OCIPAMA 37
Ndi Sukila hẽ Oku Papatisiwa?
Taya ocili ale uhembi?
Epapatiso ocina cimue ci sukiliwa Kakristão.
□ Ocili
□ Uhembi
Ocimãho ca velapo cepapatiso, oku ku teyuila oco ku ka linge ekandu.
□ Ocili
□ Uhembi
Epapatiso li ku ecelela oku popeliwa.
□ Ocili
□ Uhembi
Nda kua papatisiwile, ku sukila oku li lomboluila ku Suku omo liovilinga viove.
□ Ocili
□ Uhembi
Akamba vove nda va kasi oku papatisiwa, eci ci lomboloka okuti, ove wa lipongiyilavo oku eca enanga liaco.
□ Ocili
□ Uhembi
NDA WAMBATA omuenyo u litava lolonumbi via Suku, oku linga ukamba Laye kuenda oku sapuilako vakuene catiamẽla kekolelo liove, citava okuti o kasi oku sokolola oku papatisiwa. Pole, o kũlĩha ndati nda wa lipongiyila oku eca enanga liaco? Oco o kuatisiwe oku tambulula epulilo eli, tu konomuisi ovisimĩlo vi kasi vonano.
● Epapatiso ocina cimue ci sukiliwa Kakristão.
Ocili. Yesu wa handeleka olondonge viaye oco vi papatisiwe. (Mateo 28:19, 20) Ocili okuti, Yesu wa tava oku papatisiwa. Oco o setukule Kristu, o sukila oku papatisiwa eci o liyeva okuti, o kasi oku kula konepa yespiritu, oco o nõlepo onjila yaco loku kuata onjongole yo vutima yoku ci linga.
● Ocimãho ca velapo cepapatiso, oku ku teyuila oco ku ka linge ekandu.
Uhembi. Epapatiso ondimbukiso yi lekisiwa komanu yelitumbiko liove ku Yehova. Elitumbiko liove, hacina cimueko ci ku tateka oku linga ovina o yongola vuyombeki. Pole, ove o tumbika omuenyo wove ku Yehova omo okuti, o yongola oku ambata omuenyo u litava lolonumbi viaye.
● Epapatiso li ku ecelela oku popeliwa.
Ocili. Embimbiliya li popia okuti, epapatiso enanga limue li kuete esilivilo lia velapo, oco tu popeliwe. (1 Petulu 3:21) Pole, eci ka ci lomboloka okuti, epapatiso li sokisiwa lolonumbi vioku liteyuila nda ku pita oku litusula kuoviendelo. O sukila oku papatisiwa omo liocisola o kuetele Yehova kuenda o yongola oku u vumba lutima wosi otembo ka yi pui.—Marko 12:29, 30.
● Nda kua papatisiwile, ku sukila oku li lomboluila ku Suku omo liovilinga viove.
Uhembi. Tiago 4:17 hati: “Wosi wa kũlĩha oku linga eci ca sunguluka, pole, handi ka ci lingi, ekandu kokuaye”—ci kaile una wa papatisiwa ale sio. Omo liaco, nda wa kũlĩha eci ca sunguluka kuenda o liyevite okuti, o kasi oku kula konepa yespiritu oco wambate omuenyo wove lolondunge, pamue eli olio epuluvi lioku sapela la umue pokati kolonjali viove, ale Lukristão umue wa loñoloha. Lonjila eyi, o pondola oku limbuka ndomo wamamako oco o papatisiwe.
● Akamba vove nda va kasi oku papatisiwa, eci ci lomboloka okuti, ove wa lipongiyilavo oku eca enanga liaco.
Uhembi. Oku nõlapo oku papatisiwa ka ku kisikiwa, ku sukila oku tunda vutima. (Olosamo 110:3) O sukila lika oku papatisiwa eci o kũlĩha ciwa cosi ca kongela voku kala Ombangi yimue ya Yehova kuenda o kuete ekolelo liokuti, wa lipongiyila oku kuata ocikele caco.—Ukundi 5:4, 5.
Enanga Limue li Pongolola Omuenyo
Epapatiso enanga limue li pongolola omuenyo kuenda li nena asumũlũho alua. Vepuluvi limuamue, mua kongela oku kuata ocikele coku—ambata omuenyo lonjila yi litava lelitumbiko lio pokolika wa linga ku Yehova.
Wa lipongiyila hẽ oku linga elitumbiko liaco? Nda oco, o kuete asunga awa oku kuata esanju. Ocina o lavoka kovaso, ovikele via velapo—vioku vumba Yehova lutima wosi kuenda oku ambata omuenyo lonjila yi lekisa okuti, ove wa litumbika muẽle kokuaye.—Mateo 22:36, 37.
VOCIPAMA CI KUÃIMO
Lilongisa oku tumbika ovimãho oco o talavaye ciwa lomuenyo wove.
OCISONEHUA CA VELAPO
‘Eci atimba ene ndocilumba ci kasi lomuenyo, ci kola, haico ci taviwa la Suku okuti, upange u kola luloño wene woku sokolola.’—Va Roma 12:1.
CECI O SUKILA OKU LINGA
Lekuatiso liolonjali viove, sanda manji umue vekongelo o pondola oku ku kuatisa oku kula konepa yespiritu.—Ovilinga 16:1-3.
WA CI KŨLĨHA . . . ?
Epapatiso li kuete esilivilo lialua momo onepa “yondimbukiso” yepopelo liove.—Esekiele 9:4-6.
OKU KAPAKO OVINA VIA SOKIYIWA!
