Esilivilo Lioku Likutilila kuenda Oku Lekisa Umbombe

Yesu ndopo a mala oku ta olusapo kolondonge viaye luatiamẽla koku lipilika poku likutilila. (Luka 11:5-13) Citava okuti cilo o kasi ko Samaria, ale ko Galilea kuenje o lombolola vali esilivilo lioku lipilika poku likutilila. Noke o ta olusapo lukuavo.

Eye o popia hati: “Volupale lumue mua kala onganji yimue ka ya sumbilile Suku kuenda omanu. Volupale luaco mua kalavo ocimbumba cimue ca enda oku u sapuila hati, ‘Panga okuti ñuata esunga kunyali wange kekanga.’ Pole, onganji ka ya lekisile onjongole yoku kuatisa ukãi waco, yu wa popia vutima waye hati, ‘Ndaño sia sumbilile Suku kuenda omanu, omo ocimbumba eci ciyaya oku ndi sakalaisa [ale oku lipilika], ndinga okuti ci kuata esunga, sanga ci ndi kavisa lapingilo aye.’”—Luka 18:2-5.

Yesu o lombolola ciwa olondaka viaco poku popia hati: “Yevi eci onganji ya popia ndaño ka ya sungulukile! Suku hẽ ka lingi esunga kuava va nõliwa, haivo vo liyeyela utanya luteke, osimbu a lekisa epandi kokuavo?” (Luka 18:6, 7) Nye Yesu a yongola oku lombolola catiamẽla ku Isiaye?

Yesu ka kasi oku lombolola okuti Yehova Suku o sokisiwa longanji ka ya sungulukile. Volondaka viaye, mua kongela etepiso liokuti: Nda onganji ka ya sungulukile ya kuatisa ukãi wa kala oku u lipilikila, ocili okuti Suku o ci lingavo. Eye ukuesunga haeye uwa kuenda o tambulula afendeli vaye nda ka va liwekapo oku likutilila. Tu ci limbukila kolondaka Yesu a popia noke hati: “Ndu sapuili siti, [Suku] o linga lonjanga esunga kokuavo.”—Luka 18:8.

Olonjanja vialua ambombe kuenda olohukũi ka va tatiwa lesunga, osimbu okuti olohuasi la vana va kuete unene va tatiwa lesunga. Pole, Suku ka tati ndoco omanu. Eci otembo yaco yi pitĩlapo, Suku o ka linga esunga poku nyõla olondingaĩvi, pole, o ka eca omuenyo ko pui kafendeli vaye.

Helie o kuete ekolelo ndukãi u ocimbumba? Vañami va tava okuti Suku “o linga lonjanga esunga kokuavo?” Omo liaco, Yesu o lombolola esilivilo lioku lipilika poku likutilila. Oco a lekise esilivilo liekolelo kuenda ohutililo, eye o pula hati: “Eci Mõlomunu eya, o sanga hẽ ekolelo eli kilu lieve?” (Luka 18:8) Eye o yongola oku popia okuti, eci Kristu eya citava okuti ka sangi ekolelo liaco.

Vamue va kasi oku yevelela Yesu va lipanda omo liekolelo liavo. Kuenje eci ci va kokela oku litenda okuti vakuesunga kuenda va sepula vakuavo. Yesu o ta olusapo lumue.

Eye o popia hati: “Alume vavali va enda konembele oku ka likutilila, umue u Fariseo, ukuavo ukuakutambula elisimu. U Fariseo wa votoka oku likutilila loku popia hati, ‘A Suku nda pandula omo sia tuwile ndomanu vakuavo ndeci vakuakupunda, vana ka va sungulukile, vakuakahokolo, ale ndulume u ukuakutambula elisimu. Ndi likandangiya okulia olonjanja vivali vosemana; ndukuakueca onepa yange yosi yekũi.’”—Luka 18:10-12.

Va Fariseo va kũlĩhĩwa okuti vakuakulilekisa kowiñi okuti vakuesunga oco va komõhise vakuavo. Va li kisika oku likandangiya oku lia Volosengunda kuenda Volokuãla. Momo voloneke viaco povitanda peyuka kuenje valua va pondola oku va mola. Handi vali, va likolisilako oku eca onepa yekũi kuenda ovikũla vitito. (Luka 11:42) Eci kua kambele olosãi vimue, ovo va sepula omanu vaño poku popia vati: “Owiñi owu okuti ka wa kũlĩhĩle Ocihandeleko, [ndomo va Fariseo va va tendele] wa siñaliwa.”—Yoano 7:49.

Yesu amisako oku ta olusapo hati: “Pole, ukuakutambula elisimu wa talama ocipãla kuenda ka petuile ovaso aye kilu, pole, wa kala oku liveta veta vonete loku popia hati, ‘A Suku, ñuatele ohenda, ndukuakandu.’” Ukuakutambula elisimu lumbombe o limbuka akulueya aye. Kuenje Yesu o malusula loku popia hati: “Ndu sapuili siti, ulume u wa enda tupu konjo yaye wa tendiwa ndukuesunga okuti u Fariseo u, o sule. Momo wosi o likapa kunene amisua kutito, puãi wosi o li amisa kutito amisua kunene.”—Luka 18:13, 14.

Omo liaco, Yesu o lombolola esilivilo lioku lekisa umbombe. Elungulo eli li kuatisa olondonge viaye via kulila pokati ka va Fariseo vana va litenda okuti vakuesunga haivo va velisapo ovikele kuenda ekemãlo. Eli elungulo limue li kuete esilivilo lia velapo kolondonge viosi via Yesu.