Yehova Oka Tẽlisa Esunga Liaye

“Suku hẽ, ka tetuluila lesunga vaye va noliwa, ava vo vilikaiya utanya luteke?”​—⁠LUKA 18:⁠7.

1. Velie va pondola oku vetiya vakuavo kuenda momo lie?

KOLUALI luosi, Olombangi via Yehova, vi kuete esanju lioku kala la vamanji va kasi oku vumba Yehova voku enda kuanyamo alua. Ove hẽ wa kũlĩha vamue pokati kavo? Citava okuti, ivaluka manji umue ukãi wa kuka, haeye wa papatisiwa osimbu, pole endaenda kolohongele olonjanja viosi. Pamue ivaluka manji umue ulume wa kuka okuti wa kuatisa ekongelo kupange woku kunda vokuenda kuanyamo alua. Ovo va kũlĩha okuti, o Harmagedo ndopo yiya, kuenda ka yi cilua. Ndaño okuti, oluali lulo lua vĩha luamamako toke cilo, ka va tepulula ekolelo liavo kolohuminyo via Yehova. Kuenda ka va liwekapo oku amamako loku ‘pandikisa toke kesulilo lioluali lulo.’ (Mateo 24:​13) Ekolelo va kuetele Yehova, lia siata oku pamisa vamanji vosi va kasi vekongelo.​—⁠Osamo 147:⁠11.

2. Nye ca siata oku tu sumuisa?

² Olonjanja vimue, tua siata oku mola ovituwa via litepa pokati Kolombangi vimue via Yehova. Vamue pokati kavo, va siata oku litumbika kupange woku kunda vokuenda kuanyamo alua. Pole, noke va fetika oku tepulula ekolelo liavo ku Yehova. Kuenje, va liwekapo oku endaenda kolohongele. Tu sumua calua eci tu mola vamanji vamue va tunda vocisoko ca Yehova. Omo okuti va kasi ‘ndolomeme via nyelela,’ tu yongola oku va kuatisa oco va tiuke. (Osamo 119:176; Va Roma 15:⁠1) Ocili okuti, kuli vamanji vamue va pama kespiritu kuenda va kuete ombili kupange wa Yehova. Pole, vakuavo va pua ekolelo kuenda va liwekapo oku endaenda kolohongele. Nye ca siata oku va kuatisa oco va pamise ekolelo liavo kolohuminyo via Yehova, osimbu okuti vamue va pua ekolelo? Nye ci tu kuatisa oku tava okuti eteke linene lia Yehova li kasi ocipepi? (Sofoniya 1:​14) Tu konomuisi olusapo lua tukuiwa Vevanjeliu lia Luka.

Elungulo Kuava va Kasi Kotembo ‘Yetukuluko Lio Mõlomanu’

3. Olusapo lukãi ocimbumba kuenda onganji, lu tu kuatisa ndati kuenda momo lie?

³ Kelivulu lia Luka kocipama 18, tu sangako olusapo luatiamẽla kukãi ocimbumba kuenda kulume umue onganji. Olusapo luaco, lu sokisiwa lolu luatiamẽla kulume wa tambula akombe, wa tukuiwa vocipama ca pita. (Luka 11:​5-​13) Pole, ovinimbu vimue Viembimbiliya vi lombolola olusapo luocimbumba kuenda onganji. Ovinimbu viaco, vi lekisa okuti, olusapo olu, lua tiamẽlavo komanu vosi va kasi kotembo yilo, eci ‘Mõlomanu a tukuluka lunene waye wusoma. Otembo yaco ya fetika kunyamo wo 1914.​—⁠Luka 18:⁠8.a