Oco ndi kule toke kepapatiso, ndi sukila oku kuata elomboloko lia suapo lialongiso Embimbiliya a kuãimo: ․․․․․
Ndi yongola oku pula kolonjali viange catiamẽla kosapi eyi ․․․․․
O TAMBULULA NDATI?
● Momo lie epapatiso enanga limue li kuete esilivilo?
● Nye ci vetiya umalẽhe oku papatisiwa selo?
● Momo lie pamue umalẽhe a sumaila oku litumbika loku papatisiwa?
[Olondaka]
“Oku kũlĩha okuti nda papatisiwile, ca ñuatisa oku nõla olonjila viwa kuenda oku yuvula oku kuama olonjila vimue nda via ndi kokela ovitangi.”—Holly
[Okakasia/Ociluvialuvia]
Apulilo a Siata Oku Lingiwa Atiamẽla Kepapatiso
Epapatiso li lomboloka nye? Oku mbuitikinyiwa vovava kuenda oku votoka, ci lomboloka okuti wa siapo ovituwa viosimbu wa kuata kuenda wa nõlapo oku linga ocipango ca Yehova.
Nye ci lomboloka oku tumbika omuenyo wove ku Yehova? Ci lomboloka oku yuvula oku tiamisila lika utima kovina viove muẽle, loku likuminya oku pitisa kovaso ocipango ca Suku kovina viosi o linga. (Mateo 16:24) Ci kuete esilivilo oku litumbika ku Yehova pocakati cohutililo osimbu kua papatisiwile.
Osimbu kua papatisiwile ovituwa vipi o sukila oku kuata? O sukila oku lekisa ovituwa vi likuata Londaka ya Suku, loku kundila vakuene catiamẽla kekolelo liove. O sukilavo oku kuata ukamba la Suku pocakati cohutililo kuenda oku lilongisa Embimbiliya loku u Vumba, momo oco ove wa nõlapo oku linga.
Anga hẽ kuli utunga wa sokiyiwa oco omunu a papatisiwe? Utunga hacoko ocina ca velapo. Ndaño ndoco, ove o sukila oku kuata ukũlĩhĩso wa suapo oco o kuate elomboloko lielitumbiko liaco.
Nye o linga nda o yongola oku papatisiwa, pole, olonjali viove vi ku sapuila oco o sinjepo? Pamue ovio vi yongola okuti, ove o kuata ukũlĩhĩso wa suapo komuenyo wove. Nda oco, tava kelungulo liavo kuenda osimbu o kevelela, pamisa ukamba wove la Yehova.—1 Samuele 2:26.
[Okakasia/Ociluvialuvia]
Catete Ovina via Velapo
O kasi hẽ oku sokolola oku papatisiwa?
Konomuisa oku kula kuove poku kũlĩhĩsa apulilo kuenda olonumbi vi kuãimo. Osimbu kua tambuluile tanga ovisohewa via tukuiwa.
Volonepa vipi o lekisa okuti wa kolela ku Yehova?—Osamo 71:5. ․․․․․
Wa siata oku lekisa ndati okuti o tẽla oku tepisa pokati keci ciwa leci cĩvi?—Va Heveru 5:14. ․․․․․
Wa siata hẽ oku likutilila olonjanja viosi? ․․․․․
Nye wa siata oku tukula volohutililo viove kuenda ovio vi situlula nye catiamẽla kocisola o kuetele Yehova?—Osamo 17:6. ․․․․․
Soneha pombuelo ovimãho o yongola oku litumbikila viatiamẽla kolohutililo viove. ․․․․․
Anga hẽ wa siata oku linga elilongiso liove lio pokolika olonjanja viosi?—Yehosua 1:8. ․․․․․
Soneha pombuelo ovimãho o yongola oku litumbikila viatiamẽla. ․․․․․
Kelilongiso liove lio pokolika? ․․․․․
Wa pitisa hẽ kovaso upange wove woku kunda? (Ceci o sukila oku linga: O pondola hẽ oku lomboluila vakuene alongiso a sulemo Embimbiliya? Anga hẽ wa kapako vana va lekisa onjongole? O kasi oku likolisilako oco o fetikile elilongiso limue Liembimbiliya?)
□ Oco □ Sio
Wa siata hẽ oku kunda ndaño okuti olonjali viove ka vi ci lingi?—Ovilinga 5:42.
□ Oco □ Sio
Soneha pombuelo ovimãho o yongola oku litumbikila viatiamẽla kupange wove woku kunda.—2 Timoteo 2:15. ․․․․․
O tẽla hẽ oku lombolola nda wa siata oku enda olonjanja viosi kolohongele ale wa siata lika oku ci linga olonjanja vimue?—Va Heveru 10:25. ․․․․․
Volonjila vipi wa siata oku panga onepa kolohongele? ․․․․․
Wa siata hẽ oku enda kolohongele ndaño olonjali viove ka vi endi (nda ovio vi ku ĩha omoko yoku ci linga)?
□ Oco □ Sio
O pondola hẽ oku popia okuti wa nõlapo muẽle oku linga ocipango ca Suku lutima wosi?—Osamo 40:8.
□ Oco □ Sio
O pondola hẽ oku soneha ovina vimue vi lekisa ndomo wa tẽla oku yula alambalalo kosikola?—Va Roma 12:2. ․․․․․
O pondola ndati oku linga esokiyo oco amameko oku pamisa ocisola cove ku Yehova?—Yuda 20, 21. ․․․․․
O pondola hẽ oku amamako oku vumba Yehova ndaño okuti olonjali viove kuenda akamba va liwekapo oku ci linga?—Mateo 10:36, 37.
□ Oco □ Sio
[Kuemẽla]
Ndeci olohuela, epapatiso enanga limue li pongolola omuenyo—ka li ka tendiwe ndocina cimue ka ci silivila