Ilaika Kuenda Oku Lekisila Ovisimĩlo Pupolo

OMANU vakuavikoti vimue va ilaika vali lulelu okuti ava va kulila kovikoti vimue viñi ci sule. Pole, ndomo ca siata lomue o vangula okuti ka lekisila ocisimĩlo pupolo. Eci ca siata, cikale eci omunu a vangula lukuavo ale poku vanguila powiñi.

Yesu koku vangula kuaye, oku ilaika kua kala ocituwa caye kuenda ca kalavo ocituwa colondonge viaye. Kepuluvi limue, umue wa sapuila Yesu okuti inaye la vamanjaye va yonguile oku vangula laye. Yesu wa tambulula hati: “Mãi [h]elie? Vamanjange velie?” Embimbiliya li amisako hati: “woluĩla olondonge viaye eka liaye kuenje hati, Tali, mãi la vamanjange hava.” (Mat. 12:48, 49) Pokati katukulo añi añi Embimbiliya, kelivulu Liovilinga 12:17 kuenda 13:16, ku lekisa okuti upostolo Petulu la Paulu va endavo loku olõla ovaka avo.

Ovisimĩlo kuenda eci ci kasi vutima, ka ci lekisiwila lika kondaka, pole ci lekisiwilavo koku ilaika kuenda pupolo. Ekambo lioku ci linga ciwa, li pitiya ocisimĩlo cekambo lionjongole konepa yu o kasi loku vangula. Pole, eci onepa eyi yupopi yi tokekisiwa ciwa, uwa wiyilila kueci ci vanguiwa u livokiya calua. Ndaño muẽle ceci o vanguila vo telefone, nda wa ilaika ciwa kuenda wa lekisila ovisimĩlo pupolo, ondaka yove yika lekisa vali ciwa esilivilo lieci o kasi loku popia kuenda ndomo o liyevite kueci catiamẽla kondaka o kasi loku popia. Omo liaco, cikale eci o vangula, eci o tanga, ale ceci okuti olonjeveleli viove via ku tulukila ale via tulukila Vambimbiliya avo, oku ilaika loku lekisila ovisimĩlo pupolo, ku kuete esilivilo liocili.

Oku ilaika kuaco loku lekisila ovisimĩlo pupolo ku lianje muẽle, ka ku ka kale ndu okuti o kasi loku vi tanga velivulu. Ove lalimue eteke oka lilongisa ndomo o yola ale ndomo o nyumãla. Oku ilaika te kua lekisavo ovisimĩlo vi kasi vutima wove. Nda oku ilaika kuaco kua lianja, oco ciwa.

Oku ilaika ku tepiwa volonepa vivali: Oku ilaika kuoku lekisa cimue kuenda kuoku eca ongusu kondaka ya popiwa. Oku ilaika Kuoku Lekisa Cimue, ku lekisa elinga ale utunga kuenda ocitumãlo. Vosikola eci o talavaya vetosi lioku ilaika, ku ka sanjuke ño loku ilika onjanja yimosi ale luvali. Likolisilako oku ilaika loku lianja vohundo yove yosi. Nda okuti o kasi loku sanga ekatanga lioku ci linga, eci cika ku kuatisa oku tala olondaka vi lekisa esuñamelo, upãla, unene, ocitumãlo, ale olondaka vi lekisa eci ca sokamo. Pole, ocina ca velapo vali o sukila oku linga, oku kapa utima wove wosi vohundo yove, okuti ku sakalala leci omanu va kasi loku sima catiamẽla kokuove. Kuenje o vangula kuenda o linga muẽle ndomo wa siata oku kala vomuenyo weteke leteke. Momo, nda omunu utima wotula, ocili okuti oku ilaika kuaye ku lianja.

Oku ilaika Kuoku eca Ongusu Kondaka ya Popiwa, ku lekisa ndomo omunu a liyevite kuenda ku lekisavo utõi. Okuo, kueca ongusu kocisimĩlo. Oku ilaika kuoku eca ongusu kondaka ya popiwa, ku kuete esilivilo lialua. Pole, lunguka! Momo oku ilaika kuoku eca ongusu kondaka ya popiwa, ca leluka oku pongoloka ocituwa cĩvi. Nda okuti onjanja lonjanja ilika ño konele yimosi, ovisimĩlo violonjeveleli vi fetika oku tindukila lika konele yaco, kuenje ka vopi esilivilo kohundo yove. Nda mitavaso yosikola wa ku sapuila okuti o kuete ocitangi eci, luluvalela lika koku ilaika ku lekisa ovilinga, utunga kuenda ocitumãlo vokuenda kuotembo yimue. Noke, pana okuti pa pita ale otembo yimue, seteka vali oku ilaika kuoku eca ongusu kondaka.

Oco o kũlĩhe otembo yiñami o kuete oku linga oku ilaika kuoku eca ongusu kondaka kuenda oku kũlĩhavo oku ilaika kua sunguluka, konomuisa ovisimĩlo via vana o kasi loku vangula lavo. Oku ilaika olonjeveleli ku lingisa okuti ovo ka va liyevi ciwa. Kolofeka vimue, nda ulume o lekisa elinga limue ndeci oku kapa eka komẽla poku komõha cimue, o sokisiwa ndulume o kuete ovituwa ndevi viakãi. Kolonepa vimue violuali, ka ca sungulukile akãi oku votoyola ovoko. Kolonepa viaco, vamanji akãi va sukila oku lekisila vali enene ovisimĩlo viavo pupolo. Kuenda oku ilaika ño enene eci tu kala kovaso yocimunga citito, kolonepa vialua violuali va ci sokisa ndovinjembe.

Eci o kuata vali eloñoloho leci ci ku leluka vali oku vangula, oku ilaika kuosi kuoku eca ongusu kondaka oka linga, kuka lekisa muẽle eci ci kasi vutima wove, loku lekisa utõi kuenda ocili cove. Ovio vika vokiya esilivilo kueci o popia.

Oku Lekisila Ocisimĩlo Pupolo. Ketimba liove liosi, ocipala cove olonjanja vialua oco ci lekisa ndomo o liyevite. Ovaso ove, omẽla yove, loku kua yendukila utue wove, viosi evi vi lekisa ndomo o liyevite. Ndaño muẽle vomẽla wove ka mua tundile ondaka, ocipala cove ci pondola oku lekisa ekambo lionjongole, esumuo, usumba, ekomõho, ale esanju. Eci ci kasi pocipala cove eci ci kuamisua londaka, ci vokiya ongusu kueci ci popiwa. Ululiki wetu wa kapa asipa valua kocipala cetu. Kocipala cetu kuli eci ci pitahãla 30 kasipa. Onepa yimue yasipa aco a li naluila kumosi eci tu yola.

Eci o kala kembumbua ale ceci o talavaya kupange woku kunda, o kasi loku likolisilako oku sapuila omanu ondaka yesanju, okuti yi pondola oku sanjuisa ovitima viavo. Ocinjola cimue cesanju ceca uvangi waco. Pole, nda ocipala cove ka ci lekisa ocisimĩlo lacimue, eci pamue ci kapa vatatahãi ocili cove.

Handi vali, ocinjola ci lekisa ku vakuene okuti ove o va kuetele ocisola. Eci ci kuete vali handi esilivilo lia velapo koloneke vilo tu kasi ndeti momo omanu olonjanja vialua va kasi lusumba woku vangula lomanu vana ka va kũlĩhĩle. Ocinjola cove ci kuatisa omanu oku lianja kuenda oku tava kueci o popia.