4. Nye Yesu a lombolola osimbu handi ka tile olusapo lu sangiwa kelivulu lia Luka kocipama 18?

⁴ Osimbu Yesu ka tile olusapo luocimbumba kuenda luonganji, wa lombolola okuti, okuiya kuaye vunene Wusoma, ku kala ndociliakulo “ci tuila ilu tunde konele eyi toke konele yikuavo.” (Luka 17:24; 21:​10, 29-​33) Pole, koloneke vilo via sulako, onepa yalua yomanu ka va kapeleko ulandu owu. (Daniele 12:⁠4) Momo lie? Momo va siatavo oku lekisa ovituwa ndevi viomanu va kala kotembo ya Noha la Lote, okuti ka va pokuile kalungulo a Yehova. Kotembo yaco, ovitima viomanu via tekelele lika ‘koku lia, kokunya, koku landa ovina, koku landisa, koku lima kuenda oku tunga olonjo viavo, toke keteke va kunduiwa vosi yavo.’ (Luka 17:​26-​29) Ovo va kunduiwa omo lioku tiamisila ovitima kovopange avo. Kuenje, ka va pokuile kocipango ca Yehova. (Mateo 24:​39) Koloneke vilo, onepa yalua yomanu, va yongola lika oku tẽlisa ovopange avo. Kuenda ka va kapeleko uvangi wokuti, esulilo lioluali lulo lua vĩha li kasi ocipepi.​—⁠Luka 17:⁠30.

5. (a) Elungulo lia Yesu lia loña ku velie kuenda momo lie? (b) Nye ca siata oku vetiya vamanji vamue oku pua ekolelo?

⁵ Yesu wa sakalalele lolondonge viaye oco ka vika pitise kovaso ovina violuali lua Satana, loku tiamisila ovitima viavo kovina va sia konyima. (Luka 17:​22, 31) Cimuamue haico ca siata oku pita Lakristão vamue. Ovo va pita anyamo alua loku kevelela eteke Yehova aka nena esulilo lioluali lulo. Pole, eci va limbuka okuti o Harmagedo yi kasi oku cilua, va fetika oku sumua. Ovo ka va kolela vali okuti Yehova oka nena esulilo lioluali lulo. Noke, va liwekapo oku endaenda kupange woku kunda omo lioku litumbika lika kovopange oku tẽlisa olonjongole viavo. Kuenje, ka va kuata otembo yoku linga upange wa Yehova. (Luka 8:​11, 13, 14) Noke va tiukila vali kovopange ana va sile konyima.

Tu Sukila Oku Likutilila Olonjanja Viosi

6-8. (a) Lombolola olusapo lukãi ocimbumba kuenda onganji. (b) Elomboluilo lipi Yesu a eca liatiamẽla kolusapo a linga?

⁶ Nye tu sukila oku linga oco tu pamise ekolelo lietu kolohuminyo via Yehova? (Va Heveru 3:​14) Yesu wa linga epulilo eli noke yoku lungula olondonge viaye oco ka vika tiukile voluali lua Satana.

⁷ Upostolo Luka wa lombolola okuti, Yesu olondonge viaye wa vi ‘tila olusapo luoku va vetiya okuti va sesamẽla oku likutalaila ño-o, oku tokoka hacoko.’ Noke, Yesu wa popia hati: “Vimbo limue mua kala onganji ka ya sumbile Suku, haiyo ka ya sumbilile omanu. Vimbo liaco mua kalavo ocimbumba ceyaiya kokuaye, citi: Mopele kunyali wange. Oloneke vimue onganji yaco ka ya tavele, puãi noke ya popia lutima wayo, yiti: Ndaño sia sumbile Suku, pamue oku sumbila omanu, haimo, omo ocimbumba eci ci sakalaisa ño-o, oco ndi ci popela sanga ci ñavisa lokuiyaiya kuaco.”

⁸ Noke liulandu Yesu a tukula, wa eca elomboloko liaco poku popia hati: “Yevi eci ca popia onganji ka ya sungulukile. Suku hẽ, ka tetuluila lesunga [omanu] vaye va nõliwa, ava vo vilikaiya utanya luteke? O tutuvala ño-o oku va tetuluila lesunga? Mopia lene siti: O va tetuluila lombili. Haimo lumue, eci Mõlomanu eya, o sanga ekolelo kilu lieve?”​—⁠Luka 18:​1-8.

