu vamue okuti ovituwa viavo vi lekisa okuti va sumbila Suku? Ovo hẽ va likolisilako oku kuama ovihandeleko via Suku viatiamẽla kovituwa viwa? Anga hẽ ovo omanu vamue va pita ale voloseteko viñi viñi haivo vamamako loku pandikisa kuenda oku yuvula oku linga eci cĩvi? Ovo hẽ omanu vamue va siata oku vangula ocili okuti ka va kuete ocituwa coku liteyuila ovo muẽle ale oku tiamisila olondaka viavo kocimãho cina va yongola oku tẽlisa? Ocili okuti alume kuenda akãi vana va siata oku lekisa ovituwa viaco evi ovo va sesamẽla ekolelo lietu.
Ku ka Sumue Nda Kueya Ovitangi Vina Viatiamẽla Koku Lekisa Ekolelo
Eci tu nõla omunu una tu pondola oku kolela tu kuete oku kala lepandi, momo oku kolela omunu umue ci sukila otembo yalua. Onjila yimue yi lekisa olondunge yatiamẽla koku kolela omunu umue, oku ci linga kamue kamue vokuenda kuotembo. Oco hẽ ndamupi? Ocili okuti, etu tu sukila oku kũlĩha ciwa ovituwa viomunu waco vokuenda kuotembo, loku limbuka ndomo eye a linãla lovitangi viñi viñi. Anga hẽ omunu waco o lekisavo esunga kovina vitito? Ndeci, nda eye wa pinga cimue, wa siata hẽ oku ondolola votembo eye a likuminya oku ceca kuenda omunu umue ukuakukuama olonumbi viosi vina a likuminya? Nda eye wa siata oku ci linga, eci ci lekisa okuti etu tu pondola oku u kolela lutima wetu wosi ndaño muẽle kovina vinene Eci ci kuete elitokeko lonumbi ya linga hati: “U o linga esunga leci citito, eye o linga esunga leci ca lua.” (Luka 16:10) Nda tua likolisilako oku nõla lutate kuenda oku lekisa epandi, ci tava okuti cika tu kuatisa oku yuvula esumuo lialua.
Nye tu linga nda tua likolisilako oku kuama olonumbi viaco poku nõla omunu una tu pondola oku kolela, pole lopo weya oku tu pakula? Omunu wosi o lilongisa Embimbiliya oka ivaluka okuti Yesu vuteke waye wa sulako woku kuatiwa oco a pondiwe, eye wa pakuiwa londonge yaye muẽle. Yesu wa pakuiwa la Yuda Isikariote kuenda olondonge vikuavo omo liusumba via tila. Ndaño muẽle Petulu wa likala Yesu olonjanja vitatu. Pole, Yesu wa limbukile okuti Yuda eye lika wa linga locipango caye muẽle. Ndaño okuti Yesu wa pakuiwa vowola yimue okuti omuenyo waye wa kala kohele, pole eye ka liwekelepo oku lekisa ekolelo liaye kolondonge vikuavo vi soka 11 noke yolosemana vimue viñami ñami. (Mateo 26:45-47, 56, 69-75; 28:16-20) Cimuamue haico, nda tua limbuka okuti tua pakuiwa lomunu umue tua kolela calua, tu sukila oku kũlĩhĩsa ciwa lutate nda eye wa ci lingila omo lioku kala omunu umue ka sesamẽla ekolelo lietu ale wa ci lingila omo liekalo lietu liomanu ka lipuile.
Anga hẽ Ndi Sesamẽla Oku Koleliwa?
Omunu una o nõla u eye a pondola oku kolela o sukila oku sunguluka kuenda oku lipula eye muẽle ndoco: ‘Anga hẽ ame ndimunu umue o sesamẽla oku koleliwa? Ovituwa vipi vi lekisa oku sunguluka kuange kuenda ndi kevelela nye ku vakuetu?’
Ocili okuti omunu una wa siata oku vangula ocili, eye o sesamẽla oku koleliwa olonjanja viosi. (Va Efeso 4:25) Eye ka vangula kuenda ka tambulula olondaka vimue viñi komanu vamue osimbu okuti komanu vakuavo o vangula cimue ciñi oco a tẽlise ocipango caye. Handi vali nda wa linga ohuminyo yimue, eye o likolisilako oku linga cosi oco a yi tẽlise loku lekisa okuti eye omunu umue o sesamẽla oku koleliwa. (Mateo 5:37) Nda omunu umue wo sapuilako ondaka yimue yo pokolika, omo lioku kala omunu una o sesamẽla oku koleliwa, eye amamako loku seleka ondaka yaco vutima waye kuenda lalimue eteke a vangula olombonde. Omunu una o sesamẽla oku koleliwa o lekisa esunga komunu eye a likuela laye. Eye ka vanji omanu va kasi epolõla vo Televisão kuenda ka sokisa ndovitalukilo ovina vina vi vetiya ukahonga loku payola akãi. (Mateo 5:27, 28) Omunu una o sesamẽla ekolelo lietu o likolisilako oku talavaya oco a litekule eye muẽle kuenda vakuepata liaye. Eye ka sandiliya apuluvi oku nganyala olombongo lonjila yimue ka ya sungulukile komanu vakuavo. (1 Timoteo 5:8) Poku lekisa ovituwa viaco evi via sunguluka kuenda oku kuama ovihandeleko viatiamẽla Kovisonehua, cika tu kuatisa oku tepisa omanu vana tu pondola oku kolela. Pole, nda tua likolisilako oku kuama ovituwa viaco cika tu kuatisavo oku kala omanu vana va sesamẽla oku koleliwa la vakuetu.
Hesanjukuolio tuka kuata poku kala voluali lumue okuti omanu vosi va sesamẽla oku koleliwa kuenda ovina viosi vi pondola oku tu sumuisa omo lioku pakuiwa lomunu umue tua kolela ka vika kalako vali! Anga hẽ eci onjoi yaño? Hanjoiko komanu vana va likolisilako calua oku kuama olohuminyo Viondaka ya Suku yina ya popia ale tunde osimbu okuti kuka kala ‘oluali lumue luokaliye’ lua posoka calua okuti ka muka kala vali ũvi, uhembi, elaviso, esumuo kuenda uveyi ndaño okufa! (2 Petulu 3:13; Osamo 37:11, 29; Esituluilo 21:3-5) Ka ci kuete hẽ esilivilo oku kũlĩhĩsa vali eci catiamẽla kelavoko liaco? Olombangi via Yehova vika kuata esanju lialua lioku ku kuatisa oku ku lomboluilako vali eci catiamẽla kondaka yaco kuenda oku ku ĩha alomboluilo akuavo a kuete esilivilo lia velapo komuenyo wove.
[Elitalatu kemẽla 4]
Oku liwekapo oku kolela vakuetu ku pondola oku nyana esanju lietu
[Elitalatu kemẽla 5]
Yehova eye o sesamẽla vali calua ekolelo lietu lutima wosi
[Elitalatu kemẽla 7]
Vosi yetu tu sukila oku kuata ukamba poku likolela pokati la vakuetu