Ocipama 2

Suku Eye Ekamba Liavelapo Ove Opondola Oku Kuata

Oku kala ekamba lia Suku ocina cimue cavelapo ove opondola okulinga okuti cosi cisule. Onjongole ya Suku oku kulongisa ndomo opondola oku kuata esanju kuenda oku kolapo; eye oyongola oku kuyovola kovituwa vialua vivĩ kuenda kovilinga vievĩho. Eye okayevelela lutate olohutililo viove. Eye oka ku kuatisa oco okuate ombembua yutima kuenda ekolelo. (Olosamo 71:5; 73:28) Suku oka kupamisa olonjanja viosi eci kuiya ovitangi. (Olosamo 18:18) Kuenda Suku okuiha ongavelo yaye yocali yomuenyo kopui.​—⁠Va Roma 6:23.

Ndomo ove olitokekisa ku Suku, cika kuecelelavo okulitokeka lakamba va Suku. Ovo vakalingavo akamba vove. Ocili okuti, ovo vakalinga vamanji yove alume kuenda akãi. Ovo vaka kuata esanju lioku kulongisa cosi catiamela ku Suku kuenda vakala ekuatiso kokuove kuenda vakavetiya epandi liove.

Etu katualisokele la Suku. Osimbu ove osandiliya ukamba la Suku, osukila elomboloko lieci cakongeliwa vonepa yaco. Ukamba la Suku hukambako wava valisoka pokati hacoko. Eye kakuete esulilo ndaño efetikilo vuloño kuenda unene waye wavelapo vali enene okuti etu tusule. Eye osoma yetu Yavelapo. Omo liaco nda tuyongola oku kala ekamba liaye, tusukila oku yevelela kuenda okulinga eci eye ayongola okuti tucilinga. Eci cituecelela otembo yosi oco tulinge ciwa upange wetu.​—⁠Isaya 48:18.