Omõla Ulume Wukãi Umue Ocimbumba wa Kuata Vali Omuenyo

Vokuenda kuocitenya Yehova wa sapuila Eliya hati: ‘Kuende ko Sarepata. Ukãi umue ocimbumba eye o ka ku tekula.’ Eci a pitĩla pombundi yolupale, wa mola ukãi umue ocimbumba o kasi oku tiaña olohũi. Kuenje Eliya wa pinga kokuaye ovava. Osimbu ukãi a kala oku enda oku kopa ovava, Eliya wo vilikiya loku u sapuila hati: ‘Hu pinga okuti o ndi nenelako okacimalañanya kombolo.’ Pole, ukãi ocimbumba wa popia hati: ‘Si kuete ombolo layimue yoku ku ĩha. Ndi kuete lika epupu liosema kuenda okolela kamue oco ndi linge okakulia komõlange kuenda kange muẽle.’ Eliya wa popia laye hati: ‘Yehova wa likuminya okuti nda wa ndi pangelako ombolo yimue, osema yove kuenda ulela ka vi pui toke eteke ombela yi fetika vali oku loka.’

Omo liaco, ukãi ocimbumba wa enda konjo kuenje wa panga ombolo yuprofeto wa Yehova. Ndomo Yehova a likuminyile, ukãi ocimbumba kuenda omõlaye vokuenda kuotembo yosi yocitenya va kuata okulia. Vombia yosema kuenda vesanga liulela ka mua puile.

Pole, noke kua pita ocitangi cimue. Omõla ulume wukãi ocimbumba wa vela kuenje wa fa. Omo liaco, ukãi wa pinga ekuatiso ku Eliya. Eliya wa tambula omõla wa kala ponete yukãi kuenje wo wambata vohondo yimue yosapalalo vonjo yukãi waco. Eye wo pekelisa pula kuenje wa likutilila hati: ‘A Yehova, hu pinga okuti omuenyo womõla ulo u tiukamo vali.’ Wa kũlĩha esunga lieci nda ca komõhĩsila omo lia Yehova oku linga ocikomo caco? Momo ndomo tua ci kũlĩha lomue wa la linga ocikomo cimue coku pindula omunu wa file. Ukãi waco ocimbumba kumue lomõlaye, ka va kaile va Isareli.

Pole, omuenyo womõla wa tiukamo vali kuenje wa fetika oku fuima! Eliya wa popia lukãi ocimbumba hati: ‘Tala! Omõlove o kasi lomuenyo.’ Ukãi wa kuata esanju lialua kuenje wa sapuila Eliya hati: ‘Kaliye nda limbuka okuti ove wumunu wa Suku. Momo ove o vangula lika ondaka Yehova a ku tuma oku popia.’