Konomuisa Ovina “Via Longa Via Suku”
“Espiritu [li] kũlãhaisa ovina viosi, ndaño vievi via longa via Suku.” —1 Va KORINDO 2:10.
1. Ovina vipi Viembimbiliya vi nena esanju komanu va fetika ndopo oku li longisa Embimbiliya?
VALUA pokati ketu vekongelo, tu pondola oku ivaluka esanju tua kuata eci tua fetika oku lilongisa Embimbiliya. Tua limbuka esunga lieci onduko ya Yehova yi kuetele esilivilo, kuenda momo lie a ecelela ohali. Tua limbukavo esunga lieci omanu vamue va endela kilu, kuenda elavoko liomanu vosi vakuekolelo. Citava okuti, osimbu handi ka tua lilongisile ocili, tua enda oku tanga Embimbiliya. Pole, lomue wa tu situluila ovina viaco. Cimuamue haico ci kasi oku pita lomanu valua okuti, ovina evi via sitikiwa kokuavo. Tu sokisiwa ndulume iñila kosi yokalunga kuli ovina via posoka. Nda ka walele ovinokolo vioku iñila vovava, ka tẽla oku mõla ovina viaco via posoka. Lekuatiso liovinokolo viaco, o sanjuka calua poku tala oloneleho via posoka, olõsi kuenda ovinyama vikuavo vi sangiwa kosi yokalunga. Cimuamue haico ci pita letu eci tu kuatisiwa Lovisonehua oku sanga elomboloko ‘liovina via longa via Suku.’—1 Va Korindo 2:8-10
2. Momo lie esanju lioku lilongisa Ondaka ya Suku lika kalela otembo ka yi pui?
2 Anga hẽ, tu sanjukila lika ovina vitito tua lilongisa Vembimbiliya? Vondaka “ovina via longa,” mua kongela oku kuata elomboloko liuloño wa Suku wa situluiwa Kakristão lekuatiso liespiritu sandu okuti, wa sitikiwa komanu vakuavo. (1 Va Korindo 2:7) Omo okuti uloño wa Suku ka u sulila, tu sanjukila oku konomuisa ovina viatiamẽla kokuaye! Lalimue eteke tuka kũlĩha ovina viosi viatiamẽla kuloño wa Suku. Esanju tua kuata eci tua fetika oku lilongisa Embimbiliya, li pondola oku amamako nda ka tua liwekelepo oku konomuisa “ovina via longa via Suku.”
3. Momo lie tu sukilila oku kuata elomboloko liovina tu tava?
3 Momo lie tu sukilila oku kuata elomboloko ‘liovina via longa’? Oku kuata elomboloko liovina tu tava, kuenda esunga lieci tu tavela kovina viaco, ci pamisa ekolelo lietu. Ovisonehua vi tu vetiya oku kuatisiwa lolondunge vietu via pindisiwa, oco tu ‘limbuke ndeci ci kasi ocipango ca Suku, okuti ciwa, ca sunguluka, kuenda ca pua eko.’ (Va Roma 12:1, 2) Oku kuata elomboloko lieci Yehova a yongola kokuetu, ci pamisa onjongole yetu yoku pokola kokuaye. Omo liaco, oku kũlĩha “ovina via longa,” ci tu kuatisa oku tamalãla layonjo oku linga eci cĩvi, kuenda ci tu vetiya oku ‘linga eci ciwa.’—Tito 2:14.
4. Nye ca kongela voku lilongisa Embimbiliya?
4 Oco tu kuate elomboloko liovina via longa, tu sukila oku lilongisa. Pole, oku lilongisa kua litepa loku tanga ocipama cimue. Velilongiso, mua kongela oku konomuisa lutate ocipama cimue kuenda oku ci sokisa lovina tua kũlĩha. (2 Timoteo 1:13) Tu sukilavo oku limbuka esunga liovina vi popiwa. Velilongiso Liembimbiliya mua kongela oku sokolola ndomo tu kapako ovina tua lilongisa, oku nõla onjila ya sunguluka, kuenda oku kuatisa vakuetu. Ocili okuti, “Ovisonehua vi kola viosi ovitumasuku, kuenje vi silivila oku longisa.” Omo liaco, velilongiso lietu tu sukila oku kongelamo ‘olondaka viosi vi tunda vomẽla wa Suku.’ (2 Timoteo 3:16, 17; Mateo 4:4) Tu sukila oku likolisilako oku linga elilongiso Liembimbiliya! Ca leluka oku kuata elomboloko ‘liovina via longa via Suku.’ Nda tua ci linga, tu kuata esanju lia piãla.
