‘Valitepa Kalimi Pole Va Litokeka Locisola’

Vokuenda kuolohulukãi vianyamo, omanu va siata oku sanda eyovo, lepolelo kuenda elianjo, oco va yovuiwe kovitangi viomuenyo. Tu pondola ndati oku liyaka lovitangi viomuenyo? Anga hẽ, eteke limue tuka yovuiwa kovitangi viaco? Oco hẽ, tuka yovuiwa ndati?

EYI oyo ondaka ya lomboluiwa kohongele yofeka yoloneke vitatu ya lingiwa Lolombangi via Yehova kunyamo wo 2006 okupisa kosãi ya Kupemba. Osapi yohongele yaco ya linga hati: “Eyovo li Kasi Ocipepi!”

Kovitumãlo vimue vi soka ecea omanu valua va kala kohongele yaco, va tunda kolofeka vialua. Kovitumãlo vimue ndeci: Ko Republika Cheka volupale luo Praga, kofeka yo Eslovakia volupale luo Bratislava, kofeka yo Poloniaa kolupale luo Chorzow loko Poznan, kuenda valupale atãlo oko Alemanya ndeci: Ko Dortmund, ko Frankfurt, ko Hamburgo, ko Leipzig, kuenda ko Munike, Ohongele yaco ya lingiwa kosãi Yevambi Linene kuenda Yenyenye yunyamo wo 2006. Kolohongele viaco, kua kala eci ci soka 313.000 komanu.

Omanu va kala kolohongele viaco va lekisa ovituwa vipi? Nye omanu vakuavo va lombolola catiamẽla kohongele yaco? Vamanji va yeva nye vovitima viavo noke yohongele?

Aliangiliyo

Vamanji vakuafeka kuenda akombe, va linga aliangiliyo oco ohongele yende ciwa. Ovo va linga upange walua woku pongiya olonjo mu sikila akombe. Kohongele ya lingiwa volupale luo Chorzow kofeka yo Polonia, Olombangi via Yehova via yekisa eci ci soka 13.000 komanu va tunda kocifuka co Europa. Omanu vaco va tunda kolofeka vimue ndeci: Ko Armenia, ko Belarus, ko Estonia, ko Georgia, ko Kasakistão, ko Kirguistão, ko Letônia, ko Lituânia, ko Moldávia, ko Rusia, ko Tajikistão, ko Turkomenistão, ko Ukrania, ko Estados Unidos, kuenda ko Usbekistão.

Vamue va pongiya ungende wavo vokuenda kuolosãi vimue. Manji umue o tukuiwa hati, Tatiana okuti, wa litumbika kupange wakundi votembo yosi vocikanjo co Kamchatka kofeka yo Rusia ocipepi longave yocifuka co Japão, wa pongiya ungende waye vokuenda kunyamo. Eye wa linga ungende u soka 10.500 kolokilometulu. Tete, wa linga ungende lombalãu ci soka olowola vitãlo, noke wa linga ungende lomboyo ci soka oloneke vitatu. Oku sulako, wa linga ungende lekãlu ci soka akũi atatu kolowola toke eci a pitila kolupale luo Chorzow kofeka yo Polonia.

Vamanji valua va liecele kupange woku kuatisa oku pongiya ocitumãlo cohongele yofeka. (Esinumuĩlo. 23:​14) Kohongele ya lingiwa kolupale lumue lu tukuiwa hati, Leipzig, Olombangi via Yehova kolupale luaco, via linga upange woku yelisa ocitumãlo cohongele yofeka. Kuenda va likuminya oku cilingavo noke yohongele. Eci olomitavaso viocila caco via mola okuti, ocitumãlo ca yelisiwa ciwa, ka via pingile vali olombongo vioku feta ocitumãlo caco.

Oku Laleka Omanu

Akongelo a sangiwa voluali luosi, va litumbikile kupange woku sandeka osapi Yohongele yofeka yi popia hati; “Eyovo Likasi Ocipepi!” Vosi va lipongiyile oku enda kohongele, va litumbikile kupange waco lesanju lialua. Ovo vamamako oku ci linga toke kuteke woku lalela kohongele yaco. Anga hẽ, elikolisilo liavo lia kuata onima yiwa?

