Olonambi Viakristão Vi Lingiwa Lesumbilo Kuenda vi Eca Esivayo ku Suku

OVINA vipi via siata oku lingiwa polonambi? Tua siata oku mola omanu va lila, okuti va wala olutu kuenda va nyoñamela posi omo liesumuo. Vamue va sika oloñoma, kuenda vakuavo va piluka. Tua siatavo oku mola vamue valia, vakuavo va sanjuka, kuenda vamue va pekela posi omo liuholua. Ovina via tukuiwa ndeti, via siata oku lingiwa kolofeka vimue okuti, poku kenda, va linga ovihilahila vioku liusika lomunu wa fa.

Olombangi Via Yehova vi kasi vovaimbo amue okuti, epata liavo kuenda omanu vakuavo va tava koviholo vioku kuatela usumba vana va fa. Valua va tava kociholo cokuti, nda umue wa fa, o li pongolola vomunu umue ukuepata wa fa osimbu, oco a kuatise vana va kasi komuenyo ale oku va linga cimue cĩvi. Oviholo viaco, vi tiamisiwilavo kovihilahila via siata oku lingiwa poku kenda umue wa fa. Pole, ca sunguluka oku lekisa esumuo omo liomunu wa fa. Olonjanja vimue, Yesu kumue lovapostolo vaye, va enda oku sumua omo liolofa viakamba vavo. (Yoa. 11:33-35, 38; Ovil. 8:2; 9:39) Pole, ka va lekisile esumuo ndeli lia siata koloneke vilo polonambi. (Luka 23:27, 28; 1 Va Tes. 4:13) Momo lie? Momo va kũlĩhĩle ekalo liava va fa.

Embimbiliya li popia hati: “Ava va kasi lomuenyo va kũlĩha okuti va laika oku fa, puãi ava va fa lacimue va kũlĩha ... Ocisola cavo lesuvu liavo lonya yavo cosi ca imũha. ... Vonjembo [okuti vayambo omanu va kendiwa,] ka muli upange, ndaño ovikuata, ndaño ukũlĩhĩso, ndaño olondunge.” (Uku. 9:5, 6, 10) Ovinimbu evi Viembimbiliya, vi lekisa okuti, omunu wa fa, ka tẽla oku linga upange. Eye, ka pondola oku sokolola, oku sapela, ale oku kuata elomboloko liovina. Oku kuata elomboloko liolondaka evi, ci kuatisa ndati Akristão oku kuama onjila ya sunguluka poku kenda umue wa fa?

‘Ko ka Lambi Kovina Via Vĩha’

Ndaño Olombangi Via Yehova vi tunda kapata alitepa, pole, via siata oku yuvula ocisimĩlo cokuti, ava va fa va kuete ocilelembia ka ci fi okuti ci pondola oku tu linga cimue cĩvi. Kuli ovituwa vimue ndeci: Oku pita uteke wosi loku lava ocivimbi, oku sika ovisikilo loku piluka, kuenda okulia loku nyua noke yoku kenda. Mua kongelavo oku linga ocipito coku lula olutu, oku eca ovilumba kuava va fa, kuenda oviholo vikuavo via siata oku lingiwa kocikuluwiya. Ovina viaco via vĩha, kuenda ka vi eci esivayo ku Suku. Momo, ka vi sangiwa Vembimbiliya, kuenda, viatiamẽla kelongiso liolondele liokuti, omunu o kuete ocilelembia ka ci fi. (Esek. 18:4) Akristão vocili va nõlapo ‘okulia komesa ya Yehova, kuenda oku yuvula omesa yolondele, oco ka vaka litenge voviholo viaco.’ (1 Va Kor. 10:21) Va pokola konumbi yi popia hati: “Litepi lavo. ... Leci ca vĩha ko ka ci lambi.” (2 Va Kor. 6:17) Olonjanja vimue, ka ca lelukile oku yuvula ovina viaco.

Vocifuka co Afrika, kuenda kolofeka vikuavo, kuli oviholo viokuti, nda ka va lingile ovihilahila vimue, ci sumuisa omunu wa fa osimbu, kuenda ci lekisa ekambo liesumbilo. Kuenje, ci nena ovitangi vimbo. Omo okuti Olombangi Via Yehova ka vi tava oku linga oviholo viaco poku kenda umue, via siata oku popiwa lãvi lomanu vimbo liavo, kuenda epata. Vamue va siata oku lundiliwa hati, ka va sole oku kuata ukamba la vakuavo, kuenda ka va lekisa esumbilo kuava va fa. Omo liaco, vana ka va lilongisa Embimbiliya, va siata oku li kapa pomangu yoku songuila ovina vi lingiwa poku kenda umue Ukristão. Pole, tu pondola ndati oku yuvula olonamãlala via vana va kuete ovituwa ka vi sanjuisa Suku, via siata oku lingiwa polonambi? Nye tu sukila oku linga oco tu yuvule ovituwa vĩvi vina vi nyõla ukamba wetu la Yehova?

