Esapulo 105
Va Talamẽla vo Yerusalãi
OMANU ava o lete ndeti, olondonge via Yesu. Va pokola kolondaka via Yesu kuenje va kala ko Yerusalãi. Osimbu va kala loku kevelela ocileñi cimue ca yukisa onjo yosi. Ca kala ndokuõla kuocipepe. Kuenje alimi ondalu a fetika oku molẽha kutue wondonge londonge. O lete hẽ ondalu kutue womunu lomunu? Eci hẽ ci lomboloka nye?
Eci ca kala ocikomo! Yesu wa tiukila kilu ku Isiaye, eye wa eca espiritu sandu lia Suku kolondonge viaye. Wa kũlĩha eci espiritu sandu lia va vetiya oku linga? Vosi va fetika oku vangula alimi a litepa.
Omanu valua vo Yerusalãi va yeva okuõla kuocipepe, kuenje veya oku tala eci ca pitako. Vamue va kala vakualofeka, veyile kofesta yo Pendekoste. Ca kala ocikomo kakombe vaco! Ovo va yeva olondonge oku vangula valimi avo muẽle catiamẽla kovina vi komõhisa via Suku.
Akombe va fetika oku popia hati: ‘Omanu vosi ava va Galilea.’ Va kasi oku vangula ndati alimi a litepa okolofeka tua tunda?
Petulu wa fetika oku va lomboluila. Lolukandi wa sapuila omanu ndomo Yesu a pondiwa, kuenda ndomo Yehova o pindula. Petulu wa popia hati: ‘Cilo Yesu okasi kilu kondio ya Suku. Kuenda eye wa eca espiritu sandu ndomo a ci likuminyile. Eli olio esunga lieci ovo va muila kuenda va yevela ovikomo evi.’
Eci Petulu a vangula ovina evi, omanu valua va sumuile leci va linga la Yesu. Kuenje omanu va pula hati: ‘Nye tu kuete oku linga?’ Petulu wa popia lavo hati: ‘U kuete oku likekembela kuenda oku papatisiwa.’ Veteke liaco, ci soka olohũlũkãi vitatu viomanu va papatisiwa, kuenda va linga olondonge via Yesu.