Manji umue o tukuiwa hati, Bogdan wa lisanga lukulu umue wendamba wa yonguile oku enda kohongele yofeka. Pole, wa popia hati, si kuete olombongo vioku linga ungende u soka 120 kolokilometulu oku enda toke kolupale luo Chorzow. Noke, manji wa ivaluka okuti, vokalela ka angiliyiwa lekongelo liavo, mua supa omangu yimue. Kuenje, manji Bogdan wa popia hati: Tuo sapuila okuti, citava oku enda letu okuti ka feti. Pole, o sukila oku pitila pocitumãlo coku londela vokalela kelivala lia 5:30 komẽle.’ Noke, ulume waco wa tava kelaleko kuenje wa enda kohongele yofeka. Noke liohongele, ulume waco wa sonehela vamanji hati: ‘Okupisa cilo, ndi yongola oku linga ulume umue wa sunguluka.’

Volupale luo Praga, ulume umue wa kala vowotele mua sikĩlile vamanji va tunda kofeka yo Inglaterra, koñolosi, wa sapuila manji umue hati, etali nda endelevo kohongele. Nye co vetiya oku enda kohongele? Ulume waco wa lombolola okuti, noke lioku tambula elaleko liakundi ekũi va sapela laye volupale vapuluvi a litepa, wa nolapo oku enda kohongele. Noke liohongele eye wa komoha calua omo liovina a mola levi a yeva, kuenje wa nolapo oku lilongisa ovina vikuavo viatiamẽla Kembimbiliya.​—⁠1 Timoteo 2:​3, 4.

Ulandu Wovipama Viohongele

Ulandu wohongele yofeka, wa lekisa ndomo tu pondola oku liyaka lovitangi viomuenyo. Olonumbi Viembimbiliya, via lekisa ndomo tu pandikisa kovitangi viaco kuenda oku vi yula.

Omanu vana va liyaka lovitangi vimue ndeci: Oku kuka, ekambo liuhayele, esumuo lioku fisa vangandiavo, ale ovitangi vikuavo viomuenyo, va tambula elembeleko li tunda Vembimbiliya li va kuatisa oku kuata elavoko. (Osamo 72:​12-​14) Olohueli kuenda olonjali, via tambula olonumbi vi va kuatisa oku sanga esanju volohuela kuenda ndomo va tekula ciwa omãla vavo. (Ukundi 4:12; Va Efeso 5:​22, 25; Va Kolosai 3:​21) Amalẽhe Akristão vana va kasi oku liyaka layonjo vakamba kosikola omo lioku pokola kalungulo Ondaka ya Suku, kolonjali, kuenda vekongelo, va tambulavo olonumbi vi va kuatisa oku liyaka lovitangi viaco. Olonumbi viaco, vi va kuatisavo oku “yuvula oloñeyi viamalẽhe.”​—⁠2 Timoteo 2:⁠22.

Ukamba la Vamanji vo Kolofeka Viosi

Olombangi via Yehova via siata oku tambula olonumbi vialua kolohongele viavo. (2 Timoteo 3:​16) Pole, olohongele evi viofeka via litepele calua omo lioku likongela kuomanu va tunda kolonepa vialua violuali. Ndaño okuti olohongele viaco via lingiwa valimi a litepa, pole, vosi va kala kolohongele viaco, va tambula olonumbi vimuamue viespiritu. Eteke leteke, vamanji vamue vatiamẽla Kosungu Yolombangi via Yehova, va linga olohundo, kuenda va lombolola ovolandu o kolofeka vikuavo. Kuenje, omanu va pamisiwa calua konepa yespiritu. Olohundo viaco kuenda ovolandu a pongoluiwa kalimi alua oco omanu vosi vopeko esilivilo.

Vamanji va kalako, va kuata esanju lioku yolela vakuavo va tunda kolofeka via litepa. Manji umue wa popia hati: ‘Oku vangula alimi a litepa, ka kua kale ocitangi. Pole, elitokeko liaco lia vokiya esanju liavamanji va kala kohongele. Momo kua kala omanu valua va tunda kolofeka via litepa, haivo va kasi lovituwa viñi viñi. Pole, va likuata omunga omo liekolelo liavo.’ Vamanji va kala kohongele ya lingiwila ko Munike, va popia hati: ‘Omanu vaco va litepa kalimi pole va litokeka locisola.’ Ovo ndaño okuti, va tunda kolofeka via litepa, kuenda kalimi añi añi, va likuatela ukamba wocili la vamanji kespiritu.​—⁠Sakaria 8:⁠23.

