Ocikomo Cavali Ko Kana

Noke yoloneke vivali ko Samaria, Yesu enda kimbo a kulila. Eye wa linga upange walua woku eca uvangi ko Yudea, pole, ka kasi oku tiukila ko Galilea oco a puyuke. Eye o fetika upange umue wa velapo woku kunda vimbo a kulila. Citava okuti Yesu ka lavoka oku tambuiwa ciwa lomanu, momo eye wa popele hati: “Uprofeto ka sumbiwile vofeka a citiwila.” (Yoano 4:44) Olondonge via Yesu ka vi kala laye, pole, vi tiukila kolonjo viavo, kapata avo kuenda kovopange va lingaile kosimbu.

Esapulo lipi Yesu a fetika oku kunda? Esapulo liaco lieli liokuti: “Usoma wa Suku u kasi ocipepi. Likekembeli kuenda koleli kolondaka viwa.” (Marko 1:15) Nye omanu va linga noke yoku yeva esapulo liaco? Va Galilea valua va yolela Yesu kuenda va lekisa esumbilo kokuaye. Ovo ka va ci lingile omo liesapulo liaye. Pole, va ci linga omo va Galilea vamue va kala ko Paskoa ko Yerusalãi osimbu kua kambele olosãi vimue kuenje va mola ovikomo viosi Yesu a linga.—Yoano 2:23.

Ko Galilea, pi Yesu a fetikila upange walua woku kunda? Citava okuti, o fetikila ko Kana kuna a pongolola ovava oco a linge ovinyu, kocipito cimue cuvala. Osimbu Yesu a kasi ko Kana o yeva okuti kakuenje umue o vela calua okuti, o panda koku fa. Kakuenje kaco, omõla ukuenje welombe wa soma Herode Antipasi, una wa tuma oku ponda Yoano Upapatisi. Ukuenje waco welombe wa yeva okuti Yesu wa tunda ko Yudea oku enda ko Kana. Omo liaco, ulume o linga ungende woku tunda ko Kafarinau oku enda ko Kana oku lisanga la Yesu. Ukuenje welombe lesumuo, o popia hati: “A Ñala, lokilako osimbu omõlange ka file.”—Yoano 4:49.

Etambululo lia Yesu, citava okuti li komõhisa ulume eci a popia hati: “Kuende, omõlove o kasi lomuenyo.” (Yoano 4:50) Ukuenje welombe wa soma Herode o kolela kolondaka via Yesu kuenje o tiukila konjo yaye. Osimbu a kala loku enda, o ñualehela lapika vaye okuti, va sanjukila oku eca esapulo liokuti omõla waye o kasi lomuenyo! Oco a kuate elomboloko liovina via pita, eye o pula hati: Owola yipi a kaya?

Ovo va tambulula vati: “Ombambi yo weca hẽla kowola yepanduvali.”—Yoano 4:52.

Ukuenje welombe wa soma wa ivaluka okuti kowola yaco, oco Yesu o sapuila okuti: “Omõlove o kasi lomuenyo.” Noke, ulume waco ohuasi, lepata liaye liosi kuenda apika vaye va linga olondonge via Kristu.

Omo liaco, Yesu wa linga ovikomo vivali ko Kana. Ocikomo cimue coku pongolola ovava oco a linge ovinyu kuenda cikuavo coku sakula umalẽhe umue wa kala vocinãla ci soka 25 kolokilometulu. Pole, ovikomo evi havioko lika Yesu a linga. Ocikomo cavali ko Kana ci kuete esilivilo, momo ca lombolokele oku tiuka kuaye vo Galilea. Ocili okuti, Yesu uprofeto umue wa taviwa la Suku. Pole ‘uprofeto o ka sumbiwa ndati vofeka a citiwila?’

Uvangi waco u ka limbukiwa eci Yesu a tiukila konjo yaye ko Nasara. Nye ci ka pita volupale luaco?