Alomboluilo ka a si Atatahãi

ECI o vangula cimue, olonjeveleli viove vi kuete omoko yoku lipula ndoco: “Eci hẽ ocili muẽle? Uvangi upi u lekisa okuti eci hundi a kasi loku vangula ci tava muẽle oku ci kolela?” Ove ulongisi, o kuete ocikele coku tambulula apulilo aco ale oku kuatisa olonjeveleli viove oku sanga atambululo atiamẽlako. Nda etosi limue li kuete esilivilo linene kueci o kasi loku vangula, eca uvangi wasuapo watiamẽla ketosi liaco oco o lekise esunga lia velapo kolonjeveleli viove lioku tava kondaka yaco. Eci cika lingisa okuti elombololuilo liove li kala limue li tavisa.

Upostolo Paulu wa kala ondunguluke koku tavisa. Lalomboluilo amue ka a si atatahãi, kuenda oku a situlula ciwa, loku felevela kuocili, eye wa likolisilako oku kuatisa olonjeveleli viaye oku pongolola ovisimĩlo viavo. Eci eye a linga ci tu ĩha ongangu yiwa oku yi kuama. (Ovil. 18:4; 19:8) Ocili okuti, olohundi vimue vatavo esanda via siatavo oku kala olondunguluke koku tavisa omanu kuhembi wavo. (Mat. 27:20; Ovil. 14:19; Va Kol. 2:4) Ovo pamue va fetika lolondaka vimue vi molẽha soketi viocili, kuenda va kolela kolono vina vi nyõla ekalo liwa, okuti ka va kapiko uvangi una u pisa ovisimĩlo viavo, ale va lupukila vali koku vetiya onjongole okuti koku lekisa esunga lieci va popela ovina viaco hacoko. Etu tu sukila oku kuata utate woku yuvula ovina viaco evi.

Kakatela Lika Kondaka ya Suku. Eci tu longisa ka cika tunde kovisimĩlo vietu muẽle. Etu tu likolisilako oku sapuila omanu eci tua lilongisa Vembimbiliya. Konepa eyi, etu tua siata oku kuatisiwa calua lalivulu a siata oku angiliyiwa locimunga cukuenje wa kolelua haeye wa lunguka. Alivulu aco, a tu vetiya oku konomuisa lutate Ovisonehua. Omo liaco, etu tu tiamisila ovisimĩlo via vakuetu Vembimbiliya, halonjongoleko yoku li lekisa okuti etu tu kuete esunga, pole lumbombe, tu ecelela okuti ovo va li muĩla ovo muẽle eci olio li popia. Etu tu tava kolondaka via popiwa la Yesu Kristu, eci a popia vohutililo ku Isiaye hati: “Ondaka yove oyo ocili.” (Yoano 17:17) Ka kuli laumue o kuete unene wa velapo te lika Yehova Suku, Ululiki wilu losi. Omo liaco, olondaka vietu vika kuata lika esilivilo nda tua vitiamisila Vondaka yaye.

Olonjanja vimue ove pamue o vangula lomanu vana okuti ka va kũlĩhĩle eci ci sangiwa Vembimbiliya, ale vana okuti ka va tava okuti Embimbiliya olio Ondaka ya Suku. Ove o kuete oku lekisa olondunge vioku tepisa otembo ci tava oku lekisa ovisonehua Viembimbiliya kuenda ndomo vi lekisiwa. Pole, ka pa ka pite otembo yalua ove te haico wa likolisilako oku tiamisila ovisimĩlo viavo kono eyi yalomboluilo a koleliwa.

Oco hẽ, o sima okuti oku tukula lika ocisonehua cimue ca sunguluka, ci lekisa esunga limue ka li patãliwa? Sio, hacoko. Ove pamue o sukila oku tiamisila ovisimĩlo kulandu waco wosi oco o lekise okuti ocisonehua caco ceca uvangi weci o kasi loku popia. Nda o kasi loku lekisa ño onumbi yimue yi sangiwa vocisonehua cimue okuti ulandu waco wosi ka u vangula lacimue catiamẽlako, pamue ci sukila oku lekisa uvangi waluapo vali. Ove pamue o sukila oku tanga ocisonehua cikuavo ci vangula eci catiamẽla kondaka yaco oco wece uvangi kolonjeveleli viove wokuti eci o kasi loku vangula catiamẽla muẽle Vembimbiliya.

Yuvula okupa uvangi vocisonehua cimue okuti uvangi waco ka u sangiwamo. Tanga lutate ocisonehua caco. Ocisonehua caco, pamue ci vangula cimue catiamẽla kondaka o kasi loku lombolola. Pole, oco elomboluilo liaco li taviwe, olonjeveleli viove te vi limbuka okuti ocisonehua caco ceca muẽle uvangi weci o kasi loku vangula.