“Mopele Kunyali Wange”

9. Elomboloko lipi li sangiwa volusapo luocimbumba kuenda onganji?

⁹ Ulandu wolusapo lua Yesu lua lomboloka ciwa. Elomboloko liaco tu li limbukila komanu a tukula volusapo luaye. Ocimbumba ca pinga kunganji hati: “Mopele kunyali wange.” Noke, onganji yo tambulula hati: ‘Ndu ku popela.’ Kuenje, Yesu wa pula hati: “Suku hẽ, ka tetuluila lesunga [omanu] vaye va nõliwa?” Omo liaco, Yesu wa popia eci catiamẽla ku Yehova hati: “Mopia lene siti: [Yehova] o va tetuluila lombili.” (Luka 18:​3, 5, 7, 8) Otembo yipi Yehova aka “tetuluila lesunga?”

10. (a) Otembo yipi esunga lia tẽlisiwa kocita catete? (b) Koloneke vilo, esunga lika tẽlisiwa ndati komanu va Yehova?

¹⁰ Kocita catete, ‘oloneke viefetuluinyo’ via tẽlisiwa kunyamo wa 70, eci o Yerusalãi ya lunduiwa kumue lonembele yaco. (Luka 21:​22) Kotembo yilo, ‘oloneke viefetuluinyo,’ vika tẽlisiwa ‘keteke linene lia Yehova.’ (Sofoniya 1:14; Mateo 24:​21) Kotembo yaco, Yehova oka ‘fetuluinya lohali ava va talisa ohali omanu vaye.’ Kuenje, oka “fetuluinya ava ka va kũlĩhĩle Suku, lava ka va tava kondaka yiwa ya Ñala yetu Yesu.”​—⁠2 Va  Tesalonike 1:​6-8; Va Roma 12:⁠19.

11. Yehova oka tẽlisa ndati lonjanga esunga liaye?

¹¹ Tu kuata ndati elomboloko liohuminyo ya Yesu wa popia hati, Yehova oka tetuluila esunga ‘lonjanga’? Embimbiliya li lekisa okuti, ndaño Yehova o lekisa epandi komanu, pole, wa sokiya otembo yoku tẽlisa ocipango caye. (Luka 18:​7, 8; 2 Petulu 3:​9, 10) Koloneke via Noha eci Etande lieya, olondingaĩvi viosi via kunduiwa. Cimuamue haico ca pita koloneke via Lote, eci ondalu ya tunda kilu ya kundula olondingaĩvi viosi. Yesu wa popia hati: “Haico ci kala keteke Mõlomanu a tukuluka.” (Luka 17:​27-​30) Kuenje, olondingaĩvi viosi vika ‘nyõliwa ocipikipiki.’ (1 Va  Tesalonike 5:​2, 3) Etu tua kolela okuti, Yehova kaka ecelela okuamamako kuoluali lua Satana okuti, ka tẽlisa esunga liaye.

‘O va Tetuluila Lombili’

12, 13. (a) Olusapo luocimbumba longanji Yesu a tukula, lu tu longisa nye? (b) Momo lie tu kuetele ekolelo liokuti, Yehova o yevelela olohutililo vietu kuenda eca ekuatiso lesunga?

¹² Olusapo lua Yesu luatiamẽla kukãi ocimbumba kuenda onganji, lu tu ĩha elomboloko likuavo. Yesu poku lombolola ulandu waco wa popia hati: “Yevi eci ca popia onganji ka ya sungulukile. Suku hẽ, ka tetuluila lesunga [omanu] vaye va nõliwa?” Yesu poku popia hati Suku o tetulula ocitangi ndeci onganji ya linga, ka ci lomboloka okuti, wa sokisa Yehova longanji ya tukuiwa ndeti. Pole, Yesu wa longisa olondonge viaye okuti ovisimĩlo via Suku levi vionganji, via litepa. Kovina vipi ovo va litepa?

