“Ve Yukisiwa Lespiritu Sandu”

1. Lombolola eci ca enda oku pita Kocipito co Pendekoste.

OLOKOLOLO vio Yerusalãi vieyuka kuenda omanu va sanjuka calua.a Owisi u tunda kutala wonembele, u lamana osimbu va Lewi va imba ocisungo coku sivaya Yehova ci tukuiwa okuti Hallel. (Olosamo 113 toke 118) Citava okuti va ci linga lonjila yimue okuti, vamue va imba onepa yetaviyo. Volokololo muli akombe valua. Ovo va tundilila kovitumãlo vio kupãla ndeci, ko Elami, ko Mesopotamia, ko Kapadokia, ko Pondu, Kegito kuenda ko Roma.b Momo lie veyilila? Momo Liocipito co Pendekoste ci tukuiwavo hati, ‘eteke lioku ungula apako atete.’ (Ate. 28:26) Ocipito caco cunyamo lunyamo, ci lekisa esulilo lioku ungula osevata kuenda efetikilo lioku ungula otiliku. Eteke limue liesanju.

2. Ovolandu api a komõhisa a pita ko Pendekoste yunyamo 33 K.K.?

² Vokuenda kuowola yecea komẽle yosãi ya Kupemba yunyamo 33 K.K., ku pita ocina cimue ci ka lingisa okuti, omanu va komõha vokuenda kuanyamo alua. Vocipikipiki, “kilu kua tunda onjuela ndokuõla kuofela yalua,” ale “ndokuõla kuocipepe ca tema.” (Ovil. 2:2; Embimbiliya li Kola) Onjuela yaco yi yukisa onjo muna mua kala 120 kolondonge via Yesu via liongolola. Noke ku pita ocina cimue ci komõhisa. Ku molẽha alimi a setahãla ondalu, kutue wondonge londonge ku kala elimi limue.c Kuenje, olondonge vi “yukisiwa lespiritu sandu” kuenda vi fetika oku vangula alimi o kolofeka vikuavo! Noke vepuluvi lina okuti olondonge vi tunda vonjo yaco kuenje vi fetika oku vangula lakombe va sanga volokololo vio Yerusalãi, akombe vaco va komõha calua, momo olondonge via kala oku vangula lavo! Omo liaco, omunu lomunu wa va yeva “oku vangula velimi liavo muẽle.”—Ovil. 2:1-6.

3. (a) Momo lie o Pendekoste yunyamo 33 K.K., yi tendiwila okuti ulandu umue u kuete esilivilo lialua kefendelo liocili? (b) Elitokeko lipi li kasi pokati kohundo ya Petulu, loku talavaya ‘lolosapi Viusoma’?

³ Ulandu owu u komõhisa, u situlula ocina cimue ci kuete esilivilo lialua kefendelo liocili ndeci: oku sokiyiwa kuo Isareli yo kilu, ekongelo Liakristão olombuavekua. (Va Gal. 6:16) Handi vali, keteke liaco eci Petulu a tiamisila olondaka viaye komanu, wa talavaya losapi yatete ‘yolosapi vitatu Viusoma.’ Osapi losapi, ya laikele oku yulula epito liasumũlũho alikasi kovimunga via litepa. (Mat. 16:18, 19) Osapi yatete, ya ecelela okuti va Yudea kuenda olomongoloke va tava olondaka viwa, loku wavekiwa lespiritu sandu lia Suku.d Kuenje ovo va ponduile oku panga onepa ko Isareli yo kilu, va laikele oku kuata elavoko lioku viala ndolosoma kuenda ovitunda Vuviali wa Mesiya. (Esit. 5:9, 10) Vokuenda kuotembo, va Samaria kuenda Vakualofeka, va ponduilevo oku kuata asumũlũho aco. Akristão vo koloneke vilo, va lilongisila nye kovolandu a pita ko Pendekoste yunyamo 33 K.K.?

“Vosi va Liongoluile Pocitumãlo Cimuamue” (Ovil. 2:1-4)

4. Ndamupi ekongelo Liakristão lio koloneke vilo lia fetika oku li sandula tunde kekongelo lia sokiyiwa kunyamo 33 K.K.?

⁴ Ekongelo Liakristão lia fetika leci ci soka 120 kolondonge okuti, “vosi va liongoluile pocitumãlo cimuamue” vohondo yimue, kuenje va wavekiwa lespiritu sandu. (Ovil. 2:1) Kesulilo lieteke, etendelo liomanu va papatisiwa vekongelo liaco, lia pitahãlele olohulukãi. Pole, ca kala lika efetikilo lioku kula kuocisoko cimue ci kasi oku amamako oku li sandula toke koloneke vilo! Ocili okuti, ocimunga cimue calume lakãi va sumbila Suku okuti cilo ekongelo Liakristão, oyo onjila ya siata oku kuamiwa oco ‘olondaka viwa Viusoma vi ka kundilue koluali luosi, ha vi lingi uvangi kolofeka viosi’ osimbu esulilo lioluali lulo ka lieyile.—Mat. 24:14.

