Olonambi Violombangi Via Yehova Via Siata Oku Lingiwa Ndati?
Onjila ndomo tu tenda kuenda oku linga olonumbi via kunamela Vembimbiliya. Catiamẽla kondaka yaco olio li popia ndoco:
Kacĩviko oku sumua eci omunu umue a fa. Ndeci, olondonge via Yesu, via lila kuenda via yeva esumuo lialua poku mola omanu va fa. (Yoano 11:33-35, 38; Ovilinga 8:2; 9:39) Omo liaco, ka tu tendi onambi ndepuluvi limue liesanju. (Ukundi 3:1, 4; 7:1-4) Pole, tu tenda epuluvi liaco okuti lioku lekisa ocikembe, locisola poku lembeleka vakuetu.—Va Roma 12:15.
Omanu vana va fa lacimue va kũlĩha vali. Ndaño okuti tuakuapata ale ovikoti via litepa, ka tu pangi onepa kovituwa vina via kunamela kelongiso liokuti, vana va fa handi va lete kuenda va pondola oku tu linga cimue cĩvi. (Ukundi 9:5, 6, 10) Mua kongela oku linga ovipito vioku sambiliya vana va fa, oku eca ovilumba kokuavo, oku sapela lavo kuenda oku pinga ekuatiso kokuavo. Etu ka tu lingi ovina via tukuiwa ndeti momo, tu pokola konumbi Yembimbiliya yokuti: “Tundi pokati kavo, . . . kuenda liwekipo oku lamba kocina ca vĩha.”—2 Va Korindo 6:17.
Vana va fa va kuete elavoko. Embimbiliya li longisa okuti, ku ka kala epinduko kuenda lomue vali o ka fa. (Ovilinga 24:15; Esituluilo 21:4) Ndeci elavoko liepinduko lia Kuatisa Akristão vo kosimbu, olio li pondolavo oku tu kuatisa oku yuvula oku sumua calua, oku linga ovihilahila ka vi sanjuisa Suku.—1 Va Tesalonike 4:13.
Embimbiliya li tu vetiya oku lekisa esuluviko. (Olosapo 11:2) Etu ka tu simi okuti olonambi epuluvi limue lioku lekisa okuti, omunu o kuete olombongo vialua. (1 Yoano 2:16) Etu ka tu lingi olonambi locimãho coku komõhisa omanu. Ka tu landi ovikalavekua via tĩla calua ale oku wala uwalo wa kemãla calua oco tu komõhise omanu veya ponambi.
Etu ka tu kisika omunu laumue oku tava konjila ndomo olonambi vietu vi lingiwa. Tu kuãi onumbi Yembimbiliya yokuti: “Suku o ka sombisa omunu lomunu pokati ketu ndeci ci likuata lovilinga vietu.” (Va Roma 14:12) Pole, nda ku molẽha epuluvi liaco, tu lombolola ovina tua siata oku lilongisa “loku omboka kuenda lesumbilo liocili.”—1 Petulu 3:15.
Olonambi Violombangi Via Yehova Via Siata Oku Lingiwa Ndati?
Ocitumãlo: Epata olio li nõla apa pa lingiwila onambi. Citava okuti yi lingiwila Vonjango Yusoma, vonjo yimue yoku lingila olonambi, vonjo yavo muẽle, kocitumãlo coku timihĩla ovivimbi ale kovilangu.
Ndomo ci lingiwa: Oco epata kuenda akamba va lembelekiwe, ku lingiwa ohundo yimue yi lombolola eci Embimbiliya li popia catiamẽla kolofa kuenda kelavoko liepinduko. (Yoano 11:25; Va Roma 5:12; 2 Petulu 3:13) Vohundo yaco, citava okuti ku lomboluiwa ovituwa vimue viwa viomunu wa fa, loku lekisa eci tu lilongisila kekolelo liaye.—2 Samuele 1:17-27.
Ku imbiwa ocisungo cimue ca kunamela Vembimbiliya. (Va Kolosai 3:16) Kesulilo liaco, ku lingiwa ohutililo yimue yoku lembeleka omanu.—Va Filipoi 4:6, 7.
Olombongo: Etu ka tu pingi olombongo poku linga upange wetavo muna mua kongela olonambi. Ka tu pingivo olombongo kolohongele vietu.—Mateo 10:8.
Omanu va enda konambi: Omanu vana okuti Halombangiko Via Yehova, va pondolavo oku enda kohondo yonambi yi lingiwila Vonjango Yusoma. Ndeci ci pita kolohongele vietu vikuavo, omanu vosi citava oku enda kohundo yonambi.
Anga hẽ Olombangi Via Yehova citava okuti vi enda kolonambi vi lingiwa latavo akuavo?
Ombangi Lombangi ya Yehova oyo yi nõla eci yi linga, okuti ci likuata leci a lilongisa Vembimbiliya. (1 Timoteo 1:19) Pole, etu ka tu pangi onepa kocipito lacimue ci lipatãla lolonumbi Viembimbiliya.—2 Va Korindo 6:14-17.