Lekisa Utõi Konjila wa Nõlapo

Kolonepa vimue violuali, kuli ocituwa cokuti, akulu vendamba kuenda epata, va sokiya ovina vi lingiwa ponambi. Omo liaco, Ukristão wocili, o sukila oku lekisa okuti, onambi yendisiwa Lolombangi Via Yehova, loku pokola kolonumbi Viembimbiliya. (2 Va Kor. 6:14-16) Kolonambi, tu sukila oku yuvula ovina vi kokela ocilondokua vamanji, ale vana va kũlĩha ovina tua siata oku longisa viatiamẽla kuava va fa.

Nda manji umue wa nõliwa oco a endise onambi, akulu vekongelo va sukila oku u kuatisa oco a kuame olonumbi Viembimbiliya viatiamẽla kolonambi. Nda umue ka lilongisa Embimbiliya o yongola oku tu kisika oku kuama oviholo vimue, tu sukila oku kuata utõi woku u lomboluila ekalo lietu. Pole, tu sukila oku ci linga lesumbilo. (1 Pet. 3:15) Nye tu sukila oku linga nda umue ukuepata ka lilongisa Embimbiliya o tu kisika oku kuama oviholo poku kenda? Tu sukila oku yuvula oku enda koku kenda omunu waco. (1 Va Kor. 10:20) Pole, citava okuti, ku lingiwa ohundo Vonjango Yusoma, ale pocitumãlo cikuavo, oco vana va sumua omo lioku fisa ngandiavo, va ‘pamisiwe Lovisonehua.’ (Va Rom. 15:4) Ndaño etimba liomunu wa fa ka li kasipo, citava okuti, ku lingiwa ohundo. (Esin. 34:5, 6, 8) Olonamalãla via vakuepata ka va lilongisa Embimbiliya, vi pondola oku vokiya esumuo. Pole, tu sanjuka calua poku limbuka okuti, Suku wa kũlĩha onjila ya sunguluka tua nõla, kuenda o tu ĩha “unene wa piãla.”—2 Va Kor. 4:7.

Soneha Olonumbi vi Kuamiwa Ponambi

Nda umue wa soneha olonumbi a yongola okuti vi kuamiwa keteke lioku u kenda, ci leluka oku sapela la vakuepata liaye ka va lilongisa Embimbiliya, oco va sumbile onjongole yaye. Oku soneha ovina viosi tu yongola okuti vi kuamiwa ponambi, kuenda oku nõla manji umue o yi songuila, ci kuete esilivilo. (Efet. 50:5) Tu sukila oku soneha onduko yetu kukanda, kuenda onduko ya manji umue eca uvangi wovina tua soneha. Vana va pokola kolonumbi Viembimbiliya, va siata oku soneha selo ovina viaco, pole, ka va kevelela toke eci va kuka, ale ceci va kuatiwa luvei umue.—Olosap. 22:3; Uku. 9:12.

Ku vamue, ka ca lelukilile oku soneha olonumbi viaco. Pole, nda tua ci linga ci lekisa okuti, Tuakristão vamue va loñoloha kespiritu, kuenda tua kapako vakuetu. (Va Fil. 2:4) Nda tua soneha ovina viaco, ci tepulula ovitangi vepata, momo pamue li kisikiwa oku tava koviholo vina okuti, eci tua kala komuenyo ka tua tavele oku vi kuama.

Lekisa Esunguluko Ponambi

Kolofeka vimue vocifuka co Afrika, va kuete oviholo vi komohĩsa omanu ponambi, oco va sanjuise vana va fa osimbu. Vakuavo, va kuete ocituwa coku ‘litunula,’ oco va lekise ovokuasi vavo kuenda ekemãlo. (1 Yoa. 2:16) Polonambi, vamue va siata oku pesela otembo yalua, kuenda ovina va kuete, loku sima okuti, ‘ca sunguluka’ oku ci linga. Vamue va siata oku kapa alitalatu omunu wa fa povitumãlo vialua, oco va vetiye omanu oku enda koku kenda. Vakuavo, va siata oku kapa volomisola elitalatu liomunu wa fa, kuenda oku vi eca komanu oco vi lembeleke vana va sumua. Va siatavo oku landa ovikasia viatĩla oco va komohise vakuavo. Kolofeka vimue vo Afrika, va siata oku panga olokasiãu vimue via sietahãla akalu, olombalãu, awato, kuenda ovina vikuavo vi lekisa ekemãlo lukuasi. Noke, ocivimbi va cupa vokasiãu, kuenje va ci kapa pula umue wa posoka, oco va ci lekise komanu. Nda ukãi wa fisa ulume waye, vo walisa esanya liuvala lia posuisiwa lolomota. Anga hẽ, afendeli va Suku, va sukila oku panga onepa kovihilahila viaco?

