Esapulo 53
Ohuminyo ya Yefita
ETEKE limue ci tava okuti ove wa lingile ale ohuminyo. Anga hẽ wa limbukile okuti ca tĩla oku yi tẽlisa? Ulume o lete ndeti vociluvialuvia cilo, wa lingile ohuminyo yimue. Eli olio esunga lieci a sumuĩla. Onduko yaye, Yefita. Eye wa kala ukuotõi haiye onganji ko Isareli.
Yefita wa kala kotembo eci va Isareli va liwekelepo oku fendela Yehova. Ovo va kala loku amamako oku linga eci cĩvi. Kuenje Yehova wa ecelela okuti va yambuiwa la va Amoni. Omo liaco, va Isareli va fetika oku popia ku Yehova hati: ‘Tua ku lueyela. Tu popele!’
Noke va likekembela ku Suku ovilinga viavo vĩvi. Ovo va lekisa oku likekembela kuavo poku fendela vali Yehova. Kuenje Yehova wa va kuatisa.
Omanu va fetika oku nõla Yefita oco a liyake la va Amoni. Yefita wa pinga ku Yehova oco o kuatise kuyaki waco. Eye, wa likuminya ku Yehova hati: ‘Nda weca va Amoni peka liange, wosi o tunda vonjo yange oku ñualehela lame eci ndi tiuka, ndu weca kokuove.’
Yehova wa yeva ko-huminyo ya Yefita kuenje wo kuatisa oku yula va Amoni. Noke Yefita wa tiuka kuyaki waco. Ove hẽ wa kũlĩha omunu watete wa tunda vonjo yaye oku liñualehela laye? Omunu waco, omõlaye ukãi okuti eye lika a kala laye. Yefita wa kaluka hati: ‘Avoyo we, amõlange! Wa ndi nenela esumuo. Nda likuminyile ku Yehova kuenje si tẽla vali oku litiukamo.’
Eci omõla a limbuka ohuminyo yaco, kefetikilo wa sumuilevo. Momo ci lomboloka okuti eye o sia isiaye kuenda akamba vaye. Eye oka pita otembo yomuenyo waye koku vumba Yehova vo tavernakulu ko Silo. Noke wa sapuila isiaye hati: ‘Nda wa likuminya ku Yehova, tẽlisa ohuminyo yaco.’
Noke omõlaye wa enda ko Silo. Kuenje wa pita otembo yomuenyo waye wosi oku vumba Yehova vo tavernakulu. Unyamo lunyamo oloneke vikuala vunyamo, afeko va Isareli va enda loku endako oku u nyula. Kuenje va kala kumuamue lesanju. Omanu veya oku sola calua omõla a Yefita omo lioku kala ondingupange ya Yehova.