¹³ Onganji Yesu a tukula volusapo luaye, ka ya “sungulukile,” pole, “Suku onganji yesunga.” (Osamo 7:11; 33:⁠5) Onganji ka ya kuatele onjongole yoku kuatisa ocimbumba. Pole, Yehova wa kapako omunu lomunu. (2 Asapulo 6:​29, 30) Eye, o kuatisa omanu vana va yongola oku U Vumba. (Isaya 30:​18, 19) Momo lie? Ndaño okuti, onganji ya kala ondingaĩvi, ya yevelela kepingilo liocimbumba, kuenda ya tetulula ocitangi caye lesunga. Omo liaco, Yehova o yevelela olohutililo viomanu vaye kuenda o va kuatisa lesunga.​—⁠Olosapo 15:⁠29.

14. Momo lie tu sukilila oku pamisa ekolelo lietu kokuiya kueteke liesulilo?

¹⁴ Wosi wa liwekapo oku kolela kokuiya kueteke lia Yehova, o linga ekandu linene. Momo lie? Momo ocituwa caco ci kapa kohele ekolelo lietu liokuti, Yehova oka tẽlisa onjongole yaye. Pole, lomue o kuete omoko yoku patãla onjongole ya Yehova yoku tẽlisa ocipango caye. (Yovi 9:​12) Omo liaco, tu sukila oku li pula ndoco: Anga hẽ, omunu lomunu pokati ketu o tẽla oku amamako lekolelo? Ocitangi eci oco Yesu a votola kesulilo liolusapo luaye luatiamẽla kocimbumba kuenda konganji.

“Eci Mõlomanu Eya, o Sanga Ekolelo Kilu Lieve?”

15. (a) Epulilo lipi Yesu a linga kuenda momo lie? (b) Epulilo lipi tu sukila oku linga etu muẽle?

¹⁵ Yesu wa linga epulilo limue li kuete esilivilo hati: “Eci Mõlomanu eya, o sanga ekolelo kilu lieve?” (Luka 18:⁠8) Ondaka “ekolelo,” yi lekisa okuti, Yesu ka tukuile ekolelo liomanu vosi. Pole, wa yi tiamisila kekolelo liukãi ocimbumba. Yesu ka tambuluile epulilo a votola. Eye wa linga epulilo liaco, oco olondonge viaye vi sokolole eci catiamẽla kekolelo liavo. Anga hẽ olondonge via kala kohele poku tiukila kovina va sile konyima? Ekolelo liavo hẽ lia pamele ndeli liukãi ocimbumba? Koloneke vilo tu sukilavo oku lipula ndoco: ‘Eci Mõlomanu aka tukuluka o ndi sanga lekolelo?’

16. Ukãi ocimbumba wa kuata ekolelo lia tuwa ndati?

¹⁶ Nda tu yongola oku kala pokati komanu vana vaka kuatisiwa lesunga lia Yehova, tu sukila oku kuama ongangu yukãi ocimbumba. Ekolelo liaye lia kala ndati? Eye wa lekisa ekolelo liaye poku endaenda konganji olonjanja vialua loku pinga hati: “Mopele kunyali wange.” Ocili okuti, ukãi ocimbumba wa pinga ekuatiso konganji ka yalipuile oco yi tetulule ocitangi caye lesunga. Cimuamue haico catiamẽla komanu va Yehova koloneke vilo. Ovo va kolela okuti, Yehova oka tetulula ovitangi viavo lesunga, ndaño okuti va sukila oku pita otembo yalua loku kevelela. Ovo va pondola lika oku kolela kolohuminyo via Yehova poku likutilila kokuaye “utanya luteke.” (Luka 18:⁠7) Nda Ukristão wa liwekapo oku likutilila, oco a tetulule ovitangi viaye lesunga, ci lekisa okuti ekolelo liaye kolohuminyo via Yehova lia tepuluka. Kuenda ka kolela vali okuti Yehova o kuete unene woku kuatisa omanu vaye.