Olondaka Violopandu

Vokuenda kuohongele, ekolelo lia vamanji lia setekiwa lekalo liotembo. Momo kua kala ombela yalua kuenda ombambi. Manji umue wa tunda kofeka yo Estados Unidos wa popia hati: ‘Ombambi ya kala koloneke viohongele yofeka omo liombela, sia la yi mola komuenyo wange. Omo liaco, sia yevele ciwa ovipama viohongele yaco. Pole, ukamba wa kala pokati ka vamanji locisola caco, kuenda ocituwa cavo coku yekisa akombe, ca vokiya esanju liange. Ohongele eyi, lalimue eteke yika ndi limba komuenyo wange.’

Kohongele yofeka ya lingiwa kofeka yo Polonia, kua lingiwa ocina cimue okuti lalimue eteke omanu cika va limba. Kohongele yaco, kua sandekiwa elivulu Estudo Perspicaz das Escrituras velimi lio Polonia. Eyi oyo onima va tambula omo lioku pandikisa kombambi lombela. Omanu va kuatavo esanju lialua omo lioku sandekiwa kuelivulu losapi ya linga hati: Viva Tendo Em Mente o Dia de Jeová, Kohongele yofeka losapi hati, ‘Eyovo li Kasi Ocipepi!’

Omanu va kala kohongele yaco, vaka ivaluka ovina vialua. Manji umue wo kofeka yo Cheka o tukuiwa hati, Kristina okuti wa liecele kupange woku sindikila okalela ka vamanji va tundile kolofeka vikuavo, wa popia hati: ‘Vokuenda kungende wetu, ukãi umue wa ndi vilikiyila pokanele kuenje, wa ndi sapuila hati: Ndi kasi oku tatiwa ciwa. Ove wa tu ambatelako okulia kuenda ovava oku nyua. Nda pandula calua omo liupange wove.’ Ukãi waco wa kala oku popia catiamẽla konanya ya pongiyiwila vamanji veya kohongele okuti, va tunda kolofeka vikuavo. Manji ukuavo wa popia hati: ‘Upange tua linga ndeti, lalimue eteke tua u lingile. Vupange waco mua kongelele oku eca onanya eteke leteke kueci ci soka 6.500 komanu va tunda kolofeka vikuavo. Cisanjuisa calua oku mola ndomo omanu valua va kala oku kuatisa kupange waco oku kongelamo omãla.’

Manji umue ukãi wa tunda kofeka yo Ukrania toke kohongele yofeka ya lingiwa volupale luo Chorzow, wa popia hati: ‘Tua sanjukila ocisola vamanji va lekisa kokuetu, loku tu tata ciwa, kuenda ocituwa cavo coku yekisa. Ka tu kuete olondaka vioku eca olopandu kokuavo.’ Umãlehe umue o kuete anyamo ecelãla o tukuiwa hati, Annika wa tunda kofeka yo Filandia wa sonehela Kombetele Yolombangi via Yehova kofeka yo Polonia hati: ‘Kohongele yofeka, nda mola ovina vialua vi komõhisa okuti, lalimue eteke nda vi simile. Ciwa oku tiamẽla kocisoko Colombangi via Yehova. Momo omunu o pondola oku kuata ukamba lomanu vokolofeka vikuavo.’​—⁠Osamo 133:⁠1.

Uvangi Womanu Vakuavo

Osimbu handi ohongele ka ya fetikile, kua lingiwa eliangiliyo liokuti, omanu va tunda kolofeka vikuavo, va nyula ovitumãlo via posoka vi sangiwa vofeka mua lingiwila ohongele. Kofeka yo Bavaria, vamanji va tunda kolofeka vikuavo, va li sanga la vamanji Ponjango Yusoma yopocitumãlo. Usongui wocimunga cimue comanu vakuakunyula olofeka okuti Halombangiko via Yehova, wa komõha calua ukamba wa kala pokati ketu. Manji umue wa popia hati: ‘Eci tua tiukila kowotele lekãlu, usongui womanu vaco wa popia hati: Ene wa litepi calua lovimunga vikuavo. Momo wa wali uwalo wa sunguluka, kuenda wa pokoli kolonumbi viusongui wene. Pokati kene ka pa kale umue o popia lãvi ukuavo, ale o linga ombuanja. Nda komõha calua ukamba wa li kuateli vonjanja yimosi eci wa li sangi kulo.’

