Yehova o Vangula la Samuele

Eli Ocitunda Cinene wa kuatele omãla vavali valume va kala oku vumba ndovitunda votavernakulu. Olonduko viavo Hafeni la Finehase. Ovo ka va pokuile kovihandeleko via Yehova, kuenda va enda oku tata lãvi omanu. Eci va Isareli va enda oku nena ocilumba ku Yehova, Hafeni la Finehase va enda oku upa ositu yiwa okuti yi kala yavo. Eli wa yeva ovina omãla vaye va kala oku linga, pole, ka va lemelele. Anga hẽ Yehova wa ecelela okuti ovina viaco viamamako oku lingiwa?

Ndaño okuti Samuele wa kala calua umalẽhe pokati ka Hafeni la Finehase, pole, eye ka setukuile ocituwa cavo. Yehova wa sanjukilile calua Samuele. Vuteke umue osimbu Samuele a kala oku pekela, wa yeva ondaka yimue ya kala oku vilikiya onduko yaye. Eye wa votoka, wa lupukila ku Eli kuenje wa popia hati: ‘Ame ulo!’ Pole, Eli wa popia hati: ‘Sia ku vilikiyile. Kuende ka pekele vali.’ Samuele wa enda, wa tiukila pula. Kuenje ondaka ya vilikiya vali. Eci Samuele a yeva ondaka yaco onjanja yatatu, Eli wa limbuka okuti Yehova eye wa kala oku vilikiya Samuele. Eye wa sapuila Samuele okuti, nda wa yeva vali ondaka, o sukila oku popia hati: ‘A Yehova, popia ño. Ukuenje wove o kasi oku yevelela.’

Samuele wa enda, wa tiukila pula. Noke wa yeva ondaka ya popia hati: ‘A Samuele! A Samuele! Eye wa tambulula hati: Popia ño, momo ukuenje wove o ci yevite.’ Yehova wo sapuila hati: ‘Sapuila Eli okuti ñasi loku iya oku yambula eye kumue lepata liaye. Eli wa kũlĩha okuti omãla vaye va kasi oku linga ovina ka via sungulukile votavernakulu yange, pole, ka kasi oku va lemela.’ Eci kuaca omẽle Samuele wa yikula epito liotavernakulu ndeci a siata oku linga. Eye wa kuata usumba woku sapuila ocitunda cinene ovina Yehova a popia. Pole, Eli wo vilikiya kuenda wo pula hati: ‘Amõlange, nye Yehova a ku sapuila? Ndi sapuile ovina viosi.’ Kuenje Samuele wa sapuila Eli ovina viosi.

Osimbu Samuele a kula, Yehova wamamako oku u kuatisa. Kuenje va Isareli vosi, tunde kocivanja cimue cofeka toke kocivanja cikuavo, va kũlĩhĩle okuti Yehova wa nõla Samuele oco a linge uprofeto kuenda onganji.