Elilongiso Vepata Li Kuete Esilivilo Koku Popeliwa!
SOKOLOLA ndomo “ovita vieteke linene lia Suku Tõlo” vika kala! (Esit. 16:14) Uprofeto Mika vupopi umue wocindekaise wa soneha hati: “Olomunda vi yenguluka . . . , vi pita vakungu ndesela konele yondalu, pamue ndovava a pesekela keñueñue.” (Mika 1:4) Nye cika pita lomanu vana ka va fendela Yehova? Ondaka ya Suku yi popia hati: “Keteke liaco ava [vaka] ipaiwa la Yehova [vaka] kala tunde kesulilo liokilu lieve, toke kesulilo likuavo liokilu lieve.”—Yer. 25:33.
Omo lielungulo liaco, asongui vepata oku kongelamo vana va kasi oku tekula omãla likaliavo, va sukila oku kũlĩhĩsa catiamẽla komãla vavo okuti, akulu, kuenda oku lipula ndoco: ‘Anga hẽ, omãla vange vaka puluka kuyaki wo Harmagedo?’ Embimbiliya li lekisa okuti, vaka puluka lika nda eci otembo yaco yi pitila va pamisa ukamba wavo la Yehova.—Mat. 24:21.
Esilivilo Lioku Sokiya Otembo Yelilongiso Vepata
Ove unjali, o sukila oku kũlĩhĩsa nda o kasi oku likolisilako oku ‘longisa omãla loku va pindisa lovilongua via Yehova.’ (Va Efe. 6:4) Oku lilongisa Embimbiliya lomãla vove, ci kuete esilivilo liavelapo. Tu yongola okuti, omãla vetu va kuama ongangu Yakristão voko Filipoi vana Paulu a pandiya omo liombili yavo yoku pokola ku Yehova. Eye wa soneha hati: “A vakuacisola cange, ndeci . . . wa pokowaili, okuti eci nda kaile lene hacoko lika, haico cilo, ndaño si kasi lene, kolisiko oku linga eci ci koka epopelo liene. Kolisiko muele laco lusumba loku luluma.”—Va Fil. 2:12.
Anga hẽ, omãla vove va siata oku pokola kolonumbi via Yehova ndaño va kasi likaliavo? Va siata oku ci lekisa ndati eci va kasi kosikola? O pondola oku va kuatisa ndati oku kolela kovihandeleko via Yehova oco va songuiwe lavio nda va kasi likaliavo?
Elilongiso vepata li kuete esilivilo momo li pamisa ekolelo liomãla konepa eyi. Omo liaco, tu konomuisi atosi atatu aku kuatisa oku songola ciwa elilongiso vepata.
Amamako Lelilongiso
Embimbiliya li lekisa okuti, omãla va Suku ovangelo va siata oku liongoluila kokuaye votembo ya sokiyiwa. (Yovi 1:6) Kuama ongangu yaco lomãla vove. Sokiya eteke lelivala lioku linga Elilongiso Vepata koñolosi, kuenda tẽlisa eliangiliyo liaco. Sokiyavo eteke likuavo okuti, nda kua moleha etateko limue, u linga elilongiso keteke liaco.
Kuka ecelele okuti, elilongiso liaco li lingiwa lika olonjanja vimue. Ivaluka okuti, omãla vove ovo olondonge viove via velapo o longisa Embimbiliya. Satana o yongola oku va kuata lonjanjo yaye. (1 Pet. 5:8) Nda kua lingile Elilongiso Vepata koñolosi omo lioku tala o Televisãu ale ovopange akuavo ka a kuete esilivilo, Satana oka yula.—Va Efe. 5:15, 16; 6:12; Va Fil. 1:10.