Yehova o Kuatisa Ambombe Oku Kuata Elomboloko
5. Helie o pondola oku kuata elomboloko ‘liovina via longa via Suku’?
5 Ndaño kua loñolohele kosikola, kuenda ku kuete ocituwa coku lilongisa, kuka sime okuti ku tẽla oku kuata elomboloko ‘liovina via longa via Suku.’ Eci Yesu a kala palo posi kupange waye woku kunda, Yehova ka situluile ocipango Caye komanu vana va loñoloha kovina violuali. Pole, wa eca elomboloko liaco ku vana ka va lilongisile calua kosikola, okuti ambombe haivo va tava oku longisiwa lomanu va Suku. Ovo va tendiwa ndomãla, poku va sokisa la vana va pita kolosikola via velapo. (Mateo 11:25; Ovilinga 4:13) Upostolo Paulu poku popia catiamẽla ‘kovina Suku a pongiyila vana vo sole,’ wa sonehela vamanji hati: “[Ovina viaco] ovio muẽle Suku a tu situluila la mitakati espiritu. Momo espiritu [li] kũlãhaisa ovina viosi, ndaño vievi via longa via Suku.”—1 Va Korindo 2:9, 10.
6. Olondaka vielivulu lia 1 Va Korindo 2:10, vi lomboloka nye?
6 Espiritu lia Suku li konomũisa ndati “ovina viosi, ndaño vievi via longa via Suku”? Yehova ka eci komunu lomunu esituluilo liondaka yocili. Pole, espiritu sandu li songuila ocisoko caye loku eca komanu elomboloko Liembimbiliya. (Ovilinga 20:28; Va Efeso 4:3-6) Vamanji va sangiwa voluali luosi, va siata oku kuama ovipama vimuamue vielilongiso Liembimbiliya. Vokuenda kuanyamo, va siata oku lilongisa ovina vialua Viembimbiliya. Espiritu sandu, lia siata oku kuatisa vamanji oco va kuate elomboloko ‘liovina via longa via Suku.’—Ovilinga 5:32.
Ceci ca Kongeliwa Vovina “Via Longa Via Suku”
7. Momo lie omanu valua ka va kuetele elomboloko ‘liovina via longa via Suku’?
7 Tu sukila oku yuvula ovisimĩlo viokuti, ka ca lelukile oku kuata elomboloko liovina “via longa.” Ndaño okuti omanu valua, ka va kũlĩhĩle “ovina via longa via Suku,” ka ci lekisa okuti, ka ca lelukile oku kuata uloño wa Suku. Pole, Satana eye o kasi oku vetiya omanu oku yuvula olonumbi Yehova a siata oku eca lekuatiso liocisoko Caye.—2 Va Korindo 4:3, 4.
8. Ovina vipi via longa Paulu a tukula kocipama catatu vukanda a sonehela va Efeso?
8 Ukanda watatu Paulu a sonehela va Efeso, u lekisa okuti ‘vovina via longa via Suku,’ mua kongela ovina vialua ndeci: Oku limbuka Ombuto ya likuminyiwa, oku nõliwa kua vana va kuete elavoko lioku enda kilu, kuenda Usoma wa Mesiya. Ovina viaco, omanu va Yehova via va lomboloka ciwa. Paulu wa soneha hati: “Elumbu liaco ka lia situluiwile komãla vomanu vakuavitumbulukila vikuavo, ndeci koloneke vilo lia situluiwa [lespiritu] kovapostolo va kola lo kovaprofeto. Elumbu liaco lieli, omo ondaka yiwa yeya, oco cilo vakualofeka va lingavo vakapiñala vu Kristu Yesu.” Paulu wa popia hati, wa nõliwila oku “situluila omanu vosi ndomo mu kasi elumbu lina lia vundisua tunde nunde vu Suku.”—Va Efeso 3:5-9.