Ovovangi Akuavo. Olonjanja vimue, ci kuatisa oku lekisa uvangi u sangiwa volono vikuavo via koleliwa okuti ha Vembimbiliyako oco o kuatise omanu oku limbuka ocili Cembimbiliya.

Ndeci, ove ci tava okuti o lekisa oluali nduvangi wokuti kuli Ululiki. Ci tavavo okuti o tiamisila ovisimĩlo kovihandeleko via viala ovina via lulikiwa, ndeci ongusu yi kokela posi ovina viosi, kuenda oku lekisa okuti omo kuli ovihandeleko viaco, ci lekisa okuti kuli U wa tumbika ovihandeleko viaco. Alomboluilo ove aka kala awa nda wa atiamisila kueci ci sangiwa Vondaka ya Suku. (Yovi 38:31-33; Osa. 19:1; 104:24; Va Rom. 1:20) Uvangi waco u kuatisa, momo u lekisa okuti eci Embimbiliya li popia ci likuata lovina vi letiwe.

O kasi hẽ oku likolisilako oku kuatisa umue oco a kuate elomboloko liokuti Embimbiliya Ondaka muẽle ya Suku? Ove pamue o tukula eci ca popiwa la vamue va kuete ukũlĩhĩso walua woluali va popia okuti Embimbiliya ondaka muẽle ya Suku, pole eci hẽ ci lekisa uvangi waco? Atukulo aco a kuatisa lika omanu vana va sumbila vakuokũlĩhĩso waco. Anga hẽ o pondola oku tukula uloño, nduvangi wokuti eci ci sangiwa Vembimbiliya cocili? Nda ove wa tukula ovisimĩlo violonoño ka via lipuile nduvangi wa velapo, ci kala ndoku tiamẽla kociseveto ca hongua. Pole, nda ove wa fetika loku tukula Ondaka ya Suku kuenje noke oco o tukula akonomuiso olonoño ana a lekisa ocili Cembimbiliya, alomboluilo ove aka tiamẽla kociseveto ca pama.

Olondaka viosi o kasi oku likolisilako oku lekisa nduvangi, vi lekisa uvangi wasuapo. Uvangi wosi u sukiliwa, watiamẽla ño kolonjeveleli viove. Ndeci nda o kasi oku lombolola eci catiamẽla koloneke via sulako via tukuiwa kelivulu lia 2 Timoteo 3:1-5, ci tava okuti ove o tiamisila ovisimĩlo violonjeveleli viove kesapulo limue lia sapuiwa calua li lekisa okuti omanu koloneke vilo ka “va kuete ocikembe” la vakuavo. Ongangu eyi yimosi yi tẽla koku lekisa ondimbukiso yokuti oloneke via sulako vi kasi loku tẽlisiwa.

Oku setahãisa ovina vivali via litepa okuti vi kuete cimue ca lisetahãila, ci kuatisa. Oku setahãisa kuaco lika ka ci lekisa uvangi waco. Oco ku lekisiwe esilivilo liaco, ci sukila oku sokisa leci Embimbiliya li popia. Pole, oku setahãisa ku pondola oku kuatisa omunu oku kuata elomboloko liokuti ocisimĩlo eci cocili. Ci tava oku setahãisa poku lombolola okuti Usoma wa Suku uviali muẽle wocili. Ove ci tava oku lekisavo okuti ndeci uviali womanu wa sokiyiwa, Usoma wa Suku u kuetevo olombiali, omanu va vialiwa, ovihandeleko, ombonge kuenda ocisoko celongiso.

Ci tava okuti ku sapuiwavo ovolandu a pita muẽle ocili poku lekisa olondunge vioku kapako elungulo Liembimbiliya. Handi vali ci tavavo oku lombolola ovolandu a pita vomuenyo wove muẽle ndoku lekisa uvangi wolondaka o kasi loku vangula. Ndeci, poku lekisa komunu umue esilivilo lioku tanga kuenda lioku lilongisa Embimbiliya, ove ci tava okuti o tukula asumũlũho wa kuata vomuenyo wove omo lioku ci linga. Poku vetiya vamanjaye, upostolo Petulu wa vangula eci catiamẽla kepongoloko lia Yesu, okuti ocina cimue eye muẽle a li muĩla lovaso aye. (2 Pet. 1:16-18) Paulu wa lombololavo eci ca pita vomuenyo waye muẽle. (2 Va Korindo 1:8-10; 12:7-9) Poku lombolola ovolandu a pita vomuenyo wove, kala lutate oco ku ka molẽhise ocisimĩlo cokuti o kasi loku livelisapo.

Omo okuti omanu va litepa kekalo kuenda kovisimĩlo, uvangi u taviwa lomunu umue pamue ka u taviwa la umue ukuavo. Omo liaco, kapako ovisimĩlo violonjeveleli viove poku nõla uvangi oka lekisa kuenda ndomo oka u lekisa. Elivulu Liolosapo 16:23 li popia hati: “Utima wukualondunge u longaisa omẽla waye, ho vokiya uloño kolondaka viaye.”