5. Asumũlũho api Akristão va laikele oku kuata poku liongolola lekongelo, ci kaile kocita catete lo koloneke vilo?

⁵ Ekongelo Liakristão lia laikelevo oku kala ono yoku pamisa olombuavekua viosi konepa yespiritu, noke ‘yolomeme vikuavo.’ (Yoa. 10:16) Paulu wa lekisa olopandu omo liekuatiso vamanji va eca komunu lukuavo poku sonehela Akristão vo ko Roma hati: “Ñuete onjongole yalua yoku vu moli okuti, ndu wĩhi ongavelo yespiritu oco vu pamisiwi; ale oco tu likolisi pokati pocakati cekolelo lietu, ci kaile liene ci kaile liange.”—Va Rom. 1:11, 12.

6, 7. Ekongelo Liakristão koloneke vilo, li kasi oku tẽlisa ndati ocikundi Yesu a eca coku kundila kolofeka viosi?

⁶ Ekongelo Liakristão koloneke vilo, li kuetevo ovimãho vimuamue levi ekongelo lio kocita catete lia kuata. Yesu wa eca upange umue kolondonge viaye okuti ka wa lelukile, pole, u sanjuisa. Eye wa va sapuila hati: “Kuendi, ka longisi omanu vo kolofeka viosi oco va linge olondonge viange, va papatisili vonduko ya Tate la Mõla kuenda yespiritu sandu, va longisi oku linga ovina viosi ndo kundiki.”—Mat. 28:19, 20.

⁷ Koloneke vilo, upange waco wa siata oku lingiwa pocakati cekongelo Liakristão Liolombangi Via Yehova. Ocili okuti ka ca lelukile oku kundila omanu vakualimi a litepa. Ndaño ndoco, Olombangi Via Yehova via siata oku panga alivulu a kunamẽla Vembimbiliya kueci ci pitahãla 1.000 kalimi. Nda wendaenda kolohongele Viakristão, oku panga onepa kupange woku kunda Usoma, loku linga olondonge, o kuete asunga oku sanjuka. O kasi pokati ketendelo liomanu vatito kilu lieve va kuete esumũlũho lioku eca uvangi wosi watiamẽla konduko ya Yehova!

8. Ekuatiso lipi tu tambula pocakati cekongelo?

⁸ Oco o kuatisiwe oku pandikisa kotembo yilo yohali, Yehova Suku wa linga eliangiliyo liokuti ku kala ongongela ya vamanji vosi voluali. Paulu wa sonehela Akristão va Heveru hati: “Tu likapiko pokati oco tu livetiyi locisola kuenda lovilinga viwa, ka tu ka liwekipo oku liongolola kolohongele vietu ndeci vamue va lingainga, pole, tu li pamisi pokati, ca piãla enene omo vu lete okuti eteke li kasi ocipepi.” (Va Hev. 10:24, 25) Ekongelo Liakristão eliangiliyo limue lia Yehova oco o pamise vakuene kuenda oku pamisiwavo lavo. Omo liaco, amamako oku pamisa ukamba wove la vamanjove kespiritu. Lalimue eteke ku ka lañe kolohongele Viakristão!

‘Omunu Lomunu wa va Yeva . . . Velimi Liaye Muẽle’ (Ovil. 2:5-13)

9, 10. Valua va siata oku lieca ndati olumue oco va kundile omanu va vangula elimi likuavo?

⁹ Sokolola esanju ocimunga ca va Yudea kuenda colomongoloke ca kuata ko Pendekoste yunyamo 33 K.K. Citava okuti valua pokati kavo, va vanguile elimi limuamue okuti o Helasi, ale o Heveru. Pole, cilo ‘omunu lomunu wa yeva [olondonge] oku vangula velimi liavo muẽle.’ (Ovil. 2:6) Ocili okuti oku yeva olondaka viwa kelimi liavo muẽle, ca vetiya ovitima violonjeveleli viaco. Akristão vo koloneke vilo, ka va kuete ongavelo yoku popia locikomo alimi o kolofeka vikuavo. Pole, valua va siata oku lieca olumue oco va kundile esapulo Liusoma komanu vo kolofeka viosi. Ndamupi? Vamue va siata oku lilongisa elimi limue oco va kuatise ekongelo limue liomanu va vangula elimi lio kofeka yikuavo, ale oku ilukila kofeka yikuavo. Ocili okuti, ovo va siata oku limbuka okuti olonjeveleli vi komõha omo lialikolisilo avo.