Manji umue wa talavaya ko Departamentu Yasapulo kohongele ya lingiwila kofeka yo Praga, wa popia hati: ‘Calumingu komẽle ulume umue osipayu weya oku kũlĩhĩsa ndomo tu kasi kohongele yofeka. Eci a limbuka okuti pokati ketu pali lika ombembua, wa popia hati: Si kuete vali eci ndi linga kulo. Eye wa lombolola okuti, omanu vamue va lisungue locitumãlo cohongele yofeka, va pula eci ca kala oku pita vocitumãlo caco. Eci nda va lomboluila okuti, Olombangi via Yehova ovio vi kasi oku lingilamo ohongele yofeka, va sumua calua. Pole, nda va sapuila ndoco: Nda omanu vosi va kuatele ovituwa ndevi Violombangi via Yehova, voluali nda ka muli vali olosipayu.’

Omanu Valua va Yovuiwa Ale

Ondaka ya Suku yi kasi ndeyau pokati komanu vakuavituwa viñi viñi haivo vakualofeka vialitepa oco va litokeke pokati lombembua kuenda oku likuata omunga. (Va Roma 14:19; Va Efeso 4:​22-24; Va Filipoi 4:⁠7) Ohongele yofeka losapi hati, ‘Eyovo li Kasi Ocipepi,’ ya eca uvangi waco. Olombangi via Yehova via yovuiwa ale kovitangi vialua vi kasi voluali. Pokati kavo ka pa sangiwa vali ovituwa vimue ndeci: Usuanji, ungangala, olonepele viakova. Ovo va lavoka otembo eci voluali ka muka kala vali ovitangi viaco.

Omanu vana va endele kohongele yaco onjanja yatete, va mola ombembua yi sangiwa pokati Kolombangi via Yehova vi tunda kolofeka via litepa haivo vakuavituwa via litepa. Uvangi waco wa muiwa kesulilo liohongele yofeka. Omanu valua va pandula lesanju loku li yolela lakamba vokaliye kuenda vopa alitalatu. (1 Va  Korindo 1:10; 1 Petulu 2:​17) Omo liesanju kuenda oku kolela okuti, eyovo li kasi ocipepi, vamanji va tundile kolofeka vikuavo, va tiukila lonjongole yoku amamako oku pokola Kondaka ya Suku.​—⁠Va Filipoi 2:​15, 16.

[Atosi pombuelo yamẽla]

[Okakasia Lelitalatu kemẽla 10]

Akũi Avali Latãlo Kalimi a Vanguiwa Velimi Limosi

Kovitumãlo ecea kua lingiwila Ohongele yofeka, ovipama viohongele via lingiwa kelimi liopocitumãlo. Kohongele yofeka ya lingiwa kofeka yo Alemanya, olohundo viaco via lingiwa kueci ci soka 18 kalimi akuavo. Kolupale luo Dortmund, olohundo via lingiwa kalimi amue ndeci: Lio Árabe, lio Espanyole, lio Farsi, Lioputu, kuenda lio Rusu. Kolupale luo Frankfurt, ya lingiwa kelimi Liongelesi, lio Françes, kuenda kelimi lio Sérvia-Koroasia. Kolupale luo Hamburg, ya lingiwa kelimi lio Dinamarka, lio Holanda, lio Sueko, kuenda lio Tâmil. Kolupale luo Leipzig, ya lingiwa kelimi lio China, lio Polonia, kuenda lio Turkia. Kolupale luo Munike, ya lingiwa kelimi lio Helasi, lio Italiano, kuenda Liovindekaise lio Alemanya. Ohongele yofeka ya lingiwila kolupale luo Praga, olohundo viaco via lingiwa kelimi lio Cheka, Liongelesi, kuenda lio Rusu. Kolupale luo Bratislava, ohongele ya lingiwa kelimi Liongelesi, lio Hungria, lio Eslovako, kuenda Liovindekaise lio Eslovako. Kolupale luo Chorzow, ohongele ya lingiwa kelimi lio Polonia, lio Rusu, lio Ukrania, kuenda Liovindekaise lio Polonia. Kolupale luo Poznan ya lingiwa kelimi lio Polonia kuenda kelimi lio Finlandia.

Ohongele yaco yofeka ya lingiwa kueci ci soka akũi avali latãlo kalimi. Ocili okuti, ndaño omanu va kala kohongele yaco va litepa kalimi, pole, va litokeka locisola cavo.

[Elitalatu kemẽla 9]

Omanu va tunda kofeka yo Koroasia va kala kohongele yofeka ko Frankfurt, va kuata esanju omo lioku tambula Embimbiliya lio Tradução do Novo Mundo lia sandekiwa velimi liavo