Tu Vumbi Suku ‘Lutima Wetu Wosi’

VA YUDEA kuenda vakualofeka va likongelele lolondonge via Yesu Kristu. Omanu va kala ko Yerusalãi Kocipito co Pendekoste, va tundile konano yo Roma, kuenda kombuelo yo Partia. Vosi yavo va vanguile alimi a litepa. Pole, valua pokati kolondonge via Yesu va kala oku sapela lavo, va tundile ko Galilea. Vamue pokati kakombe vaco, va pula ndoco: “Tu yeva ndati, omunu omunu elimi liaye a citiwa lalio?”​—⁠Ovil. 2:⁠8.

Eci upostolo Petulu a votoka, wa lombolola ndomo ocikomo ca va kuatisa oku eca uvangi. Omo liaco, omanu va tava kesapulo liaco. Kuenje, valua va papatisiwa! (Ovil. 2:​41) Noke etendelo liomanu vekongelo lia livokiya, kuenda vosi yavo va likuatele omunga. Luka usonehi Wembimbiliya, wa popia hati: “Vosi va tava va kala lutima umuamue lomuenyo umuamue.”​—⁠Ovil. 4:⁠32.

Omanu vana va papatisiwa ko Pendekoste yunyamo wa 33, va yonguile oku kala vo Yerusalãi vokuenda kuotembo yimue oco va vokiye ukũlĩhĩso wovina viokaliye va lilongisa. Pole, ka va kuatele epondolo lioku kalako otembo yalua. Momo va sukilile oku kongola olombongo. Vamue pokati kavo va landisa ovina viavo kuenje olombongo viaco va vi nena kovapostolo oco vi eciwe kolosuke. (Ovil. 2:​42-​47) Ovo va lekisa ocituwa ciwa coku eca ekuatiso!

Akristão vocili va siata oku lekisa ocituwa caco. Koloneke vilo, tu kasi oku amamako oku vumba Yehova ‘lutima wetu wosi.’ Vamue pokati ketu, va siata oku pesela otembo yavo, longusu yavo, kuenda olombongo, oco va kuatise koku kunda olondaka viwa, Viusoma wa Suku.​—⁠Tanga pokakasia losapi hati: “Ceci Utima Wetu u tu Vetiya Oku Eca Ovina tu Kuete.”

[Okakasia Lelitalatu kemẽla 6, 7]

CECI UTIMA WETU U TU VETIYA OKU ECA OVINA TU KUETE

Valua pokati Kolombangi Via Yehova olohukũi, vakuavo va siata oku liyaka lovitangi vioku sanga olombongo. Omo liaco, poku eca olombanjaile vioku kuatisa kupange woku kunda Usoma, tu sukila oku yuvula ocisimĩlo cokuti, olombanjaile vietu ka vi kuete esilivilo. Eci Yesu a mõla ukãi ocimbumba haeye ohukũi wa kapa ombanjaile yaye vokasia yonembele, ko pembuile. Pole, wa popia hati: “Ndu sapuili siti, Ocili ocimbumba eci, haico osuke, ca imbamo ca lua, vosi vakuavo ci sule. Momo ava vosi kukuasi wavo wa lua, vopako ño eci va lumba, eye puãi kusuke waye, wa imbamo cosi a kala laco, haico eteku liaye.” (Luka 21:​1-4) Ndaño wa eca ombanjaile yitito, pole wa eca ovina a kuatele.

Vamanji vosi va sukila oku linga esokiyo lioku eca olombanjaile vekongelo. Eci Akristão vo ko Yudea va sukilile ekuatiso, vamanji ko Korindo va yonguile oku eca ekuatiso, va tambula onumbi yiwa kupostolo Paulu. Eye wa soneha hati: “Kondaka yovilumba vioku kuatisa olosandu, ene lingi ndeci nda lombolola ale kakongelo o ko Galatia. Eteke liatete [kosemana] ene vosi, omunu omunu a [seleke] cimue ndomo a sumũlũha, okuti eci njiya ka va vetiya vali oku kongola.”​—⁠1 Va Kor. 16:​1, 2.

Ocili okuti, omanu va siata oku seleka olombongo vioku tetulula ovitangi viavo. Cimuamue haico Olombangi Via Yehova via siata oku linga okuti, vi seleka olombongo vioku kuatisa kefendelo liocili. Omo liaco, vamanji voluali luosi va siata oku eca olombanjaile oco vi kuatise koku kunda Usoma. Va ci linga poku sokiya olombongo omunu lomunu a yongola oku eca olosãi viosi. Omanu vamue va siatavo oku eca olombanjaile vioku kuatisa kupange woku kunda. Omo liaco, va siata oku kuata esanju lialua poku limbuka okuti, va kasi oku eca eci va kuete.

Vamanji ko Filiale va siata oku tuma kakongelo ovikanda violopandu, noke yoku tambula olombanjaile via vamanji.

Ovo, va sanjuka calua poku tambula olombanjaile via siata oku eciwa la vosi, oco vi kuatise kupange woku kunda olondaka viwa viusoma wa Suku. Olombanjaile viaco via siata oku kuatisa olomisionaliu vi kasi kolofeka vialua. Via siatavo oku kuatisa koku landa olomakina vioku panga alivulu oco a tumiwe kakongelo. Olombanjaile viaco via siatavo oku kuatisa vamanji va nyula akongelo vimbo kuenda vofeka, oco va kuatise vamanji oku pama kespiritu. (Va Rom. 1:​11, 12) Vamanji va litumbika kupange wakundi votembo yosi, va siatavo oku kuatisiwa lolombanjaile viaco.

Vamanji va fetika tete oku eca olombanjaile viavo oco vi kuatise koku amamako lefendelo liocili, va tambula asumũlũho alua omo lioku sivaya Yehova lovina va kuete. Hesanjukuolio va kuata! Cimuamue haico ci pondola oku pita letu okuti, nda tua kuatisa kupange woku kunda u kasi oku lingiwa voluali luosi, tuka tambula asumũlũho alua. Omo liaco, tu amamiko oku lekisa onjongole yoku eca eci tu kuete.

Omanu kuenda akongelo va yongola oku eca olombanjaile, va pondola oku vi tuma ko Associação das Testemunhas de Jeová, Rua de Talatona n.°1​—⁠Luanda Sul, Caixa Postal 6877 Luanda—Angola