9. Momo lie tu kuetele esumũlũho lioku kuata elomboloko ‘liovina via longa via Suku’?
9 Paulu wa lombololavo hati, ocipango ca Suku ci “situluiwila okuti kaliye ekongelo lia Kristu li lekisa kovosoma lolombiali viovovailu olondunge vi likasi . . . via Suku.” (Va Efeso 3:10) Ovangelo va kuatisiwa poku kuata elomboloko liuloño wa Yehova woku songuila akongelo palo posi. Etu tu kuetevo esumũlũho lioku kuata elomboloko liovina ovangelo va kũlĩha! (1 Petulu 1:10-12) Noke, Paulu wamisako loku popia hati, ‘etu kumue lolosandu, tu sukila oku kũlĩha upati lusõvi lokulepa kuenda okulonga’ kuekolelo lietu. (Va Efeso 3:11, 18) Omo liaco, tu kũlĩhĩsi ovolandu amue ovina via longa ka tua konomuisile handi.
Ovolandu Ovina Via Longa
10, 11. Otembo yipi Yesu a linga onepa yatete ‘yombuto yukãi’ wa Suku wokilu, ndomo ca lekisiwa Vovisonehua?
10 Tua kũlĩha okuti, Yesu eye onepa yatete ‘yombuto yukãi’ wa Suku wokilu, ya tukuiwa kelivulu Liefetikilo 3:15. Oco tu vokiye elomboloko liatiamẽla kondaka yaco, tu sukila oku lipula ndoco: ‘Otembo yipi Yesu a linga Ombuto ya likuminyiwa? Anga hẽ, wa linga ombuto otembo keyile kulo kilu lieve, ale ceci a citiwa palo posi? Wa linga hẽ ombuto noke yoku papatisiwa, ale noke liepinduko liaye?’
11 Suku wa likuminyile okuti, ocisoko caye cokilu ca tukuiwa vocitumasuku cina ci lomboloka ‘ukãi’ waye, oco cika cita ombuto yika sasõla utue wonyoha. Pole, noke lianyamo alua, ukãi wa Suku ka citile ombuto yi pondola oku nyola Satana kuenda upange waye. Noke, ocitumasuku ca Isaya, ca tukula ukãi waco hati, ‘osiũle,’ okuti ka citi, kuenda “utima waye wa teka.” (Isaya 54:1, 5, 6) Ocili okuti, Yesu wa citiwila ko Beteleme. Pole, wa linga lika ombuavekua noke lioku papatisiwa, kuenje wa linga omõla wa Suku wespiritu. Omo liaco, Yehova wa popia hati: “U, Eye Omõlange wa soliwa.” (Mateo 3:17; Yoano 3:3) Kuenje, onepa yatete ‘yombuto’ yukãi, ya situluiwa. Noke, olondonge via Yesu, via nõliwavo, kuenda via wavekiwa lespiritu sandu. Omo liaco, “ukãi” wa Yehova, una wa pita otembo yalua ‘ndukãi osiũle okuti ka citile,’ weya oku kuata ‘esanju lialua.’—Isaya 54:1; Va Galatia 3:29.
12, 13. Ovinimbu vipi viovisonehua vi lekisa okuti Akristão olombuavekua va kasi palo posi, vatiamẽla kocisoko ‘cukuenje wa kolelua haeye wa lunguka’?
12 Ulandu wavali wovina via longa wa situluiwa kokuetu, watiamẽla kocipango ca Suku coku nõla pokati komanu ci soka 144.000 kolombuavekua. (Esituluilo 14:1, 4) Etu, tu tava kelongiso liokuti, olombuavekua viosi vi kasi handi palo posi, viatiamẽla kocisoko ‘cukuenje wakolelua haeye wa lunguka.’ Ukuenje waco, eye Yesu a tuma oku eca “okulia” ku vakuanjo yaye. (Mateo 24:45) Ovinimbu vipi Viembimbiliya vi lekisa okuti, ulandu wa tukuiwa ndeti wocili? Anga hẽ, Yesu wa tukula Akristão vamue okuti va pamisa vamanjaye lokulia kuespiritu?
