Vakuakutanga va Pula
Momo Lie Tu Tukuila Onduko Ya Suku Nda Ka Tua Kũlĩhĩle Ndomo Ya Enda Oku Tukuiwa?
Koloneke vilo, lomue wa kũlĩha ciwa ndomo kelimi lio Heveru va enda oku tukula onduko ya Suku. Pole eci Embimbiliya lia sonehiwa, onduko ya Suku ya sangiwilemo eci ci soka 7.000 kolonjanja. Eci Yesu a kala palo posi, wa situlula onduko ya Suku kuenda wa longisa olondonge viaye oku likutilila oco va sivaye onduko yaco. (Mateo 6:9; Yoano 17:6) Ocili okuti oku tukula onduko ya Suku ci kuete esilivilo lialua ka Kristão vocili. Momo lie koloneke vilo ka tua kũlĩhĩlile ciwa ndomo va enda oku tukula onduko yaco kosimbu? Kuli ovina vivali via velapo tu sukila oku konomuisa.
Catete, vokuenda kueci ci soka olohulukãi vivali kanyamo konyima, va Yudea omo liusumba kuenda ovihilahila viavo, va liwekapo oku tukula onduko ya Suku. Eci omunu umue a tanga Embimbiliya pamue o sanga okuti ovinimbu vimue apa pa sesamẽla onduko ya Suku va piñainyapo hati, “Ñala.” Eli olio esunga lieci vokuenda kuanyamo alua omanu va liwekelapo oku tukula onduko ya Suku.
Cavali, ovisonehua via va Heveru kosimbu ka via kuatele olovongale ndeci alimi akuavo. Omo liaco, poku tanga ocinimbu cimue, ca sukilile okuti omunu o tanga, eye o tukula olovongale via kambako. Pole, vokuenda kuotembo omanu va siapo onjila yoku tokekisa olondaka ndomo va Heveru va lingaile kosimbu. Noke Vembimbiliya kelimi lio Heveru, va vokiyamo olovongale. Ci kale konduko ya Suku kuenda kondaka “Ñala,” kua vokiyiwa olovongale oco va ivaluise vakuakutanga ndomo oyo yi tukuiwa.
Olokosoande vikuãla ale o Tetragrama toke cilo vi kasi oku kuamiwa ndomo ca lekisiwa vondisionaliu yimue poku lombolola hati, “ololetala evi vikuãla, okuti YHWH ale JHVH, kelimi lia va Heveru, ovio va enda oku tukula lavio onduko ya Suku lonjila ya sunguluka.” Ndomo tua ci mola, nda tu vokiya olovongale pokati kolokosoande, JHVH ci leluka oku vi tanga okuti “Jehovah,” pole kelimi Liumbundu onduko yaco yi tukuiwa hati Yehova.
Olonoño vimue via siata oku tukula onduko yaco hati Yave. Anga hẽ eci ci likuata ndomo onduko yaco ya enda oku tukuiwa kosimbu? Lomue wa ci kũlĩha. Pole olonoño vikuavo via siata oku popia hati ka citava oku tukula onduko yaco. Ocili okuti olonduko vimue vi sangiwa Vembimbiliya koloneke vilo, pamue ka via siatele oku tukuiwa ndomo va Heveru kosimbu va enda oku vi tukula, pole lomue o ci patãla. Eli olio esunga lieci elimi lelimi li tukuila onduko yimuamue lolonjila via litepa. Cimuamue haico ci pitavo londuko ya Yehova.
Akristão vatete, va enda oku tukuiwa londuko ya Suku. Ovo va enda oku kundila omanu eci catiamẽla konduko yaco loku va vetiya oku ci lingavo. (Ovilinga 2:21; 15:14; Va Roma 10:13-15) Omo liaco, ci kuete esilivilo oku tukula onduko ya Suku kelimi lietu loku kũlĩha elomboloko liayo kuenda oku kapako olonumbi via Suku vomuenyo wetu.
[Elitalatu kemẽla 32]
Vembimbiliya, onduko ya Suku yi sangiwamo eci ci soka 7.000 kolonjanja