¹⁰ Kũlĩhĩsa ulandu wa Christine wa lilongisa elimi lio Guzerati leci ci soka epanduvali Liolombangi vikuavo Via Yehova. Christine poku li sanga lomunu umue va talavayela kumosi, wo lama kelimi lio Guzerati. Ukãi waco wa komõha kuenda wa yonguile oku kũlĩha esunga lieci a kalela oku likolisilako oku lilongisa elimi liaco lia tĩla lio Guzerati. Christine wa tẽla oku eca uvangi uwa kukãi waco. Kuenje ukãi wa popia hati: “Ka kuli vali etavo likuavo nda lia vetiya omanu vavo oku lilongisa elimi lia tĩla calua. Soketi vu kuete cimue ci kuete esilivilo lialua vu yongola oku popia.”

11. Nye tu pondola oku linga oco tu lipongiyile oku kunda esapulo Liusoma kovimunga viomanu va vangula elimi likuavo?

¹¹ Vosi yetu ka tu kuete epondolo lioku lilongisa elimi limue liokaliye, pole, tu lipongiyila oku kunda esapulo Liusoma komanu va vangula elimi likuavo. Tu ci linga ndati? Onjila yimue yoku ci linga, poku talavaya lo aplikativo JW Language^® oco o tẽle oku lama kelimi li vanguiwa posongo o kasi . Pocakati co aplikativo yaco, o pondola oku lilongisa olondaka vielimi limue okuti, vi vetiya onjongole yomanu va vangula elimi liaco. Tu sukila oku va vetiya oku iñila vo jw.org, oku va lekisa olovideo vialua lalivulu a sandekiwamo kelimi liavo. Poku talavaya lovimalẽho viaco kupange woku kunda, tu pondola oku kuata esanju limuamue ndeci vamanjetu vo kocita catete va kuata, eci omanu vo kolofeka vikuavo va komõha poku yeva esapulo liolondaka viwa “kelimi liavo muẽle.”

“Petulu wa Votoka” (Ovil. 2:14-37)

12. (a) Ocitumasuku ca Yoeli ca lekisa ndati ulandu wocikomo ca laikele oku pita ko Pendekoste yunyamo 33 K.K.? (b) Momo lie kua lavokawaile oku tẽlisiwa kuocitumasuku ca Yoeli kocita catete?

¹² “Petulu wa votoka” oco a sapele lomanu vakualofeka via litepa. (Ovil. 2:14) Ku vosi va yonguile oku u yevelela, eye wa va sapuila okuti ongavelo yocikomo coku vangula alimi, ya eciwile la Suku oco yi tẽlise ocitumasuku ca Yoeli cokuti: “Ndi ka sukumuila espiritu liange komanu vosi.” (Yoe. 2:28) Osimbu ka endele kilu, Yesu wa sapuila olondonge viaye hati: “Ndi ka pinga ku Isia kuenda eye o ko wĩhi oñuatisi yikuavo,” yina eye a tukula okuti, “espiritu.” —Yoa. 14:16, 17.

13, 14. Petulu wa likolisilako ndati oku vetiya ovitima violonjeveleli viaye kuenda tu u setukula ndati?

¹³ Petulu poku malusula ohundo yaye wa popia hati: “Kuenje onjo yosi ya Isareli yi kolele okuti, Suku wo lingisa Ñala haeye Kristu, Yesu una ene wa pondeli kuti.” (Ovil. 2:36) Ocili okuti, omanu valua va kala oku yevelela Petulu, ka va kailepo eci Yesu a pondiwila kuti. Pole, omo okuti va pangele onepa kofeka yaco, ovo va kuatelevo eko lielinga liaco. Limbuka okuti Petulu wa sapuila va Yudea lesumbilo, loku seteka oku vetiya ovitima viavo. Petulu ka kaile locimãho coku pisa, pole, coku va kuatisa oku likekembela. Anga hẽ owiñi wa kala oku yevelela Petulu wa sumuile omo liolondaka a popia? Sio. Omanu vosi va kalapo ‘ovitima viavo via sakalalele.’ Ovo va pula ndoco: “Nye tu sukila oku linga?” Ocili okuti, onjila ndomo Petulu a sapela lavo, ya kuatisa oco ovitima viomanu valua vi vetiyiwe loku likekembela.—Ovil. 2:37.