Akristão va loñoloha kespiritu, va sukila oku yuvula oku yapuisiwa lomanu ka va pokola kolonumbi via Yehova.Tua kũlĩha okuti, ovihilahila ‘ka vi tundi ku Suku. Pole, vi tunda koluali lu panda kesulilo.’ (1 Yoa. 2:15-17) Tu sukila oku lavulula oco ka tuka wile vonjanjo yoku livelisapo okuti, vakuetu ci sule. (Va Gal. 5:26) Ovolandu a lekisa okuti, oku tava koviholo vioku kuatela usumba ava va fa, kua siata oku vetiya omanu oku linga ovina vialua ponambi. Kuenje, ka ci leluka oku songuila onambi yaco. Oku fendela ava va fa, kua siata oku vetiya vana ka va Lilongisa Embimbiliya oku linga ovina via vĩha. Kuenje, poku kenda, ka va likandangiya poku lila, va lamba ocivimbi loku seteka oku sapela laco ndeci va vangula lomunu o kasi lomuenyo, va kapa olombongo vocikasia caco, kuenda ovina vikuavo. Nda tua linga ovina viaco poku kenda manji umue, ci vĩhisa onduko ya Yehova kuenda afendeli vaye.—1 Pet. 1:14-16.

Oku kũlĩha ekalo liava va fa, ci tu kuatisa oku yuvula ovituwa violuali poku kenda umue. (Va Efe. 4:17-19) Ndaño Yesu wa kala ulume umue wavelapo voluali, pole, wa kendiwa lonjila yimue ya sunguluka. (Yoa. 19:40-42) Vana va kuete ‘ovisimĩlo ndevi via Kristu,’ va sukila oku lekisa esunguluko poku kenda umue. (1 Va Kor. 2:16) Omo liaco, oku lekisa esunguluko poku kenda manji umue, ci tu kuatisa oku yuvula ovina vi pisiwa Lovisonehua okuti ka ku kala ombuanja. Nda tua ci linga, ci sanjuisa vana va sole Suku.

Anga hẽ o Sukila Oku Lekisa Esanju?

Kuli ovituwa vimue okuti, noke lioku kenda, vakuepata kuenda omanu vakuavo veya ponambi, va sika oñoma, valia kuenda va piluka. Polonambi viaco, valua va siata oku kolua, loku linga ovina ka via sungulukile. Omanu vamue va siata oku sima okuti, oku linga ovina viaco, ci sanjuisa vana va fisa ngandiavo. Vakuavo va siata oku sima okuti, ovihilahila viaco, vi panga onepa kepata liavo. Pole, vamue va sima okuti, va ci lingila oku sanjuisa omunu wa fa, oco ocilelembia caye ci lisange la vana va fa osimbu.

Akristão vocili va pokola Kovisonehua vi popia hati: “Okulila kua velapo, oku yola ku sule. Momo oku nyumãla kuocipala ku koka oku sanjuka kutima.” (Uku. 7:3) Ovo, va kuatisiwa poku ivaluka okuti, ndaño tu kuete omuenyo umbumbulu, pole, tu kuete elavoko liepinduko. Vana va kuete ukamba la Yehova, va kũlĩha okuti, “eteke liokufa lia velapo, eteke lioku citiwa.” (Uku. 7:1) Omo okuti kolonambi vimue va siata oku linga oviholo mua kongela umbanda lovina via vĩha, Akristão vocili va sukila oku yuvula oku panga onepa kovipito viaco. Oku kala pocipito coku sanjuisa vana va fa, ci sumuisa Yehova kuenda afendeli vaye.

Lekisa Ekalo Lialitepa

Ndaño vana va kasi vupeke wespiritu va kuetele usumba omanu va fa, pole, tua sanjuka calua omo lioku yovuiwa kovina viaco! (Yoa. 8:32) Omo okuti ‘tumãla vocinyi,’ kuenda tu kuete elomboloko liovina viespiritu, tu sukila oku lekisa esumuo lonjila yimue ya litepa, momo tu kuete elavoko liepinduko. (Va Efe. 5:8; Yoa. 5:28, 29) Kuenje, tu yuvula oku lekisa esumuo ndeli lia vana “ka va kuete elavoko.” (1 Va Tes. 4:13) Nda tua ci linga, ci tu kuatisa oku teyuila efendelo liocili, kuenda oku yuvula oku lueya olonumbi via Yehova omo lioku kuatela usumba omanu.—1 Pet. 3:13, 14.

Epokolo lietu Kovisonehua, lika kuatisa omanu oku limbuka ‘ava va vumba Suku kuenda vana ka vovumbi.’ (Mal. 3:18) Momo, tu lavoka otembo okuti, lomue oka fa vali. (Esit. 21:4) Osimbu tu lavoka oku tẽlisiwa kuohuminyo yaco, tu yuvuli atime kuenda oku litenga loluali lua vĩha, oco Yehova a tu sange okuti, tua liyelisa kovina viaco.—2 Pet. 3:⁠14.

[Elitalatu kemẽla 30]

Oku soneha ovina viosi tu yongola okuti ovio vi lingiwa ponambi, ci kuete esilivilo

[Elitalatu kemẽla 31]

Olonambi Viakristão te vi lingiwa lesumbilo loku eca esivayo ku Suku