13 Suku wa sapuila epata lia va Isareli hati: “Vulombangi viange, vukuenje wange. Nda ku nõla.” (Isaya 43:10) Pole, keteke 11 kosãi ya Nisana, kunyamo wa 33, Yesu wa sapuila asongui a va Isareli hati, Suku ka tava vali epata liavo oku kala omanu vaye, poku popia hati: “Usoma wa Suku upiwa kokuene kuenje weciwa kofeka yima apako.” Yesu wa sapuilavo omanu hati: “Tali, onjo yene yo siali upolokoso.” (Mateo 21:43; 23:38) Ndaño okuti va Isareli va kala omanu va Yehova, pole, ka va kalele vali vakuekolelo kuenda ka va lungukile. (Isaya 29:13, 14) Noke lioloneke vimue, Yesu wa pula hati: “Helie ukuenje wa kolelua haeye wa lunguka?” Eye wa yonguile oku pula hati: ‘Epata lipi lia koleliwa lika piñala va Isareli, oco li linge ukuenje wakolelua wa Suku?’ Upostolo Petulu wa eca etambululo eci a sapuila ekongelo Liakristão olombuavekua hati: “Ene . . . ‘vufeka yi kola, vucikumba ca Suku.’ ” (1 Petulu 1:4; 2:9) Ofeka yaco yespiritu, yi lomboloka ‘Isareli ya Suku,’ una weya oku linga ukuenje wa Yehova. (Va Galatia 6:16) Ocili okuti, epata liosi lia va Isareli lia kala ‘akuenje,’ ale omanu va Yehova. Cimuamue haco catiamẽla Kakristão vosi olombuavekua va kasi palo posi okuti, vatiamẽla kocisoko ‘cukuenje wa kolelua haeye wa lunguka.’ Omo liaco, tu kuete esumũlũho lioku tambula “okulia” kueciwa lukuenje wa Suku!
Elilongiso Lio Pokolika li Nena Esanju
14. Momo lie oku lilongisa Embimbiliya okuti ka tu sulila lika voku tanga ovipama vimue, ci nenela esanju?
14 Eci tu kuata elomboloko liokaliye Liovisonehua, tu sanjuka calua, momo li pamisa ekolelo lietu. Omo liaco, oku lilongisa Embimbiliya okuti ka tu sulila lika voku tanga ovipama vimue, ci nena esanju. Poku tanga alivulu a sandekiwa lukuenje wa lunguka, o sukila oku sokolola ovina o tanga, loku li pula ndoco: ‘Elomboloko liovinimbu evi ndi li sokisa ndati leli ndi kuete liatiamẽla kondaka eyi? Ovinimbu vipi Viovisonehua viecelela oku kuata elomboloko liocipama ndi kasi oku tanga?’ Nda o yongola oku konomuisa ovina vikuavo, soneha epulilo o yongola oku sanga etambululo. Noke, etosi liaco olio o konomuisa velilongiso likuavo.
15. Ovina vipi vi nena esanju o pondola oku lilongisa, kuenda asumũlũho api a tunda kelilongiso liaco?
15 Velilongiso liove, ovina vipi viokaliye o kasi oku konomuisa okuti vi ku nenela esanju? Tu pondola oku vokiya elomboloko lietu poku lilongisa ovisila vialua Suku a linga oco a kuatise omanu. O pondola oku pamisa ekolelo liove poku lilongisa ovitumasuku viatiamẽla ku Yesu Kristu, ale alivulu Embimbiliya a situlula ovitumasuku vikuavo. Tu pondolavo oku pamisa ekolelo lietu poku konomuisa ovolandu Olombangi Via Yehova, poku tanga elivulu losapi hati: Testemunhas de Jeová—Proclamadores do Reino de Deus, nda lia pongoluiwa kelimi liove.a Handi vali, oku konomuisa “Apulilo Valingiwa Lavakuakutanga,” a sandekiwa Vutala Wondavululi, cecelelavo oku kuata elomboloko liovinimbu o yongola oku konomuisa. Kũlĩhĩsa lutate ocinimbu Covisonehua oco ci ku kuatise oku kuata elomboloko liocipama o kasi oku lilongisa. Nda wa ci linga, ci ku kuatisa oku pindisa “olondunge” viove, oco o kuate elomboloko liovina o konomuisa. (Va Heveru 5:14) Osimbu amamako lelilongiso liove, soneha atosi amue Vembimbiliya liove, ale vopapelo yimue, oco aku kuatise ove muẽle kuenda vana o longisa. Nda wa ci linga, oka kuata asumũlũho ka a pui.
