Usoma Wa Suku Wa Tumbikiwa Ale

Ukanda umue wasapulo wo kofeka yo Australia wa popia hati: ‘Ci tava ndati okuti omanu vakualofeka via litepa lovituwa via litepa va likuata omunga? Ci tẽliwa lika longusu yimue ka yi sokisiwa leyi yomanu okuti oyo yi tokeka apata.’

ONGUSU yaco yi tẽla hẽ oku ci linga? Omanu valua va popia hati, kakuli ongusu yi tẽla oku ci linga. Pole, Embimbiliya li lekisa okuti kuli ongusu yimue yika tokekisa apata osi omanu. Ongusu yaco yika tẽla muẽle oku ci linga.

Soma Daviti wa tukuile ale ovitangi vi kasi oku pita cilo voluali. Eye wa popia hati: ‘Olosoma viokilu lieve via lipongiya. Olombiali via tumbikila ongombo Yehova lombuavekua yaye, viti, tu soyoli apanda avo. Ovikolo viavo tu vi inasi.’ (Osamo 2:​2, 3; Ovilinga 4:​25, 26) Olombiali violuali, vi kasi oku tungila ongombo Yehova la Yesu Kristu okuti eye Osoma ya nõliwa. Otembo yipi va fetika oku tunga ongombo yaco?

Uvangi Wembimbiliya u lekisa okuti ongombo yaco va fetika oku yi tunga kunyamo wo 1914 eci Usoma wa Suku wa tumbikiwa kilu la Yesu osoma.a Otembo yaco, olombiali violuali via kuata ocisimĩlo cimuamue. Ovio ka via pokuile Kuviali wa Suku wa tumbikiwa. Pole, via vetiya omanu oku li tumbika Kuyaki Watete wa pita Voluali Luosi.

Suku o tenda hẽ ndati ovisimĩlo evi violombiali violuali? Embimbiliya li popia hati: “U o kasi kilu o yola. Yehova o va pembula. O popia lavo loku tema, kuenje o va lingisa usumba lonyeño yaye ya lua.” Noke Yehova oka sapuila Omõlaye Yesu Osoma hati: “Minge, kuenje hu iha olofeka ha vi lingi ocipiñalo cove, lasukiyo oluali ha a lingi ocitumalo cove. O va teya lepangati liutale. O va nyanyõla ndelonga liutungi wolombia.”​—⁠Osamo 2:​4, 5, 8, 9.

Yesu oka nyanyõla lombueti yutale olombiali violuali Vuyaki wo Harmagedo. Elivulu Liesituluilo, li tukula “ovita vieteke linene lia Suku Tõlo.” Olio li lekisavo okuti ‘olosoma vi kasi oku ongoluiwila’ eteke liaco. (Esituluilo 16:​14, 16) Olondele vika vetiya olombiali via palo posi oco vi kuate ocisimĩlo cimosi coku li yaka la Suku Tõlo.

Otembo yolombiali oku linga uyaki waco yi kasi ocipepi. Pole, olombiali viaco ka ‘vi ka yula,’ momo vika nyõliwa. Kuenje eci cika ecelela okuti omanu vaka kuata ombembua yina va kasi oku lavoka tunde osimbu. Eci cika pita hẽ ndati? Vuyaki waco wa sulako, Usoma wa Suku uka ‘kundula ovosoma osi a kulo kilu lieve. Kuenje owo uka kala oloneke ka vi pui.’ (Daniele 2:​44) Usoma wa Suku owo lika uka tẽlisa onjongole yomanu yoku tumbika ombembua voluali luosi.

Osoma Yuviali wa Suku

Usoma waco owo omanu va siata oku pinga poku likutilila hati: “Ocipango cove ci lingiwe [palo] posi ndeci ci lingiwa kilu.” (Mateo 6:​10) Usoma waco wocili muẽle. Momo wa fetika ale oku linga ovina vi komohĩsa tunde eci wa tumbikiwa kilu kunyamo wo 1914. Omo liaco, tu konomuisi uvangi u lekisa okuti Usoma wa Suku wa tumbikiwa ale.

