Nye Ci Pita Lomanu Va Fa?
“Ovilelembia viosi ka vi fi, ndaño muẽle violondingaĩvi. Vi kasi oku kangisiwa vondalu ka yimi kuenda ekangiso liaco ka li sulila.”—Clemente wo ko Alexandria, usonehi wo kocita cavali lo kocita catatu.
NDECI Clemente a lombolola, wosi o longisa okuti ifelu viondalu ocitumãlo cimue coku talisa omanu ohali, o kasi oku lekisa okuti omanu va kuete ocilelembia ka ci fi. Anga hẽ Embimbiliya li tava kelongiso liaco? Kũlĩhĩsa eci Ondaka ya Suku yi popia poku tambulula apulilo akuãimo.
Anga hẽ ulume watete Adama wa kuatele ocilelembia ka ci fi? Embimbiliya limue lio Protestante, li tukuiwa hati, Versão Rei Jaime, poku tukula catiamẽla koku lulikiwa kua Adama, li popia ndoco: “ÑALA Suku wa lulika omunu leve lio posi yu wo fuimĩla ofela yomuenyo kuenje omunu wa kuata omuenyo.” (Efetikilo 2:7) Ivaluka okuti ocinimbu eci, ka ci lekisa okuti Adama wa tambula ocilelembia ka ci fi.
Nye ca pita la Adama noke yoku linga ekandu? Suku ko kangisile vifelu viondalu otembo ka yi pui. Embimbiliya li popia hati: “O lialia okulia kuove lesalamĩho liokopolo yove, toke eteke o tiukila vali keve; momo haiko wa tundile. Ove ukueve, keve haiko o tiukila.” (Efetikilo 3:19) Olondaka via Suku ka vi lekisa okuti Adama o kuete ocilelembia ci kasi oku amamako lomuenyo noke yoku fa kuaye. Momo eci Adama a fa, omuenyo waye wa imũha.
Anga hẽ omanu va kuete ocilelembia ka ci fi? Suku wa sapuila uprofeto Esekiele hati: “U o linga ekandu eye o fa.” (Esekiele 18:4) Upostolo Paulu wa soneha hati: “Ekandu lia iñila voluali lomunu umuamue, kuenda okufa kueya lekandu, haico okufa kua sambukila omanu vosi, momo vosi va linga ekandu.” (Va Roma 5:12) Nda okuti omanu vosi va linga ekandu, ci kuete esunga lioku popia hati, ovimuenyo viosi vi fa.
Anga hẽ omunu wa fa wa kũlĩha cimue ale o yeva evalo? Ondaka ya Suku yi popia hati: “Ava va kasi lomuenyo va kũliha okuti va laika oku fa, puãi ava va fa lacimue va kũliha.” (Ukundi 9:5) Embimbiliya poku lombolola ekalo liomunu wa fa, li popia ndoco: “O tiukila posi yaye. Eteke liaco hailio olongombo viaye vi nyõleha.” (Osamo 146:4) Nda okuti omanu va fa “lacimue va kũliha” kuenda ‘olongombo viavo vi nyõleha,’ va kangisiwa ndati vifelu viondalu?
Yesu ka popele hati ava va fa va yeva evalo, pole wa sokisa oku fa lotulo. (Yoano 11:11-14) Vamue va siata oku popia hati Yesu wa longisa okuti ifelu vi tokota kuenda olondingakandu vika imbiwa vifelu viondalu. Omo liaco tu konomuisi eci eye a popia.