Ocipama 5

Akamba Va Suku Vaka Kala Vofeka Yelau

Ofeka yelau ka yika lisetahãla loluali lulo tukasi ndeti cilo. Suku lalimue eteke ayonguile okuyukisa osi lovitangi kuenda esumuo, olongembia kuenda ohali. Kovaso yotembo, Suku oka pongolola oluali vofeka yelau. Ofeka Yelau yika kala hẽ ndati? Tuvanji eci Embimbiliya litusapuila:

Omanu vasunguluka. Ofeka Yelau yikakala ocitumalo cakamba va Suku. Ovo vaka lilingila ovina viwa pokati kavo. Vaka kuata ekalo liwa liokuendela volonjila viasunguluka via Suku.​—⁠Olosapo 2:⁠21.

Eteku liomanu vosi. Vofeka Yelau ka muka kala onjala. Embimbiliya lilombolola okuti: “Vofeka mu kale olomema [ale eteku] via lua.”​—⁠Olosamo 72:⁠16.

Olonjo viafina kuenda upange wusanjuisa. Vofeka Yelau palo posi apata osi aka kuata olonjo viavo muẽle. Omanu vaka linga upange una okuti u vanenela esanju liocili.​—⁠ Isaya 65:​21-23.

Ombembua voluali luosi. Ka muka kala omanu valiyaka kuenda olofa viuyaki. Ondaka ya Suku yisapula okuti: “[Suku] imola ovita toke kesukiyo liongongo.”​—⁠Olosamo 46:​8, 9.

Uhayele. Embimbiliya lieca ohuminyo okuti: “Layimue onungi [Vofeka Yelau] yi popia yiti, ‘ndi vela.’ ” (Isaya 33:24) Handi vali, layumue oka kala ocilema, omeke, ocisitatui ale pamue ocitapi.​—⁠Isaya 35:​5, 6.

Esulilo liolongembia, liesumuo, kuenda olofa. Ondaka ya Suku yisapula okuti: “Okufa ka ku kalako vali, ndaño oku lila loku liyula lupongo laviovo ka vi kalako vali. Momo ovina viatete via pita.”​—⁠Esituluilo 21:⁠4.

Kamu ka kala omanu vakuevĩho. Yehova walinga ohuminyo hati: “Vakuakandu . . . va tundisua vofeka, kuenda vakuosuanji va veyuiwamo.”​—⁠Olosapo 2:⁠22.

Omanu vakalikuatela ocisola kuenda esumbilo pokati kavo. Ka kukakala uvĩ wolonepele, omanu vatalisiwa ohali, ocipululu kuenda esuvu. Omanu vaka kuata elitokeko kuenda vaka kuata ekalo liomuenyo lokuendela volonjila via Suku viasunguluka.​—⁠Isaya 26:⁠9.