O Kundila Kolonepa Vikuavo Vio Galilea

Yesu kumue lolondonge viaye vikuãla va kuata upange walua veteke limosi ko Kafarinau. Eci ekumbi lia iñila, omanu vo ko Kafarinau va nena valua va vela oco va sakuiwe. Yesu ka kuete otembo yalua yoku kala lika liaye.

Omẽle ociteketeke, osimbu kua tekãva Yesu o pasuka kuenje enda posamua. Eye o sanda ocitumãlo cimue a pondola oku kala lika liaye oco a likutilile ku Isiaye. Pole, eye ka kala lika liaye otembo yalua. Eci “Simono la vana va kala laye” va limbuka okuti Yesu ka kasi pokati kavo, vo sandiliya. Omo okuti Yesu wa kala konjo ya Petulu, citava okuti eye wa fetika oku sandiliya Yesu.—Marko 1:36; Luka 4:38.

Eci va sanga Yesu, Petulu o popia hati: “Vosi va ku sanda.” (Marko 1:37) Ci kuete esunga lieci omanu vo ko Kafarinau ka va yonguila okuti Yesu enda. Ovo va eca olopandu vialua omo liovina viosi Yesu a linga, kuenje va “seteka oku u tateka oco ka ka va sie.” (Luka 4:42) Anga hẽ Yesu weya palo posi oco a linge lika ovikomo? Anga hẽ ovikomo viaco o vi lingila lika vimbo liaco? Nye Yesu a popia catiamẽla kovina viaco?

Yesu o sapuila olondonge viaye hati: “Tuendi kocitumãlo cikuavo, kovaimbo a kasi ocipepi, si va kundilavo, momo oco ndeyilila.” Omo liaco, Yesu o sapuilavo omanu va kasi oku u tateka oco ka ka va sie hati: “Te nda kundila olondaka viwa Viusoma wa Suku kalupale akuavo, momo oco nda tumiwila.”—Marko 1:38; Luka 4:43.

Esunga lia velapo lieci Yesu eyilila palo posi, oku kunda eci catiamẽla Kusoma wa Suku. Usoma waco u ka kemainya onduko ya Isiaye kuenda u ka malako ovitangi viosi viomanu otembo ka yi pui. Yesu poku linga ovikomo, wa lekisa okuti wa tumiwa la Suku. Cimuamue haico okuti, osimbu Yesu keyile palo posi, Mose wa linga ovikomo vialua kuenje ovikomo viaco via lekisa okuti wa tumiwile la Suku.—Etundilo 4:1-9, 30, 31.

Yesu kumue lolondonge viaye vikuãla va tunda vo Kafarinau oco va ka kundile kalupale akuavo. Olondonge viaco vievi: Petulu la manjaye Andereu kuenda Yoano la manjaye Tiago. Ovo omanu vatete Yesu a laleka eci kua kambele osemana oco vo kuame kungende woku kunda.

Esapulo lia Yesu kumue lolondonge viaye vikuãla ko Galilea li kuata onima yiwa okuti, omanu valua va yeva eci catiamẽla kokuaye! “Esapulo liatiamẽla kokuaye lia lisanduila ko Suria yosi,” lo kofeka yi kuete alupale ekũi yi tukuiwa hati Dekapoli kuenda li pitĩla kesinya likuavo Liolui Yordão. (Mateo 4:24, 25) Kuenje owiñi walua womanu u sangiwa vovaimbo aco, lo vo Yudea, u kuama Yesu kumue lolondonge viaye. Valua va nena omanu va vela oco Yesu a va sakule. Kuenje o sakula omanu vaco loku tundisa olondele vatimba avo.