Kongelamo Ovipama vi Kuatisa Oku Liyaka Lovitangi Vieteke Leteke
Velilongiso Liepata, yuvula oku lombolola ovolandu amue ka a kuete esilivilo. Pole, likolisilako oku lombolola ovipama vi kuatisa oku liyaka lovitangi vieteke leteke. Ci lingiwa ndati? Olonjanja vimue, o sukila oku nõla ovipama vi lombolola ovitangi omãla vove va pondola oku liyaka lavio kovaso yoloneke. Kongelamo ovipama violonumbi viupange woku kunda. Omãla va siata oku sanjukila oku linga ovina va sole. Oku linga ovindekaise vimue viupange woku kunda loku sokolola ndomo tu pondola oku eca etambululo komanu, ci va kuatisa oku kuata utõi eci va kuama olonepa via litepa viupange woku kunda Usoma.—2 Tim. 2:15.
O pondolavo oku nõla ovipama vimue vi kuatisa omãla oku liyaka lovitangi vi tunda kakamba vavo vo kosikola. Velilongiso liepata citava okuti, o kuama ulandu u sangiwa velivulu, Os Jovens Perguntam—Respostas Práticas, Volume 2 kocipama 15. Kemẽla 132 kuenda 133 ku sangiwa osapi ya linga hati, “Plano Para Enfrentar a Pressão de Colegas.” Kamẽla aco, kuli olonumbi viwa vi kuatisa omãla vove oku eca etambululo lia sunguluka. Kombuelo yemẽla 133, ku vetiya amalẽhe hati: “Treine suas respostas com seus pais ou com um amigo maduro.” Olonjanja vimue, lingi ovindekaise viatiamẽla kolonumbi viaco Velilongiso Liepata.
Elilongiso vepata, lieca epuluvi kolonjali lioku lombolola esilivilo lioku kuata ovimãho viespiritu. Catiamẽla konepa eyi, elivulu Os Jovens Perguntam Volume 2, lieca olonumbi viwa kocipama 38, losapi hati: “O Que Fazer da Minha Vida?” Poku lombolola ocipama caco, kuatisa omãla vove oku kũlĩha okuti, oku tiamisila utima koku vumba Yehova oyo onjila ya velapo komuenyo. Vetiya omãla vove oku kuata onjongole yoku kala akundi votembo yosi, oku talavaya ko Betele, oku Pindisiwa Kosikola Yolondingupange, ale oku kuata ovimãho vikuavo viupange wotembo yosi.
Elungulo: Olonjali vimue via siata oku vetiya omãla vavo oco va linge lika ovina va sole, kuenje ka va pandiya ovina viwa va kasi oku linga. Ca sunguluka oku vetiya omãla oku kuata ovimãho vioku talavaya ko Betele, kuenda kupange wumisionaliu. Pole, kuka va sumuise loku va kisika oku kuata lika ovimãho o yongola. (Va Kol. 3:21) Ivaluka okuti, omõla o sukila oku sola Yehova lutima waye wosi, omo liaco, yuvula oku u kisika oku ci linga. (Mat. 22:37) Pandiya omãla omo liovina viwa va siata oku linga, kuenda kuka tiamisile utima kovina ka va kasi oku linga. Va vetiya oku kapako ovina viosi Yehova a siata oku linga. Noke ecelela okuti, va sanjukila ocisola ca Yehova.
Linga Elilongiso Liepata Lesanju
Onepa yatatu, yi tu vetiya oku lekisa esanju Velilongiso Liepata. O ci linga ndati? Olonjanja vimue citava okuti, u yevelela olokasete viondalama, ale u tala olovideo vimue via sandekiwa Lolombangi Via Yehova, kuenda oku sapela catiamẽla kovolandu aco. Citava okuti, eca ovinimbu Viembimbiliya komunu lomunu vepata, noke u vi tangela kumosi velilongiso.
Vutala Wondavululi kuenda vo Despertai!, mu sangiwa ovipama vialua tu pondola oku kuama velilongiso liepata. O pondola oku kuama ocipama losapi hati, “Qual É a Sua Resposta?” ci sangiwa vo Despertai! kemẽla 31. Vutala Wondavululi tua siata oku eca komanu, mu sangiwavo ovipama vimue losapi hati, “Kamalẽhe Vetu” okuti, vi tu kuatisa kelilongiso liepata. Mu sangiwavo ocipama cikuavo ca loña kamalẽhe losapi hati, “Longisa Omãla Vove.”
