OCIPAMA 6
Lipi Elavoko Liava va fa?
1. Vipi olondaka viwa viatiamẽla kuava va fa?
Eci Yesu a endele ko Betania ocipepi lo Yerusalãi, wa sanga okuti, tunde eci ekamba liaye Lasaru a fa, papita ale oloneke vikuãla. Kuenje, wa enda la Marta kuenda Maria keleva kua kendiwila manjavo Lasaru. Noke, kueya owiñi walua. O pondola hẽ oku sokolola esanju Marta la Maria va yeva eci Yesu a pindula Lasaru kolofa?—Tanga Yoano 11:21-24, 38-44.
Marta wa kũlĩhĩle olondaka viwa viatiamẽla kuava va fa. Eye wa kũlĩhĩle okuti Yehova o ka pindula ava va fa oco va kale vali lomuenyo palo posi.—Tanga Yovi 14:14, 15.
2. Lipi ekalo liava va fa?
Suku wa sapuila Adama hati: “Ove ukueve, keve haiko o tiukila.”—EFETIKILO 3:19.
Omanu va lulikiwa loneketela. (Efetikilo 2:7; 3:19) Vokati ketimba lietu ka muli espiritu limue liomuenyo. Etu tuakuetimba liositu, kuenda ka tu kuete cimue ci puluka kolofa. Eci tu fa, owoño wetu u liwekapo oku talavaya, kuenda olondunge vietu vi sulila. Lasaru noke yoku pinduiwa, ka lomboluile ulandu umue watiamẽla kolofa, momo ava va fa, lacimue va kũlĩha.—Tanga Osamo 146:4; Ukundi 9:5, 6, 10.
Anga hẽ, Suku o kangisa vondalu vana va fa? Embimbiliya li lekisa okuti ava va fa lacimue va kũlĩha. Omo liaco, elongiso liatiamẽla kondalu yifelu, liuhembi, kuenda li vetiya omanu oku sepula Suku. Ocisimĩlo coku yoka omanu vondalu, ci sumuisa Suku.—Tanga Yeremiya 7:31.
Tala ovideo Nye ci Pita Letu Eci tu fa?
3. Anga hẽ ava va fa va pondola oku vangula letu?
Ava va fa ka va pondola oku vangula ndaño oku yeva cimue. (Osamo 115:17) Pole, kuli ovangelo vamue vãvi va siata oku vangula lomanu, kuenje va limolehisa nda vana va fa. (2 Petulu 2:4) Yehova wa tu handeleka oco tu yuvule oku vangula lava va fa.—Tanga Esinumuĩlo 18:10, 11.
4. Helie o ka pinduiwa?
Omanu valua va fa, va ka pinduiwa oco va kuate vali omuenyo palo posi. Ndaño muẽle vana ka va kũlĩhĩle Suku kuenda vana va linga ovina vĩvi, va ka pinduiwavo.—Tanga Luka 23:43; Ovilinga 24:15.
Ava va ka pinduiwa va ka lilongisa ocili catiamẽla ku Suku, loku lekisa ekolelo ku Yesu, poku pokola kokuaye. (Esituluilo 20:11-13) Nda va linga ovina viwa, va ka kala otembo ka yi pui palo posi.—Tanga Yoano 5:28, 29.
5. Epinduko liava va fa li tu longisa nye catiamẽla ku Yehova?
Suku wa eca elavoko lioku pindula ava va fa poku tuma Omõlaye palo posi oco a tu file. Omo liaco, epinduko liava va fa, li situlula ocisola Yehova a tu kuetele kuenda ohenda yaye. Eci ava va fa va ka pinduiwa, helie ove o yongola oku ka mola?—Tanga Yoano 3:16; Va Roma 6:23.