¹⁴ Ndeci Petulu a linga, tu pondolavo oku vetiya ovitima viomanu vosi. Kuenje kupange woku kunda, ka tu sukila oku pisa alongiso osi omanu va tava okuti, ka a likuata leci Embimbiliya li longisa. Omo liaco, ca velapo oku tiamisila utima kovina etu kuenda ovo va tava. Nda tua ci linga, tu pondola oku sokolola lutate konjila ya sunguluka poku talavaya Londaka ya Suku. Olonjanja vialua omanu vakuotima wa sunguluka, nda tu va kundila lonjila yaco, va tava lonjanga ocili Cembimbiliya.

“Omunu Lomunu Pokati Kene a Papatisiwe” (Ovil. 2:38-47)

15. (a) Nye Petulu a sapuila va Yudea lolomongoloke kuenda kueyilila onima yipi? (b) Momo lie olohulukãi viomanu via yevelela olondaka viwa ko Pendekoste, via eceliwila oku papatisiwa keteke liaco?

¹⁵ Keteke li komõhisa lio Pendekoste yunyamo 33 K.K., Petulu wa sapuila va Yudea kuenda olomongoloke hati: “Likekembeli kuenda omunu lomunu pokati kene a papatisiwe.” (Ovil. 2:38) Kuenje ci pitahãla 3.000 komanu va papatisiwa voviva viovava vina via kala ocipepi lo Yerusalãi.e Anga hẽ poku papatisiwa va ci linga ño okuti ka va sokoluile vali? Anga hẽ ulandu owu u pondola oku lomboloka okuti olondonge Viembimbiliya, ale omãla vana okuti olonjali viavo Akristão, va papatisiwa ño osimbu ka va lipongiyile? Sio. Ivaluka okuti va Yudea, lolomongoloke va papatisiwa ko Pendekoste yunyamo 33 K.K., va siatele oku lilongisa ondongosi Ondaka ya Suku kuenda va pangele onepa kofeka ya litumbikile ale ku Yehova. Handi vali, ovo va kala ale oku lekisa ombili yavo poku linga ovongende anene oco va kale kocipito cunyamo lunyamo. Noke lioku tava kocili ca velapo catiamẽla kocikele ca Yesu Kristu koku tẽlisiwa kuocipango ca Suku, ovo va lipongiyilile oku amamako oku vumba Suku, pole, cilo ndolondonge via papatisiwa via Kristu.

16. Akristão vo kocita catete va lekisa ndati ocituwa coku lieca olumue?

¹⁶ Tua kolela okuti, ocimunga caco ca kuata esumũlũho lia Yehova. Ulandu Waco u lekisa okuti: “Vosi vana va tava, va likuata omunga kuenda va litepaila omunu lukuavo ovina viosi va kuatele kuenje ovo va landisa ovapia kuenda ovina viosi va kuatele, loku avela olombongo ku vosi ndeci omunu lomunu a sukilile.”f (Ovil. 2:44, 45) Ocili okuti, Akristão vosi vocili va yongola oku setukula ongangu eyi yocisola loku lieca olumue.

17. Ananga api a sukiliwa oco omunu umue a papatisiwe?

¹⁷ Embimbiliya li lekisa okuti, osimbu omunu ka litumbikile loku papatisiwa, o sukila oku eca ananga alua konepa yespiritu. Omunu o sukila oku kuata ukũlĩhĩso watiamẽla Kondaka ya Suku. (Yoa. 17:3) Eye o sukilavo oku lekisa ekolelo loku likekembela lutima wosi omo liekalo liomuenyo ambatele kosimbu. (Ovil. 3:19) Kuenje o sukila oku linga apongoloko loku linga lika ovina vi likuata locipango ca Suku. (Va Rom. 12:2; Va Efe. 4:23, 24) Noke lioku eca ananga aco, omunu o litumbika ku Suku poku linga ohutililo yimue kuenje o papatisiwa. —Mat. 16:24; 1 Pet. 3:21.

18. Olondonge via papatisiwa via Kristu vi pondola oku tambula esumũlũho lipi?

¹⁸ Ove hẽ wundonge yimue ya litumbika haeyo ya papatisiwa ya Yesu Kristu? Nda oco, eca olopandu omo liesumũlũho wa tambula. Ndeci olondonge vio kocita catete vieyukisilue lespiritu sandu, o pondolavo oku tambula unene wa Yehova oco wece uvangi wosi, loku linga ocipango caye!