Ovipama losapi hati, “Os Jovens Pergun-tam” vi sangiwa vo Despertai! kuenda velivulu Os Jovens Perguntam, Volume 2, vi kuatisa olonjali vi kuete omãla okuti, amalẽhe. Poku lilongisa elivulu liaco, kũlĩhĩsavo okakasia ka sangiwa kesulilo liocipama locipama ka kuete osapi ya linga hati, “Como Responderia?” Vokakasia kaco, mu sangiwa apulilo oku pitulula. Pole, citava okuti, apulilo aco a konomuisiwa vokuenda kuelilongiso liepata.
Velilongiso liepata, kuka linge apulilo alua komãla. Kuka va kisike oku tanga lolukandi atosi va soneha kemẽla losapi hati, “Minhas Anotações,” ale ana a soneha ponele yemẽla yelivulu. Velivulu liaco kemẽla 3 losapi hati, “Uma Nota Para os Pais,” ku popia hati: “Oco u vetiye omãla vene oku soneha ciwa ovisimĩlo viavo, eceleli okuti, va lianja. Noke vokuenda kuotembo ka vaka kuata ohele yoku vangula lene catiamẽla kovina va soneha.”
Nda wamamiko lelilongiso liene vepata, oku kongelamo ovipama vi kuatisa oku liyaka lovitangi vieteke leteke, kuenda oku linga elilongiso liaco lesanju, Yehova oka sumũlũisa alikolisilo ene. Nda wa ci lingi, u pamisa epata liene konepa yespiritu.
[Olondaka vielitalatu kemẽla 31]
Sokiya Ovipama vi Vetiya Epata
Manji umue ukãi o tukuiwa hati, J. M. kofeka yo Estados Unidos, wa popia hati: “Ame lulume wange poku lilongisa lomõla wetu ufeko, tua siata oku pongiya ovipama tuka lilongisa kohongele, kuenje, noke tu u vetiya oco a lombolole loku teta onimbu ovina tua lilongisa. Olonjanja vimue, tu linga ovindekaise viovolandu Embimbiliya, ale vievi viatiamẽla kupange woku kunda. Tu linga elilongiso li likuata lanyamo omõla wetu, lina liu sanjuisa, halio li vetiya utima waye.”
Manji umue kofeka yo Japãu o tukuiwa hati, Y. T. wa popia hati: “Poku kuatisa omõla ukuenje wondonge yange oku kũlĩha ndomo oviña Viembimbiliya via kala kosimbu, tu linga o kopia yelivulu lia Isaya loku upamo atendelo osi ovipama viaco, kuenda atendelo ovinimbu. Noke tu tokeka olopapelo viaco okuti, vi kala ndemẽla limosi. Omõlaco o seteka eci Yesu a linga vosunangonga ko Nasara. Ulandu u sangiwa kelivulu lia Luka 4:16-21, u lekisa okuti Yesu “wa tuvula elivulu [lia Isaya] kuenje wa tanga” ocinimbu a kala oku sandiliya. (Isa. 61:1, 2) Pole, eci omõlaco a seteka oku ci linga, wa limbuka okuti, ka ca lelukile oku sanga elivulu lia Isaya kocipama 61. Momo ociña caco ka ci kuete etendelo liovipama lovinimbu. Eci a ivaluka uloño wa Yesu woku talavaya ciwa loviña viaco, wa komõha loku popia hati: ‘Yesu wa kuatele uloño walua!’”
[Elitalatu kemẽla 30]
Oku linga ovindekaise ci kuatisa omãla oku pandikisa kovitangi vi tunda kakamba
[Elitalatu kemẽla 31]
Likolisilako oku lekisa esanju poku linga Elilongiso Vepata koñolosi