Ohuminyo ya Yefita

Va Isareli va yanduluka vali Yehova kuenje va fetika oku fendela olosuku viesanda. Eci va Amoni va liyaka la va Isareli olosuku viaco viesanda ka via tẽlele oku va kuatisa. Va Isareli va tala ohali vokuenda kuanyamo alua. Noke va sapuila Yehova vati: ‘Tua linga ekandu. Linga ohenda, tu popele kovanyali vetu.’ Va Isareli va nyõla oviteka viavo kuenje va fetika vali oku fendela Yehova. Yehova ka yonguile vali oku mola okuti va Isareli vamamako oku tala ohali.

Ulume umue esualali o tukuiwa hati Yefita, wa nõliwa oco a songuile omanu oku yaka la va Amoni. Eye wa popia ku Yehova hati: ‘Nda wa tu kuatisa oku yula uyaki owu, ndi likuminya okuti eci ndi tiuka konjo, omunu watete o tunda volombundi vionjo yange, oco a ñualehele lame, ndu weca kokuove.’ Yehova wa yevelela ohutililo ya Yefita kuenje wo kuatisa oku yula uyaki.

Eci Yefita a tiuka konjo, omunu watete wa tunda oku li ñualehela laye, omõlaye ukãi wongunga. Omõlaco wa kala oku piluka kuenda oku sika oloñoma. Nye Yefita a ponduile oku linga? Eye wa ivaluka ohuminyo yaye kuenje wa popia hati: ‘Avoyo we, amõlange! Wa teya utima wange. Nda linga ohuminyo yimue ku Yehova. Oco ndi yi tẽlise, ndi sukila oku ku tuma oco o ka vumbe votavernakulu ko Silo.’ Pole, omõlaye wo sapuila hati: ‘A tate, nda wa linga ohuminyo yimue ku Yehova, o sukila oku yi tẽlisa. Eci ndu ku pinga ceci okuti, ngecelele handi oku pita olosãi vivali, lakamba vange vakãi kolomunda. Noke ngenda ko Silo.’ Omõla ukãi wa Yefita wa vumba lekolelo votavernakulu vokuenda kuomuenyo waye wosi. Unyamo lunyamo akamba vaye va endaenda ko Silo oku ko nyula.