Kuatisi Amalẽhe Oku Sanjukila Elilongiso Liembimbiliya
16. Ene ulonjali, u kuatisa ndati amãlehe oku sanjukila elilongiso Liembimbiliya?
16 Olonjali vi sukila oku vetiya omãla vavo oco va kuate onjongole yoku lilongisa ovina viespiritu. Ene ulonjali, ka uka simi okuti, omãla ka va pondola oku kuata elomboloko liovina via longa. Nda wa tuma omãla oku konomuisa etosi uka kũlĩhĩsa velilongiso liepata, o sukila oku va pula ovina va lilongisa vonepa yaco. Velilongiso liepata, u pondola oku kongelamo olonepa vina vi kuatisa amalẽhe oku lilongisa ndomo va pondola oku teyuila ekolelo liavo. Lekisivo kokuavo okuti, ovina va siata oku lilongisa viocili. Citava okuti u lilongisa lavo okalivulu losapi hati: “Veja a Boa Terra,” b oco u va longise olofeka vimue via tukuiwa Vembimbiliya kuenda oku va lomboluila ovina wa tangi Vembimbiliya vokuenda kuosemana.
17. Momo lie tu sukilila oku lavulula poku linga elilongiso Liembimbiliya pokolika?
17 Elilongiso Liembimbiliya pokolika li kuete esilivilo kuenda li pamisa ekolelo. Pole, kuka ecelele okuti, ku kuata vali otembo yoku pongiya ovipama violohongele. Momo oyo onjila Yehova a siata oku kuama oco a tu longise lekuatiso ‘liukuenje wa kolelua haeye wa lunguka.’ Pole, oku konomuisa ovipama vikuavo, ci ku kuatisa oku eca atambululo kolohongele ndeci: Kelilongiso Lielivulu kuenda atosi a velapo Embimbiliya a tangiwa Vosikola Yuviali Wakristão.
18. Momo lie elikolisilo lioku lilongisa “ovina via longa via Suku” li kuetele esilivilo?
18 Oku lilongisa Ondaka ya Suku pokolika, ku kuatisa oku amamako lukamba wove la Yehova. Catiamẽla kesilivilo lielilongiso, Embimbiliya li popia hati: “Ombindikiyo yolondunge ya soka lombindikiyo yolombongo. Okuvelapo kuolondunge kuoku: vi popela omuenyo wu o kasi lavio.” (Ukundi 7:12) Elikolisilo liove lioku kuata elomboloko liovina viespiritu li kuete esilivilo. Embimbiliya li likuminya komanu vana vamamako oku konomuisa ovina viespiritu poku popia hati: “[Oka] sanga ukũlĩhiso wa Suku.”—Olosapo 2:4, 5.
[Atosi pombuelo yamẽla]
a Lia sandekiwa Lolombangi Via Yehova.
b Ka sandekiwa Lolombangi Via Yehova.
O Tambulula Ndati?
• Vipi “ovina via longa via Suku”?
• Momo lie elilongiso lietu liovina via longa lalimue eteke lika sulila?
• Momo lie ci nenela esanju oku kuata elomboloko ‘liovina via longa via Suku’?
• O pondola ndati oku kuatisiwa ‘lovina via longa via Suku’?
[Elitalatu kemẽla 28]
Otembo yipi Yesu a linga Ombuto ya likuminyiwa?
[Elitalatu kemẽla 31]
Olonjali, vi sukila oku eca komãla ocikele coku konomuisa etosi limue poku pongiya elilongiso liepata