17. Nye ci tu vetiya oku pandikisa kolohutililo lelavoko liokuiya kueteke lia Yehova?

¹⁷ Ocitangi ukãi ocimbumba a liyaka laco, ci lekisa okuti tu kuete esunga lioku amamako oku likutilila. Tu konomuisi oku litepa ku kasi pokati kukãi ocimbumba kuenda ekalo lietu. Ukãi ocimbumba wa kuata utõi woku enda konganji ndaño okuti lomue wo vetiya oku ci linga. Pole, ondaka ya Suku yi tu ĩha utõi woku pandikisa ‘koku likutilila.’ (Va Roma 12:​12) Ukãi ocimbumba ka kuatele ekolelo liokuti, epingilo liaye li tambuluiwa. Pole, Yehova wa tu likuminya oku tẽlisa esunga liaye. Vonduko yuprofeto Waye wa popia hati: “Ndaño [ocitumasuku] ci tutuvala, ove o ci talamẽla. Ciya muẽle, ka ci cilua.” (Havakuki 2:3; Osamo 97:​10) Ukãi ocimbumba ka kuatele umue wo vetiya oco amameko oku pinga ekuatiso. Pole, etu tu kuete Yesu oñuatisi ya velapo okuti, “o kasi kondio ya Suku oku tu livondelelako.” (Va Roma 8:34; Va Heveru 7:​25) Ndaño okuti, ukãi ocimbumba wa kuata ocitangi, pole wa pinga konganji oco yi tetulule ovitangi viaye. Omo liaco, tu kuete esumũlũho lioku pamisa ekolelo lietu kolohuminyo via Yehova, lelavoko liokuti, eteke liesulilo ndopo li pitila.

18. Olohutililo vi pamisa ndati ekolelo lietu kuenda viecelela ndati oku kuatisiwa lesunga lia Yehova?

¹⁸ Olusapo lukãi ocimbumba lu tu longisa okuti olohutililo vi kuete elitokeko lekolelo. Kuenje, oku pandikisa koku likutilila, ku tu kuatisa oku yuvula ehonguo liekolelo lietu. Pole, eci ka ci lomboloka okuti, tu pamisa lika ekolelo lietu nda tu linga olohutililo vi komohĩsa omanu. (Mateo 6:​7, 8) Poku likutilila, tu sukila oku limbuka okuti tua kolela lika Suku, momo ohutililo yi tokeka ukamba wetu la Yehova kuenda yi pamisa ekolelo lietu. Ocili okuti, omunu o sukila oku kuata ekolelo oco a yovuiwe. Cimuamue haico Yesu a linga poku vetiya olondonge viaye ‘oku likutilila olonjanja viosi okuti ka vi tokoka.’ (Luka 18:1; 2 Va  Tesalonike 3:​13) Olohutililo vietu havioko vi kuatisa okuiya kueteke lia Yehova. Cikale okuti tu likutilila ale sio, eteke liaco liya muẽle. Pole, nda tu yongola oku popeliwa keteke lia Yehova, tu sukila oku likutilila oco ka tuka hongue kespiritu.

19. Tu lekisa ndati okuti tua kolela kohuminyo ya Suku yoku ‘tetuluila lesunga omanu vaye va nõliwa’?

¹⁹ Tu ivaluka epulilo Yesu a linga hati: “Eci Mõlomanu eya, o sanga ekolelo kilu lieve?” Etambululo lipi li eciwa kepulilo eli? Tua sanjuka calua poku limbuka okuti olohuluwa viomanu va kasi oku vumba Yehova koluali luosi. Olohutililo viavo lepandi, vi lekisa okuti va kuete ekolelo. Ovo va kasi oku eca etambululo kepulilo lia Yesu. Omo liaco, ndaño tu liyaka lekambo liesunga voluali lulo lua Satana, tua kolela okuti, Yehova oka ‘tetuluila lesunga omanu vaye va nõliwa.’

[Atosi pombuelo yamẽla]

Ivaluka Eci Tua Lilongisa?

• Nye ca siata oku vetiya omanu vamue oku pua ekolelo?

• Momo lie tu kuetele ekolelo kokuiya kueteke lia Yehova?

• Nye ci tu vetiya oku likutilila olonjanja viosi?

• Oku likutilila olonjanja viosi ku tu teyuila ndati oku yuvula oku pua ekolelo?

[Elitalatu kemẽla 19]

Olusapo luocimbumba kuenda onganji lu lombolola nye?

[Elitalatu kemẽla 21]

Koloneke vilo, olohuluwa viomanu va kolela okuti, Suku oka ‘tẽlisa ocipango caye’