Yehosua la va Giveone

Asapulo atiamẽla ko Yeriko a lisanduila kovaimbo akuavo o ko Kanana. Olosoma viaco via nõlapo oku likongela oco vi liyake la va Isareli. Pole, va Giveone va kuata ovisimĩlo vikuavo. Ovo va wala uwalo wa pua kuenje va enda ku Yehosua kuenda va popia vati: ‘Tua tunda kofeka yocipãla. Tua yeva eci catiamẽla ku Yehova kuenda kovina viosi eye o lingili kofeka Yegito kuenda yo Moavi. Lisili letu okuti ka vu liyaki letu kuenda tu linga apika vene.’

Yehosua wa tava kokuavo kuenje ka va liyakele lavo. Noke yoloneke vitatu, Yehosua wa limbuka okuti ovo ka va tundile kofeka yocipãla. Pole, va tunda vofeka yo Kanana. Yehosua wa pulisa va Giveone hati: ‘Momo lie wa tu kembeli?’ Ovo va tambulula vati: ‘Tua kala lusumba! Tua kũlĩha okuti Yehova Suku yene o vu yakeliko. Lingi ohenda ko ka tu pondi.’ Yehosua wa tẽlisa ohuminyo yaye kuenje omanu vaco ka va pondele.

Noke yotembo yimue, olosoma vitãlo vio ko Kanana kumue lolohoka viavo, via limalehẽla oku ka liyaka la va Giveone. Yehosua kumue lolohoka viaye va linga ungende uteke wosi oco va ende va ka popele va Giveone. Uyaki wa fetika komẽle yeteke lia kuamamo. Va Kanana va fetika oku tilila kolonepa viosi. Kuosi ovo va tilila Yehova wa va veta lociwe. Kuenje Yehosua wa pinga ku Yehova oco ekumbi li talame. Momo lie eye a lingila epingilo liaco ku Yehova nda ekumbi lalimue eteke lia talamele? Momo Yehosua wa kolelele muẽle Yehova. Omo liaco, ekumbi ka lia iñilile vokuenda kueteke liaco liosi toke eci va Isareli va yula olosoma vio Kanana kumue lolohoka viavo.