Catete, Usoma waco u kuete oviali u songuiwa la Yesu Kristu. Kunyamo wo 33, Yehova wo wiha ocikele caco coku songuila akongelo. (Va Efeso 1:​22) Tunde kotembo yaco, Yesu o kasi oku songuila upange waye luloño wocili. Kocita catete kua kala onjala yalua. Kuenje vamanji vakongelo vangiliya ovina vioku kuatisa vakuavo. Omo liaco, va tuma Barnaba la Saulu oco vaka tuale ekuatiso ku vamanji.​—⁠Ovilinga 11:​27-30.

Yesu wa siata oku tu lingila ovina vialua vi komohĩsa tunde eci Usoma waye wa tumbikiwa. Olonjanja vimue vamanji va siata oku pita lovitangi vialua ndeci ahunguhungu ofela, ovilemawe, onjala kuenda ombela yi teya olonjo viavo. Pole, vamanji vo kolofeka vikuavo va siata oku eca ekuatiso ku vakuavo va pita lovitangi viaco. Okupisa kosãi ya Susu toke ya Kayovo kunyamo wo 2001, kofeka yo El Salvador kua pita ocilemawe cimue cinene. Omo liaco, vamanji vofeka yaco kumue la vana va tunda ko Kanada, ko Guatemala kuenda ko Estados Unidos, va eca ekuatiso kokuavo. Ovo va tunga lonjanga olonjango vitatu Viusoma. Kuenda ovita vitãlo kolonjo.

Omanu Vaka Kala Vusoma wa Suku

Usoma wa Suku wa tumbikiwa kunyamo wo 1914. Kuenje tunde kotembo yaco omanu kolonepa viosi violuali va kasi oku kongeliwa kefendelo lia Yehova. Uvangi waco u sangiwa kelivulu lia Isaya wa popia hati: “Ci kala okuti koloneke viesulilo omunda yonjo ya Yehova yi velapo koku lepa pokati kolomunda viosi, . . . kuenje omanu volofeka viosi volumũhĩlako.” Olondaka evi vi lekisavo okuti, ‘omanu valua’ va sunguluka va tava oku longisiwa la Yehova. Kuenda va pokola kolonumbi viaye.​—⁠Isaya 2:​2, 3.

Koloneke vilo, etendelo Liolombangi via Yehova lia pitahãla olohuluwa epandu komanu. Kuenda upange wavo wa li sanduila kueci ci pitahãla 230 kolofeka. Kolohongele viofeka via siata oku lingiwa voluali luosi omanu va siata oku komoha calua omo liombembua, ocisola kuenda ukamba u sangiwa pokati Kolombangi via Yehova. Momo lomue pokati kavo o lekisa olonepele vioku a citiwila kuenda elimi a vangula. (Ovilinga 10:​34, 35) Ove hẽ, ku tava okuti uviali wa Suku owo lika uka tokekisa olofeka lovisoko viomanu?

Usoma wa Suku Kuenda Elilongiso

Tua kũlĩha okuti, osoma losoma yi kuete ovihandeleko. Kuenje omanu va sukila oku pokola kovihandeleko viaco. Cimuamue haico ci pita Lusoma wa Suku. Ava vosi va yongola oku kalamo, va sukila oku pokola kolonumbi viaye. Pole, ci sukila ekuatiso lialua oco omanu vakuapata a litepa va pokole kolonumbi vimuamue. Palo tu sangapovo uvangi u lekisa okuti Usoma wa Suku wa tumbikiwa ale. Uvangi waco, tu u limbukila kupange woku kunda u kasi oku lingiwa. Momo u kasi oku kuatisa omanu valua oku pongolola ovitima viavo.

