Eye wa Sanjuisa Isiaye Kuenda Yehova

Ove hẽ, o lete ufeko velitalatu?— Eye, omõla wulume umue o tukuiwa hati, Yefita. Embimbiliya ka li tu sapuila onduko yaye pole, tua kũlĩha okuti, wa sanjuisa isiaye kuenda Yehova. Tu konomuisi ulandu watiamẽla kokuaye, kuenda ku isiaye Yefita.

Yefita wa kala ulume umue uwa, kuenda wa sanda otembo yoku longisa omõlaye ufeko ovina viatiamẽla ku Yehova. Eye wa pamele kuenda wa kala usongui uwa. Va Isareli va pinga kokuaye oco a va songuile poku yaka lovanyãli vavo.

Yefita wa likutilila ku Suku oco o kuatise oku yula. Yefita wa likuminyile okuti, nda wa yula, omunu wosi wa tunda tete vonjo yaye oco a ñualehele laye poku tiuka, u weca ku Yehova. Kuenje, o talavaya votavernakulu ya Suku otembo yosi yomuenyo waye. O tavernakulu ya kala ocitumãlo omanu va endaile oku fendela Suku kosimbu. Ocili okuti, Yefita wa yula uyaki! Ove hẽ, wa kũlĩha omunu wa tunda tete vonjo oco a ñualehele laye eci a tiuka?—

Omõla ufeko wa Yefita, eye wa tunda tete vonjo! Ndaño okuti omõlaco eye lika Yefita a kuata, pole, wa sukilile oku u weca oco a ka vumbe Yehova votavernakulu. Yefita wa sumuile calua. Pole, wa sokolola ohuminyo a lingile. Noke, omõlaye wo sapuila hati: ‘A tate, nda wa linga ohuminyo ku Yehova, yi tẽlisa.’

Omõla a Yefita wa sumuilevo. Momo, wa kũlĩhĩle okuti, omunu wosi o talavaya votavernakulu, ka kuela, kuenda ka citi omãla. Pole, wa tava oku tẽlisa ohuminyo ya isiaye, kuenda wa sanjuisa Yehova. Oku linga upange wa Yehova, ca kuatele esilivilo lia velapo kokuaye okuti oku kuela, ale oku cita omãla ci sule. Omo liaco, wa tunda konjo yolonjali viaye, kuenje, wa vumba Yehova votavernakulu vokuenda kuomuenyo waye wosi.

Ove hẽ, o sima okuti ovina a linga via sanjuisa isiaye kuenda Yehova?— Via sanjuisa! Nda wa pokola loku sola Yehova, ndeci omõla a Yefita a linga, o sanjuisa olonjali viove, kuenda Yehova.