Usoma wa Suku u kasi oku tẽlisa ndati upange waco? Upange waco u kasi oku tẽlisiwa poku kundila omanu ‘kolonjo’ viavo. Kuenda oku va longisa Embimbiliya. (Ovilinga 5:42; 20:​20) Ekuatiso lie li kasi oku tunda kelongiso liaco? Patele umue o tukuiwa hati Jacques Johnson wa yonguile oku konyuisa ukãi umue oco kaka lilongise vali Embimbiliya Lolombangi via Yehova. Kuenje wa tuma oku sandeka ocisimĩlo caye vukanda wasapulo ko Kanada. Eye wa popia hati: ‘Nda limbuka okuti sika tẽlisa ocisimĩlo cange coku tateka ukãi oku lilongisa Embimbiliya. Momo nda limbuka okuti Ombangi ya Yehova ya fetika oku kuata ukamba lukãi una a kala oku longisa Embimbiliya. Noke ukãi waco weya oku linga Ombangi ya Yehova. Kuenda sia tẽlele oku tateka onjongole yaye.’ Olonumbi Viembimbiliya ukãi a lilongisa Lolombangi via Yehova, vio kuatisa calua. Kuenda ekalo liwa Liolombangi via Yehova, li kasi oku kuatisavo omanu valua oku siapo ovituwa vĩvi komuenyo wavo.

Elongiso liatiamẽla Kusoma wa Suku lia siata oku upiwa Vembimbiliya. Kuenda lia siata oku kuatisa omanu valua oku siapo ovituwa vĩvi komuenyo wavo. Likasivo oku kuatisa omanu oku lekisa ocisola ku vakuavo. Kuenje pokati kavo lomue o kuetele ukuavo olonepele. (Yoano 13:​34, 35) Elongiso liaco li kasivo oku kuatisa omanu oku pokola kolondaka viupostolo Paulu wa popia hati: “Ko ka lisetahaisi loluali lulo, puãi kuati ovitima viokaliye okuti ovimuenyo vi pongoluiwa, kuenje vu limbuka ndeci ci kasi ocipango ca Suku, okuti ciwa, ca sunguluka, ca pua eko.” (Va Roma 12:⁠2) Omanu valua va siapo ovituwa viavo vĩvi. Kuenje cilo, va kasi oku pokola kolonumbi Viusoma wa Suku. Omo liaco, ovo va kuete ombembua lesanju. Kuenda va lavoka oku kuata omuenyo uwa kovaso.​—⁠Va Kolosai 3:​9-11.

Utala Wondavululi u kasi oku kuatisa omanu valua voluali okuti cilo va kuete ombembua. Omo lievokiyo liolomakina vioku pongolola alimi, Utala Wondavululi u kasi oku sandekiwa kueci ci pitahãla 135 kalimi. Kuenje, eci ci kasi oku kuatisa omanu valua oku lilongisa Utala Wondavululi velimi liavo.

Umue misionariu wetavo lio Mormon, wa konomuisa eci catiamẽla katavo. Eye wa tukula Utala Wondavululi lo Despertai! via sandekiwa Lolombangi via Yehova. Otualivulu tuaco tua siata oku kuatisa kupange wavo woku kunda. Omo liaco, eye wa popia hati: ‘Lomue kaka sepule Utala Wondavululi lo Despertai! Momo mu sangiwa olonumbi vi kuete uvangi wocili. Kuenda ka vi sokisiwa lalivulu a sangiwa vatavo akuavo.’

Kuli Ovovangi alua a lekisa okuti Usoma wa Suku wa tumbikiwa ale. Kuenje, Olombangi via Yehova via sanjukila oku kundila omanu vosi ‘olondaka viwa viusoma.’ Omo liaco, ovio vi kasi oku laleka omanu oco va linge afendeli va Yehova. (Mateo 24:​14) Ove hẽ o yongolavo oku linga Ombangi ya Yehova? Nda wa likongela lavio okuti o pokolavo kolonumbi Viusoma, oka tambula onima yiwa. Kuenda oka kuata omuenyo ko pui voluali luokoliye muna ‘muka kala lika esunga.’​—⁠2 Petulu 3:⁠13.

[Etosi pombuelo yemẽla]

[Elitalatu kemẽla 5]

Kunyamo wo 1914, olofeka via li tumbikile Kuyaki Woluali Luosi

[Elitalatu kemẽla 6]

Ekuatiso lieciwa Lakristão kotembo yohali li lekisa okuti va likuetele ocisola pokati

[Elitalatu kemẽla 7]

Olombangi via Yehova voluali luosi vi tambula elongiso limuamue osemana losemana